Nendiꞌamasien 8
8
Nga kiniꞌaán xota̱ Mandiaa̱n nga fetꞌani
1Kósꞌe̱ xota̱ tji̱e̱e̱ Efraii̱n, bi̱ katsoó Jendeoo̱n:
—Mí nii̱ bo̱a̱ xi kiniꞌínje̱jne̱ ji̱n, nga kiꞌmíyéjínjne̱ kjiꞌanga kꞌinkixkénje̱ ji xota̱ Mandiaa̱n.
Kó ꞌniú kandokjo̱a̱jo.
2Ta̱nga Jendeoo̱n, bi̱ katsoó:
—Mí ni xi je katsꞌen an, xikoó ni xi je kiniꞌánjnú jún. A ndajín ngase tostsi̱je̱è xí chjaꞌátikó xi tsꞌangii̱ Efraii̱n, ta̱bo̱a̱jiín xi botiñá Abiesee̱r ki̱a̱ ndi̱tse̱e̱n. 3Néná boá xi je katsꞌénkꞌasꞌien ngi̱ya ndsa̱jnú Oree̱b ko̱jo See̱b, kui xi já ngito̱ko̱o̱ xota̱ Mandiaa̱n, kó mí nii̱ bo̱a̱ xi katsꞌen an, xi ka̱ma kꞌuijñándsa̱ji̱n an kjo̱a̱a̱ ni xi kiniꞌánjnú jún.
Kósꞌe̱ jaꞌajenda kjo̱a̱xcha̱án xota̱ tji̱e̱e̱ Efraii̱n nga bo̱a̱ katsó.
4Tji̱e̱nga Jendeoo̱n jachó ki̱a̱ tꞌa ndejèꞌ Jorndaa̱n, kó jaꞌatio kui ko̱jo nga ján úchán jáxíꞌín xi nijan tsoꞌbájo̱, kó achichí je jenda, ta̱nga to̱kó kijítji̱ngiraa̱ xota̱ kondraa̱. 5Kó bi̱ katsoó xota̱ xi chji̱a̱ni na̱xi̱ńdáꞌniú Sukoo̱t:
—ꞌNiú míꞌájnúꞌun nga ko̱e̱ꞌéchiíjnúu̱ nichinie xota̱ xi tsoꞌbájo̱ an, ngatꞌa̱ achichí je jenda, kó Sebaa̱ ko̱jo Salmunaa̱ boá xi tsꞌénmongatji̱ngìi̱ an, kui já re xi chji̱a̱ni xota̱ Mandiaa̱n.
6Ta̱nga jáxá xí chji̱a̱ni na̱xi̱ńdáꞌniú Sukoo̱t, bi̱ katsoó:
—A jè ngi̱ya ndse̱ ji tikón Sebaa̱ ko̱jo Salmunaa̱, tsi̱ꞌe̱ nga nichinie ko̱e̱ꞌéjne̱ jájúu̱n.
7Kó bi̱ katsó Jendeoo̱n:
—Nda kjíꞌí, ta̱nga kjiꞌa ngije Néná sa̱ꞌínkꞌasꞌien ngi̱ya ndsa̱ án Sebaa̱ ko̱jo Salmunaa̱, ndaꞌyá ko̱jo xtjieé nangi kixií má xi sa̱ꞌinxi̱ni an yojojnú.
8Kósꞌe̱ kijínijíngí na̱xi̱ńdáꞌniú Peniee̱l, kó ti̱ bo̱a̱ ti̱ katsoó xotaa̱ kui ngi̱ndiee̱ nga, ta̱nga xota̱ Peniee̱l, ti̱ bo̱a̱ ti̱ katsoó, xikó má katsó xota̱ xi chji̱a̱ni na̱xi̱ńdáꞌniú Sukoo̱t. 9Kó Jendeoo̱n ti̱ bi̱ ti̱ katsoó xota̱ xi chji̱a̱ni Peniee̱l:
—Nda kjíꞌí, ta̱nga kjiꞌa ngije kji̱ndi̱bá ngiñá an nga je xió kjiꞌii̱, sa̱ꞌinkixóndó án kui tarieé.
