Nendiꞌamasien 10
10
Tolaa̱
1Jaskan ngije kꞌien Abimelee̱k, kisꞌijña ngo nda̱ xi kiꞌmí Tola̱, tsi̱ꞌe̱ nga kꞌo̱xiéꞌá xota̱ na̱xi̱ńdá Israee̱l, Tolaa̱ ndií Púaa̱ kamá, ndíndeè Ndondoo̱, kó Ndondoo̱ kuí boá xi kamá ngo nda̱ xi chji̱a̱ni xota̱ tji̱e̱e̱ Isakaa̱r, xi kisꞌijña na̱xi̱ńdáꞌniú Samii̱r, ki̱a̱ na̱xi̱ xi kamá tsi̱ꞌe̱ xota̱ tji̱e̱e̱ Efraii̱n. 2Tolaa̱ kan ján nó atíxoma ki̱a̱ na̱xi̱ńdá Israee̱l, kó ngije kꞌien, ki̱a̱ akjanijín na̱xi̱ńdáꞌniú Samii̱r.
Jaii̱r
3Jaskan ngije kꞌien Tolaa̱, kisꞌijña Jaii̱r, ngo nda̱ xi chji̱a̱ni Ngalaa̱nd, kui xi kan jó nó atíxoma ki̱a̱ na̱xi̱ńdá Israee̱l. 4Kó Jaii̱r, kantié kamá ndí xíꞌín xi kisꞌiee̱, kó kui jaá bórró kisꞌińdosoón nga kisꞌiṉtso̱ma, kó kantié na̱xi̱ńdáꞌniú kisꞌiee̱ ki̱a̱ nangi Ngalaa̱nd, kui ngi̱ndie xi ngaskande ngotꞌe̱ na̱xi̱ńdáꞌniuú Jaii̱r ꞌmí. 5Kó jachó ni̱xtjin nga kꞌien Jaii̱r, sꞌe̱ ki̱a̱ akjanijín ki̱a̱ na̱xi̱ńdáꞌniú Kamoo̱n.
Xota̱ amonitaa̱ atíxomaa̱ xota̱ Israee̱l
6Ta̱nga xota̱ Israee̱l, ti̱ ndajín katsꞌén nginí ngindyi̱ko̱n Néná, kó ki̱a̱ katsꞌénxátꞌaa̱ ne xi chji̱a̱ni ne Baa̱l, ko̱jo ne xi chji̱a̱ni na̱ ne Astaroo̱t, ko̱jo ne xi chji̱a̱ni nangi Siria̱, ko̱jo ne xi chji̱a̱ni nangi Sindoo̱n, ko̱jo ne xi chji̱a̱ni nangi Moaa̱b, ko̱jo ne xi chji̱a̱ni xota̱ tji̱e̱e̱ Amoo̱n, ko̱jo ne xi chji̱a̱ni xota̱ Filisteaa̱, kó índomasien Néná, kó ngiti̱ ki̱a̱jín katsꞌénxátꞌaa̱. 7Kó Néná ꞌniú katsꞌénxchánjo̱ xota̱ Israee̱l, kósꞌe̱ ki̱a̱ katsꞌénkꞌasꞌien ngi̱ya tsja xota̱ Filisteaa̱, ko̱jo ngi̱ya tsja xota̱ tji̱e̱e̱ Amoo̱n, 8kó kui xotaa̱ ndeskande koó kjiꞌa ítsꞌi̱yanii̱ nga ndajín katsꞌénjo̱, ko̱jo nga xá ínié ꞌniuú xota̱ Israee̱l, kó tjiꞌún ján nó kamaá nga bo̱a̱ kjiꞌi ni xi katsꞌénjo̱ ngayeje xota̱ Israee̱l xi síndo ki̱a̱ tꞌa ndejèꞌ Jorndaa̱n, ngi̱ndiee̱ xota̱ Amoo̱r, ki̱a̱ nangi Ngalaa̱nd. 9Kó bo̱a̱ tsꞌén xota̱ tji̱e̱e̱ Amoo̱n jaꞌatio ndejèꞌ Jorndaa̱n nga askjanjo̱ xota̱ tji̱e̱e̱ Jundáa̱, ko̱jo xota̱ tji̱e̱e̱ Benjaa̱, ko̱jo xtín xota̱ ndiꞌaa̱ Efraii̱n, kó xota̱ Israee̱l achichí kjo̱a̱ni̱ma̱ jaꞌatio ko̱jo nda̱ kamaá kui nii̱.
