Nendiꞌamasien 16

Kjiꞌanga kijí Sansoo̱n na̱xi̱ńdáꞌniú Ngasa̱.

1Ngo ndi̱yà kijí Sansoo̱n na̱xi̱ńdáꞌniú Ngasa̱, kó ki̱a̱ kamábe ngo na̱masien, kó kisꞌiejo̱. 2Kó kiꞌmíyaà xota̱ xi chji̱a̱ni na̱xi̱ńdáꞌniú Ngasa̱ nga bi̱ kiꞌmií: ¡Kꞌi̱e̱ tikón Sansoo̱n! Kósꞌe̱ kui xotaa̱ íchjáꞌyá kui ngi̱ndiee̱, kó nga ngo ni̱xtji̱e̱e̱n askondá ki̱a̱ nga̱ntjo̱a̱a̱ na̱xi̱ńdáꞌniuú, kó xió tsíchji̱a̱si̱e̱n nga bi̱ katsó: Xchiyá máráa̱ nga si̱sién, kósꞌe̱ kjiꞌa si̱ꞌankꞌién. 3Ta̱nga Sansoo̱n kisꞌifé ngaskande tsí nga kamá masien ni̱xtji̱e̱n, kósꞌe̱ jaꞌaá kó jastjíe̱n, sꞌe̱ tsꞌaxiénijín nga iskjíbé nga̱ntjo̱a̱a̱ na̱xi̱ńdáꞌniuú, ko̱jo yáseé, ko̱jo ki̱cha̱ xi ꞌbíchjáꞌniúní, sꞌe̱ tsaꞌanijín kó kijínijíngí nga̱soón na̱xi̱ xi tikón kje̱n na̱xi̱ńdáꞌniú Ebroo̱n kó ki̱a̱ íjñá.

Sansoo̱n ko̱jo na̱ Ndalilaa̱

4Jaskan ngije kamá kui nii̱, Sansoo̱n katsꞌénmején ngo na̱ xi ꞌmí Ndalilaa̱ xi chji̱a̱ni nangi soón Soree̱k. 5Kó já ngito̱ko̱o̱ xota̱ Filisteaa̱ kijíkoón kui naa̱, kó bi̱ katsoó:

Chꞌi̱ṉche̱je ji Sansoo̱n, tsi̱ꞌe̱ nga xche̱ ji ñá ndibánií ngaꞌniú xí tjiín, ko̱jo nga xcha̱jne̱ kótsꞌèn nga ka̱ma si̱ꞌanjne̱, tsi̱ꞌe̱ nga ko̱ndo̱bo̱a̱jne̱, kó kꞌuitáꞌniújne̱, tsi ji xi ko̱si̱ke̱jejne̱, nga ngo nga ngo ji̱n ngo mi̱ úchán to̱ntiboa ko̱e̱ꞌéjne̱.

6Kó na̱ Ndalilaa̱, bi̱ katsoó Sansoo̱n:

—ꞌNiú míꞌaá nga kꞌuiyéní ñá ndíbánií ngaꞌniú xí tjiín, kó kótsꞌèn ka̱ma kꞌuitáꞌniuú, tsi̱ꞌe̱ nga kju̱i̱e̱ ngaꞌniúu̱.

7Kó Sansoo̱n, bi̱ katsoó:

—Tsi yito ńꞌniú tji̱xin xí kji̱e̱ xíjín kꞌuítꞌana, kjiꞌá boá nga xcha̱ja ngaꞌniúna, kó xikoó tsi ngo xota̱ ta̱chiboa ka̱ma an.

8Kó já ngito̱ko̱o̱ xota̱ Filisteaa̱ kijíjoo̱ na̱ Ndalilaa̱ yito ńꞌniú tji̱xin xí kji̱e̱ xíjín, kó kui ítaꞌniúní Sansoo̱n. 9Na̱ Ndalilaa̱ ja̱bo̱a̱ je síndoꞌmaá ngi̱yaꞌmaa̱ xota̱ xi stso̱bo̱a̱ Sansoo̱n. Kósꞌe̱ kui naa̱ askjandáyà má nga bi̱ katsoó Sansoo̱n: ¡Sanso̱n! ¡Xota̱ Filisteaa̱ je ndyi̱foeꞌekjánjoo̱!