10Kó Sebaa̱ ko̱jo Salmunaa̱ ki̱a̱ kisꞌińdo ki̱a̱ Karkoo̱r, kó mara̱ tjiꞌún mi̱ jájuún, ngayeje xi tsꞌangi ngase xi chji̱a̱ni xota̱ xi kisꞌińdo xtji̱e̱e̱n nínga fotjo tsꞌueé, ngatꞌa̱ mara̱ tsita̱ úchán ko̱jo kan mi̱ jáxíꞌín xi ndyi̱yaꞌa ki̱cha̱ndojoó xi je kiniꞌánkjiesón. 11Kó bo̱a̱ tsꞌén Jendeoo̱n, kijínijíngí xtji̱e̱e̱n ndi̱yà nínga fí xota̱ xi kisꞌińdo ndiꞌańjñoo̱ ki̱a̱ xtji̱e̱e̱n nínga fotjo tsꞌueé na̱xi̱ńdáꞌniú Noba̱, ko̱jo na̱xi̱ńdáꞌniú Jojbeaa̱, kó askjanjo̱ xota̱ xi síndo kui ngi̱ndiee̱, ngatꞌa̱ ngiti̱ jmí jájún xi konda kisꞌiejiín. 12Kó tsanga Sebaa̱ ko̱jo Salmunaa̱, ta̱nga Jendeoo̱n kijítji̱ngii̱, kó katsoboá nga jó kui já re xi chji̱a̱ni xota̱ Mandiaa̱n, kó indyiándikoón ngayeje jájuún kui jaá. 13Kósꞌe̱ ngije kjindibáꞌoyá nginí ngije kijí kui kjo̱a̱xcha̱án xtji̱e̱e̱n tꞌa na̱xi̱ Eree̱, Jendeoo̱n ndií Joaa̱, 14katsoboá, kó katsꞌénkijentsꞌoa ngo nda̱ xo̱ngò xí chji̱a̱ni na̱xi̱ńdáꞌniú Sukoo̱t, kó ngaskande xo̱jo̱n má ítꞌaa̱ jaꞌeén jáxá xí chji̱a̱ni na̱xi̱ńdáꞌniú Sukoo̱t, ko̱jo xota̱ xi xchaá: Ichítié ko̱jo kan yito ma kui jáxíꞌiín. 15Kó Jendeoo̱n, nga jachó kje̱n kui jáxá xí chji̱a̱ni na̱xi̱ńdáꞌniú Sukoo̱t, bi̱ katsoó: Jànꞌa̱n tsitsíjenjnúu̱ Sebaa̱ ko̱jo Salmunaa̱, kui já xí ta̱ngatꞌanii̱ kui nga akajnóchájnúꞌun, nga bi̱ kiꞌmíjnúꞌun: A jè ngi̱ya ndse̱ ji tikón Sebaa̱ ko̱jo Salmunaa̱, tsi̱ꞌe̱ nga nichinie ko̱e̱ꞌéjne̱ jájúu̱n xi je jendaa̱.
16Kó katsoboá xota̱ xi xchaá kui na̱xi̱ńdáꞌniuú, kó ndaꞌyá ko̱jo xtjieé nangi kixií tsaꞌonni jáxíꞌín xi chji̱a̱ni kui na̱xi̱ńdáꞌniuú. 17Kó ti̱ katsꞌénkixóndó tarieé na̱xi̱ńdáꞌniú Peniee̱l, ko̱jo katsꞌénkjiesón xota̱a̱ nga.
18Sꞌe̱ jaskan, bi̱ tsꞌén asíyaá Sebaa̱ ko̱jo Salmunaa̱:
—Kókón kuí jáxíꞌín xí kiniꞌánkꞌiénjnú jún ki̱a̱ na̱xi̱ńdáꞌniú Taboo̱r.
Kó bi̱ katsó kuí jaá:
—Xikó má kjiꞌi ji, bo̱a̱ má kón kui jaá nga, xikó má kón ndií ngo nda̱ re, bo̱a̱ má kón.
19Kó bi̱ katsó Jendeoo̱n:
—¡Já ntsꞌie án boá! ¡Ndií na̱anna! Tikón Néná nga nde sa̱ꞌinkꞌienjínjnúꞌun katsaki, tsi be an nga júnjín xi kiniꞌánkꞌiénjnú. 20Kó bi̱ katsoó Jetee̱r kui xi ndí tjoón: ¡Ti̱sítji̱n ji, kó ti̱ꞌinkjisén ji kui jaá! Ta̱nga kui nda̱ xo̱ngo̱ò tsꞌaxiéjín ki̱cha̱ndojoó, katsakjónní, ngatꞌa̱ kjindí ngase kui nda̱a̱. 21Kósꞌe̱ bi̱ katsó Sebaa̱ ko̱jo Salmunaa̱: ¡Ti̱sítji̱n ji, kó ti̱ꞌinkꞌinjne̱, ngatꞌa̱ xikótsꞌèn xi̱ꞌin ji, bo̱a̱ tsꞌén chꞌokon ji nga!
Kó Jendeoo̱n jastjíe̱n, kó katsꞌénkjiesón Sebaa̱ ko̱jo Salmunaa̱, kó iskjíbé ni tsjakon xi yajáyaá kjásén cho̱toꞌoyitsꞌeèn kui jaá.
