Nendiꞌamasien 20
20
Ni xi katsꞌén xota̱ Israee̱l
1Kósꞌe̱ ngayeje xota̱ Israee̱l jatjoxieni ngi̱ndiee̱, ndeskande nangi Ndaa̱n, ngaskande nangi Beersebaa̱, ko̱jo nangi Ngalaa̱nd, kó ki̱a̱ kamátikó ki̱a̱ na̱xi̱ńdáꞌniú Mispaa̱, nga ngo tjín kamá ngindyi̱ko̱n Néná. 2Kó ngayeje já ngito̱ko̱o̱ xota̱ tji̱e̱e̱ Israee̱l, ko̱jo nijón úchán mi̱ jáxíꞌín xi tjimáyise xi ndyi̱yaꞌa ki̱cha̱ndojó, jachókindyia ki̱a̱ nínga kamátikó xota̱ na̱xi̱ńdaá Néná. 3Kó xota̱ tji̱e̱e̱ Benjaa̱ tsintꞌié nga xota̱ Israee̱l je kijínijíngí ki̱a̱ na̱xi̱ńdáꞌniú Mispaa̱. Kó xota̱ Israee̱l, bi̱ katsoó nda̱ xi chji̱a̱ni xota̱ tji̱e̱e̱ Lebii̱:
—Tꞌíyéjne̱ kótsꞌèn kamáni kui ni xi ndajiín.
4Kó kui nda̱ xi chji̱a̱ni xota̱ tji̱e̱e̱ Lebii̱, kui xi xi̱ꞌii̱n kui na̱ xi kiniꞌánkꞌieén, bi̱ katsó:
—An ko̱jo chjo̱onna ki̱a̱ jáchójne̱ ki̱a̱ na̱xi̱ńdáꞌniú Ngabaa̱, tsi̱ꞌe̱ nga ki̱a̱ si̱ꞌankjaꞌyájne̱ katsaki, 5ta̱nga já xí chji̱a̱ni ki̱a̱ na̱xi̱ńdáꞌniú Ngabaa̱ ndajín kijítsꞌénjo̱na, kó jaꞌatjiyajoo̱n ndiꞌa nínga tikón an nga jñoó, tsi̱ꞌe̱ nga sa̱ꞌínkꞌiénna katsaki, kó ata̱ ni̱ma̱ katsꞌénjo̱ chjo̱onna, kuíni nga kꞌienni. 6Kó án iskjíbé án chjo̱onna, kó kjín tjín tsatieya an, kó yojoo̱ ki̱a̱ katsangiyáa̱ ngayeje xota̱ tji̱e̱e̱ xota̱ Israee̱l, ngatꞌa̱ nangi Israee̱l boá nínga bo̱a̱ kjiꞌi ni xi ndajín xi kamátaꞌin. 7Kó ngotꞌe̱ ꞌne̱ nga kꞌi̱e̱ tindyiónjnú jún xi xota̱ Israee̱l, ndókjo̱a̱jnú kótsꞌèn sasiénjnú kui nii̱, kó te̱ꞌéjnú ngo kjo̱a̱botíxoma.
8Kósꞌe̱ ngayeje xota̱ na̱xi̱ńdaá kixindyia kixi̱ kó ta̱ ngo xtín kamá, kó bi̱ katsó:
—Nde ngojín ji̱n xi ko̱e̱je̱ nginí nínga tsꞌénkjaꞌyá ko̱jo tsi ndiꞌaa̱, 9kó kuí bí kui nii̱ xi si̱ꞌanjne̱ ki̱a̱ na̱xi̱ńdáꞌniú Ngabaa̱: Ngo kjo̱a̱chꞌáṉcha̱ ko̱óntonjne̱ tsi̱ꞌe̱ nga xcha̱ ꞌyání xi tjón ko̱e̱je̱nijíngí kui na̱xi̱ńdáꞌniuú. 10Kó tie jáxíꞌín chje̱ꞌéjinjne̱ xki̱ úchán xota̱ xi chji̱a̱ni xota̱ tji̱e̱e̱ Israee̱l, ko̱jo úchán xki̱ ngo mi̱, ko̱jo ngo mi̱ xki̱ tie mi̱, tsi̱ꞌe̱ nga sa̱ꞌínkabi nichinie ki̱a̱ na̱xi̱ńdáꞌniuú, tsi̱ꞌe̱ nga kjiꞌanga kongínnijíngíjne̱ ki̱a̱ na̱xi̱ńdáꞌniú Ngabaa̱, ngi̱ndie xi chji̱a̱ni xota̱ tji̱e̱e̱ Benjaa̱, bo̱a̱ si̱ꞌanjo̱ kui xotaa̱ xikó má kjiꞌi ni xi ndajín xi kamá ki̱a̱ nangi Israee̱l.
