Nendiꞌamasien 21
21
Ínchjín xí kisꞌińdojo̱ xota̱ tji̱e̱e̱ Benjaa̱
1Xota̱ Israee̱l ki̱a̱ na̱xi̱ńdáꞌniú Mispaa̱ katsjátsꞌoá nga bi̱ katsó: Nde ngojín ñá xí ka̱ma ko̱e̱ꞌée̱ ndí ínchjínná tsi̱ꞌe̱ nga kꞌuíndojo̱ ndí xíꞌiín xota̱ tji̱e̱e̱ Benjaa̱. 2Kósꞌe̱ xota̱ na̱xi̱ńdaá jachó ki̱a̱ na̱xi̱ńdáꞌniú Betee̱l, kó ki̱a̱ kisꞌińdo ngindyi̱ko̱n Néná ngaskande nga kamángixoón, kó achichí ꞌniú askjandáyà nga askjandá. 3Kó bi̱ katsó: Míkjo̱a̱a̱ ji Ne, ji xi Nee̱ xota̱ Israee̱l ji, míkjo̱a̱a̱ nga bo̱a̱ kjiꞌi ni xi kamá ki̱a̱ Israee̱l, nga ngo xtín xota̱ tji̱e̱e̱ xi je kichajá.
4Kó nga kamángindyiojón, xota̱ na̱xi̱ńdaá achichí ta̱jñó jastjíe̱n, kó ki̱a̱ katsꞌénda ngo ṉchandikón, sꞌe̱ katsꞌénkꞌasꞌien kjo̱a̱tjó, ko̱jo chji̱e̱ xi tsi̱ꞌe̱ kjo̱a̱xioó. 5Kósꞌe̱ bi̱ katsó xota̱ Israee̱l: ꞌYá xota̱ tji̱e̱ni xi ngayeje xi chji̱a̱ni Israee̱l xi kijínijíngíjín nga kamátikó ki̱a̱ ngindyi̱ko̱n Néná. Ngatꞌa̱ jè ikꞌínda ngo ni, nga kui xota̱ xi ko̱e̱je̱nijíngíjín ki̱a̱ na̱xi̱ńdáꞌniú Mispaa̱ nga kjo̱chó ngindyi̱ko̱n Néná, kó bi̱ kiꞌmí: ¡Chjiéngá ko̱ya!
6Kó xota̱ Israee̱l ni̱ma̱ kamaá já ntsꞌi̱e̱ kui xi xota̱ tji̱e̱e̱ Benjaa̱, kó bi̱ katsó: ¡Ngo xtín xota̱ tji̱e̱ xi chji̱a̱ni Israee̱l xi je kichajá ngotꞌe̱ ꞌne̱! 7Kó si̱ꞌáa̱n kjo̱a̱a̱ ínchjín xí kꞌuíndojo̱ kui xota̱ xi tsꞌangi ngasee̱, ngatꞌa̱ jè bo̱a̱ kiꞌmí ngindyi̱ko̱n Néná nga ko̱e̱ꞌéjáa̱n ndí ínchjínná, tsi̱ꞌe̱ nga kꞌuíndojo̱ ndií kui xotaa̱.
