Nendiꞌamasien 2
2
Ndítsjie xi Néná jachó ki̱a̱ Bokii̱n
1Kó ndítsjie xi Néná jatjoni Ngilngaa̱l, sꞌe̱ kijí ki̱a̱ Bokii̱n, kó bi̱ katsoó xota̱ Israee̱l:
Án boá xi tsꞌaxiéjnúꞌun ki̱a̱ nangi Ejipto̱, kósꞌe̱ kijíjo̱jnúꞌun ki̱a̱ tꞌanangi xi ja̱bo̱a̱ je kixiyatjóo̱n xota̱ xi xchájnú nga jún tsjajnúꞌun, kó bi̱ kixiáa̱n: Jmíni̱xtjin nga sa̱ꞌinkjié an kjo̱a̱ ni xi indajo̱jnúꞌun, 2tsi jún, jmí ni kꞌuíndajo̱jnú xota̱ xi síndo kui tꞌanangii̱, kui xi síndoo̱ ṉchan xi si̱ꞌankjatsónjnú jún katsaki. Kó kandaꞌyáꞌénjínjnúu̱ ni xi kixian an.
Míkjo̱a̱a̱ nga bo̱a̱ kjiꞌi kon ni xi kiniꞌánjnú. 3Kuíni nga ngotꞌe̱ ꞌne̱, je bi̱ kixian an: Ngiti̱ kongatji̱ngíjáa̱n kui xota̱ na̱xi̱ńdaá xikótsꞌèn kongínboaꞌájnú, ngatꞌa̱ kui xotaa̱, kuí boá xi ka̱ma xikoó ngo ńꞌniú ndaꞌyá xí kjoájnú, kó ne xi tsꞌéndíkón, kuí boá xi xikoó tsi ngo chja̱ya̱ ka̱majnú jún.
4Kó kui ndítsjie xi Néná ngije bo̱a̱ katsoó xota̱ Israee̱l, kui xota̱ na̱xi̱ńdaá achichí ꞌniú askjandá, 5kuíni nga Bokii̱n ítꞌajaꞌén kuí ngi̱ndiee̱, kó ki̱a̱ katsꞌénkꞌasꞌiee̱n kjo̱a̱tjó Néná.
Nga Kꞌien Josuee̱
6Kó ngije Josuee̱ katsꞌénkixotꞌa xota̱ na̱xi̱ńdaá, xota̱ Israee̱l kja̱kijí kja̱kijí nga ngo nga ngo tꞌanangi xi kasakoo̱ tsi̱ꞌe̱ nga ki̱a̱ je kꞌuíndo. 7Ngayeje ni̱xtjin nga kisꞌijña Josuee̱, xota̱ na̱xi̱ńdá Israee̱l ki̱a̱ katsꞌénxátꞌaa̱ Néná, ko̱jo ngayeje ni̱xtjin nga kisꞌińdo ngase xota̱ xi xchá xí nijan kisꞌiṉtso̱ma Josuee̱, kui xi kamábe ngayeje ni yiꞌi xi katsꞌén Néná, ngandaa̱ xota̱ Israee̱l.
8Ti̱chaa̱n kꞌien Josuee̱ ndií Nuu̱n, mosoo̱ Néná, kó úchán ko̱jo tie noó nga kꞌien. 9Kó ki̱a̱ akjanijín ki̱a̱ tꞌanangi xi kisꞌijñaa̱ ki̱a̱ na̱xi̱ńdáꞌniú Timnaa̱-Seraa̱, ki̱a̱ na̱xi̱ xi chji̱a̱ni xota̱ tji̱e̱e̱ Efraii̱n, ki̱a̱ nínga ta̱ꞌii̱n na̱xi̱ Ngaa̱. 10Kó ngayeje kui xota̱ tji̱e̱e̱ Israee̱l ti̱ jesón nga, kó nijan kamátikójo̱ xota̱ xi xchaá. Sꞌe̱ jaskan kisꞌie ingo tjín xota̱ tji̱e̱ xi ngiti̱ kamábejín Néná, ti̱nde kamábejín ni xi katsꞌén kuí, ngandaa̱ xota̱ Israee̱l.
