Joo̱b 28
28
Soó kjo̱a̱kjínkoón
1To̱ntiboaa̱ ki̱a̱ ꞌnaxiéni ti̱xa̱na̱xi̱i̱,
kó to̱nsinieé ndiꞌií boá xi niꞌántsjieni.
2Ki̱cha̱ ndaa̱ ki̱a̱ ꞌnaxiéni ngi̱jin chojoo̱,
kó ki̱cha̱ kobree̱ ngi̱jin ndi̱jo̱o̱ ꞌnaxiéni.
3Xota̱ xi tsꞌénxá ngi̱ya ti̱xa̱na̱xi̱i̱,
boaꞌa ndiꞌí xí tsꞌentsíjee̱n nínga ꞌniú jñoó tꞌanangii̱,
kó mongase ndi̱jo̱ tsjakon
nínga ꞌniú kjii̱n ko̱jo nínga ꞌniú jñoó ti̱xa̱na̱xi̱i̱,
4ńꞌniú tsꞌénkjién kjiꞌanga fotjajen nínga nkꞌaa̱,
achichí ndojó ti̱xa̱ xi tsꞌénda,
kó fochó ngaskande nínga kji̱e̱ jmíjín xi fochó.
5Tꞌanangii̱ boá nínga ꞌboxiéni ni xi kjinie ko̱jo ni xi ꞌbi,
kó ki̱a̱ ngi̱ndie tꞌanangii̱ achichí sibéꞌyá.
6Ndi̱jo̱ yiꞌii̱ ꞌboxiéni ndi̱jo̱ safiro̱,
kó ngi̱jin chojoo̱ ꞌboxiéni to̱nsinié.
7Kui ndi̱ya̱à kji̱e̱ ngo ni̱sie je kamábe,
ko̱jo kji̱e̱ ngo cho̱ xi kjinie yojo siee̱n nga,
8kji̱e̱ ngo cho̱ tamá jè jaꞌa ki̱a̱a̱,
ti̱nde ngo xandi̱je̱ kji̱e̱ bejín kóchon kui ngi̱ndiee̱.
9Xota̱ xi tsꞌénxá ti̱xa̱na̱xi̱i̱ bokján ndi̱jo̱ tajaá,
kó ꞌbíndo tsijen ngindiee̱ na̱xi̱i̱,
10tsꞌeén ti̱xa̱ ndi̱jo̱ yiꞌii̱,
kó kotsijee̱n ni tsjakon xi tjiín,
11fochó ngaskande nínga tokjà ndejeèꞌ,
kósꞌe̱ kjiꞌá boá nga bokó
ni xi kisꞌińdoꞌmámára.
12Ñá tikón kjo̱a̱kjínkoón.
Ñání tikón ngi̱ndiee̱ kjo̱a̱kjíntakoón.
13Jmíjín xi be kókjiꞌi chjínií xota̱ nga̱sondiee̱,
ngatꞌa̱ jmí tsi kui nga̱sondiee̱ chji̱a̱ni.
14Nínga ꞌniú na̱nga̱a̱ ndáchíkoón, bi̱ tsó:
Kꞌi̱e̱jín tikón, kó ndáchíkón tiyaá, bi̱ tsó:
Ánjín tikónna.
15Kjo̱a̱kjínkoón ka̱májín to̱nsinié si̱ꞌantsieni,
ti̱nde ka̱májín to̱ntiboaa̱ nga,
16ti̱nde ka̱májín to̱nsinié xi nda ngasee̱,
ti̱nde ka̱májín ndi̱jo̱ tsjakon xi ꞌmí ónise̱ ko̱jo tsi ndi̱jo̱ safiro̱ si̱ꞌantsieni.
17Ti̱nde to̱nsinieé, ti̱nde chi̱tse̱én,
ti̱nde ni tsjakon xi ꞌniú chjií,
ka̱májín bo̱a̱ má kon kꞌuiín kjo̱a̱kjínkoón,
18¡ti̱nde ndi̱jo̱ koraa̱l, ti̱nde toꞌixkií, ka̱májín nga bo̱a̱ má kón kꞌuiín.
Kjo̱a̱kjínkoón chjí ngasenii̱ ta̱bo̱a̱jiín ndi̱jo̱ tsjakon xi chjií,
19ti̱nde ndi̱jo̱ topasio̱ xi tjín nangi Kuu̱, ka̱májín nga bo̱a̱ má kón kꞌuiín,
ti̱nde to̱nsinié xi ndaa̱ ka̱májín kui si̱ꞌantsieni.
20Ja̱ ti̱ ingo ndi̱yà kosíyángiñá án:
ñá kji̱ndi̱báni kjo̱a̱kjínkoón,
kó ñání tikón ngi̱ndiee̱ kjo̱a̱kjíntakoón.
21Tikónꞌmárií ngayeje xota̱ nga̱sondiee̱,
ko̱jo ngindyi̱ko̱n ni̱sie xi tjín nkꞌa jàn nga.
22Ndatsi kui xi tsꞌenkjiéná ko̱jo kjo̱a̱bo̱yaa̱
tsó nga be xò ꞌyá kuií bo̱a̱,
23ta̱kuítsí Néná xí be ndi̱ya̱à,
ko̱jo xi be kótsꞌèn sakóná.
24Néná be ngaskande nínga fetꞌanii̱ nga̱sondiee̱,
kó ti̱ be ngayeje ni xi ma ngindie nkꞌajmii̱,
25kjiꞌanga Néná katsjaá ngaꞌniuú tjo̱o̱,
ko̱jo nga tsꞌachi̱bo̱a̱ ndáfoaa̱,
26kjiꞌanga íjñaá ngo kjo̱a̱kiti stseé,
ko̱jo nga akoó ndi̱ya̱à cho̱ꞌo̱o̱n,
27askotsijen ndá ndaá kjo̱a̱kjínkoón, nga ki̱a̱ tikón,
kó kamámejeén askotꞌayákón, kó kamábe kókjiꞌi chjií.
28Kósꞌe̱ bi̱ katsoó ngayeje xota̱ nga̱sondiee̱:
tsi xcha̱ndikónjnú Ndi̱a̱a̱,
kó tsi ku̱i̱ta̱xínboaꞌájnúu̱ ni xi ndajiín
ja̱ jè kasakojnú kjo̱a̱kjínkoón.
Currently Selected:
Joo̱b 28: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
