Joo̱b 8
8
Ni xi tjón katsó Bilndaa̱nd
1Kósꞌe̱ Bilndaa̱nd, xi chji̱a̱ni nangi Súaa̱j, bi̱ katsoó Joo̱b:
2¡Ngaskande kjiꞌání nga to̱kó bo̱a̱ tsꞌén ko̱ndókjo̱e̱ ji,
achichí ꞌniú ndókjo̱e̱ ji,
xikó maá ngo tjo̱ꞌniú!
3Néná xí tsi̱ꞌe̱ ngayeje ngaꞌniuú,
sa̱ꞌínkꞌájinjiín kjo̱a̱ndaa̱ ko̱jo kjo̱a̱kixi̱i̱.
4Tsi katsꞌénjé ndíi̱ kondraa̱ Néná,
kuí boá xi katsjaá kjo̱a̱botíjé xí tsoboaá kui.
5Ta̱nga tsi nga ta̱jño̱ó ku̱i̱ndyi̱sé ji Néná,
kó tsi ꞌniú ko̱ndókjoée̱ kui xi tsi̱ꞌe̱ ngayeje ngaꞌniuú,
6tsi tsjie ji, ko̱jo tsi kixi̱ ji,
kuí boá xi skoón, kó kuí boá xi tsja̱á
nginií ngayeje ni xi kisꞌiee̱ ngasꞌe̱.
7Kó ndatsi chiboa ma kjo̱a̱cho̱n xi tjón kisꞌiee̱,
nde kjo̱chótji̱ngíjín xikó kjiꞌi ni xi jaskan kꞌuieé.
8Tasíyée̱ xota̱ tji̱e̱ xcháná,
kó xche̱ ji kókjiꞌi ni xi kamábe kui.
9Ngatꞌa̱ xota̱ ngojña̱ ngocha̱ boá ñá, kó jmí ni yajín ñá,
kó ni̱xtjin xi tindyión kuí nga̱sondiee̱ achichí tsá foaꞌa,
bo̱a̱ má maá xikoó tji̱nkꞌi̱e̱én.
10Kui xotaa̱ ku̱i̱chji̱a̱joo ko̱jo ko̱kóyaá,
kó ndeskande ngi̱jin ini̱ma̱a̱ kꞌo̱xiéni én xí ku̱i̱chji̱a̱joo.
11A ka̱maxchá xka̱ papiroo̱ nínga jmí ndásejín.
Kó a ka̱maxchá ndikingándaá nínga jmí ndáfoajín.
12Ta̱nga ndatsi to̱kó sa̱si̱e̱ ngase, kó ndatsi kji̱e̱ bichájín,
tsá ngase xí ta̱bo̱a̱jiín kje̱ꞌe xka̱.
13Ti̱ bo̱a̱ ti̱ maa̱ ngayeje xota̱ xi tsꞌénchíyà Néná,
kó kjo̱a̱chiyaá xota̱ xi ꞌniú ndajiín, fekjo̱a̱.
14Kjo̱a̱ꞌniátakoón achichí inda má,
xikó maá ngo ndo̱bo̱a̱tóstsó,
15kó kui xi ki̱a̱ ko̱óꞌniú kuí ndo̱bo̱a̱tsóstsoó,
kꞌo̱ka, ngatꞌa̱ ngije skjíbé, stindsó.
16Xota̱ xi ꞌniú ndajiín xikónií kui xka̱
xi kjiꞌanga beꞌeé ndoboaá,
fítsié, kó ngayeje ndi̱tsee̱n sꞌikitsieni tjiaa̱,
17kó ngi̱jin ndi̱jo̱o̱ fíjin ja̱ma̱a̱, kó ki̱a̱ sitꞌa ndi̱jo̱o̱,
18ta̱nga tsi tjín xí skji̱níyá,
nde jmíjín xi sku̱i̱e̱ nínga kisꞌińdo.
19¡Bo̱a̱ tsꞌén fe kjo̱a̱tsja xi ꞌbeé nga kisꞌińdo,
kó ngi̱ndiee̱ kje̱ꞌe xka̱ tjo ngijee̱!
20Néná tsꞌenchꞌójín xota̱ xi kixi̱i̱,
ti̱nde bosikójojín xota̱ xi ꞌniú ndajiín.
21Néná boá xi sa̱ꞌín nga ko̱jne̱ nginí ji,
kó xchieꞌeyé má ji nga tsja ka̱maa̱.
22Ta̱nga kondra̱a̱ kjo̱a̱soboá boá xi sa̱ko̱ó,
kó si̱ꞌankjatsón ndiꞌaa̱.
Currently Selected:
Joo̱b 8: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
