Joo̱b 6
6
Ni xi tjón katsó Joo̱b
1Kósꞌe̱ Joo̱b, tsꞌén tsíchji̱a̱ kjo̱a̱a̱ ni xi katsó Elifaa̱:
2¡Achichí mejénna nga kjo̱a̱ndasenna ko̱jo kjo̱a̱ni̱ma̱na,
ka̱ma nijan xꞌi̱chi̱bo̱a̱joni ngajoó ngo nisochi̱bo̱a̱!
3¡Achichí má kui nii̱, nga ngaskande érá ngase ka̱ma,
ta̱bo̱a̱jiín tsomií ndáchíkoón!
Kuíni nga ta̱xkiya tsíchji̱a̱ an.
4Ngatꞌa̱ kui Néná xí tsi̱ꞌe̱ ngayeje ngaꞌniuú katsꞌénꞌónna nga yeꞌéna yáyojoó,
kó jè tsijen kjimaa̱ a̱si̱énni̱xtjinna nga tsꞌénmongajin ndikimaya xi tjiín kui yáyojoó,
kó ni xi mindyiandíkónná xí tsi̱ꞌe̱ Néná, je síndonda tsi̱ꞌe̱ nga an skjánjo̱na.
5A skja̱ndáyà ngo bórró xí tjín ngi̱jin kꞌijñaá ki̱a̱ tꞌa ndi̱xcho̱ xi skji̱ni̱e̱.
A skja̱ndáyà ngo cho̱yojo xi̱ꞌin ki̱a̱ tꞌa ndi̱xcho̱ xi skji̱ni̱e̱.
6A ka̱ma xi̱ni̱e̱ ni xtón xí jmí na̱xa̱jiín.
A nda chinie tiboaa̱ chjo̱o.
7Ja̱ kui ni xi nde kamámejénjiín ini̱ma̱na nga katsꞌenjo̱ an ngasꞌe̱,
kuí boá xi kjima nichinie xi tsꞌéntsꞌe̱na ngotꞌe̱ ꞌne̱.
8¡Achichí mejénna nga Néná tsja̱ana ni xi tsꞌénmíꞌáa̱ katsaki,
achichí mejénna nga sa̱ꞌínkjatjosón ni xi ꞌniú mejénna.
9¡Nga Néná ka̱mamejeén nga sa̱ꞌínkjítiena,
ko̱jo nga tsja ngatiꞌéna tsi̱ꞌe̱ nga sa̱ꞌínkjiénakjo̱a̱!
10Kuí boá kui nii̱ xi sa̱ꞌíndajonna,
kó ndatsi xcha̱jàjín xi so xi ndakjanna, ta̱nga skjínkꞌatsja má an,
ngatꞌa̱ tsꞌénꞌbiꞌmájín an eén kui Néná xí tsjiee̱.
11Mí ngaꞌniú xí tjín ngasena tsi̱ꞌe̱ nga skoya ngase an.
Míkjo̱a̱a̱ nga to̱kó kꞌuiérá ngasena kjo̱a̱chiyákjo̱a̱.
12A bo̱a̱ tsꞌén ꞌniú tajá án xikoó ndi̱jo̱o̱.
Axa̱ ki̱cha̱ bronse̱ kjijon yojona.
13Ngotꞌe̱ ꞌne̱, nde ngiti̱ májín ti̱ aa̱n bosiko̱jo an yojona,
je tsangaboaꞌá xi ka̱maa̱ ko̱síko̱jona katsaki.
14Tsi ngo nda̱ xi nda yaꞌáná xi kjo̱a̱ni̱ma̱ tsꞌénfoaꞌatio, niꞌándajónrií,
ndatsi je íjñámasien nga bendikón Xí tsi̱ꞌe̱ ngayeje ngaꞌniuú.
