Joo̱b 21
21
Xi ma juu̱n ndi̱yà nga tsíchji̱a̱ Joo̱b
1Joo̱b bi̱ katsoó Sofaa̱r:
2Ngotjón chií tasiénijónjnúꞌun,
kó kuí nii̱ xi xikoó tsi kui xi sa̱ꞌíndajonna.
3Chiyákjo̱a̱chiíjnúꞌun tji̱e̱nga kuichjiá an,
kósꞌe̱ ngije kamána,
ka̱ma ko̱jno̱jnú tsi mejénjnú.
4Néná boá xi tsꞌénchji̱a̱jo an, jmí tsi xota̱ nga̱sondie,
kuíni nga achichí nda̱ kjimana.
5Tasiénijónjnúꞌun, kó achichí ko̱e̱je̱ndikónjnú.
6Kjiꞌanga tsꞌenkjó án kui nii̱, ngaskande an fíndikónna,
kó ngaskande fotsié má ngayeje yojona.
7Míkjo̱a̱a̱ nga fesónjín xota̱ xi ꞌniú ndajiín,
ko̱jo achichí tsie maá nga ꞌbíndo nga̱sondie nga tsie kjo̱a̱cho̱n ꞌbeé.
8Be nga bi̱ yiꞌi, bi̱ nda ma ndií,
kó achichí tsjá maá nga tsen ndíndeè,
9nde ngojín ni xi mindyiandíkoón ngi̱ndie nínga síndo,
ngatꞌa̱ Néná nde ngojín ni xi ndajín xi tsangiyaa̱.
10Cho̱yojo xi̱ꞌin ko̱jo cho̱yojo ínchjiín achichí ndí ꞌbeé.
¡Nde ngojín xi fesón nga tsenxtió!
11Ndií monga, kó tsaton
xikoó cho̱tsa̱nga̱ xi ꞌbímajin ngi̱jin kꞌijñaá,
12achichí tsjatsꞌèn sie ko̱jo tié
nga fonie arpaa̱, ko̱jo yána̱xo̱o̱, ko̱jo tanboo̱.
13Xota̱ xi ꞌniú ndajiín achichí tsjatsꞌèn ꞌbíndo,
ngayeje ni̱xtjin nga síndo nga̱sondie,
kó nga fetꞌakjo̱a̱ achichí xió tsꞌén fesón.
14Bi̱ tsoó Néná:
Ti̱ꞌinkjinjne̱ yojòo̱,
ngatꞌa̱ mejénjínjne̱ xcha̱jne̱ ndi̱yàa̱.
15Jí boá kui Ne xi tjiín ngayeje ngaꞌniuú,
ta̱nga mejénjínjne̱ nga ji si̱ꞌanxátꞌajne̱,
jmí ni niꞌánjínjne̱ nga ji ndokjo̱a̱jne̱ ji.
16Ta̱nga jmí tsi ngi̱ya tsja tikón ni nda xi kjimaa̱ kui.
Kjin ngatꞌíjñána an, ni ndajín xi tsꞌénkjó xota̱ xi ꞌniú ndajiín.
17Kji̱e̱ ngo ndi̱yà ya nga xota̱ xi ꞌniú ndajiín
ngindie ni̱xtjin fesón.
Kji̱e̱ ngo ndi̱yà jè kamáyà
nga tjín ni xi ꞌniú ndajín xi ndibánié.
Kji̱e̱ ngo ndi̱yà jè kamáyà nga Néná ꞌniú katsꞌénxchán
tsi̱ꞌe̱ nga kjo̱a̱ni̱ma̱ katsꞌénkꞌatio.
18Kji̱e̱ ngo ndi̱yà jè kamáyà nga tjo̱o̱
kijíjo̱ xikoó tsi ngo xtjié,
ko̱jo tsi ngo tjo̱ꞌniú iskjifé.
