Nendiꞌamasien 14
14
Nga ixán Sansoo̱n
1Kó Sansoo̱n kijíjaya na̱xi̱ńdáꞌniú Timnaa̱t, kó ki̱a̱ kamábe ngo na̱ xi xota̱ tji̱e̱e̱ xota̱ Filisteaa̱ chji̱a̱ni, 2kósꞌe̱ kijínijíngí nginí nangii̱, kó katsóyaà na̱ꞌmii̱ ko̱jo na̱aa̱n, nga bi̱ katsoó:
—Ngo na̱ kamábe an ki̱a̱ na̱xi̱ńdáꞌniú Timnaa̱t xi chji̱a̱ni xota̱ tji̱e̱e̱ xota̱ Filisteaa̱, kó mejénna nga chji̱a̱ꞌajnúꞌun tsi̱ꞌe̱ nga chjo̱onna ka̱ma.
3Ta̱nga na̱ꞌmii̱ ko̱jo na̱aa̱n, bi̱ katsoó:
—A ngiti̱ jmíjín ínchjín ngi̱jii̱n xota̱ xingi̱, ko̱jo ngi̱jii̱n xota̱ nangíná, tsi̱ꞌe̱ nga ngo chjo̱on xí chji̱a̱ni xota̱ Filistea̱ xi jmíjín sirkunsisioo̱n ku̱i̱ndyinje̱ kon ji.
Ta̱nga Sansoo̱n, bi̱ katsoó na̱ꞌmii̱ ko̱jo na̱aa̱n:
—Chji̱a̱ꞌajnúꞌun kui chjo̱on, ngatꞌa̱ kuí boá xi kamátsjána.
4Ta̱nga na̱ꞌmii̱ ko̱jo na̱aa̱n, nde bejín nga Néná boá xi índa kui nii̱, ngatꞌa̱ tsangasendie kótsꞌèn ku̱i̱ꞌítꞌaa̱ xota̱ Filisteaa̱, kjo̱a̱a̱ nga kui ni̱xtjin jàn xota̱ Filisteaa̱ boá xi atíxomaa̱ xota̱ Israee̱l. 5Kó Sansoo̱n, ko̱jo na̱ꞌmii̱, ko̱jo na̱aa̱n kijíjaya na̱xi̱ńdáꞌniú Timnaa̱t, kó nga jachó nínga tjitjíe̱ tostsi̱je̱è kuí ngi̱ndiee̱, ngo xandi̱je̱ xi kjindí xi tsꞌénꞌbìtsjè má kijítsꞌuieé Sansoo̱n, 6kó A̱si̱énni̱xtjii̱n Néná kjindibánié kui nda̱a̱, kó tsja soboá soboá katsꞌénxi̱ni kui xandi̱je̱e̱, xikó má tsꞌén niꞌánxi̱ ngo ndí ndií tindso̱, ta̱nga nde katsóyàjiín na̱ꞌmii̱ ko̱jo na̱aa̱n ni xi katsꞌén. 7Jaskan ngije jachó kui na̱xi̱ńdáꞌniuú, tsíchji̱a̱jo kui naa̱, kó kui tsa̱kji̱ín achichí kamátsjaá Sansoo̱n. 8Ngije jaꞌa chiboa ni̱xtjin, ti̱ jachó nginí kui ngi̱ndiee̱ tsi̱ꞌe̱ nga je kꞌuijñájo̱ kui naa̱, kósꞌe̱ xín ndi̱yà kijí tsi̱ꞌe̱ nga skotsíjee̱n ńdaa̱ kui xandi̱je̱e̱, kó kamábe nga ngi̱jin ńdaa̱ kui cho̱o̱ ngo ndo̱bo̱a̱a̱ cho̱ndo̱ꞌo̱sièn tjiyá, 9kó tsja iskjíbéní kui ntsjieén, sꞌe̱ iskjinie nga kijí ndi̱ya̱à, ngaskande nga jachótji̱ngii̱ na̱ꞌmii̱ ko̱jo na̱aa̱n, kó ti̱ katsjaá tsi̱ꞌe̱ nga iskjinie kui nga, ta̱nga katsóyàjiín nga kui ntsjieén ki̱a̱ iskjíbéní ngi̱jin ńdaa̱ kui xandi̱je̱e̱, 10kó jachó na̱ꞌmii̱ nínga tikón kui na̱ xi kꞌuijñájo̱ ndií, kó Sansoo̱n ngo sꞌué ꞌniú katsꞌén, ngatꞌa̱ bo̱a̱ tsꞌén kamángaá já xo̱ngo̱ò, 11kó nga kamábe xota̱ Filisteaa̱ kui nii̱, kanangiyaa̱ kantié já xí nda yaꞌa tsi̱ꞌe̱ nga ki̱a̱ nijan kꞌuíndojo̱, 12kó Sansoo̱n, bi̱ katsoó kui jaá:
—Ngo ni xi tjiꞌmá kosíyájnúꞌun, kó xi sku̱i̱e̱, kó ka̱tso̱yàna mí nii̱ bo̱a̱, ngindiee̱ nga kjo̱chó xi yito ni̱xtjin nga xi̱ndyiá kui sꞌueé, kantié ńjñondio xi lino̱ kamándani, ko̱jo kantié xtjí xi chajá nga ma sꞌué tsjàa̱, 13ta̱nga tsi xcha̱jínjnú mí nii̱ bo̱a̱, jún boá xi ko̱e̱ꞌéjnúꞌun nga kantié ńjñondio xi lino̱ kamándanii̱, ko̱jo kui xi kantié xtjí xi chajá nga ma sꞌueé.
