Joo̱b 13
13
1Ngayeje kui nii̱, ndyikón án má xi je kamábe,
kó ti̱ je tsintꞌie an, ko̱jo je kamákjínna nga.
2Ni xi je yàjnú jún, ti̱ je be an nga,
bejiínko̱n an nga jún xi ya ngasejnú xikoó an.
3Ta̱nga ta̱sá Néná xí tsi̱ꞌe̱ ngayeje ngaꞌniuú kuichjiájo an,
ngatꞌa̱ mejénna kꞌoxiéꞌá an yojona kjo̱a̱a̱ ni xi kjimana,
4ngatꞌa̱ nga ja̱koxi̱, xota̱ ndiso boá jún,
kó bo̱a̱ kónjnú jún xikoó chji̱ni̱e̱ndiki xi jmíjín xi tsꞌéndíkii̱.
5¡Tsi ta̱sá kjókjojnú ndso̱ꞌbájnú,
kuí nii̱ xi ko̱kó nga xota̱ xi kjínkónjnú!
6Ngotꞌe̱ ꞌne̱, ngo kjo̱a̱nda kuíꞌájnúꞌun,
ndaꞌyá májnúꞌun, kó tasiénijónjnúu̱ énna:
7A kꞌuindísójnú nga si̱ꞌankjiénjnú jaꞌeén Néná,
kó a kꞌuindísójnú nga kongínjindajo̱jnú kuí.
8A niꞌánkjójnú nga ngo kjo̱a̱nda ndyi̱niꞌánjnúu̱
nga jún xi xota̱ xi fíjindojo̱ Néná kjimajnú.
9Kó tsi Néná xí skótꞌajnú jún,
a ka̱má ko̱jno̱chajnú kuí,
xikó tsꞌén mojnóchàjnú ngo xota̱.
10Ta̱sara̱ Néná sa̱ꞌínxchánjo̱jnú,
ngatꞌa̱ tjín xota̱ xi ndyi̱mongínjnúu̱ kjo̱a̱ndaa̱.
11Nga ja̱koxi̱, ko̱nda̱konrajnú kjo̱a̱jee̱,
kó júnra̱ xi kꞌo̱kaniéjnú ndikoón!
12Jún ndyi̱ndokjo̱a̱jnú ngo énkjínkón xi jmí ni chjíjiín,
kó ni xi ndyi̱ꞌmìjnú nga ndyi̱ꞌnaxiéꞌájnú yojojnú,
xikónií tsi kjibixóndó xikoó ndásee̱.
13Ta̱sá ndaꞌyájnúꞌun, án mára kuichjiá an,
kósꞌe̱ jaskan ta̱ xikó ngatamana ngijee̱.
14Ánní nga ti̱ aa̱n xi sa̱ꞌinꞌóo̱n yojona,
kó míkjo̱a̱a̱ nga ndajín sa̱ꞌinjo̱ an kjo̱a̱mindyionna.
15Néná boá xi kjimaꞌniáko̱n an, ndatsi kui xi mejeén sa̱ꞌínkꞌiénna,
ta̱nga kꞌoxiéꞌá án yojona ngindyi̱ko̱n kui.
16Kó ti̱kuíní bo̱a̱ xi kꞌo̱xiéꞌána,
ngatꞌa̱ nde ngojín xota̱ xi ꞌniú ndajín
xi ka̱maa̱ kjo̱chó ngindyi̱ko̱n kui.
17¡Nda má tasiénijónjnúꞌun ni xi je tikóndana nga kuichjiá an!
18Ngotꞌe̱ ꞌne̱, kꞌoxiéꞌá an yojona,
kó jè be an nga Néná sku̱i̱e̱ nga jmíjéjínna.
19Tsi tjín xí mejeén ko̱óngítaꞌinna,
ta̱sá xió kotíjña̱ an, kósꞌe̱ ngatꞌien an ngijee̱.
20Ji Ne, ta̱ jó tsí kjo̱a̱nda xi míꞌaá,
tsi ko̱e̱ꞌéní, nde chjiénjín nga ji kotíjña̱ꞌmaa.
21¡Ngiti̱ botíjéjín ngasení,
ti̱nde ngiti̱ boeꞌéndièjín ji nga stsakjon ngase an!
22Chji̱e̱ꞌéní nga kꞌoxiéꞌá an yojona,
kó an kuichjiájoo,
kó tsi ji xi bo̱a̱ tsꞌén mejeén, an tjón kuichjiá an,
kósꞌe̱ ji ndokjo̱e̱jení ngijee̱.
23¡Tꞌíyéní kókjiꞌi ni xi ndajín ko̱jo kókjiꞌi jé xí katsꞌen an!
¡Takéní nínga katsꞌenkjatsoón ndso̱ꞌba án!
24Ánní nga mindyinꞌmíní.
Ánní nga kondraa̱ kiniꞌínní.
25Ánní nga an timiyitji̱nginí,
xi ye ji nga án boá xikoó ngo xka̱ kixí xi fíjo̱ tjo̱o̱.
26Jí boá xi tifongitaꞌínní kjo̱a̱a̱ ni xi ndajín,
¡kó tibotíjéní kjo̱a̱a̱ jé xí katsꞌen an ndeskande koó nga xo̱ngò án!
27Jè xikoó tsi ńꞌniúki̱cha̱ tjitáꞌniuú an,
ta̱jmì chi̱bo̱a̱ní nga tichindéní,
¡ngo ndsa̱ko án kjien an,
kó ji ki̱a̱ ꞌmitji̱ngíní!
28Yojona je kjife, xikó maá tsi je kjifondo,
xikó maá ngo ńjño xi kjinie xobií.
Currently Selected:
Joo̱b 13: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
