Joo̱b 10
10
1Jè tsꞌajoón ini̱ma̱na nga tikón an kui nga̱sondiee̱,
kuichji̱a̱mára an kjo̱a̱a̱ kjo̱a̱ndasenna,
ko̱jo kjo̱a̱a̱ kui ni xi on tjíjii̱n ini̱ma̱na
2Kuíni nga je bi̱ kixiáa̱n Néná:
Ji Ne, ngata̱ niꞌínjéjínní,
¡kó tꞌíyéní míkjo̱a̱a̱ nga an tibixkénje̱ní!
3A ndakjíꞌí nga tiniꞌínꞌínní,
ko̱jo nga tiniꞌínchꞌí ji ni xi ndse̱ ji katsꞌénda,
ko̱jo nga tsja maa̱ ni xi tsꞌén xota̱ xi ꞌniú ndajiín.
4A bo̱a̱ tsꞌén yé ji nii̱,
xikótsꞌèn yàjne̱ ji̱n xi xota̱ nga̱sondie ji̱n.
5A bo̱a̱ kjiꞌi chiboa nó mindyin ji
xikoó xi mindyionjne̱ ji̱n xi xota̱ nga̱sondie ji̱n.
6Tsi̱ꞌe̱ nga ku̱i̱ndyi̱séyé ji ni xi ndajín xi katsꞌen an,
ko̱jo nga ku̱i̱ndyi̱sé ji mí jé xí katsꞌen an.
7¡Ndatsi jè yé ji nga jmíjéjínna,
kó ti̱ jè be an nga jmíjín
xi ka̱maa̱ kꞌo̱xiéna ngi̱ya ndse̱!
8Ji Ne, ndse̱ boá xi kiniꞌínkjìn jí nga kiniꞌíndení,
kó ngotꞌe̱ ꞌne̱ akasíkje ji ni xi niꞌínkjé, kó mejeén nga si̱ꞌinkjiení.
9Ngatjaꞌátsjiee̱n nga xikó má tsꞌén niꞌánda ngo ti̱jì bo̱a̱ má tsꞌén kiniꞌíndení,
kó ngotꞌe̱ ꞌne̱ ńdie mejeén si̱ꞌin nginí.
10Xikoó tsi kiniꞌínkꞌájìnní xikó tsꞌén niꞌánkꞌájin ntsjeén,
kó kiniꞌíndení xikó tsꞌén manda kjixoo̱.
11Jí boá xi yojo ko̱jo tji̱xin akjaꞌmeni ji yojona,
kó ikꞌíkje ji ńdana, ko̱jo naxána.
12Jí boá xi katseꞌéní kjo̱a̱mindyion, ko̱jo kjo̱a̱ni̱ma̱takón,
¡kó achichí nda kichíi̱n a̱si̱énni̱xtjinna!
13Ngi̱jin ini̱màa̱ boá nga tikónjin kui nii̱,
kó jè be an nga kui nii̱ xi tjíjin takín,
14¡jí boá xi tichindéní tsi̱ꞌe̱ nga xche̱ ji tsi katsꞌenjé án,
ngatꞌa̱ si̱ꞌinjetakínjín ji jéna!
15¡Xi̱xꞌi̱a̱n xò án tsi katsꞌenjé án!
Kó tsi jmíjéjínna, nde májín ko̱n an nga ji skoꞌaa̱.
¡Jè tsꞌajonna nga kixi̱jín ko̱jo nga ndasen tikón an!
16Tsi nkꞌakon ka̱ma an, tichindéní
xikó maá ngo xandi̱je̱ xi tsꞌénkonda ni xi skji̱ni̱e̱,
sꞌe̱ tsí sa̱ꞌintíyá chií an katsaki,
kó tji̱e̱nmá tibokení ngaꞌniúu̱ nga tiniꞌínkjiéní.
17Sakó ngasee̱ ni xi bokó nga an xi konna,
kó ꞌniú ngase tiniꞌínxchínje̱ní,
xikó maá jájún xi xixiójín nga ndyi̱kjánjo̱na.
18Míkjo̱a̱a̱ nga katseꞌéndiè ji nga katsen an.
¡Ta̱sara̱ ndatsi kꞌien an katsaki,
ko̱jo tsi nde ta̱ꞌyajín xi kamábena!
19¡Ndara̱ ngase kamána tsi to̱bo̱a̱a̱ katsenjín an,
tsi ta̱ síkijí ngi̱ya nga̱tsjo̱ó jàn kijí an!
20A chiboajín má ni̱xtjin xi tikón an.
¡Ngo kjo̱a̱nda kuíꞌaá, te̱ꞌéní kjo̱a̱xió!
¡Mejénna nga kꞌuiéchiína kjo̱a̱niꞌándajon.
21Ngindiee̱ nga koaꞌañáa̱ nga kjuín án nínga ngiti̱ kjoéꞌe̱ꞌoyájín an,
ki̱a̱ ngi̱ndie nínga jñoó, ko̱jo nínga tikón kjo̱a̱bo̱yaa̱,
22ki̱a̱ na̱xi̱ńdá nínga ꞌniú jñoó,
nínga ta̱xkiya síndo ngayeje nii̱,
ko̱jo nínga ndiꞌií xikó tsi jñó!
Currently Selected:
Joo̱b 10: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
