Nendiꞌamasien 4
4
Na̱ Ndéboraa̱ ko̱jo Baraa̱k
1Jaskan ngije kꞌien Aoo̱nd, xota̱ Israee̱l ti̱ katsꞌénjé nginí ngindyi̱ko̱n Néná. 2Kuíni nga Néná ki̱a̱ katsꞌénkꞌasꞌien ngi̱ya tsja nda̱ ree̱ nangi Kanaa̱n xi ꞌmí Jabii̱n, kui xi atíxomaa̱ na̱xi̱ńdáꞌniú Asoo̱r. Nda̱ ngito̱ko̱o̱ jájuún kui nda̱ ree̱, Sísara̱ kiꞌmí, kó ki̱a̱ kisꞌijña ki̱a̱ na̱xi̱ńdáꞌniú Arosee̱t-Ngoii̱n. 3Kósꞌe̱ xota̱ Israee̱l achichí ni̱ma̱ katsó nga tsíchji̱a̱a̱ Néná, tsi̱ꞌe̱ nga kꞌo̱xiéꞌá, ngatꞌa̱ nda̱ re Jabii̱n nijan úchán karro̱ kjo̱a̱xchán xí ki̱cha̱ kisꞌiee̱, kó kan nó nga achichí ꞌniú ínieé xá xota̱ Israee̱l.
4Kui ni̱xtjin jàn ngo na̱ chji̱ni̱e̱ꞌe̱én Néná xi ꞌmí na̱ Ndébora̱ kamá ngito̱ko̱o̱ xota̱ Israee̱l, chjo̱ón Lapindoo̱t, 5kó kui naa̱ kamángaá nga ki̱a̱ kisꞌijña ngo ngindie yáxka̱jèn, kui xi kisꞌijña ki̱a̱ ngamasiennii̱ na̱xi̱ńdáꞌniú Ramaa̱, ko̱jo na̱xi̱ńdáꞌniú Betee̱l, ki̱a̱ na̱xi̱ xi chji̱a̱ni xota̱ tji̱e̱e̱ Efraii̱n. Kó xota̱ Israee̱l ki̱a̱ jachó nínga tikón Yáxka̱je̱én Na̱ Ndéboraa̱ tsi̱ꞌe̱ nga kui naa̱ xi sa̱ꞌíndajin kjo̱a̱a̱. 6Kó kui naa̱ katsangiyakjaꞌá Baraa̱k, ndií Abinoaa̱n, ki̱a̱ na̱xi̱ńdáꞌniú Kendee̱, ngi̱ndie xi chji̱a̱ni xota̱ tji̱e̱e̱ Neftalii̱. Kó nga jachó Baraa̱k, na̱ Ndéboraa̱, bi̱ katsoó:
—A jèjín katsjaá ngo kjo̱a̱ Néná, kui xi Nee̱ xota̱ Israee̱l, nga bo̱a̱ katsoó nga kꞌuín jí, kó nga kꞌuitíkí jí tie mi̱ xota̱ xi̱ꞌin xi chji̱a̱ni xota̱ tji̱e̱e̱ Neftalii̱, ko̱jo xota̱ tji̱e̱e̱ Sabuloo̱n ki̱a̱ na̱xi̱ Taboo̱r. 7Kó nga kuí boá xi sa̱ꞌin nga ki̱a̱ xo̱ngàndántꞌié Sisoo̱n ko̱e̱je̱ Sísaraa̱, kui xota̱ xi ngito̱ko̱o̱ xota̱juu̱n re Jabii̱n, ko̱jo nga ko̱e̱je̱jo karro̱ kjo̱a̱xcha̱án, ko̱jo ngayeje xota̱juu̱n, kó nga Néná ki̱a̱ sa̱ꞌinkꞌasꞌiee̱n ngi̱ya ndse̱ ji.
8Kó Baraa̱k, bi̱ katsoó na̱ Ndéboraa̱:
—Tsi ji xi kꞌuínje̱ní, kjuín án, ta̱nga tsi kꞌuínje̱jínní, kjuínjín an.
9Kó bi̱ katsó kui naa̱:
—Ja̱ ndakjiꞌi, ja̱ kjuínjoo̱, ta̱nga kjiꞌanga si̱ꞌin ji, nda má tjajintakín nga jmí tsi ji xi kiniꞌín ji, ngatꞌa̱ Néná ngi̱ya tsja ngo chjo̱on sa̱ꞌínkꞌasꞌien Sísaraa̱.
Kó jastjíe̱n na̱ Ndéboraa̱, sꞌe̱ kijíjo̱ Baraa̱k ngaskande na̱xi̱ńdáꞌniú Kendee̱. 10Kó Baraa̱k ítikó xota̱ tji̱e̱e̱ Sabuloo̱n, ko̱jo xota̱ tji̱e̱e̱ Neftalii̱ ki̱a̱ na̱xi̱ńdáꞌniú Kendee̱, kó tie mi̱ ma jáxíꞌín xi kijíjo̱, ti̱ kijí na̱ Ndéboraa̱ nga. 11Kó kisꞌijña ngo nda̱ kenita̱ xi Jebee̱r kiꞌmí, xi chji̱a̱ni xota̱ tji̱e̱e̱ Obaa̱b, chiꞌyaá Moisee̱, kui xi ja̱bo̱a̱ je jatjoxíntꞌaa xota̱ kenitaa̱, tsi̱ꞌe̱ nga ki̱a̱ katsꞌénda ndiꞌańjño ki̱a̱ nangi soón Saanayii̱n, ngi̱ndie xi tikón ki̱a̱ tꞌa na̱xi̱ńdáꞌniú Kendee̱. 12Kó nga kiꞌmíyaà Sísaraa̱ nga Baraa̱k, ndií Abinoaa̱n kijínijíngí na̱xi̱ Taboo̱r, 13Sísaraa̱ ítikó nga nijan úchán karro̱ kjo̱a̱xchán xí ki̱cha̱a̱, ko̱jo ngayeje jájún xi nijan síndojo̱, kó jatjoni ndeskande Arosee̱t-Ngoii̱n, kó ngaskande xo̱ngàndántꞌié Sisoo̱n jachó.
