Joo̱b 33
33
1Ji amingo̱ Joo̱b,
ꞌniú míꞌaá nga nda nda má tasínijìi̱n
nga ngo nga ngo ngayeje én xí kuichjiájoo.
2Jè tsꞌénkjíxꞌá án ndso̱ꞌba án,
kó jè ka̱tse̱ má kjimaa̱ najén án.
3Nga ngo nga ngo én xí kuichjiá an
ngi̱jin ini̱ma̱na fotjoni,
kó ni xi kuichjiá an, ni xi kixi̱ boá.
4A̱si̱énni̱xtjii̱n Néná boá xi katsꞌéndana,
kó tjo̱ xi yítsiéna xi tsi̱ꞌe̱ ngayeje ngaꞌniuú, kuí boá katsjána kjo̱a̱mindyion.
5Ndókjo̱e̱ꞌéni tsí ka̱maa̱,
ti̱ndyinde ji tsi̱ꞌe̱ nga xchi̱boátí.
6Ngindyi̱ko̱n Néná,
ji ko̱jo an ndse̱je̱n ñá,
ngatꞌa̱ ti̱ chojo kamándani an nga.
7Kuíni nga, ngata̱ ndakinjín máni,
ngatꞌa̱ jmí tsí ni xi ndajín sa̱ꞌínjoo̱ ji.
8Nga ja̱koxi̱ jí boá xi bi̱ kase ji,
kó to̱kó tsꞌéntꞌie tsjé an nga bi̱ tꞌísé ji kjimana:
9¡Tsjie án, jmí jéjínna!
¡Jmí jéjínna, kó jmíjínna ni xi ndajín!
10Néná boá xi tjítsó nga tjínna jé,
kó xikoó tsi kondra̱a̱ kui kjimaa̱ an.
11Tjitáꞌniúrií an, xikoó tsi ńꞌniúki̱cha̱ tjítꞌaa̱ an,
kó nga ngo ni̱xtjii̱n nga an tsꞌénkondana.
12Kixi̱jín ni xi tꞌísé ji,
ngatꞌa̱ Néná je ngase ta̱bo̱a̱jiín xota̱ nga̱sondiee̱.
13Kó míkjo̱a̱a̱ nga kui mejeén ku̱i̱xkénje̱ ji,
jmí kjo̱a̱jín nga kui sa̱ꞌínseén ni xi tꞌísé ji.
14Ta̱nga Néná tsi ngo ko̱jo tsi jó to̱ko̱ya tikoón xikótsꞌèn chji̱a̱joná,
ta̱nga xotaa̱ makjínjiín,
15tjín ni̱xtjin nga Néná ngi̱jin ńjñána chji̱a̱joná,
kjiꞌanga tjèn ndyi̱tsjayojofé,
16ko̱jo tsi ngi̱ya tji̱bo̱a̱nijón chji̱a̱ya,
kó tsóyà cha̱n cha̱nná kjo̱a̱botíxomaa̱,
17tsi̱ꞌe̱ nga ngiti̱ si̱ꞌán jàn ñá ni xi ndajín,
ko̱jo nga ngiti̱ nkꞌakonjín ka̱má,
18ngatꞌa̱ bo̱a̱ tsꞌén nga kꞌo̱xiéꞌá ini̱ma̱ná ngi̱ya tsja kjo̱a̱bo̱yaa̱,
ko̱jo tsi tsi̱ꞌe̱ nga jmíjín xi chꞌo tsꞌén sa̱ꞌínkꞌiénná.
19Tjín ni̱xtjin nga Néná botíjéná,
nga tsjáná xí so xi ndakjan ngi̱jin ńdaná.
20Nga ngaskande ngiti̱ ma bojójínná,
kó ini̱ma̱ná ngaskande ngiti̱ jmí ni fijénjiín,
21xíyà kjin kjin yojoná,
kó ngaskande yà má ńdaná.
