Joo̱b 12
12
Xi ma jaán ndi̱yà nga tsíchji̱a̱ Joo̱b
1Kó Joo̱b, bi̱ katsoó Sofaa̱r:
2¡Nga ja̱koxi̱ jún boá xi mostroo̱ xota̱ na̱xi̱ńdaá!
¡Kó ngije ko̱yàjnú, kju̱i̱e̱ kjo̱a̱kjínkoón!
3Ta̱nga ti̱ tjín xko̱a̱tokò án nga,
kó júnjín xi kjínkón ngasejnú, ta̱bo̱a̱jiín an.
¡Kó ꞌyá xí bejín ni xi ndyi̱ꞌmìjnú jún!
4Ngasꞌe̱, kjiꞌanga tsíchji̱a̱a̱ Néná,
ngatsjéni̱xtjin nga katsꞌénsénna,
ta̱nga ngotꞌe̱ ꞌne̱,
ngaskande já amingo̱na mojnókiena,
ngayeje xotaa̱ mojnókiena ndatsi kixi̱ an.
5¡Xota̱ xi jmíjiín kjo̱a̱xti, nde niꞌínjín maá
nga chji̱a̱taꞌin xota̱ xi ndyi̱foaꞌatio kjo̱a̱ni̱ma̱a̱!
6Xota̱chejeé nda ngase ꞌbíndo,
kó ꞌniú ꞌbíndo xota̱ xi chꞌo tsoó Néná,
ngatꞌa̱ kuí boá xi katsjaá ngayeje nii̱.
7Ta̱nga tasíyàjnúu̱ cho̱o̱, kó kuí ko̱kóyájnú,
tasíyàjnúu̱ ni̱sie xi tjín nkꞌa jàn, kó kuí ka̱tso̱yàjnú,
8tasíyàjnúu̱ tꞌanangii̱, kó kuí ko̱kóyájnú,
tasíyàjnúu̱ tji̱o̱ xi tjín ngi̱jin ndáchíkoón, kó kuí ka̱tso̱yàjnú.
9Ngayejee̱ nga je be
nga Néná boá xi katsꞌénda ngayeje nii̱.
10¡Néná boá xi tjiyátsjà
ini̱ma̱a̱ ngayeje xi tjín nga̱sondiee̱!
11Xikótsꞌèn tji̱bo̱a̱nijoo̱n ntꞌieé ngayeje nii̱,
kó najee̱n be kó chinie ngayeje nii̱,
12xota̱ xi je kjín nónií nga síndo
ma kjínkón, ko̱jo makjiín ngayeje nii̱.
13Néná tjiín kjo̱a̱kjínkón ko̱jo ngaꞌniú,
kó kuí boá xi ꞌbínda ngo ni, kó fotjosón kui nii̱.
14Tsi Néná tsꞌénkixóndó ngo ni,
jmíjín xi ka̱maa̱ skjinínkꞌá nginí.
Tsi Néná xi ku̱i̱ꞌíjñaꞌniú ngo xota̱,
nde ngojín xi ka̱maa̱ ku̱i̱ꞌíjñandé.
15Tsi mejénjiín sa̱ꞌínkaꞌa stseé,
ngayeje kꞌijñaá nga xí,
ta̱nga tsi mejeén nga ko̱a̱ꞌa,
ngayeje tꞌanangii̱ nga sꞌingandá.
16Ngi̱ya tsja tikón ngaꞌniuú, ko̱jo kjo̱a̱kjínkoón,
ngi̱ya tsja tikón xi ꞌboṉcha̱a̱, ko̱jo chꞌíi̱ncha̱joo̱.
17Néná boá xi tsꞌén nga chaja kjo̱a̱kjínkoón xota̱ xi kjínkoón,
kó nga xota̱ xi be tsi nda ko̱jo tsi ndajín ndyi̱tsꞌèn xotaa̱, ma tsobéjii̱n.
18Kuí boá xi tsꞌenkjié xaá xota̱ xi ndajín xi botixómaá,
kó xikoó tsi ngo ńꞌniú ꞌbítꞌa ndáyaá,
19kuí boá xi foaꞌáxiín xaá chináꞌmii̱,
kó tsꞌenkjiékjo̱a̱ xota̱ xi tjiín ngaꞌniuú,
20xota̱ xi tsjá kjo̱a̱botíxomaa̱ bókjo tsꞌoa,
kó tsꞌén nga xota̱ xi xchaá
chaja kjo̱a̱kjínkoón.
21Néná tsꞌénkjáꞌa kjo̱a̱soboá
xota̱ xi tjiín ngaꞌniú ko̱jo xi yandikoón,
22Néná boá xi ꞌbijñá tsijen
ti̱xa̱na̱nga̱a̱ tꞌanangii̱,
kó ꞌbijñá tsijen kjo̱a̱bo̱yaa̱,
23kuí boá xi tsꞌénkjín na̱xi̱ńdaá, ko̱jo tsi tsꞌenkjiékjo̱a̱,
kuí boá xi tsꞌéntsójó, sꞌe̱ ꞌbitíkó nginí.
24Néná boá xi tsꞌén nga xota̱ xi botixómaá
chíyaá kjo̱a̱kjíntakoón
tsi̱ꞌe̱ nga ngiti̱ sku̱i̱e̱jín mí ni xi sa̱ꞌín.
25Kó kꞌuitsómá nínga jñoó
nga sti̱ngí xikoó tsi xota̱ xi ti̱ka̱ ko̱jo tsi xota̱ xi chꞌi̱.
Currently Selected:
Joo̱b 12: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
