Joo̱b 19
19
Xi ma uún ndi̱yà nga tsíchji̱a̱ Joo̱b
1Kó bi̱ katsó Joo̱b:
2Ngaskande kjiꞌání nga to̱kó si̱ꞌanꞌonjnúu̱ ini̱ma̱na,
nga chꞌo kꞌuínjnúꞌun.
3Ngotjón ngotjón chꞌo ꞌmíjnúꞌun.
¡A soboájín májnú!
4Ndatsi ja̱koxi̱ nga katsꞌenjé án,
yojona boá xi tjítsꞌenjo̱ an.
5Ta̱nga tsi jún xi nkꞌa ngase ꞌna̱xiéjnú yojojnú ta̱bo̱a̱jiín án,
nga niꞌánkjiénjnú kjo̱a̱ni̱ma̱ xi tsꞌénfoaꞌatio an, kondra̱ tsa̱ꞌa̱n.
6Ja̱ mejénna nga xcha̱jnú nga Néná boá xi tsꞌatájóna,
kó kuí boá xi íjñána ngo chja̱ya̱.
7Kjandayà má an nga míꞌá an nga tjín xí ko̱síko̱jona,
ta̱nga nde ngojín xi ntꞌiéna,
ti̱nde ngojín xi kixi̱ tsꞌén sa̱ꞌínsénna.
8Néná jè íchjána ndi̱yà, kó mejénjiín nga kjo̱a̱ꞌa an,
jè katsꞌénjñó ndi̱yàna.
9Jè jaꞌáxín kjo̱a̱cho̱nna, ko̱jo kjo̱a̱yandikónna,
10jè katsꞌénkjatsónna, kó jè kjiꞌme an,
jè xikoó tsi ngo yá xí kachjaníyá ko̱jo ja̱ma̱ katsꞌénna.
11Néná achichí ꞌniú katsꞌénxchánjo̱na,
nga ngaskande kondra̱ tsi̱ꞌe̱ katsꞌénna,
12xtín jájuún kijítsꞌuiéna nga askjanjo̱na,
¡kó nga ngo foaꞌatjiyajoo̱n ndiꞌana je síndo!
13Néná katsꞌén nga ngaskande ntsꞌié án je katsꞌénkjinna,
kó amingo̱na kotsijenna
kósꞌe̱ xikoó tsi xota̱ xi nde bejín ꞌyá kuií bo̱a̱ maa̱ an.
14Xota̱ xingi̱ án je katsꞌénkjinna yojoo̱,
xota̱ xi bena je katsꞌénchíyána.
15Xota̱ xi ki̱a̱ kisꞌińdo ndiꞌana ko̱jo chji̱ni̱e̱ꞌbona,
ngotꞌe̱ ꞌne̱ kotsijenna xikoó tsi ngo xota̱ xi nde bejínna.
16Tsíchji̱a̱a̱ moso̱na, kó katsꞌénsénjínna,
kó ngaskande indasén máa̱.
17Achichí chꞌoje̱n nda̱na, nga ngaskande chjo̱onna chikjo̱a̱jiín,
kó ndína achichí chꞌo maá.
18Ngaskande jáxóngo̱ó katsꞌénchꞌóna,
ngije fostjíe̱n an, tji̱e̱nmá chji̱a̱taꞌinna,
19ngayeje amingo̱na tsꞌenchꞌóna,
kó xota̱ xi ꞌniú tjó kamána, je kondra̱na síndona ngotꞌe̱.
20Tji̱xinna ko̱jo yojona jè tjisítꞌa ꞌniú má ńdana,
kó jè ta̱ yojońꞌniú án tsí xi tikón ngase.
21Jún já Amingo̱,
¡ngatamani̱ma̱jnú án!
Ngatꞌa̱ Néná boá xi katsꞌénkjiénakjo̱a̱.
22Míkjo̱a̱a̱ nga ndyi̱miyotji̱ngijnúꞌun xikó tjítsꞌénjo̱na Néná.
A kji̱e̱ tsiejínjnú nga ndyi̱niꞌánkjiétikónjnúꞌun.
23¡Achichí mejénna nga ngo xo̱jo̱n si̱tꞌa énna katsaki,
24ko̱jo tsi ngo chikjan ki̱cha̱ tie ngatsjéni̱xtjin si̱tꞌa!
25Jè be an nga tikón kui xi kꞌo̱xiéꞌána,#19:25 Xi kꞌo̱xiéꞌána: Yà jàn tsi Néná boá xi tsó, ko̱jo tsi kui xi chji̱a̱ ki̱a̱ 9:33-34; 16:19-21.
kó nga fetꞌani kuí boá kjo̱stjíe̱nni ngi̱jin tꞌanangii̱.
26Kó ndatsi ngije jatson yojona,
ti̱ kuí xí skuiéni an#19:26 Ti̱ kuí xí skuiéni an Néná: An, nga xota̱ an, mejeén bo̱a̱ tsó. Ingo xikó tsó: An, nga jmíjínna yojo. Néná.
27Ja̱koxi̱ boá nga án má xi skuie an,
ndyikón án má xi sku̱i̱e̱, kó jmí tsi ndyi̱ko̱n kje̱ꞌe xota̱,
¡achichí ni xi kjimaa̱ ini̱ma̱na nga kjo̱chó kui ni̱xtjii̱n!
28Ka̱mara̱ bi̱ kꞌuínjnú: míkjo̱a̱a̱ nga ndyi̱miyotji̱ngíi̱,
ngatꞌa̱ ndyi̱niꞌánkjójnú nga an boá xi konna kjo̱a̱a̱ ni xi ndajín xi kjimana,
29ta̱nga chónjnú yojojnú kjo̱a̱a̱ kjo̱a̱bo̱yaa̱,
ngatꞌa̱ kuí boá xi tsꞌénkjién Néná nga botíjeé ngayeje ni xi ndajiín,
kó bo̱a̱ tsꞌén nga xcha̱jnú nga tikón ngo xi tsꞌendájin kjo̱a̱a̱.
Currently Selected:
Joo̱b 19: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
