Nendiꞌamasien 3
3
Na̱xi̱ńdá xí kisꞌińdo ngase ki̱a̱ nangi Kanaa̱n
1Kuí bí kui na̱xi̱ńdaá xi índo ko̱jo xi katsꞌénkjién Néná, tsi̱ꞌe̱ nga kui xi skítꞌayákónni xota̱ Israee̱l, ngayeje kui xi kamábejín kjo̱a̱xchán xí kiniꞌánjo̱ xotaa̱ nangi Kanaa̱n. 2Néná katsꞌén kui nii̱, tsi̱ꞌe̱ nga tji̱e̱e̱ xota̱ Israee̱l sku̱i̱e̱ kui kjo̱a̱xcha̱án, ko̱jo nga ko̱kóyaá xota̱ xi kamábejín kui ni xi̱ꞌbi̱: 3Kisꞌińdo ún ngito̱ko̱o̱ xota̱ Filisteaa̱, ko̱jo ngayeje xota̱ Kanaa̱n, ko̱jo xota̱ sindonioo̱, ko̱jo xota̱ Ee̱b xi kisꞌińdo ki̱a̱ na̱xi̱ Líbanoo̱, ndeskande na̱xi̱ Baa̱l-Ermoo̱n, ngaskande nínga bitja nga fóchó na̱xi̱ńdáꞌniú Amaa̱t. 4Néná índo kui xotaa̱ tsi̱ꞌe̱ nga skótꞌayákón xota̱ Israee̱l, sꞌe̱ bo̱a̱ tsꞌén sku̱i̱e̱ tsi ku̱i̱ntꞌiéꞌeén kjo̱a̱botíxoma xi Néná katsjaá xota̱ xi xchaá ngatꞌaa̱ Moisee̱. 5Kó bo̱a̱ tsꞌén nga xota̱ Israee̱l ki̱a̱ kisꞌińdojii̱n xota̱ Kanaa̱n, ko̱jo xota̱ Ee̱t, ko̱jo xota̱ Amoo̱r, ko̱jo xota̱ Feree̱, ko̱jo xota̱ Ee̱b, ko̱jo xota̱ Jebuu̱, 6kó ndií xota̱ Israee̱l ixánjo̱ ndií kui xotaa̱, kósꞌe̱ ki̱a̱ katsꞌénxátꞌaa̱ ne xi kisꞌiee̱ ngijee̱.
Otoniee̱l
7Ta̱nga xota̱ Israee̱l ti̱ katsꞌén nginí ni xi ndajín ngindyi̱ko̱n Néná, kó katsꞌénchíyà Nee̱, kósꞌe̱ ki̱a̱ katsꞌénxátꞌaa̱ a̱si̱én xí kisꞌiee̱ ne Baa̱l ko̱jo na̱ ne Aseraa̱. 8Kuíni nga Néná achichí katsꞌénxchánjo̱ni xota̱ Israee̱l, kó ki̱a̱ katsꞌénkꞌasꞌien ngi̱ya tsja Kusaa̱n-Risataii̱n, nda̱ re xi chji̱a̱ni nangi Araa̱n-Najarayii̱n, kó xota̱ Israee̱l jin nó nga ki̱a̱ katsꞌénxátꞌaa̱ kui nda̱ ree̱. 9Kósꞌe̱ xota̱ Israee̱l achichí ni̱ma̱ katsó nga tsíchji̱a̱a̱ Néná, kó Néná tsintꞌieé, kósꞌe̱ jaꞌájin ngo nda̱ xi kꞌo̱xiéꞌá, ko̱jo xi sa̱ꞌíndé, kó Otoniee̱l boá, ndií Kenaa̱, ntsꞌi̱e̱ xi kjindí Kalee̱b. 10Kó A̱si̱énni̱xtjii̱n Néná kisꞌijñajii̱n kui nda̱a̱, kó kuí boá xi atíxoma nangi Israee̱l. Kó kijí kjo̱a̱xchán, kósꞌe̱ Néná katsꞌénkꞌasꞌiee̱n Kusaa̱n-Risataii̱n, nda̱ ree̱ nangi Araa̱n, kó Otoniee̱l katsꞌeén nga askjanjo̱ kui nda̱ ree̱. 11Jaskan ngije kamá kui nii̱, yichán nó kisꞌie kjo̱a̱xió tꞌanangii̱, kósꞌe̱ kꞌien Otoniee̱l, ndií Kenaa̱.
