Joo̱b 34
34
Xi ma joó ndi̱yà nga tsíchji̱a̱ Eliuu̱
1Kó bi̱ katsó ngase Eliuu̱:
2Jún xi xota̱ kjínkónjnú,
ko̱jo jún xi xota̱ chji̱ni̱e̱jnú,
nda nda má tasiénijónjnúꞌun ni xi ku̱i̱chji̱a̱ an.
3Tsi máná chitꞌa kókón nichiniee̱,
ti̱ ka̱máná nda ko̱nda̱ꞌyá kó tsó eén nga.
4Kuíni nga chje̱ꞌéjin ni xi kixi̱i̱,
kó stsitsíjen cha̱n cha̱a̱n ni xi ndaa̱.
5Ngatꞌa̱ jè bi̱ katsó Joo̱b:
Jmí jéjínna, ta̱nga Néná mejénjiín nga kixi̱ tsꞌén sa̱ꞌínsénna,
6xota̱ xi kixi̱ án,
ta̱nga xikó maá tsi ngo xi tsꞌénꞌbindísó kjima an,
nde ngo jé katsꞌénjín an,
ta̱nga Néná katsꞌénꞌónna tsi̱ꞌe̱ nga ko̱yà án.
7A tjín ingo xota̱ xi xikoó Joo̱b tsobo̱a̱,
xi ngatsjéni̱xtjin mojnókie ngayeje nii̱.
8Achichí tsjá maá nga ki̱a̱ fotsoꞌbájo̱ xota̱ xi ꞌniú ndajiín,
kó tsꞌénkámajo̱ xota̱ xi ndajiín.
9¡Kó ngotꞌe̱ ꞌne̱ bo̱a̱ tjítsó
nga jmí ni chjíjín xoò nga
si̱ꞌankjatjosón ni xi mejeén Néná!
10Ta̱nga jún xota̱ xi kjínkón boá jún,
kuíni nga nda nda má tasiénijónjnúꞌun ni xi xiánjnúꞌun.
¡Ndeskande chjiénjín nga si̱ꞌankjó
nga kui Néná xí tsi̱ꞌe̱ ngayeje ngaꞌniuú
sa̱ꞌín ngo ni xi kixi̱jín kjiꞌi!
11Ngatꞌa̱ kuí boá xi ku̱i̱ꞌíchjií xota̱ nga̱sondiee̱ ta̱ xikó kjiꞌi ni xi katsꞌén,
kó tsja̱á xikó kjiꞌi ni xi tsoboaá.
12Nga ja̱koxi̱ Néná xí tsi̱ꞌe̱ ngayeje ngaꞌniuú
tsꞌénjín ni xi ndajín ko̱jo ni xi kixi̱jín.
13ꞌYá xí íjñá ngi̱ya tsja kui tꞌanangii̱,
ꞌYá xí atíxomaa̱ nga ku̱i̱ꞌíndonda ni xi tjíndo kui nga̱sondiee̱,
14Tsi Néná xí tjítsꞌénkjó nga kjo̱a̱ꞌáxínná a̱si̱énni̱xtjii̱n,
ko̱jo tsi skjíbé nginí kjo̱a̱mindyion xi katsjáná,
15¡ngayeje ñá nga ko̱yà,
kó chojo ka̱má nginí ngayeje xota̱ nga̱sondiee̱!
16Kó ji Joo̱b,
tsi ja̱koxi̱ nga xota̱ xi kjínkón ji,
nda nda má tasínijìnní ni xi xián án.
17A ka̱márií sa̱ꞌíndajin ngo kjo̱a̱ kui xi chꞌoo̱ kjo̱a̱kixi̱i̱.
A ka̱maári kꞌuítꞌejé jí xota̱ xi kixi̱i̱.
18A ka̱má xota̱ xi ꞌniú ndajín kꞌuiín ree̱,
kó a ka̱má xota̱ xi kixi̱jín kꞌuiín xota̱ xi yandikoón.
19Néná katsꞌéndaná ngayeje ñá,
tsi xota̱ ni̱ma̱ ko̱jo tsi xota̱ xi cho̱n,
jmíjín xi tjó ngasee̱ kui.
