Joo̱b 32
32
Nga tjón tsíchji̱a̱ Eliuu̱
1Kjiꞌanga kamákjiín nga ján kui jaá nga Joo̱b nda tsꞌaxié yojoo̱, ngiti̱ jmí ni katsójiín. 2Ta̱nga ngo nda̱ xi ꞌmí Eliuu̱ achichí ꞌniú katsꞌénxchánjo̱ Joo̱b, ngatꞌa̱ nda ngase tsꞌaxié yojoo̱ ta̱bo̱a̱jiín Néná. Eliuu̱ ndií Barakee̱l boá, ndíndee̱ Buu̱, xota̱ ngo ndiꞌaa̱ Raa̱n. 3Kó ti̱ katsꞌénxchánjo̱ ngaján já amingoo̱ Joo̱b, ngatꞌa̱ ja̱bo̱a̱ je ítꞌajé, kó kji̱e̱ bokójín nga Joo̱b xi konnii̱.
4Eliuu̱ ja̱bo̱a̱ jè kamámejeén tsíchji̱a̱ ngindiee̱, ta̱nga ta̱sá xió kisꞌijña ngatꞌa̱ Joo̱b ko̱jo já amingoo̱ xchá ngase ta̱bo̱a̱jiín kui. 5Ta̱nga ngije kamábe Eliuu̱ nga ngaján já amingoo̱ Joo̱b ngiti̱ jmí ni xi katsójín, achichí katsꞌénxchán, 6kó ítsꞌi̱yanii̱ nga tsíchji̱a̱.
Bi̱ katsó Eliuu̱:
Ti̱ꞌanjetakónjnú nga kuichjiá an,
ngatꞌa̱ kjindí ngase an, kó jún jè xchájnú,
kuíni nga achichí katsakjon an nga kuichjiá an ni xi tjítsꞌenkjó án.
7Bi̱ tsꞌén katsꞌenkjó án:
Xota̱ xi xchaá, kuí boá xi ngatíchji̱a̱,
kó xota̱ xi je ꞌniú xchá ngasee̱ ngatakoyá kjo̱a̱kjínkón xi tjiín.
8Nga ja̱koxi̱ xota̱ nga̱sondiee̱ tikónjii̱n ngo a̱siénni̱xtjin,
ngo tjo̱ xi katsjaá Néná xí tsi̱ꞌe̱ ngayeje ngaꞌniuú,
kó kuí boá kui a̱si̱énni̱xtjii̱n xi tsjaá kjo̱a̱kjíntakón.
9Ta̱nga jmí tsi kjo̱a̱a̱ nga je xchá, sꞌe̱ xota̱ xi tjiín kjo̱a̱kjíntakón ka̱má,
ti̱nde jmí tsi xota̱ xi je ꞌniú xchaá xi makjiín kjo̱a̱kixi̱i̱.
10Kuíni nga bi̱ kixian an: Ndaꞌyájnúꞌun ni xi xián án,
ngatꞌa̱ ti̱ tjínna kjo̱a̱kjínkón.
11Tji̱e̱nga ndyi̱ndokjo̱a̱jnú jún,
kó ndyi̱mindyiséjnú én nda xi ko̱ndókjo̱a̱jnú,
askoyá xió xió an,
nga tsintꞌièe̱ ni xi je kandokjo̱a̱jnú.
12Jè tsintꞌie nda ndajnúꞌun,
ta̱nga nde ngojín jún
xi kamaá tsíchji̱a̱ꞌa Joo̱b,
nde ngojín jún xi kamaá nga bo̱a̱jín kjiꞌi ka̱tso̱
kjo̱a̱a̱ ni xi tsíchji̱a̱.
13¡Ngata̱ bi̱jín ꞌmíjnú ngotꞌe̱:
jè kasakoná kjo̱a̱kjínkón, kó ta̱sá Néná,
jmí tsi xota̱ nga̱sondie xi ngatíchji̱a̱ꞌa Joo̱b!
14Jmí tsi an xi tjítsóna Joo̱b,
kuíni nga bo̱a̱jín tsꞌén ku̱i̱chji̱a̱ an
xikó kiꞌmíjnú jún.
15Ji Joo̱b, já amingo̱o̱ kamátsobéjinrií,
kuíni nga ngiti̱ jmí ni ndyi̱tsójín ngase,
ngatꞌa̱ jè ngiti̱ jmíjiín ni xi ku̱i̱chji̱a̱.
16Jè askoyá an, ta̱nga ngiti̱ tsíchji̱a̱jín ngase,
ta̱sá xió kisꞌińdo, kó ngiti̱ jmí ni katsójín!
17Kuíni nga kuichjiáꞌañaá jí ni xi tsoboána xtji̱e̱e̱n an,
kó ti̱ xiyà an ni xi bee̱ko̱n an nga.
18Achichí én xí tjíjinna xi kuichjiá an,
kó jè ngiti̱ chikjo̱a̱jínna nga jmí ni tꞌíxiánjín an.
19An jè xikó maá ngo ti̱jìtjíxin xí ndyi̱a̱ bino̱,
¡kó je mejeén xtjiyà an!
20Chjiéngá kuichjiá an,
¡chjiéngá kjo̱a̱ꞌajenda an!
21Nde ngojín jún xi nijan ka̱ma an,
ti̱nde jmíjín xi kjo̱a̱ndaa̱ kotíjña̱ an,
22ngatꞌa̱ tsjajín mána nga tjín xí nkꞌa ꞌbijñá an,
tsi bo̱a̱ sa̱ꞌin an, Néná ko̱tíjéna.
Currently Selected:
Joo̱b 32: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