Aoo̱nd
12Ta̱nga xota̱ Israee̱l ti̱ katsꞌén nginí ni xi ndajín ngindyi̱ko̱n Néná, kó Néná katsjangaꞌniuú Englóo̱n nda̱ ree̱ nangi Moaa̱b, tsi̱ꞌe̱ nga skjánjo̱ xota̱ Israee̱l, ngatꞌa̱ ndajín katsꞌén ngindyi̱ko̱n Néná. 13Kó kui nda̱ ree̱ Englóo̱n ítikó xota̱ tji̱e̱e̱ Amoo̱n, ko̱jo xota̱ tji̱e̱e̱ Amalee̱k, sꞌe̱ askjanjo̱ xota̱ Israee̱l, kó katsꞌéntsi̱ꞌe̱ na̱xi̱ńdáꞌniú Jerikoo̱. 14Kó xota̱ Israee̱l tjiꞌún ján nó katsꞌénxátꞌaa̱ nda̱ re Englóo̱n. 15Ta̱nga kjiꞌanga xota̱ Israee̱l ni̱ma̱ katsó nga tsíchji̱a̱a̱ Néná, Néná jaꞌájin ngo nda̱ xi kꞌo̱xiéꞌá, kó kuí boá xi Aoo̱nd, ndií Jeraa̱, xi skón kamá, xi chji̱a̱ni xota̱ tji̱e̱e̱ Benjaa̱, kó xota̱ Israee̱l ngo ni xi ta̱ boeꞌéná katsangiyaa̱ Englóo̱n, nda̱ ree̱ nangi Moaa̱b. 16Kó Aoo̱nd ngo kichiro̱ xi yojó ngajó ngaboaá katsꞌénda xi mejeén masien metro̱ nga ndojó, kósꞌe̱ asiéngí ndáyaá xtji̱e̱e̱n nínga kixi̱i̱ tsja. 17Kó kijíjoo̱ kui nii̱ Englóo̱n, nda̱ ree̱ nangi Moaa̱b. Englóo̱n bi̱ jee̱ kamá. 18Kó kjiꞌanga je katsꞌénkꞌasꞌiee̱n kui ni xi ta̱ boeꞌéná, Aoo̱nd katsꞌénkixotꞌa xota̱ xi nijan kijíjo̱, 19ta̱nga kui nda̱a̱ kijí ngi̱ndie xi ꞌmí Pesilii̱n, ki̱a̱ Ngilngaa̱l, kó bi̱ katsó: Ji nda̱ re, ngo ni ꞌma tikónna xi xiyaá.
Kósꞌe̱ nda̱ ree̱, bi̱ katsó: ¡Chiyéra ji, xió ti̱ndyin! Kó ngayeje xota̱ xi síndo ki̱a̱a̱ jatjoxie. 20Kósꞌe̱ Aoo̱nd kijíkóntiñaa̱ kui nda̱ ree̱ nga je tikónsón yáxíríe̱ xi tikoón ngi̱yaꞌma xi ꞌbíjñá nga ma cho̱ndoboaá, kó Aoo̱nd, bi̱ katsoó: Ngo én xí katsangiya Néná tikónna xi tsjaa ji. Kó nda̱ ree̱ jastjíe̱nni kui yáxíríee̱, 21kósꞌe̱ Aoo̱nd tsja skón iskjíbéní ki̱cha̱ xi singií ndáyaá xtji̱e̱e̱n nínga kixi̱i̱, kó ki̱a̱ yeꞌeé nga̱ntsꞌo̱a̱ kui nda̱ ree̱, 22achichí ꞌniú yeꞌeé nga ngaskande ńdaa̱ kui kichiroo̱ tsꞌasꞌien ngaskande ngi̱ya nga̱ntsꞌo̱a̱ kui nda̱ ree̱, kó xinié nga̱tsꞌo̱a̱ yíꞌmá yeje kui kichiroo̱, ngatꞌa̱ Aoo̱nd ngiti̱ tsꞌaxiéjín kui kichiroo̱, kó jatjo má yeꞌee̱ nda̱ ree̱. 