11Kó xikoó tsi ta̱ ngo kamá nga kamátikó ngayeje jáxíꞌín xi chji̱a̱ni Israee̱l, kondraa̱ kui na̱xi̱ńdáꞌniuú. 12Kó xota̱ tji̱e̱e̱ Israee̱l katsangiya jáxíꞌín ngayeje ngi̱ndie nínga síndo xota̱ tji̱e̱e̱ Benjaa̱, nga bi̱ katsó: Mí ni xi ndajín xi kamá ngi̱jinjnú. 13Ngotꞌe̱ ꞌne̱, ti̱ꞌankꞌasꞌiénjnú kui já xí achichí ꞌniú ndajiín xi síndo ki̱a̱ na̱xi̱ńdáꞌniú Ngabaa̱, tsi̱ꞌe̱ nga si̱ꞌankꞌienjne̱, kó bo̱a̱ tsꞌén chja̱ꞌáxínjne̱ kui ni xi ndajín xi tikón ki̱a̱ Israee̱l.
Ta̱nga xota̱ tji̱e̱e̱ Benjaa̱, nde tsintꞌiéjiín ni xi katsó já ntsꞌi̱e̱ kui xi xota̱ xi chji̱a̱ni Israee̱l. 14Kó ta̱sá xota̱ tji̱e̱e̱ Benjaa̱ jatjoni na̱xi̱ńdáꞌniuú, kó ki̱a̱ kamátikó ki̱a̱ na̱xi̱ńdáꞌniú Ngabaa̱ tsi̱ꞌe̱ nga skjánjo̱ xota̱ Israee̱l. 15Kó xota̱ tji̱e̱e̱ Benjaa̱ xi jatjoni na̱xi̱ńdáꞌniuú kan jun mi̱ ma jáxíꞌín xi ndyi̱yaꞌa ki̱cha̱ndojó, ko̱jo xota̱ xi chji̱a̱ni na̱xi̱ńdáꞌniú Ngabaa̱ nijan kamá, kó yito úchán já xí katjoꞌójin kamá ngayejee̱. 16Ngayeje kui xotaa̱ ko̱jo kui xi yito úchán já xí katjoꞌójii̱n, skón kamá, kó nga ngo nga ngo kui jaá, tsi ngo tsja̱ tsꞌaya ngo ndi̱jo̱ndayojo ngayejee̱ nga yeꞌeé. 17Kó já xí chji̱a̱ni xota̱ Israee̱l, nijón úchán mi̱ kamá xi tsaꞌa ki̱cha̱ndojoó, kó ngayejee̱ nga já xí fí kjo̱a̱xchán boá.