15Ntsꞌié án jè tsꞌenṉcha̱jona, xikoó ngo ndáfoa xi ꞌniú tsꞌénmonga,
xikó maá ngaꞌniuú ndáfoaa̱ xo̱ngàndántꞌié kui xi ta̱ ngotjón foaꞌá tsí,
16kui xi ndie ma ta̱ngatꞌanii̱ kui nchꞌàn xí nijan kjimańdá kuí ndáfoaa̱,
17ta̱nga nga ni̱xtjii̱n cho̱ndoboaá,
ꞌbíndo kixí, kó ngiti̱ mongajín ndáfoaa̱.#6:17 Kui ngi̱ndie jàn achichí má xo̱ngàndántꞌié xi ta̱ kjiꞌa tsí nga ma cho̱nchꞌàn nga ꞌbeé ndáfoa.
18ꞌBijñámasien ndi̱yà nínga ndyi̱fí,
kó inda inda ma chiboa, kósꞌe̱ chaja.
19Xota̱ kjín xi ꞌbítso̱ma xi chji̱a̱ni na̱xi̱ńdáꞌniú Temaa̱n mongase ndáfoa,
kó xota̱ xi fíboá xi chji̱a̱ni nangi Sabaa̱,#6:19 Na̱xi̱ńdáꞌniú Temaa̱ Ko̱jo Sabaa̱ Ki̱a̱ jatjoni kjín xtín xota̱ xi botiñá ni sije̱n xi achichí kamámejeén xota̱ xi chji̱a̱ni kje̱ꞌe na̱xi̱ńdá. Cf. Isa 60.6. koyaa̱ nga sa̱ko̱ó.
20Ta̱nga kjo̱a̱soboá boá xi sakoó kjo̱a̱a̱ kui ni xi kamáꞌniátakón,
ngatꞌa̱ nga jachó ki̱a̱a̱, ta̱ bi̱ ta̱ kamaá nga jmí ni kasakojiín.
21Bo̱a̱ kónjnú jún ngotꞌe̱ ꞌne̱, nde jmí ni chjíjiín jún,
ngatꞌa̱ kjiꞌanga kamáyàjnú ngo kjo̱a̱ni̱ma̱ xi ꞌniú, achichí kandakonnijnú.
22A bi̱ kixianjnúꞌun: Ngo ni te̱ꞌéjnúꞌun.
Axa̱: A kjo̱a̱nda tsa̱ꞌa̱n boá kꞌuíchjíngíjnú ngo ni.
23Axa̱: Ti̱ꞌandéjnúꞌun ngi̱ya tsja kondra̱a̱.
Axa̱: Ti̱ꞌandéjnúꞌun kjo̱a̱a̱ xota̱ xi ta̱nisién ꞌniú ndajiín.
24Tꞌíyájnúꞌun, kó kokjo an ndso̱ꞌba án,
takoyàjnúꞌun ñání nínga ndajín katsꞌen an.
25Achichí ngaꞌniú xí tjiín én xí kixi̱i̱.
Ta̱nga jún nde jmí kjo̱a̱jínjnú nga ndyi̱fongitaꞌinjnúꞌun ngo jé.
26Kjo̱a̱a̱ én boá nga an ndyi̱ndokjo̱a̱taꞌínjnúꞌun,
ngatꞌa̱ ta̱ tjo̱ tsí bo̱a̱ ni xi chji̱a̱ ngo nda̱ achichí nda̱ kjimana.
27Jún ngaskande ka̱majnú ko̱ti̱ñájnú ngo xota̱ xi xꞌi̱a̱n,
ko̱jo tsi ko̱ti̱ñájnú ngo amingo̱.
28Ngotꞌe̱ ꞌne̱, tsitsíjenjnúu̱ ndyikón án,
kó tꞌíyájnúꞌun tsi tsꞌénꞌbindisojo̱ tíkje̱njnúꞌun.
29¡Ndibá nginíjnú, ꞌniú míꞌájnúꞌun!
¡Ngatꞌié ni xi kjo̱a̱kixi̱i̱!
¡Ndibá nginíjnú, jo̱o̱n! Ngatꞌa̱ kixi̱ tikón an.
30A jmíjínrií kjo̱a̱kixi̱ ni xi tsꞌénchji̱a̱ an,
kó ndso̱ꞌba án a bejín ni xi ꞌniú ndajiín.
Currently Selected:
Joo̱b 6: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
