1 Samuee̱ 1
1
Nga katsen Samuee̱
1Ki̱a̱ Rama̱ nangi xi chji̱a̱ni xota̱ Suu̱f, ngo ngi̱ndie xí kisꞌijña ngi̱jin na̱xi̱i̱ xota̱ tji̱e̱e̱ Efraii̱n, kisꞌijña ngo nda̱ xi kiꞌmí Elkana̱ xi ndií Jeroaa̱n kamá, ndíndeè Eliuu̱, ndínde xi ma joó Touu̱, ko̱jo ndínde xi ma jaán Suu̱f, kó ngayejee̱ nga xota̱ tji̱e̱e̱ Efraii̱n jatjojinni.
2Elkanaa̱ jó kamá chjo̱on xí kisꞌijñajo̱, ngo xi kiꞌmí na̱ Anaa̱ xi chjo̱on ndaa̱ kamá, kó chjo̱on xí ma joó na̱ Penina̱ kiꞌmí. Na̱ Peninaa̱ kisꞌiee̱ ndí, ta̱nga na̱ Anaa̱ ndi̱ kamá.
3Kó Elkanaa̱ xki̱ nó xki̱ nó kijítsꞌéndíkón Néná xí tsi̱ꞌe̱ jájuún, nga jatjoni na̱xi̱ńdáꞌniuú nga kijítsꞌenkꞌásꞌieén kjo̱a̱tjó ki̱a̱ na̱xi̱ńdáꞌniú Silo̱, nínga kisꞌińdo ndií chináꞌmi Elii̱, kui xi Ofnii̱, ko̱jo Finee̱, kui xi chináꞌmii̱ Néná kamá kui ngi̱ndiee̱.
4Kó nga jachó ni̱xtjin nga Elkanaa̱ katsꞌénkꞌasꞌien kjo̱a̱tjó, chií kui ni xi katsꞌénkꞌasꞌiee̱n katsjaá na̱ Peninaa̱, ko̱jo ngayeje ndií xi xi̱ꞌin ko̱jo xi ínchjín, 5ta̱nga na̱ Anaa̱ ni xi nda ngasee̱ kui katsjaá, ngatꞌa̱ ꞌniú ngase tjó kamaá, ndatsi Néná katsjájiín ngi̱ndie nga tsaꞌa ndí na̱ Anaa̱.
6Kó na̱ Peninaa̱ kondra̱ kisꞌijñanii̱ na̱ Anaa̱, kó katsꞌénxtií ko̱jo tsajnókie, ngaskande nga nde bejiín mí ni xi sa̱ꞌín, ngatꞌa̱ Néná katsjájiín ngi̱ndie nga ndí tsaꞌa. 7Kó xki̱ nó nga bo̱a̱ tsꞌén katsꞌénxtií, kjiꞌanga kijínijíngí xtji̱e̱e̱n nínga kisꞌijña Ndiꞌaa̱ Néná, kó kuíni nga na̱ Anaa̱ achichí askjandá, kó jmí ni iskjiniejín.
8Kó Elkanaa̱, kui xi xi̱ꞌii̱n na̱ Anaa̱, bi̱ katsoó:
—Ánní nga tichiꞌékón ji. Míkjo̱a̱a̱ nga jmí nichinie tichinijín ji. Ánní nga ndasen tikón kon ini̱màa̱. A chjíjín ngasenii̱ an ta̱bo̱a̱jínnii̱ tie ndí.
9Ngo ndi̱yà ngije iskjinie ko̱jo ngije katsꞌe ki̱a̱ na̱xi̱ńdáꞌniú Silo̱, na̱ Anaa̱ jastjíe̱n, kó ki̱a̱ jaꞌa nínga tikónsón yáxíríee̱ chináꞌmi Elii̱, ki̱a̱ tꞌa nga̱ntjo̱a̱a̱ na̱ngo̱xi̱i̱ Néná, 10kó kui naa̱ achichí ndasen kisꞌijña ini̱ma̱a̱ nga ni̱ma̱ katsó nga tsíchji̱a̱a̱ Néná, kó achichí ndasen askjandá. 11Kó ngo ni indajo̱ Néná, nga bi̱ katsoó:
Ji Ne xi tsi̱ꞌe̱ jmi̱juu̱n, tsi ni̱ma̱ ka̱maa̱ nga stsitsíjìi̱n kjo̱a̱ndasee̱n kui na̱ xi mosòo̱ ma, kó tsi kjo̱a̱ꞌátsjiee̱n an, tsi xchi̱yàjiín kui na̱ mosòo̱, kó tsi ko̱e̱ꞌée̱ ngo ndí xíꞌín, jí boá xi sa̱ꞌínkꞌasꞌiee̱n, tsi̱ꞌe̱ nga xáa̱ xi sa̱ꞌín ngayeje ni̱xtjin nga kꞌuijñá nga̱sondie, kó jmíni̱xtjin ko̱tie tsja̱a̱.
12Kó tji̱e̱nga na̱ Anaa̱ achichí je tsienii̱ nga tsꞌénchji̱a̱a̱ Néná, chináꞌmi Elii̱ tsꞌénkotsijen ndá ndaá tsꞌoa kui naa̱, 13ngatꞌa̱ na̱ Anaa̱ ini̱ma̱a̱ boá xi tsꞌénchji̱a̱, kó chií tsí katsꞌéntíyaá tsꞌoa, kó nda̱a̱ nde tsijen kandaꞌyájín, kuíni nga Elii̱, chꞌi̱ kuí naa̱, katsó. 14Kósꞌe̱ Elii̱, bi̱ katsoó:
—Ngaskande kjiꞌání nga to̱kó ku̱i̱ńtje̱ chꞌi̱ ji, chje̱ꞌéxíi̱n ndso̱ꞌboe binoo̱.
