Joo̱b 17
17
1Jè mejeén ma kꞌien an,
jè má kjié ni̱xtjinna,
kó jè tikónda nga̱tsjòna.
2Ngayeje xota̱ xi síndo nga ngo foaꞌatjiyajonna xi ndyi̱mojnókiena,
kó tsꞌénkotsijée̱n kótsꞌèn ndyi̱tsꞌènxtína.
3¡Ji Ne, nángí ji yojòo̱ kjo̱a̱a̱ an, kó chínní,
ngatꞌa̱ ꞌyá xí bo̱a̱ sa̱ꞌín tsi jijín!
4Ji xi kiniꞌíntsobéjìi̱n kui xotaa̱,
ngata̱ boeꞌéndièjíi̱n nga kui xi sa̱ꞌín.
5Kui xi ta̱ngatꞌanii̱ nga ngo to̱n sa̱ꞌín
nga maa̱ botiñá ngo amingo̱,
¡kuí xi̱ꞌba̱ xi chjiéngá sku̱i̱e̱ kótsꞌèn kju̱i̱e̱són ndií!
6Ji Ne, jí boá xi tiniꞌínkjeꞌení kjo̱a̱soboá,
kó ngayeje xotaa̱ ndyi̱mojnókiena,
tjín xí ngaskande botítiajón má kje̱n án.
7Jè tjísichjá má ndyikón án ta̱ngatꞌanii̱ xi so xi ndakjaa̱n,
kó kjo̱a̱niꞌánkjóna, xikoó tsi ngo tji̱nkꞌi̱én kjimá.
8Kjiꞌanga bena xota̱ xi ndaa̱,
achichí fíndikoón,
kó xota̱ xi jmíjéjiín kjánjo̱ xota̱ xi ꞌniú ndajiín.
9Xota̱ xi kixi̱i̱, fíra ndi̱yà xí tjimá,
kó xota̱ xi jmíjéjiín ndyiojón ndyiojón kꞌuié ngasee̱ ngaꞌniú!
10Ndibájnú kó ka̱ma ku̱i̱xkánjo̱ ngasejnúꞌun,
ngatꞌa̱ jè be an nga ngi̱jinjnú
nde ngojín xota̱ xi kjínkón tjín.
11Jè kjimatiñana kjo̱a̱bo̱yaa̱,
kó kjifotjosónjín ni xi mejeén ini̱ma̱na nga ka̱ma,
12¡ta̱nga jún ndyi̱bosíkjojnú ni̱xtji̱e̱e̱n, kó ni̱xtjin ndyi̱niꞌánjnú!
¡To̱kó jñó ngase, kó jè kisisie̱èn ndyi̱ꞌmìjnú!
13Tsi kjo̱a̱bo̱yaa̱ xi kjo̱a̱chiyána,
kó jñoó je jaꞌatjiyajoo̱n nínga kjiꞌijña an,
14tsi nga̱tsjo̱ó xí na̱ꞌmi tꞌíxiáa̱n,
kó tsi chi̱ndoo̱ xi xikoó tsi ndichjá án ko̱jo na̱ana kjima,
15¡ja̱ ñání tikón kjo̱a̱chiyána, tsobo̱a̱
kó kui kjo̱a̱chiyaá, ꞌyá xí jaskan sku̱i̱e̱!
16Kjo̱a̱chiyaá nijan ko̱yàjo̱ an,
¡kó nijan kjónijínjne̱ nga jójne̱ ki̱a̱ ngi̱jin tꞌanangii̱!
Currently Selected:
Joo̱b 17: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