19¡Bo̱a̱ra̱ ꞌmíjnú nga Néná boá xi botíjeé ndií, kjo̱a̱a̱ ni xi katsꞌén xi xchaá!
Ta̱nga xi xchaá boá xi tsoboaá nga ko̱ti̱je̱é,
tsi̱ꞌe̱ nga ku̱i̱ꞌíchjí ko̱jo sku̱i̱e̱ ni xi ka̱maa̱.
20¡Ndakjíꞌí nga kuí má xi sku̱i̱e̱ kjo̱a̱ni̱ma̱ xi kjo̱a̱ꞌatio!
¡Ko̱jo nga kuí má xi ngatamabe kjo̱a̱xcha̱án Néná xí tsi̱ꞌe̱ ngayeje ngaꞌniuú!
21Ngatꞌa̱ tsi je be nga ta̱chiboa tsí ni̱xtjin tikoón nga kꞌuijñá ngase.
Mí ndasen ka̱maa̱ kjo̱a̱ni̱ma̱ xi kjo̱a̱ꞌatio xota̱ ndiꞌaa̱ ngije kꞌien kui.
22A tjín xí ka̱maa̱ nga tsja̱á kjo̱a̱kjíntakón Néná,
xi kuí boá xi kotsijee̱n tsi nda ko̱jo tsi ndajín ndyi̱tsꞌèn ngayeje xotaa̱,
¡kó ngaskande xota̱ xi ꞌniú yandikoón kotsijee̱n nga!
23Tjín xí kjindí ngase nga fesón,
kó tjiín ngaꞌniú, ko̱jo tsjatjiín, ko̱jo xió síndo,
24nga ndyi̱ꞌbi tsie ntsjeén,
kó ngaskande bi̱ yiꞌi kjima.
25Kje̱ꞌe xí fesón xtinda
kó nde jmíni̱xtjin nga nda iskjinie nichinie.
26¡Ta̱nga nga jó tjiín nga kju̱i̱e̱són,
kó ki̱a̱ nga̱tsjo̱ó sꞌi̱kitsie maá chi̱ndo!
27Jè be an kótsꞌèn niꞌánkjójnú jún,
ko̱jo ni xi ndajín xi ꞌbíndajnú kondra̱na.
28Kuíni nga bi̱ ꞌmíjnú:
Ñá tikón ndiꞌa je xi kisꞌijñaa̱ kui chí cho̱o̱n.
Kó kamaá ndiꞌa jee̱ kui xota̱ xi ta̱nisién ndajiín.
29A bosíyájínjnúu̱ xota̱ xi ꞌbítso̱ma kui ndi̱ya̱à.
A bosiénnijónjínjnúu̱ ni xi ꞌbiníjmì.
30Xota̱ xi ꞌniú ndajiín nde jmí ni májiín kjiꞌanga tsꞌénxchán Néná,
ngatꞌa̱ fotjongírií yojoo̱ kjiꞌanga fochó kuí ni̱xtjii̱n
31Kó ꞌyá xí ka̱maa̱ ku̱i̱chji̱a̱ꞌa kjo̱a̱a̱ ni xi je katsꞌén,
kó ꞌyá xí ka̱maa̱ sa̱ꞌínkꞌíchjí kjo̱a̱a̱ ngayeje ni xi ndajín xi je katsꞌén.
32Kjo̱chó ni̱xtjin nga kongínkjánijín,
kó nga̱són nga̱tsjo̱ó kꞌuíndo xi skondá.
33Ńdiee̱ nangi soón achichí ixi ka̱maa̱,
achichí xota̱ ko̱e̱je̱kanijín,
kó kjín má xota̱ xi je kijítjoón.
34Ta̱kjo̱a̱ndaní nga mejénjnú nga si̱ꞌandajónjnúꞌun
nga si̱ꞌankjiénjnú én xí jmí ni chjíjiín,
¡ta̱soboá kjo̱a̱ndiso boá ngayeje ni xi ꞌmíjnú!
Currently Selected:
Joo̱b 21: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
