Nendiꞌamasien 9
9
Abimelee̱k
1Abimelee̱k ndií Jerobaa̱l kijí na̱xi̱ńdáꞌniú Sikee̱n nínga síndo ntsꞌi̱e̱ na̱aa̱n, kó tsíchji̱a̱jo ngayeje xota̱ ndiꞌaa̱ na̱aa̱n, nga bi̱ katsoó: 2ꞌNiú míꞌájnúꞌun, nga bi̱ tsꞌén ko̱si̱yájnúu̱ xota̱ xi chji̱a̱ni na̱xi̱ńdáꞌniú Sikee̱n: Mí ni xi nda ngase kjiꞌi májnú jún, a nga ko̱tíxomájnú nga ichítié ko̱jo kan ndií Jerobaa̱l, axa̱ nga ta̱ ngo tsí nda̱ xi ko̱tíxomájnú. Ngatꞌa̱ ngatjaꞌátsjienjnú nga jún ko̱jo an, ta̱ ngo jín ta̱ ngo yojó ñá.
3Kó já ntsꞌi̱e̱ na̱aa̱n, asíyaá ngayeje xota̱ xi chji̱a̱ni na̱xi̱ńdáꞌniú Sikee̱n, kó nda kasasiee̱n ngi̱jin ini̱ma̱a̱ ni xi katsó Abimelee̱k, ngatꞌa̱ bi̱ katsó: Xota̱ xingi̱ boá kui nda̱a̱. 4Kó ichítié ko̱jo kan to̱ntiboa xi chji̱a̱ni na̱ngo̱xi̱i̱ ne Baa̱l-Berii̱t katseꞌeé, kó Abimelee̱k katsjáxaá já xí tjimásón ko̱jo xi ndajín ndyi̱tsꞌèn tsi̱ꞌe̱ nga kijítji̱ngii̱, kó kui to̱o̱n xi íchjínií. 5Sꞌe̱ kijí ndiꞌaa̱ na̱ꞌmii̱ ki̱a̱ na̱xi̱ńdáꞌniú Ofra̱, kó katsꞌénkꞌién nga ichítié ko̱jo kan já ntsꞌi̱e̱ kui xi ndií Jerobaa̱l kamá, ta̱nga kisꞌijñaꞌma Jotaa̱n, ndí xí kjindií Jerobaa̱l, kó tsꞌangii̱ yojoo̱. 6Kósꞌe̱ kamátikó ngayeje xota̱ xi chji̱a̱ni na̱xi̱ńdáꞌniú Sikee̱n, ko̱jo xota̱ ndiꞌaa̱ Miloo̱ ki̱a̱ tꞌa yáꞌáxka̱a̱ xi ꞌniú tikoón, kui xi tikón ki̱a̱ kui na̱xi̱ńdáꞌniuú, kó ki̱a̱ katsꞌén re Abimelee̱k.
Ni xi kamaá Jotaa̱n
7Kjiꞌanga kiꞌmíyaà kui nii̱ Jotaa̱n, kijí kó kijínijíngí na̱xi̱ Ngerisii̱n, kó ꞌniú tsíchji̱a̱ nga bi̱ katsó: Ndaꞌyájnúꞌun xota̱ Sikee̱n, chistiko̱na boá Néná.
8Ngo ndi̱yà yaá kamámejeén jaꞌájin ngo xi ka̱ma ree̱, kó bi̱ katsoó yáꞌoliboo̱: Mejénjne̱ nga ji xi ka̱ma ji rejne̱, 9ta̱nga yáꞌoliboo̱ bi̱ katsó: Kó a ngiti̱ tsjajínñáa̱ xotaa̱ isti̱ xi tsꞌéndíkónní Néná, tsi̱ꞌe̱ nga an xi je ngase ka̱ma an, kjo̱a̱a̱ yá xí ngasee̱. 10Kósꞌe̱ bi̱ kiꞌmií yáꞌingoo̱: ¡Ja̱bíꞌi̱n, mejénjne̱ nga ji xi ka̱ma ji rejne̱! 11Ta̱nga bi̱ katsó yáꞌingoo̱: Kó an, a kꞌuijñámasien án nga tsja an to xi ixi, tsi̱ꞌe̱ nga an xi re ka̱ma an, tsi̱ꞌe̱ yá xí ngasee̱. 12Kó bi̱ kiꞌmií ńꞌniuú tostsi̱je̱è: ¡Ja̱bíꞌi̱n, mejénjne̱ nga ji xi ka̱ma ji rejne̱! 13Ta̱nga bi̱ katsó ńꞌniuú tostsi̱je̱è: A kꞌuijñámasien án bino̱ xi tsꞌenda an xi tsjaá kjo̱a̱tsja Néná ko̱jo xotaa̱, kó nga an xi sa̱ꞌintíyáa̱ yojona nga̱soón yá xí ngasee̱. 14Kósꞌe̱ ngayeje yá xí ngasee̱, bi̱ katsoó yándáꞌyaá: ¡Ja̱bíꞌi̱n, mejénjne̱ nga ji xi ka̱ma ji rejne̱! 15Kó yándáꞌyaá, bi̱ katsoó ngayeje yaá: Tsi ja̱koxi̱ nga jún ndyi̱chjaꞌájinjnúꞌun nga an xi ka̱ma an rejnú, ndibájnú, kó kꞌi̱e̱ ti̱ndyiongíjnú ngindiee̱ tji̱nkꞌi̱énna, kó tsi ko̱nda̱ꞌyáꞌénjínjnúꞌun, ndiꞌí ngatjatjona, kó ngatꞌítí yákón xí tjín ki̱a̱ nangi Líbanoo̱.
