Nendiꞌamasien 19
19
Nda̱ xi chji̱a̱ni xota̱ tji̱e̱e̱ Lebii̱ ko̱jo chjo̱ón
1Kui ni̱xtjin jàn nga jmí re kisꞌiejín ki̱a̱ na̱xi̱ńdá Israee̱l, ngo nda̱ xi chji̱a̱ni xota̱ tji̱e̱e̱ Lebii̱ xi kisꞌijña nínga fetꞌanii̱ na̱xi̱ xi chji̱a̱ni xota̱ tji̱e̱e̱ Efraii̱n, kisꞌijñajo̱ ngo na̱ xi chji̱a̱ni na̱xi̱ńdáꞌniú Belee̱n, ngi̱ndie xi chji̱a̱ni nangi Jundáa̱. 2Ta̱nga chjo̱ón kui nda̱a̱ katsꞌéntꞌaa̱kjo̱a̱ xi̱ꞌii̱n, kósꞌe̱ íjñámasien, kó kijíkꞌíjñá nginí ndiꞌaa̱ na̱ꞌmii̱, ki̱a̱ na̱xi̱ńdáꞌniú Belee̱n, ngi̱ndie xi chji̱a̱ni nangi Jundáa̱, kó nijón sá kamaá nga kisꞌijña ki̱a̱a̱. 3Ta̱nga xi̱ꞌii̱n jastjíe̱n, kó kijíngase chjo̱ón tsi̱ꞌe̱ nga nda ku̱i̱chji̱a̱jo, kó kꞌuijñájo̱ nginí kui nda̱a̱. Kó ngo nda̱ moso̱, ko̱jo jó bórró kijíjo̱, kó kui naa̱ katsꞌénkꞌasꞌien ndiꞌaa̱ na̱ꞌmii̱, kó nga kamábe na̱ꞌmii̱ kui naa̱, achichí tsjá kamaá nga jachó. 4Kó chiꞌyaá kui nda̱a̱ ꞌniú katsꞌeén tsi̱ꞌe̱ nga ki̱a̱ kꞌuijñára, kó ján ni̱xtjin kamaá nga kisꞌijña ndiꞌaa̱ chiꞌyaá, kó iskjinie ko̱jo katsꞌe, kó ki̱a̱ kisꞌiyojo. 5Kó xi ma nijoón ni̱xtjin, kui nda̱a̱ ko̱jo chjo̱on, ko̱jo mosoo̱, achichí ꞌniú ta̱jñóyà jastjíe̱n, kó kisꞌijñanda tsi̱ꞌe̱ nga ko̱e̱je̱, ta̱nga na̱ꞌmii̱ chjo̱ón, bi̱ katsoó xkandaa̱: Te̱ꞌéngaꞌníi̱ ini̱màa̱ ngindiee̱ nga kꞌuín, chi̱ni mára chií nichinie, sꞌe̱ jaskan tꞌen ꞌne̱ ngijee̱.
6Kósꞌe̱ nijan kisꞌińdo, kó nijan iskjinie ko̱jo katsꞌe, sꞌe̱ na̱ꞌmii̱ kui naa̱, bi̱ katsoó kui nda̱a̱: ꞌNiú míꞌaá tsi̱ꞌe̱ nga kꞌi̱e̱ ku̱i̱ndyin ji kui ni̱xtji̱e̱e̱n, kó tsjangatamaa̱ ini̱màa̱.
7Kó kui nda̱a̱ je tsꞌénfí katsaki, ta̱nga na̱ꞌmii̱ kui naa̱, ti̱ ꞌniú tsíꞌá nginií tsi̱ꞌe̱ nga ki̱a̱ kꞌuijñá nginí kui ni̱xtji̱e̱e̱n. 8Kó xi ma uún ni̱xtjin, nga ndibáꞌásie̱én jastjíe̱n kui nda̱a̱, tsi̱ꞌe̱ nga je ko̱e̱je̱ katsaki, ta̱nga na̱ꞌmii̱ kui naa̱, bi̱ katsoó: ꞌNiú míꞌaá tsi̱ꞌe̱ nga ko̱e̱ꞌéngaꞌníi̱ ini̱màa̱, kó chiyéra ji ngaskande ngije si̱si̱eén. Kó ngajoó nga nijan iskjinie nginí nichinie, kó ngaskande kisꞌijñara ngaskande nga kamángixoón. 9Kó nga jastjíe̱n kui nda̱a̱, tsi̱ꞌe̱ nga ko̱e̱je̱ kui, ko̱jo chjo̱ón, ko̱jo mosoo̱, chiꞌyaá, kui xi na̱ꞌmii̱ kui naa̱, bi̱ katsoó: Jè kjimajñó, ꞌniú míꞌaá nga ta̱sá ti̱ndyinra ji kui ni̱xtji̱e̱e̱n, kó tsjangatamaa̱ ini̱ma̱a̱. Ndyiojón ta̱jñó tꞌen ji, tsi̱ꞌe̱ nga kꞌuin jí ndiꞌáa̱.