Nga ikixkánjo̱ xota̱ tji̱e̱e̱ Benjaa̱
18Kó xota̱ Israee̱l kisꞌińdonda, kó kijínijíngí ki̱a̱ na̱xi̱ńdáꞌniú Betee̱l, kó asíyaá Néná nga bi̱ katsoó: ꞌYání ji̱n xi tjón ko̱e̱je̱kjánjo̱ xota̱ tji̱e̱e̱ Benjaa̱. Kó Néná bi̱ katsó: Tjón xota̱ tji̱e̱e̱ Jundáa̱. 19Kó nga ta̱jño̱ó kijí xota̱ Israee̱l, kó ki̱a̱ índo ndiꞌańjñoo̱ tiñaa̱ na̱xi̱ńdáꞌniú Ngabaa̱ tsi̱ꞌe̱ nga skjánjo̱. 20Kó xota̱ Israee̱l kijíkjánjo̱ xota̱ tji̱e̱e̱ Benjaa̱, kó jáxíꞌín xi chji̱a̱ni Israee̱l kisꞌińdonda tsi̱ꞌe̱ nga skján ki̱a̱ tꞌa na̱xi̱ńdáꞌniú Ngabaa̱, 21ta̱nga xota̱ tji̱e̱e̱ Benjaa̱ jatjoxieni na̱xi̱ńdáꞌniú Ngabaa̱, kó kan jó mi̱ ma jáxíꞌín xi chji̱a̱ni xota̱ Israee̱l xi katsꞌénkjiesón. 22Kó katsꞌéngaꞌniú nginí xota̱ Israee̱l, kó ti̱ katsjá nginií kjo̱a̱ xkjín tsi̱ꞌe̱ nga skján nginí ki̱a̱ ngi̱ndie nínga tjón tjón askjan. 23Ngatꞌa̱ xota̱ Israee̱l kijínijíngí, kó askjandá ngindyi̱ko̱n Néná ngaskande nga kamángixoón, kó asíyaá Néná nga bi̱ katsoó: A ti̱ ku̱i̱xkánjo̱ nginíjne̱ xota̱ tji̱e̱e̱ ntsꞌiejne̱ Benjaa̱. Kó Néná bi̱ katsó: Tangínnijíngijnú kó ti̱xkánjo̱jnú.
24Kó bo̱a̱ tsꞌén nga kamángindyiojoón, xota̱ Israee̱l kijíkjánjo̱ xota̱ tji̱e̱e̱ Benjaa̱. 25Kó xota̱ tji̱e̱e̱ Benjaa̱ jatjoni na̱xi̱ńdáꞌniú Ngabaa̱, kondraa̱ xota̱ Israee̱l, kó ingo ndi̱yà nginí nga tjiꞌún ján mi̱ ma jáxíꞌín xi chji̱a̱ni xota̱ tji̱e̱e̱ Israee̱l xi ki̱cha̱ndojó katsꞌénkjiesónni.
26Kósꞌe̱ ngayeje xota̱ Israee̱l, ko̱jo ngayeje xota̱ na̱xi̱ńdaá kijínijíngí ki̱a̱ na̱xi̱ńdáꞌniú Betee̱l, kó ki̱a̱ kixindyia ngindyi̱ko̱n Néná nga askjandá ko̱jo nga katsꞌénkjaꞌa kjindiá yojoo̱, ngaskande nga kamángixoón, kó katsꞌénkꞌasꞌien kjo̱a̱tjó, ko̱jo chji̱e̱ xi boeꞌé tsi̱ꞌe̱ kjo̱a̱xioó ngindyi̱ko̱n Néná. 27Kó xota̱ Israee̱l asíyaá Néná, ngatꞌa̱ kui ni̱xtjii̱n to̱kó ki̱a̱ tikón koxa̱a̱ kjo̱a̱ꞌbíndaa̱ Néná ki̱a̱ ngi̱jii̱n xota̱ Israee̱l, 28kó Finee̱, ndií chináꞌmi Eleasaa̱, ndíndeè Aaroo̱n, kuí boá xi katsꞌénxá kuí ni̱xtjii̱n ki̱a̱ Ndiꞌaa̱ Néná, kó xota̱ Israee̱l, bi̱ katsoó Néná: A ti̱ ku̱i̱xkánjo̱ nginíjne̱ xota̱ tji̱e̱e̱ ntsꞌiejne̱ Benjaa̱, axa̱ jè si̱ꞌankjiejne̱kjo̱a̱. Kó Néná, bi̱ katsó: ¡Tangínnijíngijnú, ngatꞌa̱ ndyiojón sa̱ꞌinkꞌasꞌienjnúꞌun ngi̱ya ndsa̱jnú kui xotaa̱!
