Joo̱b 14
14
1Xota̱ nga̱sondiee̱, ta̱chiboa tsí ni̱xtjin ꞌbíndo,
kó tsie kjo̱a̱ni̱ma̱ foaꞌatio.
2Bo̱a̱ kón xikoó naxoó:
fotjo, kó nga bichá achichí tsá xíꞌniú,
bo̱a̱ kón xikoó tji̱nkꞌi̱e̱én
nga achichí tsá foaꞌa.
3Kó nga nde bo̱a̱ tsꞌén an titsitsijínní,
kó mejeén nga si̱ꞌindajin ji kjo̱a̱ xi tsa̱ꞌa̱n.
4ꞌYá xí ka̱maa̱ sa̱ꞌíntsjie ni xi ndándií. Ta̱ꞌyajínni.
5Ni̱xtjin tjiín nga ku̱i̱ndyionjne̱ nga̱sondie,
kó jí jè bo̱a̱ kase ji kókjiꞌi sá ka̱majne̱ nga ku̱i̱ndyionjne̱.
Jí boá xi ikꞌíjñí ji ngo tsindió xi jmíjín xi ma foaꞌatjoón.
6¡Ngiti̱ tsitsijíi̱n! Xióchíi̱n ꞌne̱.
¡Te̱ꞌéndiè ji nga tsjatsꞌèn sa̱ꞌínkjién to̱n xi je katsꞌén nga ngo ni̱xtjii̱n!
7Ngatꞌa̱ yá xí je ikichaá, síndo ngase ja̱ma̱a̱,
kó ka̱márií nga xtjóntsꞌién nginí.
8Ka̱maxchárá ja̱ma̱a̱ ki̱a̱ tꞌanangii̱,
kó kjo̱ndora̱ tjatsꞌen kui yaá ki̱a̱ ngi̱jin ńdie kixií,
9ta̱nga ngije sa̱ko̱ó ndáfoa,
xtjóntsꞌién nginí, ko̱a̱ja̱ nginií naxó, kó kꞌuié nginií tjia,
xikó maá ngo yá xí sꞌe̱ kisitji̱e̱ má.
10Ta̱nga tsi xota̱ nga̱sondiee̱, xi ko̱yà,
kó tsi ta̱ ki̱a̱ tsí tji̱e̱n fe kjo̱a̱mindyioo̱n,
ñání fochó ngijee̱.
11Xikó tsꞌén chaja ndáfoaa̱ ndáchíkoón,
ti̱ bo̱a̱ ti̱ tsꞌén fe, ko̱jo xíyà ndejeèꞌ nga.
12Bo̱a̱ tsꞌén nga xota̱ nga̱sondiee̱ ꞌme, kó ngiti̱ foaꞌáꞌyájiín.
Tji̱e̱nga tikón nkꞌajmii̱, kꞌuiéjín ngo xota̱
xi kjo̱a̱ꞌáꞌyaá ngije kjiꞌiféjo̱ kjo̱a̱bo̱yaa̱.
13Achichíra̱ ndakjiꞌi tsi kꞌuijñíꞌmí ngotjónní ki̱a̱ nga̱tsjo̱ó,
ngaskande nga xi̱xió kjo̱a̱xcháa̱n,
tsi kꞌuijñí ji ngo ni̱xtjin nga kjo̱a̱ꞌátsjien nginií án.
14Tsi ko̱yà xota̱ nga̱sondiee̱, a kꞌuijñá nginí.
Ngayeje ni̱xtjin nga kotíjña̱ an, skoya an,
ngaskande nga sꞌi̱jñandé án kjo̱a̱a̱ kjo̱a̱bo̱yaa̱.
15Kósꞌe̱ nga ko̱ndókjo̱e̱ni, an sa̱ꞌinseén,
kó ka̱mamejeén tsitsíjinní,
ngatꞌa̱ jí boá xi kiniꞌíndení.
16Ta̱nga ngotꞌe̱ ꞌne̱ tiꞌbíxki̱ ji chi̱bo̱a̱ ndsa̱ko án,
kó nde xꞌe̱xki̱jínra̱ ji jéna.
17Ngora̱ koxta̱ ku̱i̱ndyie ji ngayeje kjo̱a̱tsobéna,
kó si̱ꞌinjetakínraní ngayeje jéna.
18Kjénní nga na̱xi̱ xi bixóndoó, ngiti̱ tjoninkꞌajín nginí,
kó ndi̱jo̱o̱ sasíkjo ngi̱ndie nínga síndo.
19¡Ngaꞌniuú ndáfoaa̱ tsꞌenkjié ndi̱jo̱ yiꞌii̱,
kó stsé ꞌniuú fíjo̱ xa̱a̱ tꞌanangii̱,
kó jí ti̱ boá ti̱ tsꞌén niꞌínkjié ji kjo̱a̱chiyájne̱ nga.
20Ngatsjéni̱xtjin nga jí boá xi ꞌniú ngase ji,
kó niꞌíncheje ji xota̱ nga̱sondiee̱,
niꞌínkjatsén jí kje̱n,
sꞌe̱ jaskan nangíyé ji ki̱a̱ ngi̱ya nga̱tsjo̱ó.
21Tsi jaskan si̱ꞌandikón ndií, jè ngiti̱ sku̱i̱e̱jín kuí kui nii̱,
ko̱jo tsi ni̱ma̱kjo̱a̱ si̱ꞌan, ngiti̱ ka̱makjínjiín kui nii̱.
22Ta̱kuítsí xi so xi ndakjaa̱n xi sku̱i̱e̱ yojoo̱,
kó achichí ndasen ka̱maa̱ ini̱ma̱a̱.
Currently Selected:
Joo̱b 14: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