20Ta̱niján má fesón xota̱ nga̱sondiee̱,
kó nga ma masien ni̱xtji̱e̱e̱n tsꞌénxchán xota̱ na̱xi̱ńdaá,
kó chaja ngi̱jin a̱si̱én,
kó xota̱ xi tjiín ngaꞌniuú,
nde jmí ngaꞌniú niꞌánkjiénjiín nga niꞌánchaja.
21Néná ngatsjéni̱xtjin nga tsꞌénkonda
ngayeje ni xi tsꞌén xota̱ nga̱sondiee̱.
22Ngaskande nga ni̱xtji̱e̱n xi ꞌniú jñoó
májín ꞌbíndoꞌmá xota̱ xi tsꞌén ni xi ndajiín.
23Néná íjñájiín ngo ni̱xtjin xota̱ nga̱sondiee̱
tsi̱ꞌe̱ nga kjo̱chó ngindyi̱ko̱n kui, kó nga si̱ꞌandajin kjo̱a̱a̱,
24ti̱nde chjiénjín nga ko̱ngasendièmára
tsi̱ꞌe̱ nga sa̱ꞌínkjié xota̱ xi chꞌokon tsoó yojoo̱,
ko̱jo nga kje̱ꞌe xí ku̱i̱ꞌíndo ngi̱ndiee̱.
25Néná jè be ni xi ndyi̱tsꞌèn ngayeje xotaa̱,
kó nga má jñoó foaꞌáxiín ngaꞌniú xí tjiín,
kó tsꞌenkjié ndo̱jò ndójo̱,
26ngindyikón ngayeje xota̱,
botíjeé kjo̱a̱a̱ nga ndajín katsꞌén,
27ngatꞌa̱ ngiti̱ tsintꞌiéꞌénjiín,
kó ta̱sá íjñámasien kjo̱a̱botíxomaa̱ Néná,
28achichí nga ndajín katsꞌénjo̱ xota̱ ni̱ma̱a̱,
nga ngaskande Néná tsintꞌieé
nga ndyi̱kjandayà nga ko̱siko̱jo.
29Ta̱nga tsi Néná xí mejeén nga xió kꞌuijñá,
ꞌyá xí ka̱maa̱ sa̱ꞌínchꞌó nga bo̱a̱ sa̱ꞌín.
Tsi kui xi mejénjiín nga ko̱kó yojoo̱,
ꞌyá xí ka̱maa̱ sku̱i̱e̱ kje̱n.
Ta̱nga Néná, kuí boá xi tsꞌénkotsijee̱n
ngayeje na̱xi̱ńdá ko̱jo xota̱ xi tjín nga̱sondiee̱,
30tsi̱ꞌe̱ nga kuijín xota̱ xi ndajiín xi ko̱tíxomaa̱,
ti̱nde ku̱i̱ꞌíndisojo̱jín xota̱ na̱xi̱ńdaá.
31Ndara̱ kjiꞌi tsi bi̱ kꞌuíi̱n Néná:
Jè akatíjéní, kó ngiti̱ sa̱ꞌinjéjín an.
32Takéní ni xi bejín an, kó tsi ndajín katsꞌen an, ngiti̱ bo̱a̱jín sa̱ꞌin an,
33kó, a xikótsꞌèn mejeén jí, a bo̱a̱ ka̱ma katsaki,
jmí, Néná boá xi sa̱ꞌín ngo ni xikótsꞌèn mejeén kui, jmí tsi ji,
ta̱nga tsi ye ngase ji kje̱ꞌe ni, ja̱ ndókjo̱e̱ ji tsobo̱a̱.
34Jún xi ndyi̱ndaꞌyájnúꞌun
xota̱ xi kjínkónjnú ko̱jo xi chji̱ni̱e̱jnú,
kuíni chjiéngá si̱ꞌanjo̱ꞌojnú,
35nga ta̱chiboa chji̱a̱ Joo̱b,
kó nde jmí xki̱jiín ni xi tsó.
36Mejénna nga Joo̱b xchítꞌayákón ni xi je tsíchji̱a̱,
ngatꞌa̱ xikó má tsꞌén chji̱a̱ xota̱ xi ꞌniú ndajiín, bo̱a̱ má tsꞌén chji̱a̱.
37Jmí tsi ta̱ katsꞌénjé tsí Joo̱b, ti̱ kitikjo̱a̱ kamá nga,
tsajnókiejne̱ ji̱n nga katsꞌéntsen má tsja,
kó achichí chꞌo katsoó Néná nga.
Currently Selected:
Joo̱b 34: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
