Nendiꞌamasien 18
18
Xota̱ tji̱e̱e̱ Ndaa̱n katsꞌén tꞌanangi nínga kisꞌińdo
1Kui ni̱xtjin jàn jmí re kisꞌiejín ki̱a̱ na̱xi̱ńdá Israee̱l, kó ti̱kuii ni̱xtjii̱n xota̱ tji̱e̱e̱ Ndaa̱n tsangase ngo tꞌanangi nínga kꞌuíndo, ngatꞌa̱ kji̱e̱ sakójiín nangi xi tsoboaá ngi̱jii̱n xota̱ tji̱e̱e̱ Israee̱l. 2Kó xota̱ tji̱e̱e̱ Ndaa̱n ndeskande na̱xi̱ńdáꞌniú Soraa̱, ko̱jo na̱xi̱ńdáꞌniú Estaoo̱l katsangiyani ún jáxíꞌín xi bo̱a̱ tsꞌén chꞌokon xikoó kui jaá, kó kuí má bo̱a̱ já xí ꞌniú ntꞌiéꞌén ngase, ko̱jo já xí tjiín ngaꞌniú, tsi̱ꞌe̱ nga ko̱e̱je̱katsijen kui tꞌanangii̱, kó bi̱ katsoó kui jaá:
—¡Tangínjnú kó tsitsíjenjnúu̱ kui tꞌanangii̱!
Kó kui jaá kijí, kó jachó ki̱a̱ na̱xi̱ xi chji̱a̱ni xota̱ tji̱e̱e̱ Efraii̱n, ngaskande ndiꞌaa̱ Mikayiaa̱, kó ki̱a̱ jaꞌaa̱ ni̱xtji̱e̱n. 3Kó kjiꞌanga je síndo ndiꞌaa̱, tsintꞌieé ngo nda̱, kó kamákjiín nga nda̱ xi xota̱ tji̱e̱ Lebii̱ boá xí tsꞌénchji̱a̱a̱, kó bi̱ tsꞌén asíyaá nda̱ xi xota̱ tji̱e̱ Lebii̱ chji̱a̱ni:
—ꞌYá xí kjindibájo̱o̱ kꞌi̱e̱e̱. Mí xí tiniꞌín ji kui ngi̱ndiee̱. Mí ni xi tjiín kui ngi̱ndiee̱.
4Kó kui nda̱a̱, bi̱ katsó:
—Mikayiaa̱ boá xi índajo̱na nga kꞌi̱e̱ tjítsꞌenxá án, kó án boá xi chináꞌmii̱ kui.
5Sꞌe̱ bi̱ katsó kui jaá:
—ꞌNiú chjiáꞌájne̱ ji tsi̱ꞌe̱ nga ko̱si̱yèe̱ Néná, tsi̱ꞌe̱ nga xcha̱jne̱ tsi nda ko̱e̱je̱jne̱ ndi̱yà nínga ndyi̱mongínjne̱.
6Kó kui chináꞌmii̱, bi̱ katsoó kui jaá:
—¡Tangín xió xiójnú! Ngatꞌa̱ Néná boá xi tsoꞌbájo̱jnú ndi̱yà nínga ndyi̱mongínjnú.
7Kó kijí nga ún kui jaá, kósꞌe̱ jachó na̱xi̱ńdáꞌniú Laii̱, nínga kamábe nga xota̱ na̱xi̱ńdá xí síndo kui ngi̱ndiee̱, ndatsꞌèn síndo, xikó maá xota̱ sindonioo̱, nga xió ko̱jo nga ꞌniátakón xkjín nínga síndo, ngatꞌa̱ kui nangi jàn jmíjín xota̱ ko̱jo tsi ni xi katsꞌénxtií, ko̱jo jmíjín xi atíxomaa̱, kó kjin kisꞌińdonii̱ xota̱ sindonioo̱, ko̱jo jmíjín xi ngo ni índajo̱. 8Kó nga ún kui jaá kijíkón nginií já ntsꞌi̱e̱ xi kisꞌińdo ki̱a̱ na̱xi̱ńdáꞌniú Soraa̱, ko̱jo na̱xi̱ńdáꞌniú Estaoo̱l, kó kui já ntsꞌi̱e̱, bi̱ katsoó nga jachó:
—Mí én xí kichꞌiájnú.
9Kó kui jaá bi̱ katsó:
—¡Ti̱sítji̱e̱njnú, kó tjianki̱xkánjo̱ kuí jaá, ngatꞌa̱ jè kamáyàjne̱ tꞌanangii̱, kó achichí nda. Kó a jmí ni si̱ꞌánjín ñá. Ngata̱ tsiꞌéjín májnú nga kongín jàn jàn tsi̱ꞌe̱ nga si̱ꞌantsa̱ñá kuí tꞌanangii̱! 10Kjiꞌanga kjóchójnú, ti̱tjásꞌi̱e̱njnú kui tꞌanangii̱, kó ngatamaꞌniátakónjnú, ngatꞌa̱ achichí tiyá kui ngi̱ndiee̱, Néná boá xi je katsꞌénkꞌasꞌienná ngi̱ya ndsa̱. Kui ngi̱ndiee̱, ngayeje nii̱ xi tjín, kó jmí ni chajájiín.
