Joo̱b 2
2
Kjín ngase kjo̱a̱chjatꞌayákón xi kisꞌiee̱ Joo̱b
1Nga jachó ni̱xtjin nga mosoo̱ nkꞌajmii̱ kamátikó ngindyi̱ko̱n Néná, ti̱ jachó Xindajiín nga, 2kó Néná, bi̱ katsoó Xindajiín:
—¡Kó jí! Ñá kjoéꞌe̱ni.
Kó Xindajiín, bi̱ katsó:
—Nga̱sondiee̱ kijíkjaꞌatjiyajóo̱n, ki̱a̱ kijíkatsijèe̱n ni xi kjima.
3Kósꞌe̱ Néná, bi̱ tsꞌén asíyaá:
—A kiniꞌínkjéjín jí kjo̱a̱a̱ Joo̱b, nda̱ moso̱na, jmíjín ingo nda̱ ngayeje kui nga̱sondiee̱ xi bo̱a̱ tsꞌén nda ko̱jo xi kixi̱ xikoó kuí. Ngatsjéni̱xtjin nga bendikónna, kó chiíjín tsꞌén ni xi ndajín kjiꞌi, kó to̱kó kixi̱ tikón, ndatsi je bo̱a̱ kasení nga ndajín sa̱ꞌinjo̱ an, kó ndatsi jmí kjo̱a̱jínna nga katsꞌenkjié an kjo̱a̱ kui.
4Kó Xindajiín, bi̱ katsoó Néná:
—¡Tji̱e̱nga jmíjín xi tji̱xinná má xi sa̱ꞌínꞌoón, ngayeje nii̱ xi ndakjiꞌi! Ta̱nga xota̱ nga̱sondiee̱ ka̱márií tsja̱a ngayeje ni xi tjiín tsi kjo̱a̱a̱ nga kꞌo̱xiéꞌá yojoo̱. 5Ta̱nga ndajín ti̱ꞌinje̱ ji ńdaa̱ ko̱jo yojoo̱, kó ndé xche̱ ji nga chꞌo ka̱tso̱ tíkje̱n tíkje̱e̱n.
6Kósꞌe̱ Néná, bi̱ katsoó Xindajiín:
—Ja̱ ngi̱ya ndse̱ ji je tikón ngotꞌe̱ ꞌne̱, ta̱nga ngata̱ niꞌínkꞌínjín ji ki.
7Kósꞌe̱ Xindajiín jatjoxieni ngindyi̱ko̱n Néná, kó katsꞌénꞌoón Joo̱b nga íkitsie maá ṉdoꞌon ngayeje yojoo̱, ndeskande ngi̱ya se, ngaskande nga̱tsjà to̱ko̱.#2:7 Chiꞌin xi katsoboaá tji̱xin yojoná, ngase má kui xi ꞌniú ngasee̱, katsꞌeén kjo̱a̱ꞌniú kuí xi oo̱n nga kjin kisꞌijñanii̱ xota̱ xi ngasee̱ (cf. Leb13). 8Kuíni nga Joo̱b ndiso kijíkꞌíjñajinni, kó nga ngo ni̱xtjii̱n nga ngo ndi̱jo̱ tokjuie iskjijón yojoo̱. 9Kósꞌe̱ chjo̱ón Joo̱b, bi̱ kijítsoó:
—A to̱kó ko̱ké jí nga nda ji xota̱. ¡Ta̱sá chꞌo tꞌíi̱n Néná, sꞌe̱ ngataye ji ngijee̱!
10Ta̱nga Joo̱b, bi̱ katsoó:
—Xikótsꞌèn chji̱a̱ ínchjín xí chi̱nii̱, bo̱a̱ tsꞌén kandokjo̱e̱ ji chjo̱on. Tsi niꞌánjo̱ꞌó ñá ngayeje ni nda xi tsjáná Néná, a chjiénjín nga si̱ꞌanjo̱ꞌo ni xi ndajiín nga.
Kó ndatsi bo̱a̱ kjiꞌi ngayeje ni xi je kamaá Joo̱b, katsꞌénjéjín nga chꞌo katsó.
Nga ján já amingoo̱ Joo̱b
11Nga ján já xí nda tsaꞌa Joo̱b kui xi ꞌmí Elifaa̱, kui xi chji̱a̱ni nangi Temaa̱n, ko̱jo Bilndaa̱nd, kui xi chji̱a̱ni ngo ngi̱ndie xi ꞌmí Súaa̱j, ko̱jo Sofaa̱r, kui xi chji̱a̱ni ngo ngi̱ndie xi ꞌmí Naamaa̱t,#2:11 Ján já xí nda tsaꞌa. Elifaa̱, Bilndaa̱nd, Sofaa̱r, nga ján kui já amingoo̱ Joo̱b, kuí boá xi ngito̱ko̱o̱ ngi̱ndie xi chji̱a̱ni xtji̱e̱e̱n nínga fotjo tsꞌueé. Nga ján ngi̱ndie xi chji̱a̱ xo̱jo̱o̱n kꞌi̱e̱e̱, ta̱kuítsí Temaa̱n Xi ꞌniú ya kje̱ꞌe ndiè nínga chji̱a̱ xo̱jo̱o̱n (Jer 49:7; Ese 25:13). tsintꞌié ni xi ndajín xi kamaá Joo̱b, kó nga ngo nga ngo kui jaá jatjoni ngi̱ndie nínga síndo, kó índa nga nijan kjo̱chókoón, kó sa̱ꞌíndajoo̱n ko̱jo ka̱tso̱yaa̱ nga ko̱jo kui ndasen tjíndo kjo̱a̱a̱ nga jesón ndií.
12Kó nga jachó kui jaá ki̱a̱ nínga tikón Joo̱b, ta̱ kjín kamábeni, kó nde ngiti̱ kamábejín tsi kui, ta̱nga nga jachó kje̱n nínga tikón, ítsꞌi̱yanii̱ nga ꞌniú askjandá, sꞌe̱ iskjíndiyájón ńjño xi ndyi̱yajá, kó indyiaá ndiso to̱ko̱ tsi̱ꞌe̱ nga akó nga ndasen síndo ko̱jo kui nga. 13Kó yito ni̱xtjin, yito ni̱xtji̱e̱n nga kisꞌińdo tꞌanangi, nga ki̱a̱ nijan kisꞌińdojo̱ Joo̱b, kó nde ngojín kui jaá xi kamákón nga ngo ni katsoó, ngatꞌa̱ kamábe nga achichí ꞌniú ndajín kjiꞌi ni xi kamaá.
Currently Selected:
Joo̱b 2: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