Ta̱nga Sansoo̱n iskjítindsó kui ńꞌniuú, xikó má tsꞌén tindsó ngo ńꞌniú kjiꞌanga sitꞌaa̱ ndiꞌií. Kó kamáyàjín ñá kjindibáni ngaꞌniú xí tjiín.

10Kó na̱ Ndalilaa̱, bi̱ katsó nginií Sansoo̱n:

—¡Ánní nga an kichꞌíṉche̱jení! ¡Kó ikꞌíndiseje̱ní! Ngotꞌe̱ ꞌne̱, ꞌniú míꞌaá, tꞌíyéní kótsꞌèn nga ka̱ma kꞌuitáꞌniuú.

11Kó Sansoo̱n, bi̱ katsoó:

—Tsi ꞌniú kꞌuitáꞌniúna ngo arita̱ tja̱tsi̱e̱ xi kji̱e̱ jmíjín xi tsꞌénkjién, kjiꞌá boá nga xcha̱ja ngaꞌniúna, kó xikoó tsi ngo xota̱ ta̱chiboa ka̱ma an.

12Kó na̱ Ndalilaa̱ iskjíbé ngo arita̱ tja̱tsi̱e̱, kósꞌe̱ ítaꞌniú Sansoo̱n nga bi̱ katsoó: ¡Sanso̱n! ¡Xota̱ Filisteaa̱ je ndyi̱foeꞌekjánjoo̱! Tji̱e̱nga já xí je síndonda nga stso̱bo̱a̱ Sansoo̱n, ki̱a̱ síndo ngi̱yaꞌmaa̱, ta̱nga Sansoo̱n, iskjítindsó kui ńꞌniuú xikoó tsi ngo ńchjón.

13Kósꞌe̱ na̱ Ndalilaa̱, bi̱ katsó nginií Sansoo̱n:

—¡Ngaskande ngotꞌe̱ ꞌne̱ tichꞌíṉche̱jení ko̱jo tiꞌbíndiseje̱ní. Tꞌíyéní kótsꞌèn nga ka̱ma kꞌuitáꞌniuú!

Kó Sansoo̱n, bi̱ katsoó:

—Chjiéngá yito tsja̱ni̱je̱n si̱ꞌindeni, kó ki̱a̱ ti̱ꞌinkꞌájìi̱n ńchjoón ńjño chji̱ni̱e̱e̱, kósꞌe̱ ngo yáyojó títꞌaꞌnitꞌe ji.

14Kósꞌe̱ na̱ Ndalilaa̱ ngo yáyojó ítꞌaꞌniútꞌa tsja̱ni̱je̱e̱n Sansoo̱n, kósꞌe̱ bi̱ katsó: ¡Sanso̱n! ¡Xota̱ Filisteaa̱ je ndyi̱foeꞌekjánjoo̱!

Ta̱nga ngije jaꞌaá Sansoo̱n tsꞌaxiénijín yáyojoó, ko̱jo ńchjoón kui ńjño chji̱ni̱e̱e̱.

15Kósꞌe̱ na̱ Ndalilaa̱, ti̱ bi̱ ti̱ katsó nginií Sansoo̱n:

—Kó kótsꞌèn nga achichí tjóna ji, se ji, nga jmí tsi ngayeje ini̱màa̱ nga mejeén án. Jè xí ma jaán ndi̱yà nga tichꞌíṉche̱jení, kó tiꞌmíyéjínní ñá ndíbánií ngaꞌniúu̱.

