Joo̱b 7
7
1Achichí ꞌniú xá xí niꞌán nga tindyión kuí nga̱sondiee̱,
kó ni̱xtjinná xikónií ni̱xtjii̱n ngo nda̱ xi tsꞌénxá ngi̱jin jno̱o̱.
2Bo̱a̱ kón ñá xikoó mosoo̱, nga ndyi̱koyaa̱ nga je sa̱ꞌínkjaꞌyá,
bo̱a̱ kón ñá xikoó moso̱ xi tsꞌénxá ni̱xtjii̱n,
nga je mejeén nga je ka̱machjií.
3Bo̱a̱ tsꞌén nga achichí je kjín sá nga kjo̱a̱ni̱ma̱ tsꞌénfoaꞌatio an,
xikoó ngo moso̱ xi je jenda, xi achichí nda̱ kjimaa̱ nga je ka̱majñoó.
4Kjiꞌanga fojña an, bi̱ xian an:
kjiꞌání nga kjo̱stjíe̱n an,
nde tsájín foaꞌana ni̱xtji̱e̱n,
kó tsꞌénkꞌafóyà kꞌi̱e̱ tsꞌénkꞌafóyà ngaján án nga̱són ṉchanna,
nga boeꞌéńjñájínna, kó tsꞌenkjó án kóchon si̱sién.
5Ngayeje yojona je kjifee̱ chi̱ndo ko̱jo stsié,
¡ngayeje yojona nga tjitjoó ndátjítsi̱é!
6Achichí tsá tsꞌénfí ni̱xtjin nga tikón an,
xikó maá nga foaꞌa ńchjón xí tsꞌénkjién xota̱ xi kjóyà ńjñoo̱.
¡Jè ngiti̱ jmíjín ngasena kjo̱a̱chiyá!
7Ngatjaꞌátsjiee̱n ji Ne,
nga kjo̱a̱mindyionna xikónií tsi ngo ndi̱yà chjondá,
kó nga jè ngiti̱ skuiejín an ngase
mí nii̱ bo̱a̱ ni xi ndaa̱.
8Xota̱ xi ndyi̱bena ngotꞌe̱, ngiti̱ sku̱i̱e̱jínna ngase,
ngatꞌa̱ kjiꞌanga ji xi stsitsíjinní, jè ngiti̱ kotíjña̱jín an.
9Xikó maá ṉdi̱ xi fií kó chajaa̱,
bo̱a̱ má maá xota̱ xi fesoón, ngatꞌa̱ ngiti̱ foaꞌáꞌyájiín,
10ngiti̱ fochójín nginí ndiꞌaa̱,
¡kó xota̱a̱ jè ngiti̱ bejín ngase!
11Kuíni nga an, ka̱májín kokjo an ndso̱ꞌba án,
kó kuíni nga kuichjiá an nga achichí nda̱ kjimana,
ko̱jo achichí xtií ini̱ma̱na.
12Ánjín bo̱a̱ xi cho̱ chꞌokjiꞌii̱ ndáchíkoón,#7:12 Cho̱ chꞌokjiꞌii̱ ndáchíkoón: Kui cho̱ chꞌokjiꞌii̱ kuí boá xi bokó ngayeje ni xi ta̱xkiya síndoo̱ ndeskande koó ngasꞌe̱, ta̱nga Néná xi katsꞌénda ngayeje nii̱ boá xi botixómaá.
tsi̱ꞌe̱ nga an xchindèní.
13Tjín ni̱xtjin nga tsꞌenkjó án, nga ṉchanna boá xi sa̱ꞌíndajonna,
kó nga ńjñaá boá xi sa̱ꞌínkjaꞌajinda kjo̱a̱ni̱ma̱ xi tsꞌénfoaꞌatio an,
14kósꞌe̱ kjiꞌá boá nga mindyiendikíi̱n ńjñána,
kó ngo chi̱ni xi chꞌo tsó boeꞌéní.
15¡Ta̱sá mejeén ini̱ma̱na nga si̱ꞌanxíndona,
ta̱sá ngatꞌien an, ngiti̱ mejénjínna kotíjña̱ an nga̱sondie!
16Jè kamáchꞌona kjo̱a̱mindyioo̱n,
ngatꞌa̱ jmí tsi ngatsjéni̱xtjin nga kotíjña̱ an,
¡te̱ꞌéndièní, ngatꞌa̱ jè ngiti̱ jmí ni chjíjiín kjo̱a̱mindyionna!
17ꞌYá kuií bo̱a̱ xota̱ nga̱sondiee̱, tsi̱ꞌe̱ nga ndikón si̱ꞌinje̱ ji,
ko̱jo nga ki̱a̱ kꞌuijñíjin ji ini̱màa̱.
18Ko̱jo nga ndyiojón ndyiojón tichindé,
ko̱jo nga ta̱jmì chi̱bo̱a̱ní nga tichjatꞌeyékín ji.
19Ngaskande kjiꞌání nga to̱kó an stsitsíjinní,
¡ti̱ntjoénní, ndeta̱ tsi̱ꞌe̱ nga xtjéjen chií án ndáńti̱a̱na!
20Tsi katsꞌenjé án, mí ni xi ndajín xi ka̱ma sa̱ꞌinjoo̱ ji.
Ngiti̱ tsitsijinjíi̱n xota̱ nga̱sondiee̱,
Míkjo̱a̱a̱ nga ta̱ngongá an tiniꞌínje̱ní,
ngaskande nga xikoó tsi ngo chꞌià é kjimaa̱ an.
21Ánní nga niꞌínjetakínjínní,
sꞌe̱ niꞌínchíyé ji ni xi ndajín xi katsꞌen an.
Ngatꞌa̱ jè ńdie ka̱má ngiñá an,
kó tsi ndyiojón ku̱i̱ndyi̱séní,
jè ngiti̱ jmíjín an, jè aya an.
Currently Selected:
Joo̱b 7: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
