Joo̱b 29
29
Kꞌi̱e̱ tji̱e̱n fe ni xi katsó Joo̱b
1Ingo ndi̱yà, bi̱ katsó nginí Joo̱b:
2¡Achichí mejénna nga bo̱a̱ tsꞌén kotíjña̱ ngiñá an,
xikoó sá xí je ikitjá, kjiꞌanga kuí má Néná xi askonna!
3Kjiꞌanga kuí má bo̱a̱ xi katsꞌéntsijenna nga katsꞌénkjién ndiꞌií,
ni̱xtjin nga ta̱ngatꞌanii̱ kui ndiꞌií nga kamá kistsoꞌbá an nínga jñoó,
4¡kjiꞌanga kjindí ngase an, ko̱jo nga kisꞌiena ngaꞌniú,
Néná katsꞌénchikonñé ndiꞌana ngatꞌa̱ nda tsaꞌana!
5Kui ni̱xtjin jàn, kjiꞌanga Néná xí tsi̱ꞌe̱ ngayeje ngaꞌniuú kisꞌijñatꞌana,
kó ndína ki̱a̱ nijan kisꞌińdojo̱na,
6ngatsjéni̱xtjin kisꞌiejne̱ ntsjén xí kiꞌyójne̱ ki̱a̱ nga̱són yámíxa̱jne̱,
kó ti̱ kisꞌiejne̱ tsie isti̱ xi kiniꞌánkjiénjne̱,
7kjiꞌanga jáchó an nga̱ntjo̱a̱a̱ na̱xi̱ńdaá,
katseꞌéndièna nga kixi̱ tsꞌén katsꞌensée̱n xotaa̱,
8kjiꞌanga jáchó an,
já xo̱ngo̱ò kijíboaꞌá nga katsjandièna nga jaꞌa an,
kó xota̱ xi xchaá kixindyia kixi̱ má.
9Ngaskande xota̱ xi ꞌniú yandikoón
yíkjo tsꞌoa ngindyikón an,
10ko̱jo tsi tsíchji̱a̱ si̱e̱n,
ngatꞌa̱ na̱je̱n ngiti̱ katsꞌéntíyájín.
11Xota̱ xi tsintꞌiéna achichí tsjá kamaá,
kó nda tsíchji̱a̱ kjo̱a̱a̱ an kui xi kamábena.
12Ngatꞌa̱ katsꞌensée̱n xota̱ xi ni̱ma̱, xi ni̱ma̱ katsoó,
ko̱jo xota̱ xꞌi̱a̱n xi tsíꞌána nga ko̱siko̱jo an.
13Xota̱ xi je mejeén kjifesoón, katsꞌénchikonñéna,
kó ínchjín kꞌán xi je jesón xi̱ꞌii̱n achichí tsjá kamaá ngi̱jin ini̱ma̱a̱.
14Ngatsjéni̱xtjin nga kixi̱tsꞌèn katsꞌensée̱n xota̱ xi ngasee̱,
nga bo̱a̱ katsꞌen an,
xikónií tsi kui nii̱ xi ńjño xi tsajá an kamá.
15Án boá xi kamá an ndyi̱ko̱n xota̱ xi ti̱ka̱a̱,
án boá xi kamá an se xota̱ ni̱ma̱ xi kamájín kijií.
16Án boá xi kamá an na̱ꞌmii̱ xota̱ ni̱ma̱a̱,
án boá xi tsꞌaxiéꞌá an xota̱ xi xín nangii̱:
17Án boá xi katsꞌenkjié an ngaꞌniú xí kisꞌiee̱ xota̱ xi ꞌniú ndajiín,
kó ngiti̱ katsjandièjín ngasèe̱ nga ni xi ndajín katsꞌén.
18Ngaskande bi̱ tsꞌén katsꞌenkjó án:
Kjín ni̱xtjin kotíjña̱ ngase an, xikó maá tsomií ndáchíkoón,
kó je xchá án nga ko̱yà án kꞌi̱e̱ ndiꞌana.
19Xikónií tsi ngo yá xí tjitjíe̱ tꞌa ndáfoaa̱ kjimana yojona,
kó xikoó tsi yajájón má xoño tjiana.
20Ti̱ kisꞌijinna nga ꞌniú ngase xcha̱ndikónna,
ko̱jo nga xikoó tsi ꞌniú kꞌuijñá síkijí yáchjonyána ngi̱ya ndsa̱ án.
21Kjiꞌanga an xi tsíchji̱a̱ an, xió kisꞌińdo ngayeje xotaa̱,
kó nde ngojín xi tsíchji̱a̱, nga askoyaá nga an xi atixomáa̱.
22Ni xi tsíchji̱a̱ an nda kasasiee̱n xotaa̱,
kó achichí tsjá kamaá ni xi kixian an.
23Askoyaá ni xi tsíchji̱a̱ an, xikó má tsꞌén chiyaá stseé,
ko̱jo tsi xikó má tsꞌén tꞌanangii̱ nga koyaa̱ stsé xí sájín boaꞌaa̱.
24Tsi tsajnójo̱ an, nde kisꞌijinjiín,
kó achichí tsjá kamaá nga an askoꞌána.
25Án boá xi kixiyàa̱ ndi̱yà xí chjiéngá kijí,
kó xikó maá tsi ngo ngito̱ko̱ kamá an nga kisꞌijñajìi̱n,
án boá xi xikoó tsi ngo nda̱ re kamá an ki̱a̱ ngi̱jin jájuún,
án boá xi xikoó tsi katsꞌendajòo̱n kjiꞌanga askjandá.
Currently Selected:
Joo̱b 29: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
