Joo̱b 9
9
Xi ma joó ndi̱yà nga tsíchji̱a̱ Joo̱b
1Nga tsintꞌié kuí nii̱ Joo̱b, bi̱ katsó:
2¡Jè be nda nda an nga bo̱a̱ kjiꞌi kui eén!
Kó ti̱ jè be an nga ngindyi̱ko̱n Néná
jmíjín xi kixi̱ kꞌo̱xié yojoo̱,
3ti̱nde mejénjínna nga kui kuichjiátijo̱ an,
ngatꞌa̱ nde ka̱májínna nga ku̱i̱chji̱a̱ꞌa ngo ni,
kjo̱a̱a̱ ngo mi̱ ni xi maa̱ kui.
4Achichí tsie kjo̱a̱kjíntakón ko̱jo ngaꞌniú xí tjiín,
ꞌyá xí ka̱maa̱ nga ku̱i̱ꞌítikjájo̱ Néná,
sꞌe̱ skoyaá nga kui xi sa̱ꞌín.
5Kjiꞌanga tsꞌénxchán Néná,
bosíkjo ngi̱ndie nínga síndo na̱xi̱i̱,
kó nde ngojín xi be kui nii̱,
6ti̱ bo̱a̱ ti̱ tsꞌén bosíkjo ngi̱ndie nínga tikón tꞌanangii̱,
kó tsꞌénkjátsié má ngi̱ndie nínga tikónsón tꞌanangii̱.
7Botixómaá tsꞌueé, kó tsꞌueé ngiti̱ fotjojín,
ti̱ bo̱a̱ ti̱ tsꞌén, kuí boá xi tsꞌenkꞌó ndiꞌií ńñoo nga.
8Kuí boá xi yejéntie soboá nkꞌajmii̱,
kó ki̱a̱ fotsoꞌbásón nga̱soón ngaꞌniuú ndáchíkoón.
9Néná boá xi katsꞌénda ngayeje ńñoo,
kó xki̱ ngo tjín índo:
kui xi ꞌmí Osa̱ xi je ngasee̱,
ko̱jo kro xi chji̱a̱ni xtji̱e̱e̱n na̱ngi,
ko̱jo Orioo̱n,
ko̱jo nga yito xi ndí ndí ínchjiín tindso̱ ꞌmií.
10Achichí yiꞌi ko̱jo ꞌniú fíndikónná ni xi tsꞌénda Néná,
nga ngaskande jmíjín xi ka̱makjiín,
ti̱nde jmíjín xi ka̱maxki̱i̱.
11Tsi kꞌi̱e̱ kjo̱a̱ꞌatꞌana Néná,
nde ka̱májínra̱ skuie an,
tsi sa̱ꞌínkjinna yojoo̱,
nde skuiejínra̱ an.
12Tsi tjín ni xi mejeén skjíbé kuí,
ꞌyá xí ka̱maa̱ ku̱i̱ꞌíchjaá,
ꞌyá xí ka̱maa̱ bo̱a̱ ka̱tso̱o̱ nga skjíbéjín.
13Kjiꞌanga tsꞌénxchán Néná, ngiti̱ fíjínni nga̱xto̱n,
kó ngindyi̱ko̱n kui, ngaskande xota̱ xi nkꞌakoo̱n, ni̱ma̱kjo̱a̱ ꞌbíndo.#9:13 Ni̱ma̱kjo̱a̱ ꞌbíndoKꞌi̱e̱e̱ chji̱a̱ kjo̱a̱a̱ ngo cho̱ chꞌokjiꞌi xi ꞌmí Raa̱b, kó kuí xò bo̱a̱ ngo cho̱ xi xota̱ xi xchaá ngasꞌe̱ katsó nga kuí xò xí akó ngaꞌniuú kondraa̱ Néná. Cf. Xsl 87:4; Joo 26:12; Isa 51:9.
14Kó akja̱ꞌmíra̱ an ka̱ma kuichjiáꞌa an,
nde ngo én sa̱kójínna ni xi xiáa̱n kondra̱ tsi̱ꞌe̱.
15Ndatsi xota̱ xi kixi̱ an, nde ka̱májín kuichjiáꞌa an,
ta̱sá ta̱ ꞌniú tsí kuíꞌáa̱ nga ngatamani̱ma̱a̱ an.
16Tsi kui kuichjiáa̱, kó tsi sa̱ꞌínsénna,
nde sꞌi̱jinjínna nga kui ku̱i̱ntꞌièna.