29Kósꞌe̱ xota̱ Israee̱l índoxtikjá jájún nga ngo foaꞌatjiyajoo̱n na̱xi̱ńdáꞌniú Ngabaa̱. 30Kó xi ma jaán ni̱xtjin kjiꞌanga xota̱ Israee̱l kijínijíngí nga kijíkjánjo̱ xota̱ tji̱e̱e̱ Benjaa̱, ki̱a̱ kisꞌińdonda nga ki̱a̱ skja̱n kje̱n na̱xi̱ńdáꞌniú Ngabaa̱ xikoó ni̱xtjin xi ngasee̱. 31Kó xota̱ tji̱e̱e̱ Benjaa̱ jatjoxieni na̱xi̱ńdáꞌniuú tsi̱ꞌe̱ nga askjanjo̱ xota̱ na̱xi̱ńdaá, kó sa kjin sa kjin ngase kijínii̱ na̱xi̱ńdáꞌniuú. Kó xikó kamá kje̱ꞌe ni̱xtjin, tjín kuí xotaa̱ xi kiniꞌánꞌoón ki̱a̱ ngi̱ya ndi̱ya̱à, ki̱a̱ ndi̱yà xí fínijíngíni na̱xi̱ńdáꞌniú Betee̱l ko̱jo xi ingo ndi̱yà xí fíni na̱xi̱ńdáꞌniú Ngabaa̱. Kó bo̱a̱ tsꞌén mara̱ kantié jáxíꞌín xi chji̱a̱ni xota̱ Israee̱l xi kiniꞌánkjiesón. 32Kó xota̱ tji̱e̱e̱ Benjaa̱ bi̱ katsó: ¡Jè kiniꞌángiñáa̱ xikoó tsie ꞌne̱! Ta̱nga xota̱ Israee̱l, bi̱ katsó: Ku̱i̱yo̱ndíkón tsi̱ꞌe̱ nga sa̱ꞌínkjii̱n yojoo̱ na̱xi̱ńdáꞌniuú, ngaskande nga kjo̱chó ndi̱ya̱à. 33Kósꞌe̱ ngayeje xota̱ Israee̱l jastjíe̱nni ngi̱ndie nínga je ndyi̱koya, kó kisꞌińdonda nga skja̱n ki̱a̱ na̱xi̱ńdáꞌniú Baa̱l Tamaa̱r, tji̱e̱nga kui xota̱ Israee̱l xi kisꞌińdochjaá jatjoxieni nínga kisꞌińdo ki̱a̱ tꞌa na̱xi̱ xi chji̱a̱ni na̱xi̱ńdáꞌniú Ngabaa̱. 34Kó ki̱a̱ kje̱n na̱xi̱ńdáꞌniú Ngabaa̱, tie mi̱ ma jáxíꞌín xi katjoꞌójin xi chji̱a̱ni xota̱ Israee̱l xi jachó, kó kuí jaá xi katsꞌénꞌniú ngase kui kjo̱a̱xcha̱án, kó xota̱ tji̱e̱e̱ Benjaa̱ nde bejín ni xi ndajín xi je ndibánié. 35Kó kui ni̱xtjii̱n Néná katsꞌénchaja xota̱ tji̱e̱e̱ Benjaa̱, ngindyi̱ko̱n xota̱ Israee̱l, kó xota̱ Israee̱l kan ún mi̱ úchán má jáxíꞌín xi ndyi̱yaꞌa ni xi bixkánjo̱, xi chji̱a̱ni xota̱ tji̱e̱e̱ Benjaa̱ xi ki̱cha̱ndojó katsꞌénkjiesónni. 36Kó nga kamábe xota̱ tji̱e̱e̱ Benjaa̱ nga je tjichájá, xota̱ Israee̱l ja̱ katsꞌén xi je tjichájá katsꞌén, ta̱nga ja̱bo̱a̱ jè be nga je síndoxtikjá jáxíꞌín xi je síndonda nga ngo foaꞌatjiyajoo̱n na̱xi̱ńdáꞌniuú Ngabaa̱, 37kósꞌe̱ kui já xí síndoxtikjaá tsá katsꞌeén yojoo̱, kó askjanjo̱ xota̱ na̱xi̱ńdáꞌniú Ngabaa̱, kó kui já xí kisꞌińdoxtíkjaá katsꞌeén xota̱ na̱xi̱ńdáꞌniuú, kó ki̱cha̱ndojó katsꞌénkjiesón ngayeje. 