15Ta̱nga na̱ Anaa̱, bi̱ katsó:
—Jmí ndi̱a̱ xi tsa̱ꞌa̱n, chꞌi̱jín an, jmí bino̱ ko̱jo jmí xán xí ꞌniú tsꞌénꞌbi̱jín an, kjo̱a̱a̱ nga ndasen tikón a̱si̱énni̱xtjinna, kó kuíni nga ngindyi̱ko̱n Néná kjoéꞌe̱ xiyàa̱ ngayeje ni xi kjimaa̱ ini̱ma̱na. 16Ngata̱ niꞌínkjéjín ji nga ndajín boá kui na̱ mosòo̱, kjo̱a̱a̱ nga achichí má ni xi tsꞌén ndasenna, ko̱jo ni xi nda̱ kjimana, kuíni nga Néná tsꞌénchji̱a̱ñáa̱.
17Kósꞌe̱ Elii̱, bi̱ katsoó:
—Tꞌen xió xió ji, kó kui Néná xí tsi̱ꞌe̱ xota̱ Israee̱l, ngatsjaá ni xi tichjiéꞌée̱.
18Kó bi̱ katsó na̱ Anaa̱:
—Nda ngatꞌákaa̱ kui na̱ mosòo̱.
Kósꞌe̱ kui naa̱ kijíra̱ ndi̱ya̱à, kó iskjinie nichinie, sꞌe̱ kasasikjo kje̱n, ngiti̱ ndasenjín kisꞌijña ngase.
19Nga kamángindyiojón nga ta̱jñóyaà kisꞌińdoxtien ngindyi̱ko̱n Néná, sꞌe̱ jaskan kijí nginí ndiꞌaa̱ ki̱a̱ nangi Rama̱.
Kó nga jachó ni̱xtjin, Elkanaa̱ kisꞌiejo̱ na̱ Ana̱ chjo̱ón, kósꞌe̱ Néná jaꞌátsjiee̱n ni xi tsíꞌaá kui naa̱. 20Kó ngije jaꞌa ni̱xtjin, nga je tsaꞌa ndí na̱ Anaa̱, katsee̱n ngo ndí xíꞌín xi Samue̱ ítꞌa jaꞌén, nga bi̱ katsó: Ngatꞌa̱ án boá xi tsíꞌáa̱ Néná.
21Kó ingo ndi̱yà nginí nga Elkanaa̱ ko̱jo xota̱ ndiꞌaa̱, kijínijíngí ki̱a̱ na̱xi̱ńdáꞌniú Silo̱, nga kijítsjaá Néná kui kjo̱a̱tjó xi tsꞌenkꞌasꞌien xki̱ nó, tsi̱ꞌe̱ nga tsꞌénkjátjosón ni xi je índa. 22Ta̱nga na̱ Anaa̱ kijíjín, ngatꞌa̱ bi̱ katsoó xi̱ꞌii̱n:
—Skoyamára an ngaskande nga ku̱i̱ꞌíjñá chiki kui ndií, kósꞌe̱ ngaskande kjiꞌa boá nga án má xi kjuínjo̱ so̱bo̱a̱ an, tsi̱ꞌe̱ nga koko an ngindyi̱ko̱n Néná, kósꞌe̱ ki̱a̱ ngatꞌíjñá ngatsjéni̱xtjin ngijee̱.
23Kó Elkana̱ xi̱ꞌii̱n kui xota̱chjo̱on, bi̱ katsó:
—Ja̱ ti̱ꞌin ji ni xi nda ngase bee takín ji, ti̱ndyin ji ngaskande nga chje̱ꞌéxíi̱n chiki, kjiꞌanga Néná sa̱ꞌínkjatjosón eén.
Kó kisꞌijña kui xota̱chjo̱on, ko̱jo katsꞌénxchá ndií, ngaskande nga jaꞌáxiín chiki. 24Jaskan ngije jaꞌáxiín chiki kui ndií, kijínijíngí na̱xi̱ńdáꞌniú Silo̱ kui ko̱jo ndií, kó kijíjo̱ ngo ndií cho̱yojo xi ján noó, ko̱jo yaꞌa kan kilo̱ to ndso̱ko̱a̱n ṉño̱pan, ko̱jo ngo ti̱jì bino̱, ki̱a̱ Ndiꞌaa̱ Néná xí tikón kui ngi̱ndiee̱, ndatsi sꞌe̱ chichí ngase kui ndií. 25Kó kiniꞌánkꞌién kui ndií cho̱yojoo̱, sꞌe̱ kiniꞌánkꞌasꞌien kui ndií ngindyi̱ko̱n chináꞌmi Elii̱. 26Kó kui naa̱, bi̱ katsoó Elii̱: ¡Ji ndi̱a̱ xi tsa̱ꞌa̱n, tsie ngatamaa̱ nga ku̱i̱ndyin ji, kó xiyaa̱ nga án boá kui xota̱chjo̱on xí jeꞌe kui ngi̱ndiee̱, tꞌa nínga tindyin ji, kui xi ꞌniú tsíꞌaá Néná! 27Ta̱ngatꞌanii̱ kui ndií nga ꞌniú tsíꞌá an, kó Néná katsꞌénkjatjosón ni xi tsíꞌáa̱. 28Kuíni nga an, ji tjítsꞌenkꞌasꞌieen kui ndií, kui xi Néná jè katsꞌenkꞌasꞌièe̱n tji̱e̱nga kꞌuijñá nga̱sondie, kui tsi̱ꞌe̱ ka̱ma.
Kó ngayejee̱ nga kisꞌińdoxtien nga katsꞌéntsjaà Néná.
Currently Selected:
1 Samuee̱ 1: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