16Kó bi̱ katsó ngase Jotaa̱n, kó ngotꞌe̱ ꞌne̱ bosíyájnúꞌun tsi ja̱koxi̱ nga nda kiniꞌánjnú nga Abimelee̱k xi kiniꞌánjnú re, kó tsi ja̱koxi̱ nga nda kiniꞌánjo̱jnú Jerobaa̱l ko̱jo xota̱ ndiꞌaa̱, kjo̱a̱a̱ ngayeje ni nda xi katsꞌénjo̱jnú jún, 17ngatꞌa̱ na̱ꞌmina, jún boá xi askjantjéjnú, kó ndasénjín kamaá yojoo̱ ta̱ngatꞌanii̱ nga kamámejeén nga tsꞌaxiéꞌájnú ngi̱ya tsja xota̱ Mandiaa̱n, 18kó jún ngotꞌe̱ ꞌne̱ kondraa̱ xota̱ ndiꞌaa̱ na̱ꞌmina kixindyionjnú, ngatꞌa̱ kiniꞌánkꞌiénjnú ndií, kui já xí ichítié ko̱jo kaa̱n, nga ta̱ ngo ndi̱jo̱ kiniꞌánkꞌiensónjnú ngayejee̱, ko̱jo nga re kiniꞌánjnú Abimelee̱k ki̱a̱ na̱xi̱ńdáꞌniú Sikee̱n, kui xi ndií na̱ chji̱ni̱e̱ꞌboo̱, ngatꞌa̱ ntsꞌiejne̱ ma, 19tsi ja̱koxi̱ nga nda kiniꞌánjnú kui ni̱xtjii̱n kjo̱a̱a̱ Jerobaa̱l, ko̱jo xota̱ ndiꞌaa̱, ja̱ tsjangatamajnú jún kjo̱a̱a̱ Abimelee̱k, kó kui tsjangatamaa̱ kjo̱a̱a̱ jún. 20Kó tsi bo̱a̱jín kjiꞌi kui nii̱, ndiꞌí ngatjatjoo̱ Abimelee̱k, kó ngatꞌítí xota̱ xi chji̱a̱ni na̱xi̱ńdáꞌniú Sikee̱n, ko̱jo xota̱ ndiꞌaa̱ Miloo̱, kó ndiꞌí ngatjatjoo̱ xota̱ xi chji̱a̱ni na̱xi̱ńdáꞌniú Sikee̱n, ko̱jo xota̱ ndiꞌaa̱ Miloo̱ xi ngatsꞌenkjié Abimelee̱k.
21Kó tsanga Jotaa̱n nga jatjongii̱ yojoo̱, sꞌe̱ ki̱a̱ kijí ki̱a̱ na̱xi̱ńdáꞌniú Bee̱r, kó ki̱a̱ kisꞌijña ngatꞌa̱ katsakjónnií Abimelee̱k ntsꞌi̱e̱.
