Joo̱b 38
38
Néná bi̱ tsꞌén tsíchji̱a̱jo Joo̱b
1Néná tsíchji̱a̱jo Joo̱b ndeskande ngi̱jii̱n ngo tjo̱ꞌniú, kó bi̱ katsoó:
2ꞌYání jí nga ma kon takín nga sꞌijinjín maá kjo̱a̱kjínkónna,
kó nga ta̱soboá én xí jmí ni chjíjiín boá xi ndokjo̱e̱ ji.
3¡Ja̱ stsitsíjen máráa̱ a kjénraá nga tá chꞌokon sèe̱ yojòo̱!
Án mára kuichjiá an ngotꞌe̱,
kó ndókjo̱e̱ ji kjiꞌanga tjín ni xi kosíyaá.
4Tsi kjeén nga ta̱nisién kjínkón ji,
tꞌíyéní ñá tindyin ji kjiꞌanga katsꞌenda an nga̱sondiee̱.
5A yé jí ꞌyá xí tsꞌachi̱bo̱a̱,
axa̱ kótjín nga nkꞌa, nga ndojó, ko̱jo nga tiyá,
6ti̱nde yejín ji ꞌyá xí íjñá ndi̱jo̱ ngaꞌniuú,
ko̱jo kótsꞌèn ítsꞌi̱yanii̱ nga kamánda ngindiee̱!#38:6 Xota̱ ebreoo̱ ngasꞌe̱ kamákjiín nga tꞌanangii̱ són kamá, kó xikoó tsi yásé kisꞌiee̱ ngindiee̱ nínga kisꞌijñasón (Cf. Xsl 24:2; 104:5; Enk 8:29; Sak 12:1).
7¡Ki̱a̱jín kixindyin ji,
tji̱e̱nga kisie ńñoo,
ko̱jo nga iskjínkꞌatsja ndítsjiena!
8Tꞌíyéní ꞌyá xi íchjaá nga̱ntjo̱a̱ ndáfoaa̱ ndáchíkoón
kjiꞌanga jatjoxieni ngi̱ndie nínga tji̱e̱n fochó,
9kjiꞌanga iꞌmáni an ngo ṉdi̱ ndáchíkoón,
kósꞌe̱ kisꞌiejñó,
10ko̱jo nga ijñáa̱ tsindió nínga tji̱e̱n chjiéngá kjo̱chó,
kósꞌe̱ ki̱a̱ ijñá an nga̱xto̱n nga̱ntjo̱a̱a̱ nga ichjáꞌniú án,
11kjiꞌanga bi̱ kixiáa̱n: Ka̱májín ku̱i̱tjéntjée̱n kui tsindioó,
kó ngaskande tsí kꞌi̱e̱e̱ nga ka̱má kjo̱chó ngaꞌniuú ndáfoàa̱.
12A jè sa akatíxomée̱ tsꞌueé
ngo ta̱jño̱ó nga tindyin ji nga̱sondie,
axa̱ a jè sa kiꞌmíyée̱ nga sisi̱eén kóchon ku̱i̱ꞌítsꞌi̱ya nginií ingo ni̱xtjin,
13tsi̱ꞌe̱ nga skjíbé nga̱ndee̱ tꞌanangii̱,
kósꞌe̱ ki̱a̱ ku̱i̱ꞌítsaniesón xota̱ xi ꞌniú ndajiín.
14Ngije ma sisi̱eén sasíkjo nga̱sondiee̱ kó a̱sie̱én tꞌanangii̱ kjíbé,
kje̱ꞌe a̱si̱én má, xikó maá ngo xtjí.
15Ta̱nga xota̱ xi ꞌniú ndajiín chjeꞌéxiín ndiꞌií,
chaja ngaꞌniuú, kó ki̱a̱ tji̱e̱n niꞌánchaja.
16A jè kꞌin ji nínga ꞌniú na̱nga̱a̱ ndáchíkoón
ndeskande nínga tjitjó ndáfoaa̱.
17A jè akakoo̱ nga̱ntjo̱a̱a̱ kjo̱a̱bo̱yaa̱,
a je kamáyè ji ki̱a̱ nínga botixómá kjo̱a̱bo̱yaa̱.
18A jè yé ji kótjín ndojó, ko̱jo nkꞌa ko̱jo tiyá nga̱sondiee̱,
tꞌíyéní tsi ja̱koxi̱ nga je ye ji ngayeje kui nii̱.
19A jè yé jí kótsꞌèn fóchó nínga tikón ndiꞌií,
a jè yé ji ngi̱ndie nínga tikón jñoó.
20A ka̱má kꞌuínje̱ ji nínga tji̱e̱n fochó,
kósꞌe̱ nga ko̱ké nginíi̱ nínga tikón ndiꞌaa̱.
21¡Ja̱ jè yé ji, ngatꞌa̱ ja̱bo̱a̱ jè katsen ji!
Kó jè kjín nó tjiín nga tindyin ji nga̱sondie.