22Kó bo̱a̱ tsꞌén yà nga ini̱ma̱ná je kjima tiñaa̱ kjo̱a̱bo̱yaa̱.
23Ta̱nga tsi ki̱a̱ tikóntꞌaa̱ ngo ndítsjie#33:23 Xikótsꞌèn kjitꞌa, kui Ndítsjie Kui xi ngamasiee̱n xotaa̱ ko̱jo Néná tikón, jó xá kisꞌiee̱: Kuí boá xi katsóyaà xota̱ xi katsꞌénjeé míkjo̱a̱a̱ nga ngo chiꞌin tjiín ko̱jo tsi kjo̱a̱a̱ kjo̱a̱ni̱ma̱ tsꞌénfoaꞌatio, tsi̱ꞌe̱ nga sa̱ꞌínkꞌoyà yojoo̱, kó ko̱e̱je̱ nginí ndi̱yà xí ndaa̱, ko̱jo kuí boá xi chji̱a̱tjé kui xi katsꞌénjeé tsi̱ꞌe̱ nga Néná sa̱ꞌíndaya nginí.
ndeta̱ ngo chií kui xi mi̱ ma xi tjiín Néná,
xi ka̱tso̱yaa̱ ndi̱yà xí nda xi chjiéngá ko̱e̱je̱,
24tsi ni̱ma̱ ka̱maa̱, kó bi̱ ka̱tso̱o̱ Néná:
ꞌNa̱xiéꞌé ji ngi̱ya tsja kjo̱a̱bo̱yaa̱,
ngatꞌa̱ jè kasakoséna kótsꞌèn kjo̱tjoꞌa.
25Kósꞌe̱ yojoo̱ ka̱makjindiyà nginí,
kó xikó maá tsi tsi̱ꞌe̱ ngo nda̱chií ka̱ma ngijee̱.
26Kósꞌe̱ ni̱ma̱ ka̱tso̱ nga ku̱i̱chji̱a̱a̱ Néná,
kó Néná tsja̱á kjo̱a̱ndaa̱, kó tíkje̱n tíkje̱n sku̱i̱e̱, kó tsjá ka̱maa̱,
kó Néná kixi̱ tsꞌén sa̱ꞌínseén.
27Kósꞌe̱ bi̱ ka̱tso̱o̱ ngayeje xota̱ nga̱sondiee̱:
Ndatsi katsꞌenjé án, kó kixi̱jín kamá an,
ta̱nga Néná katsꞌénjéjínna xikótsꞌèn tsoboána katsaki.
28Néná kꞌo̱xiéꞌá ini̱ma̱na tsi̱ꞌe̱ nga ko̱e̱je̱jín ngi̱ya nga̱tsjo̱ó,
kó sku̱i̱e̱ nginí ndiꞌií.
29Ngayeje kui nii̱ xi tsꞌén Néná
ta̱ xikó kjiꞌi ndi̱yà mejénrií kui,
30tsi̱ꞌe̱ nga kꞌo̱xiéꞌá ini̱ma̱ná nga ko̱yàjín ñá
kó ta̱sá ku̱i̱ndyionra ngase nga̱sondie.
31Ji amingo̱ Joo̱b,
ngata̱ bichékjéjíi̱n ni xi tsꞌénchji̱a̱ an,
¡tasínijin ndé ndéní ni xi xiaán!
32Ta̱nga tsi tjiín ngo ni xi ko̱ndókjo̱e̱ ji,
ja̱ ndókjo̱e̱ tsobo̱a̱,
achichí tsjá ka̱mana nga skuie an nga jmí jéjiín.
33Tsi jmíjiín ni xi ko̱ndókjo̱e̱ ji,
xió tindyin, kó ndaꞌyéní,
kó án kokoyaá kótsꞌèn kꞌuieé kjo̱a̱kjínkón.
Currently Selected:
Joo̱b 33: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