16Kó nga na̱ Ndalilaa̱ ndyiojón ndyiojón ꞌniú katsꞌeén tsi̱ꞌe̱ nga ka̱tso̱yaa̱ ñá ndibání ngaꞌniuú, Sansoo̱n kamámején maá ini̱ma̱a̱ nga ko̱yà. 17Ti̱chaa̱n kamáꞌinda ini̱ma̱a̱ Sansoo̱n, kó bi̱ katsoó na̱ Ndalilaa̱: Kji̱e̱ ngo ndi̱yà bichá tsja̱tokó án, ngatꞌa̱ xota̱ nasareoo̱ Néná boá án ndeskande nga tjiyáꞌmá án. Kó tsi ku̱i̱chá tsja̱na, kjiꞌá boá nga xcha̱ja ngaꞌniúna, kó achichí inda ka̱ma an xikoó ngo xota̱ ta̱chiboa.

18Kó na̱ Ndalilaa̱ ngije kamákjiín nga ja̱koxi̱ boá nga Sansoo̱n je katsóyaà ñá ndibání ngaꞌniú xí tjiín, katsangiyaa̱ én já ngito̱ko̱o̱ xota̱ Filisteaa̱, nga bi̱ katsoó: Ndibánijíngí nginíjnú ngotꞌe̱, ngatꞌa̱ je kamáꞌinda ini̱ma̱a̱ Sansoo̱n.

Kó já ngito̱ko̱o̱ xota̱ Filisteaa̱ kijíkoón kui naa̱ nga je ndyi̱yaꞌa to̱n. 19Kósꞌe̱ kui naa̱ ti̱ꞌmi̱í katsꞌénkafésón Sansoo̱n, sꞌe̱ tji̱e̱nmá tsíchji̱a̱a̱ ngo nda̱ xi tsatie nga yito tsja̱ni̱je̱e̱n, kó ti̱kuii kui naa̱ ndajín katsꞌénjo̱, ngatꞌa̱ je ngiti̱ jmí ngaꞌniú kisꞌiejiín Sansoo̱n. 20Kósꞌe̱ na̱ Ndalilaa̱, bi̱ katsó: ¡Sanso̱n! ¡Xota̱ Filisteaa̱ je ndyi̱foeꞌekjánjoo̱!

Kó nga jaꞌaá Sansoo̱n, bi̱ tsꞌén katsꞌénkjó: Ti̱ kjo̱tjoꞌa nginína yojona xikoó tsie ꞌne̱. Ta̱nga nde bejín nga Néná je katsꞌénkjii̱n yojoo̱. 21Kó bo̱a̱ tsꞌén nga xota̱ Filisteaa̱ katsoboá Sansoo̱n, kósꞌe̱ tsꞌaxié ndyi̱ko̱n, sꞌe̱ kijíjayajo̱ na̱xi̱ńdáꞌniú Ngasaa̱. Sꞌe̱ ńꞌniúki̱cha̱ bronse̱ ikꞌítꞌaꞌniú, kó kiniꞌaán kjo̱a̱ꞌniú nga katsangińña ndi̱jo̱ jee̱ molino̱ ngi̱ya ndo̱bo̱a̱ya̱à. 22Ta̱nga tsja̱to̱ko̱ kamá ndojó nginí, ngije ja̱bo̱a̱ je ikichá.

Nga kꞌien Sansoo̱n

23Kósꞌe̱ já ngito̱ko̱o̱ xota̱ Filisteaa̱ kamátikó tsi̱ꞌe̱ nga katsꞌénkꞌasꞌiee̱n ngo kjo̱a̱tjó Ndangoo̱n, ne xi tsi̱ꞌe̱, kó achichí tsjá kamaá, nga bi̱ katsó:

Ne xi tsa̱ñá, ngi̱ya ndsa̱ je

katsꞌénkꞌasꞌienná Sansoo̱n,

kui xi kondra̱ná.

24Kó ngije kamábe xota̱ na̱xi̱ńdaá, katsꞌéntsjaà nee̱ ngatꞌa̱ bi̱ katsó:

Ne xi tsa̱ñá, ngi̱ya ndsa̱ je

katsꞌénkꞌasꞌienná Sansoo̱n,

kui xi kondra̱ná,

kui xi katsꞌénkjié ni tjiéna,

ko̱jo kui xi achichí xota̱na je katsꞌénkjié.