11Kósꞌe̱ jun úchán jáxíꞌín xi ndyi̱yaꞌa ni xi bixkánjo̱, xi xota̱ tji̱e̱e̱ Ndaa̱n xi chji̱a̱ni na̱xi̱ńdáꞌniú Soraa̱, ko̱jo na̱xi̱ńdáꞌniú Estaoo̱l jatjoni kui ngi̱ndiee̱, 12kó kijínijíngí, sꞌe̱ ki̱a̱ katsꞌénkjaꞌyá ki̱a̱ na̱xi̱ńdáꞌniú Kiriaa̱t-Jearii̱n, ki̱a̱ nangi Jundáa̱, kuíni nga kui ngi̱ndiee̱ Majenee̱t-Ndaa̱n#18:12 Majenee̱t-Ndaa̱n, ngi̱ndie nínga síndo ndiꞌańjño Ndaa̱n, tsó kui eén. ꞌmí ngaskande ngotꞌe̱, kó ki̱a̱ tikón ki̱a̱ nga̱xto̱n na̱xi̱ńdáꞌniú Kiriaa̱t-Jearii̱n. 13Kósꞌe̱ kijí boaꞌá ngase kui jaá xtji̱e̱e̱n na̱xi̱ xi chji̱a̱ni xota̱ tji̱e̱e̱ Efraii̱n, sꞌe̱ jachó ndiꞌaa̱ Mikayiaa̱.
14Kó nga ún kui já xí tjón kijíkatsijenꞌmaá kui nangi xi chji̱a̱ni na̱xi̱ńdáꞌniú Laii̱, bi̱ katsoó já ntsꞌi̱e̱: Mejénjne̱ nga xcha̱jnú nga kui ndiꞌaa̱ tikón ngo ńjño ndio, ko̱jo a̱si̱én xí ne tsoó xotaa̱, ko̱jo ngo a̱si̱én xí kiniꞌánda, ko̱jo ngo a̱si̱én xí ki̱cha̱ kiniꞌánńdání, kuíni nga nda má ti̱ꞌankjójnú ni xi si̱ꞌánjnú.
15Kó kui xotaa̱ kijí ki̱a̱ xtji̱e̱e̱n, kó nga jachó ndiꞌaa̱ Mikayiaa̱, kamábe kui nda̱ xi xota̱ tji̱e̱ Lebii̱ chji̱a̱ni, kó katsꞌéntinde. 16Ta̱nga ki̱a̱ nínga tikón nga̱ntjo̱a̱a̱ na̱xi̱ńdáꞌniuú, kixindyia xi jun úchán jáxíꞌín xi chji̱a̱ni xota̱ tji̱e̱e̱ Ndaa̱n xi je síndonda nga ndyi̱yaꞌa ni xi kjánjo̱o̱. 17Kó nga ún kui já xí tjón kijíkatsijenꞌmaá kui tꞌanangii̱, kijínijíngí, kó tsꞌasꞌien kui ndiꞌaa̱, sꞌe̱ iskjíbé kuí a̱si̱én xí kiniꞌándaa̱, ko̱jo ńjño ndioo̱, ko̱jo kui a̱si̱én xi ne tsoó xotaa̱, ko̱jo kui a̱si̱én xí ki̱cha̱ xi kiniꞌánńdaá, tji̱e̱nga chináꞌmii̱ ki̱a̱ sikón ngi̱xtio nga̱ntjo̱a̱a̱ nga sikónjo̱ nga jun úchán jáxíꞌín xi je ndyi̱yaꞌa ni xi bixkánjoo̱. 18Kó kui jaá tsꞌasꞌien ndiꞌaa̱ Mikayiaa̱, kó iskjíbé kuí a̱si̱én xí kiniꞌándaa̱, ko̱jo ńjño ndioo̱, ko̱jo kui a̱si̱én xi ne tsoó xotaa̱, ko̱jo kui a̱si̱én xí ki̱cha̱ xi kiniꞌánńdaá, kósꞌe̱ kui chináꞌmii̱ bi̱ katsó:
—Mí xí ndyi̱niꞌánjnú.
19Kó kui jaá bi̱ katsó:
—Si̱e̱nñá, tꞌíchjé ndso̱ꞌbe ji, kó ja̱bíchinjne̱, kó ji xi ngatama ji na̱ꞌmijne̱ ko̱jo chináꞌmijne̱. A nda ngase kjiꞌi kjimaa̱ ji, nga chináꞌmii̱ ndiꞌaa̱ ngo nda̱ ka̱ma ji, ta̱bo̱a̱jiín nga chináꞌmii̱ ngo xtín xota̱ tji̱e̱ xi chji̱a̱ni Israee̱l.
