Joo̱b 27
27
Xi ma jii̱n ndi̱yà nga tsíchji̱a̱ Joo̱b
1Joo̱b ti̱ tsíchji̱a̱ nginí, kó bi̱ katsó:
2Be án nga tikón Néná, kó jè jaꞌáxín kjo̱a̱ndana,
kui Néná xi tsi̱ꞌe̱ ngayeje ngaꞌniuú, je katsꞌénxtií ini̱ma̱na nga mejénjiín nga kixi̱ tsꞌén sa̱ꞌínsénna,
3ta̱nga tji̱e̱nga tikón nga̱sondie ini̱ma̱na,
tji̱e̱nga Néná tsꞌéntsjána tjo̱ xi tjéjén an,
4ndso̱ꞌba án ku̱i̱chji̱a̱jín ni xi ndajín,
ti̱nde najén án jmí kjo̱a̱ndiso ku̱i̱chji̱a̱jín.
5Tji̱e̱nga tikón an nga̱sondie,
ꞌniú kuichjiá an nga jmí jéjínna,
kó jmíni̱xtjin tsjandièjnúꞌun nga jún xi kꞌuiéjnú ngakixi̱.
6ꞌNiú kꞌuijñá an nga kixi̱ án,
kó nde ngojín ni̱xtjin nga tikón an xi sa̱ꞌínchꞌó ini̱ma̱na.
7¡Bo̱a̱ ngatamaa̱ kondra̱na xikoó xota̱ xi ꞌniú ndajiín,
kó ti̱ bo̱a̱ ngatamaa̱ xikoó xota̱ xi kixi̱jiín!
8Ngatꞌa̱ mí kjo̱a̱chiyá xi tjiín xota̱ xi ꞌniú ndajiín
ko̱jo xota̱ xi chejeé, kjiꞌanga Néná sa̱ꞌínkjiesón.
9A ku̱i̱ntꞌierií Néná kjiꞌanga ni̱ma̱ ka̱tso̱
nga ꞌniú nda̱ ka̱maa̱.
10A kꞌuiérií kjo̱a̱tsja nga ki̱a̱ kꞌuijñátꞌaa̱ xi tsi̱ꞌe̱ ngayeje ngaꞌniuú.
A ngatsjéni̱xtjin nga ku̱i̱chji̱a̱a̱ Néná.
11Kokomárajnúꞌun ngaꞌniú xí tjiín Néná,
kó kꞌuiꞌmájínjnúꞌun ni xi je índa xi tsi̱ꞌe̱ ngayeje ngaꞌniuú.
12Ta̱nga tsi je yàjnú kui nii̱,
míkjo̱a̱a̱ nga achichí kjo̱a̱chi̱ni xi ndokjo̱a̱jnú.
Xi ma jaán ndi̱yà nga tsíchji̱a̱ Sofaa̱r
13Kó Sofaa̱r, bi̱ katsó:
Néná xí tsi̱ꞌe̱ ngayeje ngaꞌniuú jè tikóndaa̱
ni xi tsja̱á xota̱ xi ꞌniú ndajiín,
kó bi̱ tsꞌén ka̱majeé:
14Ndatsi kjín ka̱ma ndií,
tjín xí ngi̱jin kjo̱a̱xcha̱án ko̱yà,
kó kje̱ꞌe xí ko̱yà bojó.
15Tsi tjín xí kꞌuíndo ngase,
ngo chiꞌin sa̱ꞌínkjiesón,
kó ínchjín xí kisꞌińdojo̱ nde ska̱ndátjéjín.
16Ndatsi tsie to̱n ko̱jo ńjño ku̱i̱ꞌítikó,
17ta̱nga nga fetꞌani, xota̱ xi kixi̱i̱
ko̱jo xi jmí jéjiín boá xi ka̱ma tsi̱ꞌe̱ ńjñoo̱ ko̱jo to̱o̱n.
18¡Xota̱ xi ꞌniú ndajiín, ndiꞌa xi katsꞌénda xikónií tsi xobí jè iskjinie,
kó nde ꞌniújín tikón, xikó maá ngo ndiꞌa ti̱ki̱e̱n.
19Cho̱n nga kjófé nga fetꞌanii̱,
ta̱nga nga kjo̱a̱ꞌaá, jè ni̱ma̱ kamá,
20¡achichí ni xi ndajín xi bixónieé, xikó maá tsi stsé bixónieé,
kó xikó maá tsi ngo tjo̱ꞌniú kjifé nga jñoó!
21Xtji̱e̱e̱n nínga fotjo tsꞌueé ndibá ngo tjo̱ꞌniú,
kó kui tjo̱o̱ ndeskande ndiꞌaa̱ skji̱níyá nga kjo̱jo.
22Néná ꞌniú ko̱tíjeé kó nde sa̱ꞌínjetakónjiín,
kó ndatsi mejeén nga kjo̱tjongii̱ yojoo̱, nde ka̱májiín.
23Nga sku̱i̱e̱ xotaa̱, sa̱ꞌíntsen má tsja,
kó ku̱i̱ꞌíxo̱bí maá nga ko̱jno̱kie.
Currently Selected:
Joo̱b 27: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