25Kó kjiꞌanga je tsjatjiín ini̱ma̱a̱ kui xotaa̱, bi̱ katsoó xkjín: Tangínchja̱ꞌájnú Sansoo̱n tsi̱ꞌe̱ nga ku̱i̱ti̱e̱ kó sa̱ꞌínkajnóná. Kó tsangínchjaꞌá Sansoo̱n ngi̱ya ndo̱bo̱a̱ya̱à, kósꞌe̱ katsatonjo̱ kui xotaa̱, kó ki̱a̱ ikꞌíjñá ngi̱jii̱n yáseé kui ndiꞌa nínga tsꞌéndíkón nee̱.

26Kósꞌe̱ Sansoo̱n, bi̱ katsoó xota̱ xi bosikójo: Tꞌenje̱ní ki̱a̱ nínga síndo yásé ngaꞌniuú kui ndiꞌa nínga tsꞌéndíkón nee̱, tsi̱ꞌe̱ nga koꞌniú án.

27Kó ki̱a̱ ngi̱ya na̱ngo̱xi̱i̱ tjikítsie má xota̱, xi chjo̱on xí xi̱ꞌin, ko̱jo ti̱ ki̱a̱ síndo ngayeje já ngito̱ko̱o̱ xota̱ Filisteaa̱, kó nkꞌaa̱ ndiꞌa nínga tsꞌéndíkón nee̱, mara̱ tsi ta̱ ján mi̱ jáxíꞌín, ko̱jo ínchjín xí ndyi̱kotsijen ndá ndaá Sansoo̱n nga tsꞌéntié, kó tsajnókie.

28Kósꞌe̱ Sansoo̱n tsíchji̱a̱a̱ Néná, nga bi̱ katsó: Ne tsa̱ꞌa̱n, ꞌniú míꞌaá nga ngatjaꞌátsjien an. ¡Te̱ꞌéní ngaꞌniú, ta̱ ngotꞌe̱ tsí ngase, ji Ne! Tsi̱ꞌe̱ nga sa̱ꞌingojo an ni xi katsꞌénjo̱na xota̱ Filisteaa̱ nga tsꞌaxié ndyikón án.

29Kósꞌe̱ katsꞌénjo̱ Sansoo̱n nga jó yáseé ngaꞌniuú ndiꞌa nínga tsꞌéndíkón nee̱, ngo yíꞌniúní tsja kixi̱, kósꞌe̱ ngo yíꞌniúní tsja skón. 30Kó bi̱ katsó nga askjandáyà Sansoo̱n: ¡Ngatꞌien an ko̱jo xota̱ Filisteaa̱! Kósꞌe̱ ngayeje ngaꞌniuú katsꞌénkjién nga katsangińñaxchán ndiꞌa nínga tsꞌéndíkón nee̱, sꞌe̱ ixóndónieé ngito̱ko̱o̱ xota̱ Filisteaa̱, ko̱jo xota̱ xi síndo ngi̱ya kui ndiꞌaa̱. Kjín ngase kamá xota̱ xi jesón nga kꞌien, ta̱bo̱a̱jiín xi katsꞌénkꞌién nga kisꞌijña nga̱sondie. 31Kó kjindibá ntsꞌi̱e̱ ko̱jo ngayeje xota̱ ndiꞌaa̱ na̱ꞌmii̱, sꞌe̱ iskjininkꞌa ko̱jo kijíjo̱ yojoo̱, kó ki̱a̱ yínijín xtji̱e̱e̱n na̱xi̱ńdáꞌniú Soraa̱ ko̱jo Estaoo̱l, ki̱a̱ tꞌa nga̱tsjo̱ó Manoa̱ na̱ꞌmii̱. Kó kan nó kamaá Sansoo̱n nga kamá ngito̱ko̱o̱ ko̱jo nga atíxomaa̱ xota̱ Israee̱l.

Currently Selected:

Nendiꞌamasien 16: MAIX

Highlight

Compare

Copy