8Kó bi̱ katsó kui jaá: ꞌYá xota̱ tji̱e̱ xi kijínijíngíjín nga kijí ngindyi̱ko̱n Néná ki̱a̱ na̱xi̱ńdáꞌniú Mispaa̱. Kó kamábe nga nde ngojín xota̱ xi chji̱a̱ni na̱xi̱ńdáꞌniú Jabee̱ xi chji̱a̱ni nangi Ngalaa̱nd xi kijí nínga síndo ndiꞌańjñoo̱ xotaa̱, ki̱a̱ nínga kamátikó, 9ngatꞌa̱ kjiꞌanga kijí kjo̱a̱xcha̱án, kó ikꞌíxki̱ ngayeje xotaa̱, kó nde ngojín xi kasako xi kijí xi chji̱a̱ni na̱xi̱ńdáꞌniú Jabee̱ xi chji̱a̱ni nangi Ngalaa̱nd. 10Kósꞌe̱ xota̱ xi kamátikoó katsangiya jàn jàn tiejó mi̱ jáxíꞌín xi ꞌniú chꞌokon ngasee̱, kó katseꞌeé ngo kjo̱a̱ nga bi̱ kiꞌmií: ¡Tangínjnú, kó ki̱cha̱ndojó ti̱ꞌankꞌiènjnú xota̱ na̱xi̱ńdáꞌniú Jabee̱ xi chji̱a̱ni nangi Ngalaa̱nd, ko̱jo ínchjín ko̱jo jákjíndí xi̱xi̱! 11Kó kui nii̱ xi si̱ꞌánjnú: ¡Ti̱ꞌankꞌiènjnú ngayeje jáxíꞌín ko̱jo ngayeje ínchjín xi je kisꞌiejo̱ ngo nda̱ xi̱ꞌin!
12Kó ngi̱jii̱n xota̱ xi chji̱a̱ni na̱xi̱ńdáꞌniú Jabee̱ xi chji̱a̱ni nangi Ngalaa̱nd, kasako nijón úchán ínchjín xo̱ngò xí kji̱e̱ jmí xi̱ꞌin foyojojo̱jín, kó ki̱a̱ tsangínjo̱ nínga síndo ndiꞌańjñoo̱ xotaa̱ ki̱a̱ na̱xi̱ńdáꞌniú Siloo̱, ngi̱ndie xi tikón nangi Kanaa̱n.
13Jaskan xota̱ xi kamátikoó, katsangiya chji̱ni̱e̱ꞌén tsi̱ꞌe̱ nga ku̱i̱chji̱a̱jo xota̱ tji̱e̱e̱ Benjaa̱ kui xi síndo ki̱a̱ ndi̱jo̱jee̱ na̱xi̱ńdáꞌniú Rimoo̱n, kó nga ku̱i̱ꞌíndajo̱ tsi̱ꞌe̱ nga kꞌuieé kjo̱a̱xió. 14Kó xota̱ tji̱e̱e̱ Benjaa̱ jachó nginí, kó kui katseꞌeé ínchjín xo̱ngò xi jmí ni kiniꞌánjo̱jín xi chji̱a̱ni na̱xi̱ńdáꞌniú Jabee̱ xi chji̱a̱ni nangi Ngalaa̱nd, ta̱nga kamájínnii̱ kui ínchjiín.
15Kó xota̱ na̱xi̱ńdaá ni̱ma̱ kamaá xota̱ tji̱e̱e̱ Benjaa̱, ngatꞌa̱ Néná, je íjñá tiya ngo xtín xota̱ tji̱e̱ xi chji̱a̱ni Israee̱l. 16Kó bi̱ kiꞌmií xota̱ xi xchaá kui ngi̱ndiee̱:
Mí xí si̱ꞌán tsi̱ꞌe̱ nga ko̱e̱ꞌée̱ ínchjín kuí jáxíꞌín xi kasakojiín, ngatꞌa̱ ínchjín xí chji̱a̱ni xota̱ tji̱e̱e̱ Benjaa̱ kiniꞌánkjié yeje nga kiniꞌánkꞌién.
17Kó bi̱ kiꞌmí ngasee̱:
Kui xota̱ xi tsꞌangii̱ yojoo̱, kui ngatꞌieé xota̱ tji̱e̱ tsi̱ꞌe̱ nga kju̱i̱e̱jín kui xota̱ tji̱e̱e̱, ngi̱jii̱n xota̱ tji̱e̱e̱ Israee̱l, 18ta̱nga ñá ka̱májín ko̱e̱ꞌée̱ ndí ínchjínná tsi̱ꞌe̱ nga kꞌuíndojo̱. Ngatꞌa̱ xota̱ Israee̱l ja̱bo̱a̱ jè katsjátsꞌoá nga bi̱ katsó: ¡Ngatꞌíko̱jonii̱ xota̱ xi tsja̱á ínchjín xí kꞌuíndojo̱ xota̱ tji̱e̱e̱ Benjaa̱!