Xota̱ Israee̱l ngiti̱ katsꞌéntsjájiín Néná
11Kósꞌe̱ xota̱ Israee̱l katsꞌén ni xi ndajín ngindyi̱ko̱n Néná, nga katsꞌéntsjaà a̱si̱én xí kisꞌiee̱ ne Baa̱l. 12Kó bo̱a̱ tsꞌén íjñámasien Néná, kui xi Nee̱ xota̱ xi xchaá, kui Ne xi tsꞌaxiéni ki̱a̱ nangi Ejipto̱, kó kje̱ꞌe ne kijítji̱ngi, nee̱ xota̱ na̱xi̱ńdá xí síndo nga ngo foaꞌatjiyajoo̱n kui ngi̱ndiee̱, kó kui nee̱ xi katsꞌéntsjaà, kó bo̱a̱ tsꞌén katsꞌénkjaán kjo̱a̱xcha̱án Néná. 13Kó íjñámasien Néná, kó katsꞌéntsjaà a̱si̱én xí tjiín ne Baa̱l, ko̱jo ne Astaroo̱t. 14Kuíni nga Néná katsꞌénxchán kondraa̱ xota̱ Israee̱l, kó ki̱a̱ katsꞌénkꞌasꞌien ngi̱ya tsja xota̱chejé xí jaꞌáxiín nii̱, ko̱jo ngi̱ya tsja kondra̱a̱ xi síndo nga ngo foaꞌatjiyajoo̱n, kó nde ngiti̱ kamájiín askjanjo̱ ngase kondra̱a̱. 15Ta̱ nínga kijí, nga Néná kondra̱ kisꞌijñanii̱, tsi̱ꞌe̱ nga ni xi ndajín kamaá, xikó má katsó Néná nga katsóyàtjoón.
Xota̱ Israee̱l, achichí kjo̱a̱ni̱ma̱ jaꞌatio. 16Kósꞌe̱ Néná índo nendiꞌamasien xi tsꞌaxiéꞌá kjo̱a̱a̱ xota̱ xi jaꞌáxiín nii̱, 17ta̱nga nde bo̱a̱ tsꞌén tsintꞌiéjiín já nendiꞌamasiee̱n, kó ta̱sá ki̱a̱ katsꞌéntsjajo̱ yojoo̱ nga kijítji̱ngii̱ ne xi kje̱ꞌe. Kó bo̱a̱ tsꞌén achichí tsá katsꞌénkjii̱n yojoo̱ kui ndi̱yà nínga kisꞌiṉtso̱ma xota̱ xi xchaá, kui xota̱ xi tsintꞌiéꞌeén kjo̱a̱botíxomaa̱ Néná, ta̱nga kui xota̱ xi̱ꞌbi̱, bo̱a̱jín katsꞌén.
18Kó kjiꞌanga Néná índo nendiꞌamasiee̱n, ki̱a̱ kisꞌijñajii̱n nga, kó ngayeje ni̱xtjin nga kisꞌijña kui nendiꞌamasiee̱n, Néná katsꞌéndé xota̱ Israee̱l ngi̱ya tsja kondra̱a̱, ngatꞌa̱ Néná ni̱ma̱ kamaá nga tsintꞌieé, nga ni̱ma̱ katsó xota̱ na̱xi̱ńdá xí kiniꞌaán kjo̱a̱ꞌniuú, ko̱jo xi kjo̱a̱ni̱ma̱ kiniꞌánkjaꞌaa̱. 19Ta̱nga ngije ꞌme kui nendiꞌamasiee̱n, xota̱ na̱xi̱ńdaá ti̱ katsꞌéndándí nginí yojoo̱, kó chꞌo ngase katsꞌén ta̱bo̱a̱jiín xota̱ xi xchaá, ki̱a̱ kijítji̱ngi nginí ne xi kje̱ꞌe, kó ki̱a̱ katsꞌénxátꞌaa̱, ko̱jo asiéntikoó ngindyi̱ko̱n kui nee̱, kó nde katsꞌénkꞌoyájín yojoo̱ kjo̱a̱a̱ ni xi ndajín xi je kamángaá nga katsꞌén. 20Kuíni nga katsꞌénxchánní Néná kondra̱a̱ xota̱ Israee̱l, nga bi̱ katsó:
Ta̱ngatꞌanii̱ nga kui xota̱ na̱xi̱ńdaá foaꞌatjoón ni xi indajo̱ an, ko̱jo ni xi atixomáa̱ xota̱ xi xchaá, kó nga ntꞌiéꞌénjiín nda̱na, 21ja̱ ti̱nde an ngiti̱ kongatji̱ngíjáa̱n xikótsꞌèn ko̱e̱je̱boaꞌá, kui xota̱ na̱xi̱ńdá xí índo Josuee̱ kjiꞌanga je kꞌien, 22tsi̱ꞌe̱ nga skotꞌayákón an xota̱ Israee̱l, tsi to̱kó ki̱a̱, axa̱ ngiti̱ ki̱a̱jín ko̱e̱je̱tji̱ngi ndi̱yàna, xikó katsꞌén xota̱ xi xchaá.
23Kuíni nga Néná índoni kui xota̱ na̱xi̱ńdaá, kó nde ngojín xi tsangatji̱ngii̱, ti̱nde katsꞌénkꞌasꞌienjín ngi̱ya tsja Josuee̱, ta̱sá ki̱a̱ índora ngi̱jii̱n kui xotaa̱.
Currently Selected:
Nendiꞌamasien 2: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
