Joo̱b 18
18
Xi ma joó ndi̱yà nga tsíchji̱a̱ Bilndaa̱nd
1Kó bi̱ katsó Bilndaa̱nd, nda̱ xi chji̱a̱ni nangi Súaa̱j:
2Ngaskande kjiꞌání nga kókje ji ndso̱ꞌbe. Ti̱ꞌinkjé mára ji, kósꞌe̱ jaskan xchi̱boáni̱jmì.
3Míkjo̱a̱a̱ nga xikoó tsi cho̱ kjimaa̱ ji̱n,
ko̱jo tsi xikoó xota̱ chi̱ni.
4A beriítakín nga tsi tiniꞌínxchín jí nga kꞌuiyé ji kjo̱a̱ni̱ma̱ xi tibitjatí,
kósꞌe̱ sꞌi̱jñatiya tꞌanangii̱, ko̱jo nga ndi̱jo̱o̱ sa̱síkjo ngi̱ndie nínga síndo.
5Kjo̱a̱mindyioo̱n xota̱ xi ꞌniú ndajiín, kꞌo̱, xikoó ngo ndiꞌí,
kó ꞌna̱a̱ ngiti̱ sa̱ꞌíntsijenjín ngase,
6kui ndiꞌií inda inda kꞌo̱ ngi̱ya ndiꞌaa̱,
kó ta̱niján má ngiti̱ sa̱ꞌíntsijenjín ngase.
7Ngaꞌniú xí tjiín nga fotsoꞌbá, kju̱i̱e̱,
kó ti̱kuii ni xi tsꞌénkjó sa̱ꞌínchaja,
8ngatꞌa̱ ngo chja̱ya̱ kꞌuijñaá nínga kjo̱a̱ꞌa,
kó ki̱a̱ kꞌo̱kayà kui chja̱ya̱a̱,
9kó ńdatoꞌoo̱ kꞌuindyióꞌniúní,
ńꞌniuú kui chja̱ya̱ xi ikꞌíjñaá.
10Ngo chja̱ya̱ kꞌuijñáꞌmaá ngi̱jin tꞌanangii̱,
tsi̱ꞌe̱ nga ki̱a̱ kꞌo̱kayà nga kjo̱a̱ꞌa.
11Ndikoón ni xi ndajiín,
xindyiaá ta̱ nínga ndyi̱fí,
12xi bojó xi xíndaá sa̱ꞌínkjié ngaꞌniuú,
kó ngatsjéni̱xtjin nga ꞌniú ndajín ka̱maa̱.
13Chiꞌii̱n sa̱ꞌínkjié ngayeje tji̱xin yojoo̱,
kó kjo̱a̱bo̱yaa̱ sa̱ꞌínkjié tsja ko̱jo se.
14Chja̱ꞌáxiín kjo̱a̱xió xi tjiín ngi̱ya ndiꞌaa̱,
kó ki̱a̱ kongínjo̱ ngindyi̱ko̱n re xi mindyiandíkoón.#18:14 Re xi mindyiandíkoón Ingo jaꞌén xí boeꞌeé kjo̱a̱bo̱yaa̱.
15Ki̱a̱ kꞌuijñáꞌyá ndiꞌa xi tsi̱ꞌe̱, ta̱nga xikoó tsi kuijín tsi̱ꞌe̱ ka̱maa̱,
kó ndso̱ko̱a̱n asufre̱ ku̱i̱xo̱ nga̱soón kui ndiꞌaa̱.
16Kó xi̱ ja̱ma̱a̱,
ko̱jo ku̱i̱chá tjiaa̱ xikoó ngo yá.
17Nde ngojín xi kjo̱a̱ꞌátsjiee̱n kui,
kó nde ngojín xi sa̱ꞌínkaxoma jaꞌeén ki̱a̱ ndi̱yàtieé.
18Nínga tsijee̱n tikón, kó ki̱a̱ ku̱i̱chíjmijin nínga jñoó,
kó ko̱ꞌna̱xiéni kui nga̱sondiee̱.
19Kꞌuiéjiín xota̱ xkjín ki̱a̱ nangi nínga kisꞌijña,
ti̱nde kꞌuiéjiín xkjín xi ku̱i̱ꞌíndoo̱ ni xi kisꞌiee̱.
20Ndeskande ngo ndiè, ngaskande xi ingo ndieè tꞌanangii̱,
nga xotaa̱ fíndikoón, kó tsakjón má
nga be kótsꞌèn fekjo̱a̱.
21Bo̱a̱ tsꞌén fe xota̱ xi ꞌniú ndajiín,
kó kuí bí ngi̱ndie xi tsoboaá xota̱ xi bendikónjín Néná.
Currently Selected:
Joo̱b 18: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