10Ta̱nga kui nda̱a̱ kamámejénjiín nga ki̱a̱ kꞌuijñá ngase kui ni̱xtji̱e̱e̱n, kó ta̱sá jastjíe̱n, kósꞌe̱ kijí, kó jachó ngaskande kje̱n nangi Jebuu̱, kui xi na̱xi̱ńdáꞌniú Jerusalee̱n boá ngotꞌe̱, kó kijíjo̱ nga jó bórroó nga je tjísoón xiri̱e̱, ko̱jo kijíjo̱ chjo̱ón nga. 11Kó nga jachó nangi Jebuu̱ je mejeén makꞌasꞌien tsꞌueé, kó kuíni nga nda̱ mosoo̱, bi̱ katsoó ndi̱a̱a̱:
—Ja̱bíꞌi̱n ndi̱a̱, ꞌniú míꞌaá, ta̱sá xín kongín, ki̱a̱ tjiàn kuí na̱xi̱ńdáꞌniuú xota̱ Jebuu̱, kó ki̱a̱ si̱ꞌankjaꞌyá.
12Ta̱nga bi̱ katsó ndi̱a̱a̱:
—Jmí, xínjín kongín, nínga síndo ngi̱ndie xi nde yàjín ñá, ngototo tsi tsi̱ꞌe̱ xota̱ Israee̱l, ta̱sá kongínra na̱xi̱ńdáꞌniú Ngabaa̱.
13Kó bi̱ katsó ngasee̱ mosoo̱:
—Ja̱bíꞌi̱n, kó tjiantiñá nínga tikón ngo kui ngi̱ndiee̱, kó ki̱a̱ si̱ꞌankjaꞌyá ki̱a̱ na̱xi̱ńdáꞌniú Ngabaa̱, ko̱jo tsi na̱xi̱ńdáꞌniú Ramaa̱.
14Kó bo̱a̱ tsꞌén kijíra ndi̱ya̱à, kó ki̱a̱ kamájñótaꞌin ki̱a̱ tiñaa̱ na̱xi̱ńdáꞌniú Ngabaa̱, kui ngi̱ndie xi chji̱a̱ni xota̱ tji̱e̱e̱ Benjaa̱. 15Kó tsꞌasꞌien na̱xi̱ńdáꞌniú Ngabaa̱, tsi̱ꞌe̱ nga ki̱a̱ kjo̱a̱ꞌaa̱ ni̱xtji̱e̱n, kó ki̱a̱ kisꞌińdo ki̱a̱ ndi̱tse̱e̱n kui na̱xi̱ńdáꞌniuú, ngatꞌa̱ jmíjín xi katsjaá ngo ngi̱ndie tsi̱ꞌe̱ nga ki̱a̱ sa̱ꞌínkjaꞌyá ngi̱ya ndiꞌaa̱. 16Kó nga kamájñoó, ngo ndí xingá xi kjoeꞌeni jno̱o̱ jaꞌa, kui ndí xingaá ki̱a̱ chji̱a̱ni na̱xi̱ xi tsi̱ꞌe̱ xota̱ tji̱e̱e̱ Efraii̱n, kó ki̱a̱ kisꞌijña ki̱a̱ na̱xi̱ńdáꞌniú Ngabaa̱, ta̱nga xota̱ xi síndo kui ngi̱ndiee̱ xota̱ tji̱e̱e̱ Benjaa̱ chji̱a̱ni. 17Kó kui ndí xingaá nga askotsijen, kamábe ki̱a̱ ndi̱tse̱e̱n na̱xi̱ńdaá kui nda̱a̱, kó bi̱ katsó kui ndí xingaá:
—Ñá kjindibéni ji, kó ñá tiꞌmi.
18Kó bi̱ katsó kui nda̱a̱:
—Ta̱ ngotjón ndyi̱bitjajne̱ kꞌi̱e̱e̱ na̱xi̱ńdáꞌniú Belee̱n. Nínga fetꞌanii̱ na̱xi̱ xi chji̱a̱ni xota̱ tji̱e̱e̱ Efraii̱n kjindibánijne̱. Ki̱a̱ ndokjo̱a̱nijne̱, kó na̱xi̱ńdáꞌniú Belee̱n xi chji̱a̱ni nangi Jundáa̱ kjindibánijne̱, kó ngotꞌe̱ ꞌne̱ ki̱a̱ ndyi̱mongínjne̱ Ndiꞌaa̱ Néná, ta̱nga jmíjín xi katsjandièjne̱ nga ki̱a̱ si̱ꞌankjaꞌyá chiíjne̱ ndiꞌaa̱. 19Tjínjne̱ ndi̱xcho̱, ko̱jo ni xi kjinie bórrójne̱, ko̱jo kichꞌiájne̱ nichinie ko̱jo bino̱, tsi̱ꞌe̱ tsa̱ꞌa̱n, ko̱jo tsi̱ꞌe̱ chjo̱onna, ko̱jo tsi̱ꞌe̱ nda̱ mosòo̱ xi tsoꞌbájo̱na, jmí ni chajájínjne̱.