22A jè kꞌintsitsijìi̱n ngi̱ndie nínga xindyiá nchꞌaàn,
a jè kamáyè ji ngi̱ndie nínga foaꞌatjó an ndókoaá.
23Án boá xi foaꞌatjó an, tsi̱ꞌe̱ ni̱xtjin nga nda̱ ka̱maa̱ xotaa̱,
ko̱jo tsi̱ꞌe̱ ni̱xtjii̱n kjo̱a̱xcha̱án.
24A yé jí ñá xtji̱e̱e̱n nínga ꞌbóka ndiꞌí cho̱ꞌo̱o̱n,
a yé jí ñá xtji̱e̱e̱n fí tjo̱ xi ndibání xtji̱e̱e̱n na̱ngi.
25A yé jí ꞌyání bo̱a̱ xi tsꞌénkáꞌá stsé ꞌniuú,
a yé jí ndi̱yà nínga foaꞌa ndiꞌícho̱ꞌoo̱n,
26a yé jí ꞌyání xi bosíndaá nangi kjitiyaa̱,
ki̱a̱ nínga jmí xota̱ síndojín.
27ꞌYá xí bosíndaá tꞌanangi xi kixií,
tsi̱ꞌe̱ nga fotjo nginií ndi̱xcho̱ sa̱si̱e̱e̱.
28ꞌYání xi na̱ꞌmii̱ stseé,
kó ꞌyá xí tsꞌénda xoñoo̱.
29¡Tꞌíyéní ñá fotjoni nchꞌaàn
kó stséxa̱ xi nchꞌaàn, ꞌyá xí tsꞌénda.
30Kótsꞌèn nga tajá ndáfoa ndáchíkoón, kó xikoó tsi ndi̱jo̱ ma,
kui xi ma nchꞌàn nínga ꞌniú na̱nga̱a̱!
31A ka̱maári ńꞌniú kuítꞌe ji ńño xi tjín nkꞌa jàn tsi̱ꞌe̱ nga kꞌuíndo xtín,
ko̱jo tsi kja̱xín kja̱xín kꞌuínde ji ńño xi chji̱a̱ni Orioo̱n,
32a ka̱maári nga kuí má chi̱bo̱a̱a̱ nga ka̱matsijen ńño xi tsꞌentsíjee̱n,
ko̱jo tsi ji kꞌuiyée̱ ndi̱ya̱à Osa̱ xi je ngasee̱ ko̱jo nga yito xi ndí ndií.
33A yé jí kjo̱a̱kiti xi je tikón nga botíxomaa̱ nkꞌajmi jàn,
a ka̱maári nga ji ko̱ti̱xomée̱ tꞌanangii̱.
34A ka̱maári ꞌniú xchieꞌeyé ji nga ko̱e̱ꞌékjo̱e̱e̱ ṉdi̱i̱,
tsi̱ꞌe̱ nga stsé sa̱ngíyá.
35A ka̱maári nga ji ko̱e̱ꞌékjo̱e̱e̱ ndiꞌí cho̱ꞌo̱o̱n,
tsi̱ꞌe̱ nga ko̱e̱je̱ nínga mejeén jí, kó nga: Kꞌi̱e̱ tindyionjne̱. Ka̱tso̱o̱.
36Tꞌíyéní ꞌyá xí katsjaá kjo̱a̱kjínkón
cho̱ ibii̱s#38:36 Ibii̱sKuí boá ngo to̱ko̱ya ni̱sie xi kisꞌie ki̱a̱ Ejiptoo̱ xi jatjokjà kjiꞌanga ꞌniú kamáje ndejèꞌ Niloo̱ nga íngandá kje̱ꞌe nangi. ko̱jo xo̱nda̱xi̱ꞌii̱n.
37Tꞌíyéní ꞌyání bo̱a̱ xi bo̱a̱ tsꞌén kjínkoón, xi maa̱ ꞌbíxki̱ ṉdi̱i̱,
ko̱jo ꞌyání bo̱a̱ xi ka̱maa̱ skjitjón ndáfoa xi ndyi̱a̱a̱ tsi̱ꞌe̱ nga stsé ka̱ma,
38tsi̱ꞌe̱ nga kꞌo̱ndyi̱ tꞌanangii̱
kjiꞌanga je tikón kixí.
39A ka̱maári nga ji ku̱i̱ndyi̱sée̱ ni xi skji̱ni̱e̱ xandi̱je̱e̱,
a ka̱maári nga ji xi ko̱e̱ꞌée̱ nichinie ndií,
40tji̱e̱nga kjiyojofé ko̱jo tsi ndyi̱tsꞌènkjaꞌyá
ngi̱ya ti̱xa̱na̱xi̱i̱, tji̱e̱nga ndyi̱koyaa̱ chi̱bo̱a̱ nga skji̱ni̱e̱ nichinie.
41ꞌYání bo̱a̱ xi tsjaá nichinie ni̱sie kuerboo̱,
kjiꞌanga ndií ni̱ma̱ chji̱a̱a̱ Néná,
kjiꞌanga tjimá kichajá nga ndyi̱mongase nichinie.
Currently Selected:
Joo̱b 38: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