38Kuí bí kui chi̱bo̱a̱a̱ xi índa nga sa̱ꞌín xota̱ xi chji̱a̱ni Israee̱l ko̱jo kui já xí kisꞌińdoxtíkjaá, nga ṉdi̱ sa̱ꞌínkjién ki̱a̱ na̱xi̱ńdáꞌniuú ngije katsꞌéntsi̱ꞌe̱ kui ngi̱ndiee̱. 39Kó kui já xí chji̱a̱ni Israee̱l ngije ndyi̱fíni nga̱xto̱n nga ndyi̱kjàn, xota̱ tji̱e̱e̱ Benjaa̱ ítsꞌi̱yanii̱ nga katsꞌénꞌoón ko̱jo nga katsꞌénkꞌién já xí chji̱a̱ni Israee̱l, kó mara̱ tsi ta̱ kantié katsꞌénkꞌién, kó bi̱ tsꞌén katsꞌénkjó: Jè kiniꞌángiñáa̱ xikoó kjiꞌanga tjón ikixkánjo̱. 40Ta̱nga kjiꞌanga je tjitjó ṉdi̱i̱ ki̱a̱ na̱xi̱ńdáꞌniuú, xota̱ tji̱e̱e̱ Benjaa̱ askotsijenni nga̱xto̱n, kó kamábe nga ṉdi̱i̱ na̱xi̱ńdáꞌniuú ngaskande nkꞌa jàn je kjochó, 41kósꞌe̱ xota̱ Israee̱l jaꞌatjiya, kó xota̱ tji̱e̱e̱ Benjaa̱ achichí katsakjónní, ngatꞌa̱ je kamábe ni xi ndajín xi je kjindibánié. 42Kó ta̱sá kijíꞌoyá, kó tsangaa̱ xota̱ Israee̱l, kósꞌe̱ ki̱a̱ kijí xtji̱e̱e̱n nangi kixií, ta̱nga kui xi ndyi̱mongatji̱ngii̱ jachótji̱ngii̱, kó kui xi xtji̱e̱e̱n na̱xi̱ńdáꞌniuú kjindibáni, ikꞌíchjaá ndi̱yà, kó kiniꞌánkjiesón. 43Bo̱a̱ tsꞌén ikꞌíchjáꞌyá xota̱ tji̱e̱e̱ Benjaa̱, kó ikiyotji̱ngii̱ ngaskande kje̱n na̱xi̱ńdáꞌniú Ngabaa̱, ki̱a̱ xtji̱e̱e̱n nínga fotjo tsꞌueé. 44Kó xota̱ tji̱e̱e̱ Benjaa̱ tjiꞌún ján mi̱ ma xi jesón, ngayejee̱ nga já chꞌokon boá katsaki. 45Kó xi ngasee̱ kijíꞌoyá nginí, kó ki̱a̱ tsanga xtji̱e̱e̱n nangi kixií, ngaskande ndi̱jo̱jee̱ na̱xi̱ńdáꞌniú Rimoo̱n, kó kui jaá, ún mi̱ má xi kiniꞌánkjiesón ki̱a̱ ndi̱ya̱à, kó xi ngasee̱ ikiyotji̱ngii̱ ngaskande na̱xi̱ńdáꞌniú Jindoo̱n, ki̱a̱ nínga ngi jó mi̱ ma xi kiniꞌánkjiesón. 46Kó ngayeje xota̱ tji̱e̱e̱ Benjaa̱ xi kiniꞌánkjiesón kui ni̱xtjii̱n, kan ún mi̱ ma jáxíꞌín xi ndyi̱yaꞌa ki̱cha̱ndojó, kó ngayejee̱ nga achichí chꞌokon kamá katsaki. 47Ta̱nga jun úchán má jáxíꞌín xi kijíꞌoyá nginí, kó ki̱a̱ tsanga nangi kixií, ngaskande ndi̱jo̱jee̱ na̱xi̱ńdáꞌniú Rimoo̱n, kó ki̱a̱ kisꞌińdo kui ngi̱ndiee̱ nijón sá. 48Kó xota̱ Israee̱l kijíkjánjo̱ nginí xota̱ tji̱e̱e̱ Benjaa̱, kó ki̱cha̱ndojó katsꞌénkjiesónni, ko̱jo cho̱o̱, ko̱jo ngayeje xi kasakoo̱, kó ngayeje na̱xi̱ńdáꞌniuú ítꞌandiꞌí.
Currently Selected:
Nendiꞌamasien 20: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