19Kó bi̱ katsó: Jè kjima tiñaa̱ sꞌueé Néná xi niꞌán ki̱a̱ na̱xi̱ńdáꞌniú Siloo̱, kui xi tikón ki̱a̱ xtji̱e̱e̱n ta̱ꞌii̱n na̱xi̱ńdáꞌniú Belee̱n, ko̱jo xtji̱e̱e̱n nínga fotjo tsꞌueé ndi̱yà xí fínijíngí na̱xi̱ńdáꞌniú Betee̱l, ko̱jo na̱xi̱ńdáꞌniú Sikee̱n, ko̱jo xtji̱e̱e̱n na̱ngii̱ na̱xi̱ńdáꞌniú Lebonaa̱. 20Kó katseꞌeékjo̱a̱ xota̱ tji̱e̱e̱ Benjaa̱ nga bi̱ kiꞌmií:
Tangínjnú kó ki̱a̱ ti̱ndyionxtíkjájnú ki̱a̱ nínga tjitjíe̱ tostsi̱je̱è. 21Ti̱ndyiondajnú, kó kjiꞌanga kjo̱taxie nga ku̱i̱ti̱e̱ ínchjín xí chji̱a̱ni na̱xi̱ńdáꞌniú Siloo̱, ti̱tjaxi̱e̱jinjnú ki̱a̱ nínga kjiꞌi tostsi̱je̱è, kó nga ngo nga ngojnú, ngo ínchjín xí chji̱a̱ni na̱xi̱ńdáꞌniú Siloo̱ ti̱ꞌanchejéjnú, kósꞌe̱ tangínjnú nangi xi chji̱a̱ni xota̱ tji̱e̱e̱ Benjaa̱. 22Kó kjiꞌanga kji̱ndi̱bá nga sa̱ꞌínxchán xota̱ xi xchaá, ko̱jo tsi ntsꞌi̱e̱ kui ínchjiín, bi̱ kꞌuínjne̱: Ngo kjo̱a̱nda chjiáꞌájne̱, tsi̱ꞌe̱ nga ko̱e̱ꞌéjne̱ kui ínchjiín, ngatꞌa̱ kasakojínjne̱ tsi̱ꞌe̱ ngayeje kui jaá kjiꞌanga ikixkánjo̱jne̱ na̱xi̱ńdáꞌniú Jabee̱, kó nga jún kamámejénjínjnú katseꞌéjnúu̱ ngayejee̱ kónjnú, kuíni nga jún jmíjéjínjnú. 23Kó bo̱a̱ katsꞌén xota̱ tji̱e̱e̱ Benjaa̱, bo̱a̱ kjiꞌi ínchjín xí tieé kijíjo̱chejé xi kótjín má kui jaá, kó kijí nginí nangi nínga tjíndo, kó iskjininkꞌa nginí na̱xi̱ńdáꞌniuú, sꞌe̱ ki̱a̱ kisꞌińdo ngijee̱. 24Kó xota̱ Israee̱l ti̱ kijíni kui ngi̱ndiee̱ ngijee̱, kó nga ngo nga ngo kijí nínga síndo xota̱ tji̱e̱e̱, ko̱jo xota̱ ndiꞌaa̱, kó ki̱a̱ kijíkꞌíndo nínga síndo nangi xi kasakoo̱. 25Kui ni̱xtjin jàn jmí re kisꞌiejín na̱xi̱ńdá Israee̱l, kó ta̱ ni xi beriíko̱n nga kixi̱ xi katsꞌén nga ngo nga ngo xotaa̱.
Currently Selected:
Nendiꞌamasien 21: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
