Nendiꞌamasien 15
15
Nga katsꞌéngojo ni xi kiniꞌánjo̱ Sansoo̱n
1Jaskan ngije jaꞌa chiboa ni̱xtjin, kjiꞌanga bichá to ndso̱ko̱a̱n ṉño̱paa̱n, Sansoo̱n kijíkatsijee̱n chjo̱ón, kó ngo ndií tindso̱ tsꞌényaꞌaa̱, kó bi̱ tsꞌén katsꞌénkjó: Mejénna kjojñajo̱ an chjo̱onna ki̱a̱ ngi̱yaꞌmaa̱ katsaki. Ta̱nga nga jachó Sansoo̱n, na̱ꞌmii̱ kui naa̱ katsjandièjiín nga tsꞌasꞌien kui ngi̱ndiee̱. 2Kó na̱ꞌmii̱ kui naa̱, bi̱ katsoó Sansoo̱n:
—Nga ja̱koxi̱, achichíra̱ chꞌoo̱ tsa̱kjìnna kixián án, kuíni nga ta̱sá ngo nda̱ xi nda yaꞌaa̱ katsjáa̱. Ta̱nga, a ꞌniújín tsjákjiꞌi ngase tsa̱kjìn ndíchjá xi kjindií. Ta̱sá kuí ti̱ndyinje̱ ji ngajoo̱.
3Kó Sansoo̱n, bi̱ katsoó.
—¡Ja̱ ngotꞌe̱ ꞌne̱ ánjín konna tsi sa̱ꞌinꞌóo̱n xota̱ Filisteaa̱!
4Kó kijítsoboá ján úchán cho̱ńda, sꞌe̱ iskjíbé kjín yá xí ꞌbítokó ndiꞌí, kó xki̱ jó jó íkjojó ńtsꞌen kui cho̱o̱, sꞌe̱ ngo kui yá xí ꞌbítokó ndiꞌií ítꞌa ngamasiee̱n nga jó ńtsꞌen. 5Kósꞌe̱ ítꞌandiꞌí kuí yá xí ꞌbítokó ndiꞌií, sꞌe̱ katsꞌénkjí cho̱ńdaa̱ ngi̱jii̱n tꞌanangi nínga tjitjieé ni xota̱ Filisteaa̱, kó ítí to ndso̱ko̱a̱n ṉño̱pan xi je síndotikoó ko̱jo xi kji̱e̱ tijiín, ko̱jo ngayeje ngi̱ndie nínga tjitjíe̱ tostsi̱je̱è, ko̱jo nínga tjitjíe̱ toꞌoliboo̱.
6Kó bi̱ katsó xota̱ Filisteaa̱: ꞌYá xí bo̱a̱ kjiꞌi ni xi katsꞌén. Kó bi̱ kiꞌmií: Sansoo̱n xkandaa̱ nda̱ xi chji̱a̱ni na̱xi̱ńdáꞌniú Timnaa̱t boá xi bo̱a̱ katsꞌén, kjo̱a̱a̱ nga jaꞌáxiín chjo̱ón, kó ngo nda̱ xi nda yaꞌa katsjaá. Kó jachó xota̱ Filisteaa̱ sꞌe̱ ítí kui naa̱ ko̱jo na̱ꞌmii̱. 7Kó Sansoo̱n, bi̱ katsoó kui xotaa̱: Ta̱ngatꞌanii̱ nga bi̱ kjiꞌi ni xi kiniꞌánjnú, ja̱koxi̱ nga sa̱ꞌinkjaꞌyájín an ngaskande nga sa̱ꞌingojo an kui nii̱. 8Kó Sansoo̱n nde ni̱ma̱jín kamaá nga katsꞌénꞌoón ko̱jo nga katsꞌénkjiesón kui xotaa̱. Kósꞌe̱ ki̱a̱ kisꞌijña ti̱xa̱na̱xi̱ xi tikón nangi Etaa̱n.
Sansoo̱n katsꞌeén xota̱ Filisteaa̱ ki̱a̱ tji̱ngi̱ nangi Leii̱
9Ta̱nga xota̱ Filisteaa̱ kijínijíngí, kó ki̱a̱ índo ndiꞌańjñoo̱ nangi Jundáa̱, kó kastsojoboa xtji̱e̱e̱n nangi Leii̱. 10Kó jáxíꞌín xi chji̱a̱ni nangi Jundáa̱, bi̱ katsoó xota̱ Filisteaa̱:
—Ánní nga ji̱n kjindibákixkánjo̱jnú jún.
Kó kui xotaa̱, bi̱ katsó:
—Kjindibánijíngíjne̱ kui ngi̱ndiee̱ ngatꞌa̱ Sansoo̱n boá xi ko̱ndo̱bo̱a̱jne̱, tsi̱ꞌe̱ nga bo̱a̱ má si̱ꞌanjo̱jne̱ xikó katsꞌénjo̱jne̱ kui.
