Joo̱b 4
4
Ni xi tjón katsó Elifaa̱
1Kósꞌe̱ Elifaa̱ nda̱ xi chji̱a̱ni nangi Temaa̱n, bi̱ katsoó Joo̱b:
2Tsi si̱ꞌan ngo kjo̱a̱ꞌniú nga ko̱ndókjo̱a̱joo̱ ji, tsjajínra̱ ka̱maa̱,
ta̱nga, ꞌyá xí ka̱maa̱ nga ko̱óxioó tsꞌoa.
3Achichí nda foaꞌátsjienna nga jí boá xi akakoyée̱ kjín xota̱,
kó katseꞌéngaꞌníi̱ xota̱ xi je katsꞌénkjiékjo̱a̱ katsaki.
4Én xí kandokjo̱e̱ ji boá xi katsjángaꞌniuú xota̱ xi je mejeén kjo̱tikjaá katsaki,
kó ti̱ akasíke̱je ji xota̱ xi je kamáꞌinda tikoó nga kisꞌiṉtso̱maa̱ nga.
5Ta̱nga ngotꞌe̱ ꞌne̱ nga ji xi tibitjatí ji kjo̱a̱ni̱ma̱, chikjo̱a̱jiín,
ngotꞌe̱ nga ji xi katsoboaá, achichí nda̱ kjimaa̱.
6A maꞌnítakínjín jí nga yendikín jí Néná,
kó a jmíjínri kjo̱a̱chiyá nga kixi̱ kjiꞌi ndi̱yà nínga tsꞌentje̱ ji.
7¡ꞌNiú míyaá nga si̱ꞌinkjé jí ngotꞌe̱,
ꞌyá xotaa̱ xi jmíjéjiín xi je kiniꞌánkjieé,
axa̱, ñání bo̱a̱ nga kiniꞌánkjié xota̱ xi kixi̱i̱!
8Jè kamábe an ngotꞌe̱ ꞌne̱,
nga xota̱ xi ni xi ꞌniú ndajiín ꞌbitjíe̱,
ko̱jo xi kjo̱a̱ni̱ma̱a̱ ꞌbitjíe̱ nga, ti̱ kuíní bo̱a̱ ni xi maxchaá xi foaꞌátikó.
9Tjo̱ xi kjiendáni Néná boá xi tsꞌénkjiesón,
kó nga tsꞌénxchán, ta̱ tjo̱o̱ tsꞌoa tsí xi tsꞌenkjiéni.
10Ndatsi skja̱ndáyà xandi̱je̱ xi̱ꞌii̱n, kó ndatsi ku̱i̱ꞌítsje̱ xandi̱je̱ chjo̱on,
ta̱nga chjátꞌó boá ṉꞌni̱u̱ ndií kui cho̱o̱.
11Xandi̱je̱ xi je xchaá ꞌme ngatꞌa̱ ngiti̱ sakójiín ni xi kjinie,
kó ndií xandi̱je̱ chjo̱on tsojoboa.
12Ngo én xí tjiꞌmá xi ja̱koxi̱ katseꞌéna,
kó tji̱bo̱a̱nijón án ta̱ꞌya tsintꞌié.
13Ngo kjo̱a̱niꞌánkjó xí bokóna nga jñoó kisꞌiena,
kjiꞌá ma nga ngayeje xota̱ nga̱sondiee̱ kjiyojofé tjen.
14Achichí ꞌniú katsakjon an,
kó jatsié ngayeje yojona ko̱jo ńdana.
15Kó ngo a̱siénni̱xtjin jaꞌa kje̱n án,
sꞌe̱ ngaskande kaxoboꞌyójón má yojona.
16Kó kasasien, ta̱nga ndajín kamábe an kókjiꞌi,
kó xtji̱e̱e̱n kje̱n án ki̱a̱ sikón ngo xi sikón,
sꞌe̱ kisꞌie xió xió nga ngo foaꞌatjiyajoo̱n,
kó ta̱niján má tsintꞌie an, ngo nda̱ xi bi̱ katsóna:
17A kixi̱ ngase xotaa̱ ta̱bo̱a̱jiín Néná.
A tsjie ngase xotaa̱ ta̱bo̱a̱jiín kui Ne xi katsꞌénda.
18Néná nde mosoo̱ kui maꞌniátakónjín,
ngatꞌa̱ ngaskande ndítsjiee̱ kitikjo̱a̱ maa̱ kui.
19Akja̱ꞌmíra̱ xotaa̱ ka̱maꞌniátakón,
kui xi ndiꞌa chji̱ndi̱e̱ síndoꞌyaá, kó ńdie kamándani,
ngatꞌa̱ inda boá, kó ka̱ma ko̱jna̱nié xikoó xobií.
20Kjiꞌanga ta̱jño̱ó ko̱jo nga kamángixoón niꞌánkjiesón,
kó ngatsjéni̱xtjin chaja, kó nde ngojín xi be kó kamaá.
21A chjaníyájín ńꞌniú xí tjitáꞌniúní ndiꞌańjñoo̱,
kó ki̱a̱ fesón ngindiee̱, ta̱nga jmí kjo̱a̱kjínkoón ꞌbéjiín.
Currently Selected:
Joo̱b 4: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