20Kósꞌe̱ achichí tsjá kamaá ini̱ma̱a̱ kui chináꞌmii̱, sꞌe̱ iskjíbé kuí ńjño ndioo̱, ko̱jo kui a̱si̱én xi ne tsoó xotaa̱, ko̱jo kui a̱si̱én xí kiniꞌándaa̱, sꞌe̱ kijí ngamasiee̱n kui xotaa̱. 21Sꞌe̱ jaꞌatjiya, kó kijí, kó jákjíndií, ko̱jo cho̱yojoo̱, ko̱jo ni xi tjiín, kui tjón katsꞌénkjítjón. 22Jè má kjinnii̱ ndiꞌaa̱ Mikayiaa̱ ndyi̱fochó, nga xota̱ tꞌa ndiꞌaa̱ Mikayiaa̱ kamátikó, kósꞌe̱ kijítji̱ngii̱ xota̱ tji̱e̱e̱ Ndaa̱n. 23Kó askjandáyátji̱ngii̱ xota̱ tji̱e̱e̱ Ndaa̱n, sꞌe̱ kui jaá katsꞌénkꞌafóyá, kó bi̱ katsoó Mikayiaa̱:
—Mí xí kjimaa, míkjo̱a̱a̱ nga kui xotaa̱ ikꞌítikí kón ji.
24Kó Mikayiaa̱ bi̱ katsó:
—Jún kachjábéjnú ne xi katsꞌenda an, kó tsangínjo̱jnú chináꞌmina nga, sꞌe̱ tsangínjnú. Kó mí ni xi ꞌbíjñá ngasena. Kósꞌe̱ mí xí kjimaa̱ ndyi̱ꞌmìjnúꞌun nga ndyi̱bosíyàjnúꞌun.
25Ta̱nga xota̱ tji̱e̱e̱ Ndaa̱n bi̱ katsoó:
—Ngata̱ cheꞌeyéjíi̱n xota̱jne̱, ngatꞌa̱ tsita̱ tjín xí xtinda, kó xchikjo̱a̱jiín, kó sa̱ꞌínkꞌieén ji ko̱jo xota̱ ndiꞌáa̱.
26Kó xota̱ tji̱e̱e̱ Ndaa̱n kijíra ndi̱ya̱à, kó Mikayiaa̱ nga kamábe nga ꞌniú ngase kamá kui jaá ta̱bo̱a̱jiín kuí, ta̱sá kijíꞌoyá nginí ndiꞌaa̱.
27Kó kui jaá iskjíbé ni xi katsꞌénda Mikayiaa̱, ko̱jo kui chináꞌmi xi kisꞌijñaa̱, kó nga jachó ki̱a̱ na̱xi̱ńdáꞌniú Laii̱, ngo ngi̱ndie xi tjiín kjo̱a̱xió ko̱jo xi ma maꞌniátakón, ki̱cha̱ndojó katsꞌénkjiesónni xotaa̱ kui ngi̱ndiee̱, sꞌe̱ ítꞌandiꞌí kuí na̱xi̱ńdáꞌniuú. 28Kó nde ngojín xi asíko̱jo, ngatꞌa̱ achichí kjin kisꞌijñanii̱ na̱xi̱ńdáꞌniú Sindoo̱n, kó jmíjín xi índajo̱ ngo ni. Ki̱a̱ kisꞌijña kui ngi̱ndiee̱ ki̱a̱ nangi soón Bee̱t-Rejoo̱b. Jaskan iskjininkꞌa nginí kui na̱xi̱ńdáꞌniuú, sꞌe̱ ki̱a̱ kisꞌińdo ngijee̱. 29Kó kui na̱xi̱ńdáꞌniuú Ndaa̱n ítꞌajaꞌén, ngatꞌa̱ bo̱a̱ kiꞌmí kui xi kamá na̱ꞌmii̱, ko̱jo ndií Israee̱l. Ta̱nga jaꞌeén kui na̱xi̱ńdáꞌniuú Laii̱ kiꞌmí ngasꞌe̱. 30Kó xota̱ tji̱e̱e̱ Ndaa̱n katsꞌénda ngo a̱si̱én, kó Jonataa̱n, kui xi ndií Ngersoo̱n, ko̱jo kui xi ndíndeè Moisee̱ kamá, kui ko̱jo ndií kamá chináꞌmii̱ xota̱ tji̱e̱e̱ Ndaa̱n, ngaskande ni̱xtjin nga tsangínjo̱ꞌniú xota̱a̱ na̱xi̱ńdá Israee̱l. 31Kó bo̱a̱ tsꞌén íjñára kui a̱si̱én xí katsꞌénda Mikayiaa̱, ngayeje ni̱xtjin nga kisꞌijña Ndiꞌaa̱ Néná ki̱a̱ na̱xi̱ńdáꞌniú Siloo̱.
Currently Selected:
Nendiꞌamasien 18: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
