Joo̱b 26
26
Joo̱b ta̱niján má katsꞌénxixió nga tsꞌénchji̱a̱ Bilndaa̱nd
1Tsꞌénmojnó chií má Joo̱b, nga bi̱ katsó:
2A bo̱a̱ tsꞌén bosíke̱je ji xota̱ xi ngo ni chjieén,
kó a bo̱a̱ tsꞌén ꞌnaxiéꞌé ji kui xi je ngiti̱ jmí ngaꞌniújiín.
3Kókjiꞌi kjo̱a̱botíxoma xi katseꞌée̱
ngo xota̱ xi jmí ni bejín xikoó an.
Kókjiꞌi kjo̱a̱kjínkón je akake nga bo̱a̱ se ji.
4ꞌYá xí asíko̱joo̱ nga bo̱a̱ tsó én xí kandokjo̱e̱ ji.
ꞌYá a̱siénni̱xtjin xi tsꞌaxieé kui eén.
Bilndaa̱nd tsíchji̱a̱ra ngase
5Ngaskande nínga ꞌniú na̱nga̱a̱ ndáchíkoón,
nga xota̱ xi je jesoón fotsié má nga tsakjón má.
6Tikón tsijen nga̱tsjo̱ó ngindyi̱ko̱n Néná,
kó ngaskande kjo̱a̱bo̱yaa̱ ma ꞌmájiín yojoo̱ nga.
7Néná boá xi katsꞌéntiyá nkꞌajmi#26:7 NkꞌajmiBi̱ tsó xo̱jo̱o̱n Xtji̱e̱e̱n ta̱ꞌin Nga én ebreoo̱ Safoo̱n. Kui jaꞌeén kuí boá xi tjón tjón íjñaá xota̱ Kanaa̱ ki̱a̱ na̱xi̱ Kasioo̱, kui xi tikón ta̱ꞌii̱n Palestina̱, kó kjo̱a̱a̱ nga kamátiyá ngase kui ngi̱ndiee̱ kuíni nga Xtji̱e̱e̱n ta̱ꞌin, kiꞌmí. Cf. Xsl 48:2. xi tikón xtji̱e̱e̱n ta̱ꞌin,
kó tikón tiya boá ngi̱ndie nínga íjñá, kó tꞌanangii̱ ngi̱jinꞌa̱sie̱èn tikón.
8Kuí boá xi mindyiá ndáfoaa̱ ki̱a̱ ngi̱jin ṉdi̱i̱,
kó nde jmí ni májiín ṉdi̱i̱, ndatsi é ndáfoaa̱.
9Ngojín xi be ngi̱ndie nínga botixómá Néná,
ngatꞌa̱ ngi̱jin ṉdi̱i̱ tikónjin.
10Ngo tsindió íjñaá ndáchíkoón,
kó ki̱a̱ ꞌboxiékjo ni̱xtjii̱n ko̱jo ni̱xtji̱e̱e̱n.
11Yásé xi kjiꞌiꞌniúnií nkꞌa jàn,
fotsiéndíkón má nga ntꞌié nda̱a̱ Néná.
12Ngaꞌniuú tsꞌénkjién nga tsꞌenkꞌájin ndáchíkoón,
kó kjo̱a̱kjínkoón tsꞌénkjién nga tsꞌénꞌoón cho̱ chꞌokjiꞌi raa̱b,
13A̱si̱énni̱xtjii̱n katsꞌénkjién nga tsja katsꞌénkꞌié nkꞌa jàn,
kó tsja má bo̱a̱ xi tsꞌénkjién nga tsꞌenkꞌién cho̱ chꞌokjiꞌii̱ ndáchíkoón.
14Kuí nii̱ xi bokóná kjo̱a̱a̱ ngaꞌniú jee̱,
ni xi yà kjo̱a̱a̱ kui, sꞌe̱ tsí ngo ni xi ta̱ꞌya ndaꞌyá.
Kó ngaꞌniú xí tjiín Néná, ꞌyá xí ka̱makjiín.
Currently Selected:
Joo̱b 26: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
