Joo̱b 35
35
Xi ma jaán ndi̱yà nga tsíchji̱a̱ Eliuu̱
1Bi̱ katsó ngase Eliuu̱:
2Ji amingo̱ Joo̱b, a sꞌijiínri nga tjiín ngakixi̱ ngayeje ni xi je kase ji,
ko̱jo nga kixi̱ tindyin ji ngindyikón Néná.
3Kó nga bi̱ kasée̱ Néná:
Mí ni xi nda ka̱maa̱ tsi tjínna ko̱jo tsi jmíjínna jé.
4Ja̱ ndakjiꞌi ja̱ an kuichjiájoo ji
ko̱jo amingo̱ xi nijan síndojoo̱.
5Tsitsíjìi̱n nkꞌajmii̱,
tsitsíjìi̱n ṉdi̱i̱ kókjiꞌi nkꞌa ngase, ta̱bo̱a̱jiín jí.
6Tsi ndajínkjiꞌi ni xi tiniꞌín ji, jmí ni májiín Néná
kó tsi tiniꞌínkjín ngase ji jée̱, ti̱nde jmí ni májiín kui nga.
7Kó tsi kixi̱ ni xi tiniꞌín ji,
mí ni xi nda xi tiboeꞌée̱ kui,
jmí ni xi nda tiniꞌínjíi̱n Néná.
8¡Xota̱ xi xikoó jí boá, xi ndajín tsꞌeén ni xi ndajín xi tsꞌén.
Kó kje̱ꞌe xota̱ xi xikoó jí boá,
xi nda tsꞌeén kjo̱a̱kixi̱ xi niꞌín ji!
9Achichí ni xi ndajín xi tjín kuí nga̱sondiee̱,
nga xotaa̱ míꞌá nga ko̱siko̱jo,
tsi̱ꞌe̱ nga kjo̱tjongii̱ yojoo̱ ngi̱ya tsja xota̱ xi tjiín ngaꞌniuú.
10¡Ta̱nga nde ngojín xi mongase Néná,
kui xi tsjangaꞌniúná nga jñoó!
Nde ngojín xi bosíyá kjo̱a̱a̱ kui Néná xi katsꞌéndaná,
11kui xi bokoyá ngasená ta̱bo̱a̱jiín cho̱ tamá xí tjín tꞌanangii̱,
kó tsie ngase kjo̱a̱kjínkón tsjáná ta̱bo̱a̱jiín ni̱sie xi tjín nkꞌa jàn.
12Ki̱a̱ boá nínga ni̱ma̱ ka̱tso̱o̱ Néná nga ku̱i̱chji̱a̱a̱,
ta̱nga kui nde ku̱i̱ntꞌièjiín ta̱ngatꞌanii̱ kjo̱a̱nkꞌakoo̱n.
13¡Kuíni nga Néná xi tsi̱ꞌe̱ ngayeje ngaꞌniuú,
tsꞌensénjiín ni xi jmí ni chjíjiín xi ta̱xkiya míꞌá xotaa̱!
14Ndatsi bo̱a̱ tꞌísé ji nga yejín ji kje̱n Néná,
chiyékjo̱e̱ ji, ngatꞌa̱ jè ngi̱ya tsja kui tikón kjo̱a̱ xi tse̱.
15Ji xi bi̱ se ji nga Néná tsꞌénxchánjín, ti̱nde botíjéjínná,
ko̱jo nga nde ki̱a̱jín tsꞌenseén ni xi ndajín xi tsꞌén xota̱ nga̱sondiee̱,
16ta̱nga nga ja̱koxi̱ ji Joo̱b,
jmí ni chjíjiín ni xi tꞌísé ji,
achichí ni xi tindokjo̱e̱ ji, ta̱nga nde yejín ji ni xi tꞌísé ji.
Currently Selected:
Joo̱b 35: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