Kjo̱a̱xchán xí kiniꞌánjo̱ Abimelee̱k
22Ngije jaꞌa ján nó nga Abimelee̱k atíxomaa̱ na̱xi̱ńdá Israee̱l, 23Néná ngo a̱siénni̱xtjin xi ndajín katsangiyaa̱ Abimelee̱k, ko̱jo jáxíꞌín xi chji̱a̱ni na̱xi̱ńdáꞌniú Sikee̱n, kó kui jaá kondra̱ kisꞌińdoni Abimelee̱k, 24tsi̱ꞌe̱ nga kui ni xi ndajín xi kamátaꞌin nga ichítié ko̱jo kan ndií Jerobaa̱l, Abimelee̱k kꞌo̱kanieé, ngatꞌa̱ kuí boá xi katsꞌénkꞌién ntsꞌi̱e̱, kó xota̱ xi chji̱a̱ni Sikee̱n boá xi asíko̱jo. 25Kó xota̱ xi chji̱a̱ni na̱xi̱ńdáꞌniú Sikee̱n índo jáchéjé xí kisꞌińdoꞌmá ki̱a̱ ngi̱jin kꞌijñaá, kó katsꞌénchejeé ngayeje xota̱ xi jaꞌa kui ndi̱ya̱à, kósꞌe̱ kui nii̱ kiꞌmíyaà Abimelee̱k.
26Kó Ngaa̱l ndií Ebee̱nd jachójo̱ já ntsꞌi̱e̱ ki̱a̱ na̱xi̱ńdáꞌniú Sikee̱n, kó xota̱ xi chji̱a̱ni kui ngi̱ndiee̱ kamáꞌniátakón kui jaá. 27Kó kijí ki̱a̱ jno̱ nínga tjitjíe̱ tostsi̱je̱è, kó tsꞌenje̱n, sꞌe̱ tsꞌaxié ndaá kui too̱, kó katsꞌén sꞌué, kó nga tsꞌasꞌien na̱ngo̱xi̱i̱ nee̱, iskjinie ko̱jo katsꞌe, kó chꞌo katsoó nga tsíchji̱a̱taꞌin Abimelee̱k. 28Kósꞌe̱ Ngaa̱l ndií Ebee̱nd, bi̱ katsó: ꞌYá ta̱ kui bo̱a̱ xi Abimelee̱k, kó ꞌyá ta̱ kui bo̱a̱ xota̱ na̱xi̱ńdáꞌniú Sikee̱n tsi̱ꞌe̱ nga ñá xí mosoo̱ kui ka̱má. A kuijín bo̱a̱ xi ndií Jerobaa̱l, kó a kuijín bo̱a̱ Sebuu̱l xi mosoo̱ ma. Ka̱má si̱ꞌán xaá Jamoo̱r, kui nda̱ xi katsꞌénda na̱xi̱ńdáꞌniú Sikee̱n, ta̱nga jmí tsi mosoo̱ Abimelee̱k chjiéngá ka̱má. 29Achichíra̱ ndakjiꞌi tsi an xi botixomáa̱ kui nangii̱ katsaki, tsi̱ꞌe̱ nga an xi kongatji̱ngíi̱ Abimelee̱k, kó bi̱ra̱ xiáa̱n: Tꞌítikí jí jájúu̱n, kó tja̱tje ji kui ngi̱ndiee̱.
30Kó kjiꞌanga Sebuu̱l nda̱ ree̱ na̱xi̱ńdáꞌniuú tsintꞌié ni xi tsíchji̱a̱ Ngaa̱l ndií Ebee̱nd, achichí katsꞌénxchán, 31kó ꞌma ꞌma katsangiyaa̱ chji̱ni̱e̱ꞌén Abimelee̱k, nga bi̱ katsó én xí katsangiyaa̱: Ndií Ebee̱nd kui xi ꞌmí Ngaa̱l, ko̱jo já ntsꞌi̱e̱ jeꞌe kꞌi̱e̱ na̱xi̱ńdáꞌniú Sikee̱n, kó ndyi̱mindyiaꞌoón xota̱ na̱xi̱ńdáꞌniuú kondra̱ tse̱ ji. 32Kuíni nga ti̱ꞌingaꞌní jí, kó ji ko̱jo jájúu̱n ti̱ndyionꞌmájnú ki̱a̱ nínga jno̱o̱ nga jñoó tsi̱ꞌe̱ nga ku̱i̱ndyionxtíkjajnú. 33Kó nga kamángindyiojón nga ndibáꞌásie̱én ta̱niján má ti̱xkánjo̱jnú xota̱ na̱xi̱ńdáꞌniuú, kó kjiꞌanga Ngaa̱l ko̱jo xotaa̱ skjánjoo̱ ji, jí xí yé ji mí ni xi si̱ꞌinje̱ ji.