Kó kui jaá, bi̱ katsoó:
—¡Tꞌíyéjne̱ ni xi tjiꞌmá xi mejeén kꞌuiyéjne̱, kó ji̱n ko̱nda̱ꞌyájne̱!
14Kósꞌe̱ bi̱ katsó Sansoo̱n:
—Kui xi kjiniéná, nichinie jatjoni, kó kui xi ꞌniú ngasee̱, ni xi ixi jatjoo̱.
Kó kui jaá, kamákjínjiín mí nii̱ bo̱a̱ ngije jaꞌa xi ma jaán ni̱xtjin. 15Ta̱nga xi ma nijoón ni̱xtjin, bi̱ kiꞌmií chjo̱ón Sansoo̱n:
Tsja ti̱ꞌinje̱ ji xi̱ꞌíi̱n tsi̱ꞌe̱ nga ka̱tso̱yaa̱ mí nii̱ bo̱a̱ én xí tjiꞌmá xi asíyájne̱, ngatꞌa̱ tsájmi̱ kꞌuítíjne̱ ji, ko̱jo ndiꞌaa̱ na̱ꞌmíi̱. Axa̱ kuí xá kiꞌmíyéjne̱ nga kjindibájne̱ kui sꞌueé, tsi̱ꞌe̱ nga kꞌi̱e̱ chja̱ꞌáxínjne̱ ńjñojne̱.
16Kó kui chjo̱ón kijíkoón Sansoo̱n, kó achichí askjandá, sꞌe̱ bi̱ katsoó:
—Jè be an nga mejénjiín án, ta̱sara̱ chꞌoo̱ an, ngatꞌa̱ ngo ni xi tjiꞌmá akasíyée̱ i̱xti xo̱ngo̱ò nangina, kó an kji̱e̱ ꞌmíyejínní mí nii̱ bo̱a̱.
Kó Sansoo̱n, bi̱ katsó:
—Nde na̱ꞌmina ko̱jo nde na̱ana kji̱e̱ xiyájáa̱n mí nii̱ bo̱a̱, kó a ta̱sá jí xiyaá mí nii̱ bo̱a̱ ꞌne̱.
17Kó nga yito kui ni̱xtjin nga kixindyia kui sꞌueé nga askjandá, kó ngaskande xi ma yitoo̱ ni̱xtjin katsóyaà mí nii̱ bo̱a̱, ngatꞌa̱ ꞌniú katsꞌeén nga ka̱tso̱yaa̱. Kósꞌe̱ kui naa̱ katsóyaà já xo̱ngò xí chji̱a̱ni kui nangii̱ mí nii̱ bo̱a̱. 18Kó xi ma yitoo̱ ni̱xtjin, ngindiee̱ nga kꞌo̱sꞌien tsꞌueé, já xí chji̱a̱ni kui na̱xi̱ńdáꞌniuú, bi̱ katsoó Sansoo̱n:
Mí nii̱ bo̱a̱ xi ixi ngase ta̱bo̱a̱jiín ntsjieén. Kó ꞌyání bo̱a̱ xi ꞌniú ngase xikoó xandi̱je̱e̱.
Kó Sansoo̱n, bi̱ katsoó kui jaá:
Cho̱yojo chjo̱onna boá xi kiniꞌánkjiénjnú, kuíni nga kamáyàjnú mí nii̱ bo̱a̱.
19Kósꞌe̱ A̱si̱énni̱xtjii̱n Néná kjindibánié Sansoo̱n, kó kijíjaya na̱xi̱ńdáꞌniú Askaloo̱n, kósꞌe̱ katsꞌénꞌoón kantié jáxíꞌín xi chji̱a̱ni kui ngi̱ndiee̱, sꞌe̱ jaꞌáxiín ni xi tsꞌénkjién nga fí kjo̱a̱xcha̱án, kó katsjaá kui jaá xí katsóyà mí nii̱ bo̱a̱ xi tjiꞌmaá kui én xí tsíchji̱a̱. Jaskan achichí katsꞌénxchán, kósꞌe̱ kijínijíngí ndiꞌaa̱ na̱ꞌmii̱, 20kó chjo̱ón Sansoo̱n ngo nda̱ xi nda yaꞌa katseꞌeé.
Currently Selected:
Nendiꞌamasien 14: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