10Kósꞌe̱ xota̱ Israee̱l achichí ni̱ma̱ katsoó Néná nga tsíchji̱a̱a̱, nga bi̱ katsó:
—¡Kiniꞌánjéjne̱ kondra̱ tse̱ Ndi̱a̱, ngatꞌa̱ jè ikꞌíjñámasienjne̱ Nejne̱, kó ki̱a̱ kiniꞌánxátꞌajne̱ nee̱ ne Baa̱l!
11Kó Néná, bi̱ katsoó xota̱ Israee̱l nga tsíchji̱a̱jo:
—A ánjín bo̱a̱ xi katsꞌendéjnúꞌun ki̱a̱ nangi Ejipto̱, ko̱jo ngi̱ya tsja xota̱ tji̱e̱e̱ Amoo̱n, ko̱jo ngi̱ya tsja xota̱ Amoo̱r, ko̱jo ngi̱ya tsja xota̱ Filisteaa̱, 12ko̱jo kjiꞌanga xota̱ sindonioo̱, ko̱jo xota̱ Amalee̱k, ko̱jo xota̱ Maoo̱n katsꞌénkjaꞌatiójnú kjo̱a̱ni̱ma̱, kó nga ni̱ma̱ kiꞌmíjnú nga kandokjo̱a̱jnúꞌun, tsi̱ꞌe̱ nga sa̱ꞌindéjnúꞌun ngi̱ya tsja kui xotaa̱. 13Ndatsi bo̱a̱ kjiꞌi ni xi katsꞌen an, ti̱ kuí xí ikꞌíjñámasienjnúꞌun, kó kje̱ꞌe ne kiniꞌánxátꞌajnúu̱. Kuíni nga ngiti̱ kꞌuijñándéjínjnúꞌun ngase. 14¡Tangínjnú, kó ndókjo̱a̱jnúu̱ ne xi jún kachjaꞌájinjnú! ¡Kó kui ngatꞌaxiéꞌájnú ni̱xtjin nga nda̱ ka̱majnú!
15Kósꞌe̱ xota̱ Israee̱l, bi̱ katsoó Néná:
—¡Kiniꞌánjéjne̱! ¡Jí xí yé ji mí ni xi si̱ꞌinje̱jne̱, ta̱nga ti̱ꞌindéjne̱ kui ni̱xtjii̱n, ngo kjo̱a̱nda chjiáꞌájne̱ ji!
16Kó jatjoxíntꞌaa ne xi kje̱ꞌeé, kó Néná katsꞌénxátꞌaa̱, kósꞌe̱ Néná on kamaá kjo̱a̱a̱ kjo̱a̱ni̱ma̱ xi jaꞌatio xota̱ Israee̱l.
17Tji̱e̱nga xota̱ tji̱e̱e̱ Amoo̱n, ítikó yojoo̱ kó ki̱a̱ kisꞌińdo tsá ki̱a̱ nangi Ngalaa̱nd, kó ti̱ kamátikó xota̱ Israee̱l nga, kó ki̱a̱ kisꞌińdo tsá ki̱a̱ na̱xi̱ńdáꞌniú Mispa̱. 18Kó xota̱ ngito̱ko̱o̱ nangi Ngalaa̱nd, bi̱ katsoó xkjín: Kui nda̱ xi ku̱i̱ꞌítsꞌi̱yanii̱ nga skjánjo̱ xota̱ tji̱e̱e̱ Amoo̱n, kuí boá xi ka̱ma ngito̱ko̱ xi kꞌo̱xiéꞌá ngayeje xota̱ Ngalaa̱nd.
Currently Selected:
Nendiꞌamasien 10: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
