Joo̱b 22
22
Xi ma jaán ndi̱yà nga tsíchji̱a̱ Elifaa̱
1Kósꞌe̱ bi̱ katsó Elifaa̱, nda̱ xi chji̱a̱ni nangi Temaa̱n:
2Kó tsꞌén chjiénnií Néná xota̱ nga̱sondiee̱.
Xota̱ xi kjínkoón ti̱kuíní xi nda maá yojoo̱ ni xi tsꞌén.
3A tjín ni xi tsja ka̱maa̱ Néná, kjo̱a̱a̱ nga kixi̱ ji,
axa̱ a tjín ni xi sa̱ꞌín kuí, kjo̱a̱a̱ nga ngo ndi̱yà xí nda tiꞌmi ji.
4Ta̱nga a tjítsꞌenchꞌoóri kui kjo̱a̱a̱ nga yendikín jí,
axa̱ jè sa̱ꞌíndajin kjo̱a̱ xi tse̱, ta̱ngatꞌanii̱ nga tjiín jí kjo̱a̱ni̱ma̱takón.
5¡Ta̱nga achichí jè jaꞌatioo̱ nga ꞌniú ndajín ni xi tiniꞌín ji,
kó jée̱, jè nde ngiti̱ májín ꞌbíxki̱!
6Nde jmí kjo̱a̱jín nga kachjábé jí ńjñoo̱ ntsꞌie ji,
kó xota̱ ni̱ma̱a̱ kachjeꞌéxíi̱n ńjñoo̱ nga.
7Katseꞌéjìi̱n ndáfoa xota̱ xi kamáxíndaá,
ti̱nde katseꞌéjìi̱n nichinie xota̱ xi kamábojoó.
8Ta̱nga xota̱ xi cho̱o̱n katseꞌée̱ tꞌanangi,
kó katseꞌéndièe̱ nga ki̱a̱ kisꞌińdo,
9ínchjín kꞌán xi je kꞌien xi̱ꞌii̱n, jmí ni katseꞌéjìi̱n,
kó xota̱ xi xꞌi̱a̱a̱n kachjeꞌéxíi̱n ngayeje ni xi tjiín.
10Kuíni nga ngotꞌe̱ ꞌne̱ nga ngo foaꞌatjiyajòo̱n je síndo chja̱ya̱,
kó ta̱niján má tindakin ji,
11tsijénjín tsꞌeén jñoó,
kó xikó maá tsi ngaꞌniuú ngo ndejèꞌ tsꞌénkjifeé.
12A mí tsí nkꞌajmii̱ tikón Néná,
tsitsíjìi̱n kókjiꞌi nkꞌa síndo ńño ꞌna̱a̱.
13Kó jí bi̱ se ji nga Néná bejín ni xi niꞌín ji,
ko̱jo nga ṉdi̱ jñoó tsjandièjiín nga be tsi nda ko̱jo tsi ndajín tsꞌén xotaa̱.
14Ṉdi̱ jñoó tsjandièjiín nga bená,
kó kuí má bo̱a̱ xi fotsoꞌbá, ngo ndiè
ngaskande xi ingo ndieè nkꞌa jàn.
15A mejeénri ki̱a̱ kꞌuíntjíngí ji ndi̱yà xchá
xí kisꞌiṉtso̱ma xota̱ xi ꞌniú ndajiín.
16Ngatjaꞌátsjiee̱n nga kui xotaa̱ achichí ngindie ni̱xtjin nga jesón,
ngatꞌa̱ xikoó tsi ndáfoaa̱ ndejeèꞌ kijítjiboajo̱.
17Bi̱ katsoó Néná:
ti̱ꞌinkjinjne̱ yojòo̱.
Kó mí ni xi ndajín xi katsꞌénjo̱ kui Néná xi tsi̱ꞌe̱ ngayeje ngaꞌniuú,
18ta̱sá Néná achichí ni xi nda katsjaá ki̱a̱ ndiꞌaa̱.
¡Ta̱nga kjo̱a̱botíxomaa̱ kui xota̱ xi ndajiín, achichí kjin tikónnii̱ an!
19Nga sku̱i̱e̱ xota̱ xi kixi̱i̱ achichí tsjá ka̱maa̱,
nga je si̱ꞌankjie xota̱ xi ndajiín,
kó xota̱ xi jmíjéjiín ko̱jno̱kie nga bi̱ ka̱tso̱:
20¡Jè kiniꞌánkjié kondra̱ná,
ndiꞌií boá xi katsꞌénkjié kjo̱a̱cho̱o̱n!
21Ji Joo̱b, tjandée̱ Néná,
kó ngatꞌié nginií kjo̱a̱xió,
kó kuí boá xi ndatsꞌèn sa̱ꞌínkꞌijñá nginií.
22Te̱ꞌéndiè ji nga kui ko̱kóyaá én xí fotjonii̱ tsꞌoa,
kó ngi̱jin ini̱màa̱ tꞌíjin ji eén.
23Tsi kꞌuíchin nginíi̱ Néná, kuí boá xi skjinínkꞌaá,
kó bo̱a̱ tsꞌén nga ngiti̱ jmí kjo̱a̱ndasen kꞌuiéjín ngi̱ya ndiꞌàa̱.
24Tsi ki̱a̱ ku̱i̱chíjmijin ji ngi̱jin chojoo̱ kjo̱a̱cho̱o̱n,
achichí to̱nsinié kꞌuieé, xikó maá ndi̱jo̱ xi tjín ngi̱jin ndejeèꞌ,
25kó ti̱kuíní Néná xí tsi̱ꞌe̱ ngayeje ngaꞌniuú xi kꞌo̱xiéꞌaá,
kó achichí to̱ntiboa kꞌuieé.
26Ngatꞌa̱ kjiꞌá boá nga achichí tsjá ka̱maa̱
kjo̱a̱a̱ kui Néná xí tsi̱ꞌe̱ ngayeje ngaꞌniuú,
kó ngindyi̱ko̱n kui ka̱ma chjanínkꞌé kje̱n ji.
27Ka̱ma ko̱ndókjoée̱, kó kuí ku̱i̱ntꞌie̱é,
kó ka̱ma si̱ꞌinkjatjosén ji ni xi kiꞌmíyetjée̱n.
28Kósꞌe̱ nda kjo̱tjosón ngayeje ni xi kꞌuínde ji,
kó tsijen ka̱ma ndi̱yà nínga ku̱i̱ńtje̱.
29Néná ni̱ma̱kjo̱a̱ tsꞌénkꞌíndo xota̱ xi nkꞌakoo̱n,
kó tsꞌénkjastjíe̱n xota̱ xi ni̱ma̱kjo̱a̱a̱.
30Néná tsꞌéndé xota̱ xi jmí jéjiín,
kó tsi jmí jéjiín jí, ti̱ kꞌo̱xiéꞌaá nga.
Currently Selected:
Joo̱b 22: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
