Joo̱b 36
36
Xi ma nijoón ndi̱yà nga tsíchji̱a̱ Eliuu̱
1To̱kó bi̱ katsó ngase Eliuu̱:
2Chiyérachiíní, mejénna xiyaá
nga to̱kó tikón ngasena ni xi kuichjiá an kjo̱a̱a̱ kjo̱a̱nda tsi̱ꞌe̱ Néná.
3Kixi̱ tsꞌensénná Néná,
kó kuí boá xí katsjána ngayeje kjo̱a̱kjínkón xi tjínna,
kó kuí nii̱ xi kokoo ngotꞌe̱.
4Ja̱koxi̱ boá nga tsꞌénꞌbindisójín an,
¡tsi ngo xota̱ xi kjínkón timindyisé ji, ja̱ kꞌi̱e̱ tikón an kꞌi̱e̱e̱!
5Néná achichí ngaꞌniú xí tjiín,
kó ngayeje nii̱ xi makjiín kui,
nde ngojín xota̱ xi kixi̱ xi tsꞌenchꞌó,
6ꞌboxiéꞌá xota̱ ni̱ma̱a̱ tsi̱ꞌe̱ nga jmíjín xi kjo̱a̱ꞌáxiín kjo̱a̱nda xi tjiín,
ta̱nga tsjandièjiín nga kꞌuíndo ngase xota̱ xi ndajiín,
7ngatsjéni̱xtjin nga koo̱n xota̱ xi kixi̱i̱,
kó achichí nkꞌa xá xí tsjaá:
¡Tsjandieè nga ngatsjéni̱xtjin ki̱a̱ nijan ko̱tíxomajo̱ ree̱!
8Kó tsi ndyi̱a̱taꞌniú ko̱jo tsi ndo̱bo̱a̱yà síndo,
ko̱jo tsi tsie kjo̱a̱ndasen ndyi̱foaꞌatio,
9Néná boá xi bokoó ni xi katsꞌén,
ko̱jo nga kjo̱a̱nkꞌakoo̱n boá xi jeé,
10kó chji̱a̱jo tsi̱ꞌe̱ nga sa̱ꞌínchji̱ni̱e̱, ko̱jo nga chꞌójín ka̱maa̱,
kó míꞌaá nga ko̱ngaboaꞌaá ni xi ndajiín.
11Tsi kui xi ku̱i̱ntꞌiéꞌeén Néná, kó tsi ki̱a̱ sa̱ꞌínxátꞌaa̱,
ngatsjéni̱xtjin nga tsjatsꞌèn ko̱jo nga nda kꞌuíndo,
12ta̱nga tsi ku̱i̱ntꞌiéꞌénjiín,
nde sku̱i̱e̱jín nga kji̱ndi̱baá kjo̱a̱bo̱yaa̱,
kó kju̱i̱e̱són nga kisꞌiejiín kjo̱a̱kjínkón.
13Xota̱ xi jókje̱e̱n ndyi̱tsꞌènxchánjo̱ Néná,
kó nga tjíbotíjeé,
jmíni̱xtjin míꞌaá kjo̱a̱nda.
14Kuíni nga kjindí nga kjifesón ini̱ma̱a̱,
xikoó maá xota̱ xi ndyi̱tsꞌènmasién yojoo̱.
15Ta̱nga Néná ꞌboxiéꞌá kui xi tsꞌénfoaꞌatio kjo̱a̱ni̱ma̱a̱,
kó ngi̱jii̱n kjo̱a̱ndasee̱n bokoyaá tsi̱ꞌe̱ nga ku̱i̱ntꞌiéꞌén,
16ta̱nga ngotꞌe̱ ꞌne̱,
jè tsꞌaxiéjii̱n ngayeje ni xi nda̱ kjimaa̱,
tsꞌéntsjaá tsie nichinie,
kó je katsꞌéndé kjin kjii̱n.
17Tsoboaári nga Néná sa̱ꞌínjeé
xikótsꞌèn tsꞌénjeé xota̱ xi ꞌniú ndajiín,
kó ka̱májiín kꞌuíchjée̱ kui nii̱ ji.
18¡Kuíni nga ꞌniú chíi̱n yojòo̱!
Ngata̱ kjo̱a̱cho̱o̱njín xi ka̱maꞌniátakón ji,
ngase má tsi ndajín tsꞌén kasako kui nii̱,
19ngatꞌa̱ kjo̱a̱cho̱o̱n ko̱jo ngaꞌniúu̱
nde jmí ni ka̱machjíjiín.
20Ngata̱ chiyéjíi̱n nga ka̱majñoó,
ngatꞌa̱ nga jñoó boá nga chaja xota̱ na̱xi̱ńdaá.
21¡ꞌNiú chíi̱n yojòo̱!
¡Ti̱ꞌinkjìi̱n yojòo̱ ni xi ndajiín,
ngatꞌa̱ kuíni nga tsie kjo̱a̱ni̱ma̱ tibitjatí ji ngotꞌe̱!
22Néná tjiín ngaꞌniú ko̱jo kjo̱a̱je,
kó jmíjín ingo mostro̱ xi xikoó kuí.
23Jmíjín xi ka̱ma ku̱i̱ꞌaa̱ xki̱,
ti̱nde jmíjín xi ni ka̱tso̱o̱ tsi ka̱matsobéjii̱n.
24Ngayeje xotaa̱ xi tsꞌéntsjaà kui, kjo̱a̱a̱ ni xi tsꞌén,
kó ngatjaꞌátsjiee̱n ji, nga bo̱a̱ si̱ꞌin ji nga.
25Ngayeje xotaa̱ xi ka̱má sku̱i̱e̱ ni xi tsꞌén,
ndatsi ta̱ kjin skotsíjennii̱.
26Achichí tsie kjo̱a̱je tjiín Néná
nga ngaskande nde májín ya,
ti̱nde yàjín ñá kótjín nó tjiín.
27Néná boá xi tsꞌénkixó tín ndáfoaa̱,
kó ꞌbitíkó stseé nga ṉdi̱ má,
28kó kui ndáfoaa̱ ki̱a̱ fotjoni ngi̱jin ṉdi̱i̱,
sꞌe̱ bixónieé xota̱ nga̱sondiee̱.
29Ta̱nga nde jmíjín xi ka̱maa̱ ka̱tso̱yàná
kótsꞌèn matíyá ṉdi̱i̱
ko̱jo ñá fotjoni cho̱ꞌo̱o̱n.
30Néná boá xi tsꞌénkjién ndiꞌí cho̱ꞌo̱o̱n nga tsꞌentsíjenni nga̱són ndáchíkoón,
kó sꞌijñatsijen ngaskande nínga ꞌniú na̱nga̱a̱.
31Ngatꞌa̱ ta̱ngatꞌanii̱ stseé nga tsjaá kjo̱a̱mindyion xota̱ na̱xi̱ńdaá,
kó tꞌanangii̱ tsjá tsie nichinie,
32tsja kjíbéní ngo ndiꞌí cho̱ꞌo̱n,
kó ta̱ nínga mejénrií ꞌbojmi.
33Cho̱ꞌo̱o̱n bokó nga tikón Néná,
kó tjo̱ꞌniuú bokó nga tjitsꞌénxchán.
Currently Selected:
Joo̱b 36: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