11Kósꞌe̱ ján mi̱ xota̱ xi chji̱a̱ni nangi Jundáa̱ kijí ki̱a̱ ti̱xa̱na̱xi̱i̱ Etaa̱n, kó bi̱ katsoó Sansoo̱n:
—Míkjo̱a̱a̱ nga bo̱a̱ kjiꞌi ni xi kiniꞌínje̱jne̱. A yejín ji nga xota̱ Filisteaa̱ boá xi botixómájne̱.
Kó Sansoo̱n, bi̱ katsó:
—Bo̱a̱ katsꞌenjo̱ an, xikó katsꞌénjo̱na kui xotaa̱.
12Kó kui xotaa̱, bi̱ katsoó:
—Jí ndyi̱foéꞌe̱ndobájne̱ ji, tsi̱ꞌe̱ nga ki̱a̱ si̱ꞌankꞌasꞌienjne̱ ji ngi̱ya tsja xota̱ Filisteaa̱.
Kó Sansoo̱n, bi̱ katsoó:
—Ndakjíꞌí, ta̱nga te̱ꞌéjnúꞌun ndso̱ꞌbájnú nga júnjín xi si̱ꞌankꞌiénjnúꞌun.
13Kó bi̱ katsó kui xotaa̱:
—Jmí, ji̱njín xi si̱ꞌankꞌienjne̱, ta̱ kꞌuitáꞌniútsíjne̱ sꞌe̱ si̱ꞌankꞌasꞌienjne̱ ngi̱ya tsja xota̱ Filisteaa̱.
Kósꞌe̱ jó ńꞌniú tja̱tsi̱e̱ ikítꞌa, sꞌe̱ kaꞌnaxié ki̱a̱ kui ngi̱ndie nínga tikón.
14Kó nga jachó nangi Leii̱, xota̱ Filisteaa̱ askjandáyátsjá má nga kijíkjaꞌáyíndi̱yà. Kósꞌe̱ A̱si̱énni̱xtjii̱n Néná kjindibánié Sansoo̱n, kó ńꞌniú xí tjítꞌa tsja xikoó tsi lino̱ xi je kití kamá, kó katjondó tsja. 15Kó ngo ńdatꞌanijon bórró xi sꞌe̱ kꞌien má kasakoo̱, kó iskjíbé, kó kuí katsꞌénkꞌiéni ngo mi̱ xota̱ Filisteaa̱. 16Kósꞌe̱ jaskan, bi̱ tsꞌén kisie Sansoo̱n:
Ngo ńdatꞌanijon bórró katsꞌenkjién án,
nga achichí má xota̱ xi katsꞌenkꞌién an,
ngo ńdatꞌanijon bórró katsꞌenkjién án,
nga ngo mi̱ ma xota̱ xi katsꞌenkꞌién an.
17Kó ngije kamaá nga kisie, kjin má tsꞌajmi ńdatꞌanijon bórroó, kuíni nga kui ngi̱ndiee̱ Ramaa̱t-Leii̱#15:17 Ramaa̱t-Leii̱, tji̱ngi̱i̱ ńda tꞌanijoo̱n, tsó kui eén. ítꞌajaꞌén.
18Kósꞌe̱ Sansoo̱n achichí xíndá kamaá, sꞌe̱ ni̱ma̱ katsó nga bi̱ katsoó Néná: Jí boá xi ngi̱ya tsja kui mosòo̱ ikꞌíjñí ji nga jatjoꞌa kui xotaa̱, kó ngotꞌe̱ ꞌne̱ a ko̱yà xíndá án, kó a ko̱e̱ꞌéndiè jí nga ngi̱ya tsja xota̱ xi jmíjiín sirkunsisioo̱n kꞌo̱ka an.
19Kósꞌe̱ Néná iskjíxꞌá ngo ti̱xa̱ ki̱a̱ ngo ndi̱jo̱ xi tikón ki̱a̱ nangi Leii̱, kó jatjonii̱ ndáfoa, kó ngije katsꞌe ndáfoa, kasako ngaꞌniú nginií Sansoo̱n, kuíni nga kui ngi̱ndiee̱, Ee̱n-Akoree̱ ítꞌajaꞌén, kó to̱kó tikón kui ngi̱ndiee̱ ki̱a̱ nangi Leii̱, ngaskande ngotꞌe̱.
20Kó kan nó atíxoma Sansoo̱n nga ngito̱ko̱o̱ xota̱ Israee̱l kamaá, ni̱xtjin nga kisꞌińdo xota̱ Filisteaa̱.
Currently Selected:
Nendiꞌamasien 15: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