22Kó xota̱ Israee̱l, bi̱ katsoó Jendeoo̱n:
—Tatíxomejne̱ ji, ko̱jo ndíi̱, ko̱jo ndíndée̱, ngatꞌa̱ jí boá xi kaꞌnaxiéꞌéjne̱ ngi̱ya tsja xota̱ Mandiaa̱n.
23Ta̱nga Jendeoo̱n, bi̱ katsó:
—Ánjín xi kotixomájnúꞌun, ti̱nde ndínajín xi ko̱tíxomájnú. Néná boá xi ko̱tíxomájnú jún.
24Jaskan Jendeoo̱n, bi̱ katsoó:
—Mejénna ngo ni kuíꞌájnúꞌun: Nga ngo nga ngojnú te̱ꞌéjnúꞌun nangínijon xi kachjeꞌéxínjnúu̱ jájuún.
Kjo̱a̱a̱ nga kui jájuún xota̱ Ismaelita̱ boá, kuíni nga kisꞌińdoo̱ tji̱bo̱a̱nijon nangínijon xi to̱nsinié.
25Kó bi̱ katsó kui xotaa̱:
—Ka̱má ko̱e̱ꞌéjne̱, ngata̱ bo̱a̱jín májnú jún. Kó yítie ngo ńjño, kó nga ngo nga ngo kui jaá ki̱a̱ índosón nangínijoo̱n. 26Kó ngayeje kui nangínijon xi to̱nsinieé tjiꞌún nijón kilo̱ kamá é, kje̱ꞌení ni tsjakoo̱n, sti̱ngaroo̱, ko̱jo ńjño koán xi kisꞌiee̱ já re xi chji̱a̱ni xota̱ Mandiaa̱n, ko̱jo ni tsjakon xi yajáyaá kjásén cho̱toꞌoyitsꞌeèn. 27Kó Jendeoo̱n ngo efoo̱nd katsꞌénda, kó ki̱a̱ íjñá na̱xi̱ńdáꞌniuú, ki̱a̱ Ofra̱, kó ngayeje xota̱ Israee̱l ndajín katsꞌén kjo̱a̱a̱ kui nii̱, kó xikoó tsi ngo chja̱ya̱ kamaá Jendeoo̱n, ko̱jo ngayeje xota̱ ndiꞌaa̱.
28Kó bo̱a̱ tsꞌén nga ni̱ma̱kjo̱a̱ ikꞌíjñá xota̱ Mandiaa̱n ngindyi̱ko̱n xota̱ Israee̱l, kó nginijánjín kasako ngaꞌniú ngasee̱ kui xotaa̱, kó yichán nó nga kisꞌie kjo̱a̱xió ki̱a̱a̱ tꞌanangii̱, ni̱xtjin nga kisꞌijña Jendeoo̱n.
Nga Kꞌien Jendeoo̱n
29Jaskan Jerobaa̱l ndií Joaa̱, kijí kó ki̱a̱ kisꞌijña ndiꞌaa̱. 30Kó Jendeoo̱n ichítié ko̱jo kan ndí kisꞌiee̱ xi kuí má tsi̱ꞌe̱ kamá, ngatꞌa̱ achichí ínchjín kisꞌiee̱, 31ngo kui ínchjiín, xi kisꞌijña ki̱a̱ na̱xi̱ńdáꞌniú Sikee̱n, xi kisꞌiee̱ ngo ndí, kó Abimelee̱k ítꞌajaꞌén. 32Kó Jendeoo̱n, ndií Joaa̱, achichí jè xchá nga kꞌien, kó ki̱a̱ akjanijín ki̱a̱ nga̱tsjo̱ó Joa̱ na̱ꞌmii̱, ki̱a̱ na̱xi̱ńdáꞌniú Ofra̱, nínga kisꞌińdo xota̱ tji̱e̱e̱ Abiesee̱r.
33Ta̱nga jaskan ngije kꞌien Jendeoo̱n, xota̱ Israee̱l ti̱ kjiꞌa ndajín katsꞌén nginí, kó ki̱a̱ kijítji̱ngii̱ a̱sie̱én ne Baa̱l, kó Baa̱l-Berii̱t kiꞌmí nee̱. 34Kó xota̱ Israee̱l ngiti̱ jaꞌátsjienjín ngasee̱ Néná, kui Ne xi katsꞌéndé ngi̱ya tsja xota̱ xi kondra̱a̱, xi kisꞌińdo nga ngo foaꞌatjiyajoo̱n. 35Ti̱nde katsjajín ndokꞌóchji̱ì kjo̱a̱a̱ xota̱ ndiꞌaa̱ Jerobaa̱l, kui xi Jendeoo̱n kiꞌmií, kjo̱a̱a̱ ngayeje ni nda xi katsꞌén ngandaa̱ xota̱ Israee̱l.
Currently Selected:
Nendiꞌamasien 8: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
