Joo̱b 37
37
1Kó ta̱ngatꞌanii̱ kui nii̱ nga achichí ꞌniú kjínkꞌá ini̱ma̱na,
ngaskande xikó maá tsi je kjo̱tjo.
2¡Ndaꞌyájnúu̱ nda̱a̱ Néná!
¡Ndaꞌyájnúu̱ nda̱ xi fotjonii̱ tsꞌoa!
3¡Ndaꞌyájnúu̱ kótsꞌèn ꞌniú fonie nda̱a̱ nkꞌa jàn,
kó ndiꞌií tsꞌentsíjen ngaskande nínga fetꞌanii̱ nga̱sondiee̱!
4Jaskan ndaꞌyaá ngo nda̱ xi ta̱nisién ꞌniú,
xi ngayeje ngaꞌniuú nga fonie,
kó ndatsi ndaꞌyaá, nde ngojín xi maa̱ tsꞌénkꞌíxió nga foaꞌatꞌee̱.
5Kjiꞌanga Néná tsꞌénkjánié cho̱ꞌo̱o̱n,
achichí ni xi fíndikónná má,
nga ngaskande nde makjínjínná kuí nii̱.
6Néná tsjaá ngo kjo̱a̱ nchꞌaàn
tsi̱ꞌe̱ nga ku̱i̱xo̱ nga̱són tꞌanangii̱,
kó ti̱ tsja̱ákjo̱a̱ stséxa̱a̱ ko̱jo stséꞌniuú nga
7Bo̱a̱ tsꞌén nga ngayeje xotaa̱ ꞌbíndo ndiꞌaa̱,
kó bendikón ngayeje ni xi tsꞌén Néná.
8Kó cho̱ tamaá monga má ngi̱ya ti̱xa̱ nínga ꞌbíndo
tsi̱ꞌe̱ nga ꞌbíndotji̱nkꞌi̱èn sakon sakoo̱n.
9Tjo̱ xi ndibání xtji̱e̱e̱n na̱ngi foeꞌejo̱ tjo̱ꞌniuú,
kó tjo̱ xi ndibání xtji̱e̱e̱n ta̱ꞌin foeꞌejo̱ tjo̱nchꞌaán.
10Néná botsié nga̱són ndáfoaa̱,
kó tji̱e̱nmá má nchꞌàn.
11Kuí boá xi mindyiá ndáfoa ṉdi̱i̱,
kósꞌe̱ ki̱a̱ ꞌboxiéni ndiꞌícho̱ꞌoo̱n,
12tsꞌenkꞌájin ja̱kꞌi̱e̱ ja̱ngajaán ṉdi̱i̱,
kósꞌe̱ fíjo̱ nga̱són nga̱sondiee̱,
tsi̱ꞌe̱ nga kjo̱tjosón ngayeje ni xi mejeén kui.
13Tjín ni̱xtjin nga tsꞌénkáꞌá stseé
tsi̱ꞌe̱ nga tsꞌénjeé xota̱ nga̱sondiee̱,
kó ti̱ tjín ni̱xtjin nga ta̱ngatꞌanii̱ kjo̱a̱ni̱ma̱takón xi tjiín.
14Amingoo̱ Joo̱b, chiyékjo̱e̱ chií, kó ndaꞌyéní,
ti̱ꞌinkjé ndé ndé ji ni xi fíndikónná xi katsꞌén Néná.
15A ka̱má kꞌuiyéní kótsꞌèn botixómaá nga mindyiá ṉdi̱i̱,
ko̱jo kótsꞌèn tsꞌentsíjenni nga foaꞌatꞌee̱.
16A yé jí míkjo̱a̱a̱ nga ja̱kje̱ꞌe jákje̱ꞌe kón ṉdi̱i̱,
ja̱ kuí boá ni xi fíndikónná xi yaꞌanii̱ kjo̱a̱kjíntakón xi ja̱koxi̱i̱.
17A yé jí míkjo̱a̱a̱ nga sibé tsꞌeén ńjñóo̱,
kjiꞌanga tsꞌénkꞌíxió tjo̱ xi ndibání xtji̱e̱e̱n na̱ngi.
18A jí boá xi akasíke̱je ji tsi̱ꞌe̱ nga katsꞌéntiyá nkꞌa jàn,
ko̱jo tsi̱ꞌe̱ nga ꞌniú íjñá xikoó tsi ngo chi̱tsen xí ki̱cha̱.
19Tꞌíyéjne̱ mí ni xi ka̱ma kꞌuínjne̱,
ngatꞌa̱ ta̱ngatꞌanii̱ nga jmí ni bejín an,
nde bejín an kó xiáa̱n Néná.
20Ndeskande májín ko̱n an nga kuichjiájo an,
ngatꞌa̱ tsi bo̱a̱ sa̱ꞌin an, ka̱márií sa̱ꞌínkjiéna.
21Jmíjín xi ka̱maa̱ skotsíjee̱n tsꞌueé,
tsi ngije jaꞌa ngo tjo̱, sꞌe̱ katsꞌéntsjie nkꞌa jàn,
22¡kó ngotꞌe̱ ꞌne̱ xtji̱e̱e̱n ta̱ꞌin
tsꞌéndibá ꞌna̱ ꞌna̱ ngo ndiꞌí!
¡Néná boá xi tsꞌéndibájo̱ ngayeje ngaꞌniuú!
23Nde ka̱makjínjínná kjo̱a̱je xi tjiín Néná xí tsi̱ꞌe̱ ngayeje ngaꞌniuú,
achichí ngaꞌniú tjiín, ko̱jo achichí je kjo̱a̱kixi̱i̱.
24Kuíni nga ngayeje xotaa̱ xi tsakjón má,
ta̱nga nde jmí xki̱ boaꞌájín
xota̱ xi ta̱nisién kjínkón tsoó yojoo̱.
Currently Selected:
Joo̱b 37: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
