Nendiꞌamasien 17
17
Ne xi katsꞌénda Mikayiaa̱.
1Kui ni̱xtjin jàn, ngo nda̱ kisꞌijña ki̱a̱ na̱xi̱ xi chji̱a̱ni xota̱ tji̱e̱e̱ Efraii̱n xi kiꞌmí Mikayiaa̱, 2kui xi bi̱ katsoó na̱aa̱n:
—Kui xi ngo mi̱ úchán to̱ntiboa xi kiniꞌánchejeé, kui xi án má tsintꞌie an nga kandokjo̱e̱ꞌìi̱n xi iskjíbeé, kui to̱o̱n, án tikónna, ngatꞌa̱ án boá xi iskjíbé án.
Kó na̱aa̱n Mikayiaa̱, bi̱ katsoó:
—¡Néná ngatsꞌénchíkonñeé, ndí tsa̱ꞌa̱n!
3Kó Mikayiaa̱ katsjáꞌóyá nginií na̱aa̱n xi ngo mi̱ úchán to̱ntiboaa̱:
Kó na̱aa̱n, bi̱ katsoó:
—Nga ja̱koxi̱ Néná jè katsꞌenkꞌasꞌièe̱n kui to̱ntiboaa̱ nganda tsi̱ꞌe̱ ndína, tsi̱ꞌe̱ nga si̱ꞌanda ngo a̱sie̱én ngo ne xi yá xí ndsa̱ si̱ꞌandani, kó ingo a̱sie̱én ngo ne xi si̱ꞌanda nga si̱ꞌanńdá to̱ntiboaa̱, kuíni nga tsjaꞌoyá ngiñaá kui to̱ntiboaa̱ ji.
4Ta̱nga kui nda̱a̱ katsjáꞌóyá nginií na̱aa̱n kui to̱ntiboaa̱, kó na̱aa̱n jó úchán kui to̱o̱n iskjíbé, kósꞌe̱ kijíjoo̱ nda̱ xi tsꞌénda ni to̱ntiboaa̱, tsi̱ꞌe̱ nga sa̱ꞌínda ngo a̱sie̱én ngo ne xi yá, ko̱jo ngo a̱sie̱én ngo ne xi to̱ntiboa si̱ꞌanńdání. Kó kui a̱sie̱én ki̱a̱ kisꞌińdo ndiꞌaa̱ Mikayiaa̱. 5Kó ndiꞌaa̱ Mikayiaa̱ ndo̱bo̱a̱a̱ ne kamá, kó katsꞌénda chi̱nga ndio xi boajá chináꞌmii̱, ko̱jo katsꞌénda ngase kje̱ꞌe ne, kó jaꞌájin nga katsjáxaá ngo ndií xi chináꞌmi kamá. 6Kui ni̱xtjin jàn jmí re kisꞌiejín na̱xi̱ńdá Israee̱l, kó ta̱ ni xi beriíko̱n nga kixi̱ xi katsꞌén nga ngo nga ngo xotaa̱.
7Kó kui ni̱xtjin jàn ti̱ kisꞌijña ki̱a̱ na̱xi̱ńdáꞌniú Belee̱n, ngo nda̱ Lebita̱ xi chji̱a̱ni xota̱ tji̱e̱e̱ Jundáa̱, xi ki̱a̱ jachókꞌíjñá xikoó ngo nda̱ xi xín nangi chji̱a̱ni. 8Kó kui nda̱a̱ jatjoni na̱xi̱ńdáꞌniú Belee̱n, nangi xi chji̱a̱ni Jundáa̱, kó kistsoꞌbásón nga tsangase ngi̱ndie nínga kꞌuijñá. Kó kistsoꞌbá xtji̱e̱e̱n na̱xi̱i̱ xota̱ tji̱e̱e̱ Efraii̱n, ngaskande nga jachó ndiꞌaa̱ Mikayiaa̱. 9Kó Mikayiaa̱, bi̱ katsoó:
—Ñá kjindibéni ji.
Kó kui nda̱a̱, bi̱ katsó:
—Xota̱ tji̱e̱e̱ Lebii̱ án, kó na̱xi̱ńdáꞌniú Belee̱n, nangi xi chji̱a̱ni Jundáa̱ kjindibá an, kó ki̱a̱ kotíjña̱ an nínga sa̱kóna ngi̱ndie.
10Kósꞌe̱ Mikayiaa̱, bi̱ katsoó:
—Ta̱sá ndiꞌana ti̱ndyin ji, kó jí xí ka̱ma ji xikoó tsi na̱ꞌmina, ko̱jo chináꞌmina, kó tie to̱ntiboa tsjaa xki̱ nó xki̱ nó, ko̱jo ńjño xi xchi̱e̱je ji, ko̱jo ni xi xi̱ni̱ ko̱jo ni xi sꞌi̱ ji. Kósꞌe̱ kui nda̱ xi xota̱ tji̱e̱e̱ Lebii̱ chji̱a̱ni ki̱a̱ kisꞌijña.
11Kó kui nda̱ xi xota̱ tji̱e̱e̱ Lebii̱ chji̱a̱ni kamájo̱ꞌoo̱ nga ki̱a̱ kisꞌijña ndiꞌaa̱ Mikayiaa̱, kó xikoó tsi ngo ndií Mikayiaa̱ kamá. 12Kósꞌe̱ Mikayiaa̱ jaꞌájin ko̱jo katsjáxaá kui nda̱ xi xota̱ tji̱e̱e̱ Lebii̱ chji̱a̱ni, kó kuí kamá chináꞌmii̱, sꞌe̱ ki̱a̱ kisꞌijña ndiꞌaa̱. 13Kó Mikayiaa̱, bi̱ katsó:
—¡Ngotꞌe̱ ꞌne̱, jè be an nga Néná sa̱ꞌínchikonñéná, ngatꞌa̱ jè tikónna ngo chináꞌmi xi xota̱ tji̱e̱e̱ Lebii̱ chji̱a̱ni kꞌi̱e̱ ndiꞌana!
Currently Selected:
Nendiꞌamasien 17: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
