Joo̱b 11
11
Ni xi tjón katsó Sofaa̱r
1Sofaa̱r nda̱ amingoo̱ Joo̱b xi chji̱a̱ni nangi Naamaa̱t, bi̱ katsó ngije tsintꞌié ni xi katsó Joo̱b:
2¡Ngayeje én xí ta̱xkiya ndokjo̱a̱a̱,
chjiéngá kꞌuieé ngo ngakixi̱!
¡Jmí tsi kjo̱a̱a̱ nga tsie ko̱ndókjo̱a̱,
sꞌe̱ bo̱a̱ kjiꞌi ngayeje ni xi kandokjo̱a̱a̱!
3A jmíjín xí ku̱i̱chji̱a̱ kjo̱a̱a̱ ngayeje kui én xí ta̱xkiya tindokjo̱e̱ ji.
Kó a ko̱jno̱che jí kjo̱a̱a̱ nga jmíjín xi ni ka̱tso̱o̱.
4Kixi̱ boá ni xi tsꞌénbokoyá an, tꞌísé ji,
kó tsjie tiꞌnaxié ji yojòo̱.
5¡Achichí mejénna skuie an nga Néná xí ku̱i̱chji̱a̱ katsaki,
kó nga ti̱kuii xi ko̱óngítaꞌii̱n,
6kó nga ko̱ko̱ó ni xi tjiꞌmaá kjo̱a̱kjínkoón!
Kui ni xi jó bo̱a̱ kjiꞌi chjií xikoó kjo̱a̱cho̱o̱n.
Bo̱a̱ tsꞌén nga ka̱ma xche̱ ji
nga Néná, jmí tsi bo̱a̱ tsꞌén atíjeé
xikó tsꞌén tsoboaá nga ko̱tíjeé katsaki.
7A beriítakín ji nga ka̱maa̱ xche̱ ji
ni xi tjiꞌmaá Néná.
A ka̱maári kixi̱ ka̱ma ji, xikoó kui Néná xi tjiín ngayeje ngaꞌniuú.
8¡Jmíni̱xtjin ka̱ma xche̱ ji kui nii̱!
¡Ngatꞌa̱ nkꞌa ngase ta̱bo̱a̱jiín nkꞌajmii̱,
na̱nga̱ ngase ta̱bo̱a̱jiín ti̱xa̱na̱nga̱a̱,
9je ngase ta̱bo̱a̱jiín tꞌanangii̱,
kó tiyá ngase ta̱bo̱a̱jiín ndáchíkoón!
10Tsi Néná xí stso̱bo̱a̱a̱, kó tsi sa̱ꞌíndajin kjo̱a̱ xi tse̱,
ꞌyá xí ka̱maa̱ ku̱i̱ꞌíchjaá nga bo̱a̱ sa̱ꞌín.
11Ngatꞌa̱ Néná be boá ꞌyání xi xota̱ xi ta̱chiboa,
kó ti̱ be ꞌyání xi xota̱ xi ꞌniú ndajín,
kó a sa̱ꞌinsénjín.
12Xota̱ xi ta̱chiboaa̱, kjiꞌá boá nga ka̱makjínkón,
kjiꞌanga ngo bórró chjo̱on ku̱i̱ꞌé ngo ndí xí xota̱ ka̱ma.
13Tsi ngayeje ini̱màa̱ nga chjanínkꞌé ndse̱,
kó tsi ꞌniú chji̱e̱ꞌèe̱ Néná,
14kó tsi ngo jé kiniꞌín ji, sꞌe̱ si̱ꞌinkjìi̱n yojòo̱ kui jeé,
ko̱jo tsi ko̱e̱ꞌéndièjín ji nga ni xi kixi̱jiín kꞌuié ngi̱ya ndiꞌàa̱,
15ja̱ kjiꞌá boá nga ka̱ma chjanínkꞌé ji kje̱n nga jmíjéjiín,
kó ka̱ma ꞌniú ku̱i̱ndyin ji nga jmí ni ko̱nda̱kinjín ji.
16Xchi̱ya ndo̱jò ndójo̱ò ngayeje kjo̱a̱ni̱ma̱ xi ikitjatí,
ko̱jo tsi kjo̱a̱ꞌátsjiee̱n, ta̱ xikónií tsi ndáfoa xi je jaꞌa ka̱ma.
17Achichí tsjatsꞌèn ku̱i̱ndyin ji,
kó tsijen ngase ka̱maa̱, ta̱bo̱a̱jiín nga ndisꞌueé.
Kó ndatsi je kamájñoó, xikónií tsi ta̱jñó ka̱ma.
18Ka̱maꞌnítakín ji, ngatꞌa̱ kꞌuieé kjo̱a̱chiyá,
stsitsíjìi̱n nga ngo foaꞌatjiyajoo̱n, kó tsjatsꞌèn tsjáfé ji.
19Tsjajní ji, kó nde ngojín xi ku̱i̱ndyiándikoón,
kó achichí ka̱ma xota̱ xi ka̱mamejeén kjo̱a̱ndàa̱.
20Ta̱nga xota̱ xi ꞌniú ndajiín inda inda kꞌo̱ ndiꞌí ndyi̱ko̱n,
kó jmí ngi̱ndie sa̱kójiín nínga kꞌuíndo,
ta̱kuítsí kjo̱a̱bo̱yaa̱ xi ka̱ma kjo̱a̱chiyaá.
Currently Selected:
Joo̱b 11: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
