Joo̱b 20
20
Xi ma joó ndi̱yà nga tsíchji̱a̱ Sofaa̱r
1Kósꞌe̱ Sofaa̱r, nda̱ xi chji̱a̱ni nangi Naamaa̱t, bi̱ katsoó Joo̱b:
2Kjo̱a̱niꞌánkjóna tjítsꞌénná kjo̱a̱ꞌniú tsi̱ꞌe̱ nga kuichjiájoo,
kuíni nga tsá tjítsꞌée̱n yojona.
3Ni xi ndajín xi tꞌísé ji, an kasatiena, kó chꞌo mana,
ta̱nga jè be an kótsꞌèn kuichjiájoo.
4A yejín ji nga ngatsjéni̱xtjin nga bo̱a̱ kjiꞌi ni xi kamá,
ndeskande koó nga Néná katsꞌénda xota̱ xi tjoón kui nga̱sondiee̱,
5nga kjo̱a̱tsjaa̱ xota̱ xi ndajiín,
tsiejín ꞌbondíyaá,
ko̱jo nga kjo̱a̱tsjaa̱ xota̱ xi ꞌniú ndajiín,
ta̱ ngotjón tsí foaꞌa.
6Ndatsi achichí nkꞌakon ꞌboxié yojoo̱, xikoó nkꞌajmii̱,
kó sꞌijii̱n nga kjo̱chótꞌaa̱ ṉdi̱i̱ nga skjinínkꞌá to̱ko̱,
7ta̱nga kui xotaa̱ bo̱a̱ má kón xikoó yeꞌee̱,
kuíni nga xcha̱ja ngatsjéni̱xtjin,
kó xota̱ xi kamábee̱, nginijánjín sku̱i̱e̱ ngase,
8xcha̱ja xikoó ngo ńjñá xi ta̱ ngotjón foaꞌa tsí,
ko̱jo tsi xikoó ngo ni xi bokóná nga jñoó xi chaja,
9¡xota̱ xi kamábee̱, ngiti̱ sku̱i̱e̱jín ngase,
ti̱nde kui ngiti̱ sku̱i̱e̱jín ngi̱ndie nínga kisꞌijña!
10Ndií chjiéngá ku̱i̱ꞌaa̱ kjo̱a̱nda xota̱ xi ni̱ma̱a̱,
kó tsja ngajoo ni xi katsꞌénchejé na̱ꞌmii̱,
11ndatsi ngotꞌe̱ achichí ngaꞌniú tjiín xikoó tsi xo̱ngò,
ta̱nga ki̱a̱ nga̱tsjo̱ó chojo kamá nginí.
12Ni xi ndajiín achichí nda kichiniee̱ xikó maá ntsjieén,
nga ngaskande katomájón má,
13tsi nda kamaá ni xi ndajín xi katsꞌén,
nde íjñámasienjín kui nii̱,
ta̱sá to̱kó ndyi̱tomójónra̱.
14Ta̱nga ngije iskjinie kui nii̱,
ngi̱ya nga̱tsꞌo̱a̱ xikoó tsi xaán ye̱ kamá.
15Sa̱ꞌínkjasó nginí kui kjo̱a̱cho̱n xi je iskjiniee̱.
¡Néná boá xi sa̱ꞌiín kjo̱a̱ꞌniú nga kꞌo̱xié nginí!
16Xikónií tsi xaán ye̱ xi kꞌuí,
kó kuí boá kui nii̱ xi sa̱ꞌínkꞌién.
17Ngiti̱ sku̱i̱e̱jín xo̱ngàndántꞌieé, ko̱jo ndejeèꞌ,
ko̱jo ntsjieén ko̱jo ntsjeén.
18Ngayeje ni xi katsꞌén chjiéngá tsja̱ꞌóyá nginí,
ka̱májín kuí skjíbé, ti̱nde ka̱májín kui tsjatsꞌèn sa̱ꞌínkjién kui nii̱,
19ngatꞌa̱ kjo̱a̱ni̱ma̱ katsꞌénkjaꞌatio ko̱jo íjñámasien xota̱ ni̱ma̱a̱,
kó iskjíbé ndiꞌa xi jmíni̱xtjin kui katsꞌénda.
20Kuíni nga jmíni̱xtjin nga nda kꞌuíndo,
kó nde ngo ni tsꞌenkꞌángíjín, ta̱ngatꞌanii̱ kjo̱a̱xké nii̱,
21Ngayeje nii̱ xi iskjinie,
kuíni nga tsiejín kꞌo̱ndíyaá nga bo̱a̱ tsꞌén nda kꞌuíndo.
22Ndatsi tsie ni tjiín,
ngatsjéni̱xtjin nga nda̱ ka̱maa̱,
¡kuí boá xi kꞌo̱kanieé ngayeje ni xi ꞌniú ndajiín!
23Kjiꞌa má nga skji̱ni̱e̱ nichinie,
nga Néná ꞌniú sa̱ꞌínxchán,
kó ki̱a̱ kꞌo̱kanieé kjo̱a̱xcha̱án.
24Tsi ko̱nga nga ki̱cha̱ndojó ko̱yàní,
yáyojó si̱ꞌankꞌienni,
25kó kui yáyojó xi kꞌuieé, kjo̱a̱ꞌaxtikjaá yojoo̱,
kó ki̱cha̱ xi tikoón ndyi̱ko̱n kui yáyojoó, skítjií saa̱,
kósꞌe̱ achichí stsa̱kjonní.
26Jè tikónda ngo ngi̱ndie xi ꞌniú jñó nínga kjo̱chó,
ngo ndiꞌí xí jmí tsi xota̱ xi ítsié,
kuí xí sa̱ꞌínkjié kui ko̱jo ndiꞌaa̱.
27Nkꞌajmii̱ ngayeje xi ko̱ko̱ó jé xí katsꞌén,
kó tꞌanangii̱ kjo̱stjíe̱n tsi̱ꞌe̱ nga ko̱óngítaꞌin.
28Ni̱xtjin nga ꞌniú sa̱ꞌínxchán Néná,
ndií ko̱jo ndiꞌaa̱ ngo stsé ꞌniú ko̱e̱je̱tjiboajo̱.
29Bo̱a̱ tsꞌén tsꞌénjeé Néná xota̱ xi ꞌniú ndajiín,
kuí boá kui nii̱ xi sa̱ko̱ó ngatꞌa̱ jè bo̱a̱ tsꞌén tsꞌénchji̱a̱ eén.
Currently Selected:
Joo̱b 20: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