34Kó Abimelee̱k ko̱jo ngayeje xota̱ xi ki̱a̱ síndojo̱, jatjo nga jñoó, kó nijón xtín kamá nga ki̱a̱ kisꞌińdoxtíkjaá xota̱a̱ na̱xi̱ńdáꞌniú Sikee̱n. 35Kó Ngaa̱l ndií Ebee̱nd, ki̱a̱ kisꞌińdo ki̱a̱ nga̱ntjo̱a̱a̱ na̱xi̱ńdáꞌniuú, kó Abimelee̱k ko̱jo jájuún akó yojoo̱ nga jatjoni ki̱a̱ nínga síndoꞌmaá, 36kó Ngaa̱l nga kamábe xotaa̱, bi̱ katsoó Sebuu̱l: Tsitsíjìi̱n nga achichí má xota̱ xi ndyi̱ndibájáyáni ki̱a̱ na̱xi̱i̱. Kó Sebuu̱l, bi̱ katsó: Tji̱nkꞌi̱e̱én kꞌijñaá boá xi xota̱ tꞌísée̱ ji. 37Kó bi̱ katsó nginí Ngaa̱l: Jànꞌa̱n tsitsíjìi̱n kui xota̱ xi ndyi̱fotjokjá ngamasiee̱n tꞌanangii̱, kó ki̱a̱ ndi̱ya̱à yáꞌáxka̱a̱ já xí kotꞌasoón, ngo xtín jájún ndyi̱ndibá nga.
38Kó Sebuu̱l, bi̱ katsó:
—Ñá kꞌinje̱ ji ndso̱ꞌbe ꞌne̱, ngatꞌa̱ bi̱ kase ji tsie ꞌne̱: ꞌYá ta̱ kuii̱ bo̱a̱ Abimelee̱k, tsi̱ꞌe̱ nga mosoo̱ kui ka̱má. A kuijín bi̱ kui xota̱ na̱xi̱ńdaá xi achichí kamáchꞌoó. Ja̱ tja̱tje ji ꞌne̱, kó ti̱xkénje̱ ji.
39Kó Ngaa̱l ko̱jo xota̱ na̱xi̱ńdáꞌniú Sikee̱n jatjoxieni na̱xi̱ńdáꞌniuú, kó askjanjo̱ Abimelee̱k. 40Ta̱nga tsanga Ngaa̱l, kó Abimelee̱k tsangatji̱ngii̱, kó achichí kamá xota̱ xi kiniꞌánꞌoón ki̱a̱ nga̱ntjo̱a̱a̱ na̱xi̱ńdáꞌniuú. 41Kó Abimelee̱k, ki̱a̱ kisꞌijña ki̱a̱ Arumaa̱, kó Sebuu̱l tsangatji̱ngii̱ Ngaa̱l ko̱jo já ntsꞌi̱e̱, tsi̱ꞌe̱ nga ngiti̱ ki̱a̱jín kꞌuíndo ngase ki̱a̱ na̱xi̱ńdáꞌniú Sikee̱n.
42Kó nga kamángindyiojón, xota̱ na̱xi̱ńdaá kijí jno̱o̱, kó kiꞌmíyaà Abimelee̱k kui nii̱, 43kó Abimelee̱k ján tjín katsꞌén jájuún, kó kisꞌińdoxtíkjá ki̱a̱ jno̱o̱, kó nga kamábe nga xotaa̱ je ndyi̱fotjoni na̱xi̱ńdáꞌniuú, kijíkjánjo̱ kui jaá. 44Kó Abimelee̱k ko̱jo jájún xi síndojo̱ tsá kijí, kó ki̱a̱ kisꞌińdo ki̱a̱ nga̱ntjo̱a̱a̱ na̱xi̱ńdáꞌniuú tsi̱ꞌe̱ nga sa̱ꞌíntsi̱ꞌe̱, kó xi ngi jó xtín jájuún, ki̱a̱ askjanjo̱ ngayeje xota̱ xi kisꞌińdo ki̱a̱ nínga jno̱o̱, kó katsꞌénkjiesón kui xotaa̱.
45Kó Abimelee̱k, nga ngo ni̱xtjii̱n nga askjanjo̱ xota̱ na̱xi̱ńdáꞌniuú, kó katsꞌéntsi̱ꞌe̱ kui ngi̱ndiee̱, ko̱jo katsꞌénkjiesón xota̱ xi ki̱a̱ síndo, kó kisꞌietiya, sꞌe̱ na̱xa̱ atítsojo ngayeje ngi̱ndiee̱.