23Kósꞌe̱ Aoo̱nd jatjo xtji̱e̱e̱n ngindie ndiꞌaa̱, kó ichjáꞌniú nga̱ntjo̱a̱a̱ kui ngi̱yaꞌmaa̱ nga íjñaá ki̱cha̱ xi ꞌbíchjájo̱ni. 24Kjiꞌanga jatjoxie Aoo̱nd, jachó já mosoo̱ nda̱ ree̱, kó nga kamábe nga tjíchjáꞌniú kuí ngi̱yaꞌmaa̱, katsꞌénkjó nga tsꞌénfotirá nda̱ ree̱ kui ngi̱yaꞌmaa̱ kamaá, 25kó askoyaá, sꞌe̱ nda̱ kamaá, ngatꞌa̱ kui nda̱ ree̱ kjíxꞌájín nga̱ntjo̱a̱a̱, kósꞌe̱ kijíkjaꞌá yibi̱ xi chjáxꞌájo̱ni nga̱ntjo̱a̱a̱, sꞌe̱ iskjíxꞌá, kó kamábe nga ndi̱a̱a̱ je kjiꞌijña tꞌanangii̱ nga je kꞌien. 26Kó Aoo̱nd jatjoꞌmaa̱ yojoo̱ tji̱e̱nga kjiꞌbondíyaá kui jaá, kó ngije jaꞌa ki̱a̱ ngi̱ndie xi ꞌmí Pesilii̱n, ki̱a̱ kisꞌijñaꞌma ki̱a̱ na̱xi̱ńdáꞌniú Seiraa̱t. 27Kó kjiꞌanga jachó kui ngi̱ndiee̱, kiniꞌánkjanie tjio xi ndi̱ja̱a̱ cho̱tsa̱nga̱a̱ ki̱a̱ na̱xi̱ xi chji̱a̱ni xota̱ tji̱e̱e̱ Efraii̱n, kó xota̱ Israee̱l kjindibájayani kui na̱xi̱i̱, kó Aoo̱nd kui kitsjientjoón kui xotaa̱. 28Sꞌe̱ Aoo̱nd, bi̱ katsoó kui xotaa̱: ¡Ndibátjingijnúꞌun! ¡Ngatꞌa̱ Néná jè ngi̱ya ndsa̱ je katsꞌénkꞌasꞌienná kondra̱ná kui xi xota̱ Moaa̱b!
Kó jatjajen xota̱ Israee̱l, kó ki̱a̱ kixindyiachjá ki̱a̱ tꞌa ndejèꞌ Jorndaa̱n xtji̱e̱e̱n ndi̱yà xí fíni Moaa̱b, kó nde ngojín xota̱ xi katsꞌénkjaꞌa. 29Kui ni̱xtjin jàn, mara̱ tie mi̱ xota̱ Moaa̱b xi katsꞌénkjiesón, ngayeje xota̱ xi ꞌniú yiꞌi, ko̱jo xi ꞌniú ngasee̱, kó nde ngojín xi jatjongii̱ yojoo̱. 30Bo̱a̱ kjiꞌi kjo̱a̱ni̱ma̱kjo̱a̱ xi xota̱ Israee̱l katsꞌénjo̱ xotaa̱ nangi Moaa̱b, kó tꞌanangii̱ ichítié ko̱jo kantié nó nga kisꞌijñaxió ngijee̱.
Samngaa̱r
31Jaskan kisꞌijña Samngaa̱r ndií Anaa̱t, kui xi katsꞌénꞌoón jun úchán já Filistea̱ nga katsꞌénkjién ngo yá xí tjítokó ki̱cha̱ xi nangijon cho̱yojo xi̱ꞌin, kó kui nda̱a̱ ti̱ tsꞌaxiéꞌá xota̱ Israee̱l nga.
Currently Selected:
Nendiꞌamasien 3: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
