Joo̱b 3
3
Nga ni̱ma̱ katsó Joo̱b
1Jaskan ngije kamá kui nii̱ Joo̱b iskjíxꞌá tsꞌoa, kó ítsꞌi̱yanii̱ nga chꞌo tsꞌén tsíchji̱a̱ kjo̱a̱a̱ ni̱xtjin nga katsen kui. 2Kó bi̱ katsó:
3Nganiꞌánkjié ni̱xtjin nga katsen an,
ko̱jo ni̱xtji̱e̱n nga bi̱ kiꞌmí:
¡Xi̱ꞌin kamá kui ndií!
4Ngatamajñó kui ni̱xtjii̱n,
kó nga bosíyájín Néná kjo̱a̱a̱ kui ni̱xtjii̱n ndeskande ki̱a̱ nkꞌaa̱,
ti̱nde tsꞌueé nga tsꞌentsíjenjiín.
5Ngo tji̱nkꞌi̱e̱én xí ꞌniú jñó ngatsꞌénjñó,
ko̱jo tsi ngo ṉdi̱ jñó ngasꞌijñajin,
chꞌo ngatsꞌénkꞌié, xikoó tsi ngo ni̱xtjin xi ꞌniú ndajín.
6Jñó xi ta̱nisién ꞌniuú ngatsꞌén tsi̱ꞌe̱ kui ni̱xtjii̱n,
kó nga tsjájín maá ki̱a̱ ngi̱jii̱n noó,
ti̱nde nga ki̱a̱jín nijan maxki̱jo ni̱xtjii̱n xi tjiín saá.
7Ngo ni̱xtji̱e̱n xi xikoó tsi ndi̱ ngatama.
Kó nga jmí kjo̱a̱tsja ꞌbéjiín.
8Chꞌo nga tsoó, kui xi ngatꞌíko̱jonii̱ tsoó ni̱xtjii̱n,
kui xi maa̱ tsꞌénkjáꞌaá cho̱ lebiataa̱n.#3:8 3.8 Lebiataa̱nKuí boá xi ngo cho̱ chꞌokjiꞌii̱ ndáchíkoón, kui xi kjín ndiè xo̱jo̱n eén Néná xí kjitꞌa xikoó tsi ngo xkja. (Joo 41:1-34). Cf. Xsl 74:14; 104:26; Isa 27:1.
9Ngasꞌijñó ńño ndibáꞌásie̱én kui ni̱xtji̱e̱e̱n,
kó nga koyaa̱ nga ka̱matsijen, ta̱nga nga ma tsijénjín,
ti̱nde nga sku̱i̱e̱jín nga si̱si̱eén.
10Ngatꞌa̱ íchjájín ndo̱bo̱a̱ndií na̱anna,
nínga tikónꞌya an, kó katsjandiè nga katsꞌen an,
ti̱nde íꞌmájiín ndyikón án ngayeje kjo̱a̱ni̱ma̱ xi tjiín.
11Ánní nga ta̱sájín kꞌien an ngi̱ya ndo̱bo̱a̱ndií na̱ana,
ko̱jo tsi ta̱sá kjiꞌa má kꞌien an nga katsen an katsaki.
12Míkjo̱a̱a̱ nga kisꞌie kon tikó xí kixindyia nga katsen an,
ko̱jo nga kisꞌie kon chiki xi katsjána ndáchíkí.
13Ngatꞌa̱ tsi kꞌien an kjiꞌa, xióra̱ tikón an,
kó xióra̱ kjiꞌifé an nga tjítsꞌenkjaꞌyà an tsobo̱a̱,
14ki̱a̱ra̱ nijan tikónjo̱ an já ree̱,
ko̱jo xota̱ xi katsjá kjo̱a̱botíxomaa̱,
kui xi katsꞌénda ndiꞌa yiꞌi ngasꞌe̱, kó je ixóndó ngotꞌe̱,
15ko̱jo tsi xota̱ xi botixómá xí cho̱n kamá nga kisꞌiee̱ to̱nsinié,
ko̱jo xi íkitsie maá to̱ntiboa ndo̱bo̱a̱xa̱á.
16Ta̱sara̱ ndatsi ikꞌínijín ꞌmána,
xikótsꞌèn ꞌbínijín ndí xí tsenxtió,
kó kui ndíxtioó jmíni̱xtjin be ndiꞌií.
17Ki̱a̱ kjo̱a̱bo̱yaa̱, xota̱ xi ꞌniú ndajiín,
ngiti̱ jmí ni májiín tsꞌén ngase,
kó ki̱a̱ boá nínga tsꞌénkjaꞌyá xota̱ xi je jendaa̱.
18Ti̱ ki̱a̱ boá nínga tsꞌénkjaꞌyá xota̱ xi síndo ꞌniuú nga,
nínga ngiti̱ ntꞌiéjiín nda̱ xi botixómaá xaá.
19Ki̱a̱ boá nínga síndo xi xchá xí kjindií,
ko̱jo xota̱ xi mosoo̱, nga je kamándé ngi̱ya tsja ndi̱a̱a̱.
20Míkjo̱a̱a̱ nga tsen kon xota̱ xi kjo̱a̱ni̱ma̱ kjo̱a̱ꞌatio nga kꞌuíndo nga̱sondiee̱.
Míkjo̱a̱a̱ nga to̱kó tsꞌénkꞌíndora nga̱sondie xota̱ xi síndo xtindaa̱,
21kui xi ndyi̱koyaa̱ kjo̱a̱bo̱yaa̱, kó fochokónjiín,
ndatsi xikó maá ngo ti̱jìto̱n nga ndyi̱mongase.
22Kui xi achichí ꞌniú tsjá ka̱maa̱ tsi tsá kju̱i̱e̱són katsaki.
23Míkjo̱a̱a̱ nga Néná tsjaá kjo̱a̱mindyion ngo xota̱ xi nde bejín nínga tsꞌénfí,
ko̱jo kui xi Néná je íjñaꞌya.
24Ngatꞌa̱ kjo̱a̱foaꞌatsꞌíꞌoón boá xi ni chiniena kjima,
kó ndándyíkón án tjitjón xikó maá tsi ndáfoa.
25Ngatꞌa̱ jè kjindibániéna ni xi indyiándikónna nga ka̱ma,
kó jè kjifotjosón nga kjima ni xi katsakjonña an nga ka̱ma.
26¡Ngiti̱ jmíjínna kjo̱a̱xió, ko̱jo kjo̱a̱niꞌánkjaꞌyá,
ta̱sá achichí nda̱ kjimana!
Currently Selected:
Joo̱b 3: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