14Kósꞌe̱ na̱ Ndéboraa̱, bi̱ katsoó Baraa̱k:
—Ti̱ndyinde ji, ngatꞌa̱ ngotꞌe̱ boá nga Néná sa̱ꞌínkꞌasꞌiee̱n ngi̱ya ndse̱ ji Sísaraa̱. A mí tsi Néná je tsoꞌbátjoón nga tiꞌmi ji.
Kó Baraa̱k jatjajenni na̱xi̱ Taboo̱r, kó tie mi̱ ma jáxíꞌín xi yajángií. 15Sꞌe̱ Néná ngindyi̱ko̱n Baraa̱k nga katsꞌeén Sísaraa̱, kó katsꞌénkjatsón karro̱ kjo̱a̱xcha̱án, kó ki̱cha̱ndojó katsꞌénkjiesónni ngayeje jájuún, sꞌe̱ nga kamábe Sísaraa̱ kui ni xi kamaá, jatjajenni karro̱ kjo̱a̱xcha̱án, kó tsangayise. 16Ta̱nga Baraa̱k kijítji̱ngii̱ karro̱ kjo̱a̱xcha̱án, ko̱jo jájuún ngaskande na̱xi̱ńdáꞌniú Arosee̱t-Ngoii̱n, kó ngayeje jájuún Sísaraa̱ ki̱cha̱ndojó kiniꞌánkjiesónni, ngaskande nga nde ingojín xi kisꞌińdo ngase. 17Kó Sísaraa̱ tsangayise ngaskande ndiꞌańjñoo̱ na̱ Jaee̱l, chjo̱ón Jebee̱r nda̱ kenitaa̱, ngatꞌa̱ jmí kjo̱a̱xti kisꞌiejiín nda̱ re Jabii̱n, ko̱jo xota̱ ndiꞌaa̱ Jebee̱r.
18Kó na̱ Jaee̱l jataxie nga kijíkjaꞌáyíndi̱yà Sísaraa̱, kó bi̱ katsoó:
—Ti̱tjásꞌi̱n ji ndi̱a̱, ti̱tjásꞌi̱n, kó ngata̱ ndakinjín má ji.
Kó Sísaraa̱ tsꞌasꞌien ndiꞌańjñoo̱, kó kui naa̱ ngo ńjñotjibé yíꞌmáni.
19Sꞌe̱ Sísaraa̱, bi̱ katsó:
—Ngo kjo̱a̱nda míꞌaá, chií ndáfoa te̱ꞌéní, ngatꞌa̱ achichí xíndána. Kó na̱ Jaee̱l ngo ti̱ji̱í tji̱xi̱ín xí ndyi̱a̱ ntsjén iskjíxꞌaá, kósꞌe̱ katsjaá tsi̱ꞌe̱ nga katsꞌe, sꞌe̱ ti̱ yíꞌmá nginí Sísaraa̱.
20Kó Sísaraa̱, bi̱ katsoó kui naa̱:
—Ki̱a̱ tindyin ji ki̱a̱ nga̱ntjo̱a̱a̱ ndiꞌańjñoo̱, kó tsi tjín xí kji̱ndi̱bá, kó tsi bi̱ ka̱tso̱ nga ko̱síyaá: A tjín xí tikón kꞌi̱e̱e̱. Jmíjín xi tjín tꞌíi̱n.
21Ta̱nga na̱ Jaee̱l, chjo̱ón Jebee̱r, ngo yáyojó xi tikónꞌniúní kui ndiꞌańjñoo̱, ko̱jo ngo ni xi ꞌbínieé iskjíbé, sꞌe̱ si̱e̱n si̱e̱n kijíkoón Sísaraa̱, kósꞌe̱ ki̱a̱ má asieén kui yáyojoó ki̱a̱ tꞌa xtjien, ngaskande nga kisitꞌaa̱ tꞌanangii̱ to̱ko̱, ngatꞌa̱ achichí jè jenda ko̱jo ńjñaá Sísaraa̱, kó bo̱a̱ tsꞌén kꞌien ngijee̱. 22Kó nga Baraa̱k kijítji̱ngii̱ Sísaraa̱, na̱ Jaee̱l ti̱ kijíkjaꞌáyíndi̱yà nga, kó bi̱ katsoó:
—Ja̱bíꞌi̱n, kó kꞌi̱e̱ kokoo kui xota̱ xi timindyisé ji.
Kó kui nda̱a̱ tsꞌasꞌien ndiꞌańjño nínga tikón kui naa̱, kó ki̱a̱ kamábe nga ki̱a̱ kjiꞌijña Sísaraa̱ nga je kꞌien, nga sꞌisꞌieén ngo yáyojó tꞌa tꞌanijon. 23Kó bo̱a̱ tsꞌén kui ni̱xtjii̱n Néná katsꞌén ni̱ma̱kjo̱a̱ Jabii̱n, nda̱ ree̱ nangi Kanaa̱n, ngindyi̱ko̱n xota̱ Israee̱l. 24Kó xota̱ Israee̱l ꞌniú ngase ndajín katsꞌénjo̱ Jabii̱n, nda̱ ree̱ nangi Kanaa̱n, ngaskande nga katsꞌénkꞌién.
Currently Selected:
Nendiꞌamasien 4: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014