46Nga tsintꞌié kuí nii̱ ngayeje xota̱ xi ki̱a̱ síndo ki̱a̱ nínga tikón tarieé ki̱a̱ na̱xi̱ńdáꞌniú Sikee̱n, ki̱a̱ tsꞌasꞌien na̱ngo̱xi̱i̱ ne Berii̱t. 47Kó nga kiꞌmíyaà Abimelee̱k nga ngayeje xota̱ xi síndo ki̱a̱ tarieé na̱xi̱ńdáꞌniú Sikee̱n, je kamátikó, 48Abimelee̱k ko̱jo xota̱ xi ki̱a̱ síndojo̱, kijí ki̱a̱ na̱xi̱ Salmoo̱n, kó Abimelee̱k iskjíbé ngo jacha̱ xi yojó ngajó ngaboaá, kó tsatie tjiaa̱ ngo yá, kósꞌe̱ íjñasón tjiaa̱, kó bi̱ katsoó xota̱ na̱xi̱ńdá xí ki̱a̱ síndojo̱: Ni xi je kamáyàjnú nga katsꞌen an, ti̱ bo̱a̱ ti̱ ti̱ꞌánjnú ndatsa jún nga. 49Kó ngayeje xotaa̱ na̱xi̱ńdaá, ti̱ tsatie ngo tjiaa̱ ngo yá nga, kó ki̱a̱ kijítji̱ngii̱ Abimelee̱k, kó ki̱a̱ índo ki̱a̱ nínga tikón ngaꞌniuú kui ngi̱ndiee̱, kósꞌe̱ ítꞌandiꞌí, kó ngayeje xota̱ xi síndo tarieé jesón, mara̱ tsita̱ ngo mi̱ ínchjín ko̱jo jáxíꞌín xi jesoón.
50Jaskan Abimelee̱k kijí na̱xi̱ńdáꞌniú Tebee̱, kó íchjáꞌyá ko̱jo katsꞌéntsi̱ꞌe̱ kui ngi̱ndiee̱. 51Kó ngamasiee̱n kui na̱xi̱ńdáꞌniuú kisꞌijña ngo tarié xi ꞌniú, nínga kisꞌińdoꞌmá ngayeje jáxíꞌín ko̱jo ínchjiín, ko̱jo ngayeje xota̱ ngito̱ko̱o̱ na̱xi̱ńdáꞌniuú, kó kijínijíngí nkꞌaa̱ tarieé, kósꞌe̱ íchjá nga̱ntjo̱a̱a̱. 52Nga jachó Abimelee̱k kui tarieé, askjanjo̱ xotaa̱, kó ngije ku̱i̱ꞌítꞌandiꞌí nga̱ntjo̱a̱a̱ katsaki, 53ngo xota̱chjo̱on tsꞌajminieé ngo ndi̱jo̱o̱ molino̱ to̱ko̱ Abimelee̱k, kó tsakjan to̱ko̱. 54Kósꞌe̱ Abimelee̱k tsá tsíchji̱a̱a̱ nda̱ xi bosikójo, kó bi̱ katsoó: ꞌNa̱xié ji ki̱cha̱ndojóo̱, kó ti̱ꞌinkꞌinní, tsi̱ꞌe̱ nga jmíjín xi bo̱a̱ ka̱tso̱ nga ngo xota̱chjo̱on katsꞌénkꞌiénna. Kó kui nda̱ xi bosikójoo̱, tsꞌaxié ki̱cha̱ndojoó, kó katsꞌénkjaꞌaxtikjaá, kósꞌe̱ kꞌien Abimelee̱k. 55Kó xota̱ Israee̱l ngije kamábe nga je kꞌien Abimelee̱k, ńgó ńgó kijí ndiꞌaa̱.
56Kó Néná bo̱a̱ tsꞌén katsꞌénkꞌíchjí Abimelee̱k ni xi ndajín xi katsꞌénjo̱ na̱ꞌmii̱, nga katsꞌénkꞌién xi ichítié ko̱jo kan já ntsꞌi̱e̱. 57Kó Néná ti̱ atíjeé xota̱a̱ na̱xi̱ńdáꞌniú Sikee̱n kjo̱a̱a̱ ni xi ndajín xi katsꞌén nga. Kó bo̱a̱ tsꞌén jatjosón ni xi ndajín xi tsíchji̱a̱taꞌin kui xotaa̱ Jotaa̱n ndií Jerobaa̱l.
Currently Selected:
Nendiꞌamasien 9: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