17¡Ngora̱ tjo̱ꞌniú sa̱ꞌínkjién nga sa̱ꞌínxi̱na,
kó nde jmí kjo̱a̱jínraa̱ nga ꞌniú ngase sa̱ꞌínꞌoón nínga onna!
18¡Ku̱i̱ꞌíkitsiemárana kjo̱a̱xtinda,
kó nde tsja̱ndièjínra̱ nga skjiendá an!
19Tsi stsitsíjee̱n ꞌyání xi tjín ngasee̱ ngaꞌniú,
¡Néná boá xi tjín ngasee̱ ngaꞌniú!
Kó tsi kjo̱a̱a̱ kjo̱a̱kixi̱i̱,
kótsꞌèn si̱ꞌaa̱n kjo̱a̱ꞌniú Néná, tsi̱ꞌe̱ nga kjo̱chó kui ngi̱ndiee̱.
20¡Ndatsi jmí tsi ni xi ndajín je katsꞌen an,
ndso̱ꞌba án boá xi botíjéna,
kó tsi kixi̱ án tsi xián án, kuí nii̱ xi ko̱kó nga tjínna jé!
21Jmí jéjínna, ta̱nga jmí ndasénjín kui nii̱,
ngatꞌa̱ jè ngiti̱ tjójínna yojona.
22Ta̱ ingo tsí ni xi chaja ngasena xi xián án:
nga Néná ta̱ ngo ndséje̱n tsꞌenkjié
tsi xota̱ xi nda, ko̱jo tsi xota̱ xi ndajín.
23Tsi ngo chiꞌin xi ta̱niján má tsꞌenkꞌién xota̱ xi jmí jéjiín,
Néná mojnókie kjo̱a̱ni̱ma̱ xi foaꞌatio.
24Tsi ngo xota̱ xi ꞌniú ndajín kjíbé kjo̱a̱ꞌniú ngo xoꞌba,
Néná boá xi bójñoó ndyi̱ko̱n xota̱ xi botíjeé.
Kó tsi Nénájín xi bo̱a̱ tsꞌeén, ja̱ ꞌyání tsobo̱a̱.
25Achichí tsá kjifí ni̱xtjinna,
xikó maá ngo nda̱ xi tsá monga.
Ni̱xtjinna achichí tsá kjifoaꞌa
kó nde kamábejín an ni xi ndaa̱.
26Ni̱xtjinna jaꞌa xikó maá tjotso je xi tsá ꞌbímaá,
xikó maá ngo ja̱ xi tsá tsoboá cho̱ xi kjinie.
27Tsi an bi̱ xián án:
sa̱ꞌinchíyá an ngayeje kjo̱a̱ni̱ma̱na,
kó ta̱sá kosikjo an kje̱n án nga kojnò an,
28ta̱nga achichí tsakjon an kjo̱a̱a̱ kui kjo̱a̱ni̱ma̱ xi ta̱nisién tsiee̱,
ngatꞌa̱ jè be cha̱n cha̱n an nga ji xi bo̱a̱ se ji nga tjínna jé.
29Kó tsi tjínrií jé tsí ka̱tso̱na Néná,
mítsjà nga ta̱kjo̱a̱ndaní nga sa̱ꞌin ngaꞌniú ngase an.
30Ndatsi ndo̱jò konijón an
ndsa̱ án ko̱jo ngayeje yojona,
31Néná to̱kó ki̱a̱ kꞌo̱jmina ki̱a̱ ti̱xa̱ nínga bichijmi xtjieé,
¡kó ngaskande ńjñona xikoó tsi tsꞌe̱ ka̱maa̱ an!
32Ngatꞌa̱ Néná jmí tsi xota̱ nga̱sondie xikoó án,
tsi̱ꞌe̱ nga an kuichjiáꞌa an,
ko̱jo nga nijan kongínjne̱ ngindyi̱ko̱n xota̱ xi tsꞌendájin kjo̱a̱a̱.
33Ti̱nde jmíjín xota̱ xi botíjé xi chji̱a̱ni kui nga̱sondiee̱,
xi ka̱maa̱ sa̱ꞌíndajin kjo̱a̱xtijne̱.
34Tsi tjín xí ka̱maa̱ kjo̱a̱ꞌáxínna kui ndikoón
kjo̱a̱a̱ kui kjo̱a̱ni̱ma̱ xi tsꞌénfoaꞌajin an nga tsꞌénbotíjéna Néná,
35ka̱mara̱ stsakjonjín an nga kuichjiá an,
ta̱nga nga ja̱koxi̱, tikóndajín an nga bo̱a̱ sa̱ꞌin an.
Currently Selected:
Joo̱b 9: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
