Joo̱b 5
5
1¡Ngotꞌe̱ ꞌne̱, cheꞌeyé ji Joo̱b!
A tjín xí sa̱ꞌínseén tsobo̱a̱.
ꞌYá ndítsjie xi ko̱ndókjo̱e̱je ji.#5:1 Ni xi tjítsó kꞌi̱e̱e̱ nga chjiéngá ngo ndítsjie ku̱i̱ntꞌie̱é Joo̱b tsi̱ꞌe̱ nga kui xi kꞌo̱xiéꞌá ngindyi̱ko̱n Néná. Cf. 16.19-21; 33.23-24.
2Kjénní nga kjo̱a̱tamaá boá xi tsꞌenkꞌién xota̱ xi kitikjo̱a̱a̱,
kó xota̱ xi chi̱nii̱, kjo̱a̱ꞌontakoón boá xi tsꞌenkꞌién kuí.
3Jè kamábe an nga tjín xota̱ xi kitikjo̱a̱ xi achichí tjoninkꞌaa̱ yojoo̱,
ta̱nga ti̱kuii chi̱bo̱a̱ bo̱a̱ kixian an nga ndajín ka̱maa̱ ndiꞌaa̱.
4Jé síndomasien ndií,
kó ki̱a̱ nga̱ntjo̱a̱a̱ na̱xi̱ńdáꞌniuú nínga mandajin kjo̱a̱a̱, nde ngojín xi kꞌo̱xiéꞌá.
5Ni xi kamáxchaá kuí, xota̱ xi bojoó kjinie,
kó ki̱a̱ foaꞌájin nga ꞌboxiéjinni ngi̱jin ndaꞌyaá,
kó xota̱ xi mañaa̱ sa̱ꞌínkjié kjo̱a̱cho̱o̱n.
6Ngatꞌa̱ kjo̱a̱ni̱ma̱a̱, jmí tsi ngi̱jin chojoo̱ fotjoni,
ti̱nde ni xi ndajiín, jmí tsi ngi̱jin tꞌanangii̱ fotjoni,
7ta̱sá xota̱ nga̱sondiee̱ boá xi tsen tsi̱ꞌe̱ nga kjo̱a̱ni̱ma̱ kjo̱a̱ꞌajin,
xikó maá nga ndiꞌií boá xi konnii̱ nga kjínkꞌá xꞌueé.
8Tsi an xi bo̱a̱ kjimana xikó kjimaa̱ ji,
Nénárá xi kongase an, kó Néná boá xi xiyàa̱ ni xi kjimana,
9ngatꞌa̱ kuí boá xi tsꞌén, kjín kjo̱a̱ndikón ko̱jo ni xi fíndikónná,
kó nde jmíjín xi ka̱maxki̱i̱ kui nii̱.
10Néná boá xi tsꞌénkáꞌá stsé nga̱són tꞌanangii̱,
kó kuí boá xi bosíndaá kꞌijñaá,
11Néná boá xi kjininkꞌa xota̱ xi ni̱ma̱kjo̱a̱ síndoo̱,
kó ngo ngi̱ndie xi nda tsꞌénkꞌíndo xota̱ xi síndo ndasee̱n,
12Néná boá xi ꞌbíchjaá ni xi ꞌbínda xota̱ xi mañaa̱,
tsi̱ꞌe̱ nga kjo̱tjosónjín ni xi mejeén sa̱ꞌín,
13kó kuí boá xi tsꞌénkjién kjo̱a̱mañaa̱ xota̱ xi kjínkoón, tsi̱ꞌe̱ nga ti̱kuii ku̱i̱xo̱jin,
kó tsꞌenkjié ni xi ndajín xi ꞌbínda xota̱ xi ꞌniú ndajiín.
14Néná boá xi tsꞌén nga kjiꞌanga ni̱xtjii̱n, stingí xikoó tsi jñó nínga tjimá,
kó nga ma ndisꞌueé ꞌbímá xikoó tsi nga jñó nínga tjimá.
15Bo̱a̱ tsꞌén ꞌboxiéꞌá xota̱ ni̱ma̱a̱, kjo̱a̱a̱ na̱je̱n yojó xi tjiín xota̱ xi mañaa̱,
ko̱jo ki̱a̱ ngi̱ya tsja xota̱ xi ndajiín,
16kó bo̱a̱ tsꞌén nga tsjaá kjo̱a̱chiyá xota̱ xi ni̱ma̱a̱,
ta̱nga xota̱ xi ꞌniú ndajiín bókjo tsꞌoa.
17Achichíra̱ tsjaa̱ xota̱ xi Néná sa̱ꞌínchji̱ni̱e̱,
kuíni nga, ngata̱ niꞌínchꞌíjín ji kjo̱a̱niꞌánchji̱ni̱e̱e̱ kui Néná xí tsi̱ꞌe̱ ngayeje ngaꞌniuú,
18ngatꞌa̱ Néná boá xi tsꞌénꞌónná, kó ti̱ kuí boá xi ꞌbíxtié nínga onná,
tsꞌénꞌónná, ta̱nga tsja boá xi tsꞌendáyàná.
19Jun kjo̱a̱ni̱ma̱ kꞌo̱xiéjii̱n nga ko̱síko̱joo̱,
kó xi ma yito ni xi ndajiín, jmí ni sa̱ꞌínjiín.
20Ni̱xtjin nga ka̱ma kjindiaá, kꞌo̱xiéꞌaá tsi̱ꞌe̱ nga ko̱yèjín jí,
ko̱jo kjiꞌanga ka̱ma ni̱xtjii̱n kjo̱a̱xchán,
tsja̱ndièjín nga ki̱cha̱ndojó si̱ꞌankꞌiennii.
21Kuí boá xi skoón jí kjiꞌanga tjín xí ndajín ka̱tso̱o̱,
kó nde chjiénjín nga ko̱ndaki̱n jí, kjiꞌanga kji̱ndi̱bá ni xi ndajiín.
22Ko̱jno̱che ji kjindiaá, ko̱jo ngayeje ni xi tsꞌenkjiéná,
kó nde ko̱ndaki̱n jí cho̱ tamá xí tjín tꞌanangii̱,
23ngatꞌa̱ ngaskande ndi̱jo̱ xi tjín ngi̱jin kꞌijñaá, ka̱ma kꞌuíndeje̱ ji ngo ni,
kó cho̱ tamaá, cho̱ xi ntꞌiéꞌén ka̱maa̱ ji.
24Kꞌuieé kjo̱a̱xió nga ku̱i̱ndyin ji ngi̱ya ndiꞌańjñóo̱,
kó nga kꞌuíxki̱ ji cho̱ tjiée̱ nde ngo xcha̱jàjiín.
25Achichí kjín ka̱ma xota̱ tji̱e̱ xi kꞌuieé,
kó xikó maá kꞌijñá xí tjín tꞌanangii̱ ka̱ma.
26Ngije xchá jí nga ko̱yè jí,
xikó maá ngo chꞌo̱ to ndso̱ko̱a̱n ṉño̱pan xi ni̱xtjii̱n má nga chjaꞌátikó.
27Jè ikindyiséndi̱yàjne̱ kui nii̱, kó bo̱a̱ kjíꞌí.
Tasínijin ji, kó xchítꞌe ji nga bo̱a̱ ka̱ma.
Currently Selected:
Joo̱b 5: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