20Kó kui ndí xingaá, bi̱ katsó:
—¡Ngatꞌieé kjo̱a̱xió ji! Ndeskande ngotꞌe̱ ꞌne̱ ta̱ ni xi ka̱machjieénri an tsjaa, ta̱nga mejénjínna nga ki̱a̱ si̱ꞌinkjaꞌyé ji ki̱a̱ ndi̱tse̱e̱n.
21Kó kijíjo̱ ndiꞌaa̱, kó katsjaá xka̱ xi iskjinie bórroó, sꞌe̱ aniéjón sé, kósꞌe̱ iskjinie ko̱jo katsꞌe.
22Ta̱nga kjiꞌa má nga ndyi̱tsꞌèntsjaà ini̱ma̱a̱, jachó já xí chji̱a̱ni kui na̱xi̱ńdáꞌniuú, kui xi achichí ꞌniú ndajiín, kó jaꞌatjiyajoo̱n ndiꞌaa̱, sꞌe̱ ki̱a̱ kixindyiachjá tꞌa nga̱ntjo̱a̱a̱, kó bi̱ katsoó ndí xingá xi tsi̱ꞌe̱ kui ndiꞌaa̱:
—¡Ndibéje̱jne̱ kui nda̱ xí tsꞌasꞌien ndiꞌáa̱, tsi̱ꞌe̱ nga tsjayójojojne̱!
23Kó kui ndí xingá xi tsi̱ꞌe̱ kui ndiꞌaa̱, jatjoxie, kó bi̱ katsoó:
—Jmí ntsꞌie, ngata̱ niꞌánjínjnú kui ni xi ndajiín, ꞌniú míꞌájnúꞌun, ngatꞌa̱ kui nda̱a̱ ndiꞌana boá nínga je tsꞌasꞌien. Ngata̱ niꞌánjínjnú kui ni chꞌokjiꞌii̱. 24Jéꞌe̱n kꞌi̱e̱ tikónna ngo tsa̱kjìn xo̱ngò, ko̱jo chjo̱ón kui nda̱a̱, kó ngotꞌe̱ má kꞌo̱xié an, kó ta̱ ni xi mejénjnú ti̱ꞌanjo̱jnú, ta̱nga kui nda̱a̱, ngata̱ niꞌánjo̱jínjnú kui ni xi ndajiín.
25Ta̱nga kui jaá nde kamámejénjiín tsintꞌieé kui ndí xingaá, kó kui nda̱a̱ iskjíbé chjo̱ón, kó tsꞌaxié, sꞌe̱ kui jaá chꞌo katsꞌénjo̱ kjo̱a̱ꞌniú nga ngo ni̱xtji̱e̱e̱n, ngaskande nga kisisie̱èn, kó ngaskande ngije tjíchjì ngindie jàn tsintjoen.
26Kó ngije kisisie̱èn jachó kui naa̱, kó ki̱a̱ tsꞌákatꞌa nga̱ntjo̱a̱a̱ ndiꞌaa̱ kui ndí xingaá, ki̱a̱ nínga tikón xi̱ꞌii̱n, ngaskande nga kisisièn chjanga chjanga. 27Kó nga jastjíe̱n xi̱ꞌii̱n nga ta̱jño̱ó, iskjíxꞌá nga̱ntjo̱a̱a̱ kui ndiꞌaa̱, kó jatjoxie tsi̱ꞌe̱ nga ko̱e̱je̱ra ndi̱ya̱à, ta̱nga kamábe nga chjo̱ón ki̱a̱ kjiꞌijña nga̱ntjo̱a̱a̱ kui ndiꞌaa̱, kó tsja kui naa̱ kjiꞌitiee̱ xtji̱e̱e̱n nga̱ntjo̱a̱a̱. 28Kó kui nda̱a̱, bi̱ katsoó: ¡Ti̱sítji̱n ji, kó tjiàn ꞌne̱! Ta̱nga kui naa̱ jmí ni katsójín ngatꞌa̱ je kꞌien, kósꞌe̱ kui nda̱a̱ iskjininkꞌa, kó bórroó katsꞌénkꞌíjñasón, sꞌe̱ jatjoni kui ngi̱ndiee̱. 29Kó nga jachó ndiꞌaa̱, tsꞌasꞌien, sꞌe̱ iskjíbé ngo kichiro̱, kó tiejó tjín tsatieya, sꞌe̱ xi̱i̱ yojoo̱ kui naa̱, ngo tjín katsangiyaa̱ nga tiejó tjín xota̱ tji̱e̱e̱ xota̱ Israee̱l. 30Kó ngayeje xota̱ xi kamábe ni xi katsꞌén kui nda̱a̱, bi̱ katsó: ¡Kji̱e̱ ngo ndi̱yà ya, ngo ni xi xikoó xi kamaá, ndeskande ni̱xtjin nga xota̱ Israee̱l jatjoni nangi Ejiptoo̱, ngaskande ngotꞌe̱! ¡Ti̱ꞌankjójnú kui nii̱, kó tꞌíyájnú mí nii̱ xi si̱ꞌán!
Currently Selected:
Nendiꞌamasien 19: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
