Nendiꞌamasien 13

Nga katsen Sansoo̱n

1Ta̱nga xota̱ Israee̱l, ti̱ katsꞌén nginí ni xi ndajín ngindyi̱ko̱n Néná, kó Néná yichán nó katsꞌénkꞌasꞌien ngi̱ya tsja xota̱ Filisteaa̱.

2Kósꞌe̱ kisꞌijña ngo nda̱ xi kiꞌmí Manoa̱ xi chji̱a̱ni na̱xi̱ńdáꞌniú Soraa̱, ngi̱ndie xi tikónjin nangii̱ xota̱ tji̱e̱e̱ Ndaa̱n, chjo̱ón kui nda̱a̱, ndi̱ kamá, kó jmí xota̱ tji̱e̱ kisꞌiejiín. 3Ngo ndi̱yà kuí xota̱chjo̱on, ndítsjie xi Néná jatjokjaà, kó bi̱ katsoó:

—Jè be an nga ndi̱ ji, kó nga jmí xota̱ tji̱e̱jiín, ta̱nga ngata̱ bo̱a̱jín mánii̱, ngatꞌa̱ sꞌe̱ xꞌi̱e̱ ji ko̱jo kꞌuieé ngo ndí. 4Ngotꞌe̱ ꞌne̱, ngata̱ ꞌyíjín ji bino̱ ko̱jo xán xí ꞌniú, ti̱nde ngata̱ chinijín ji ni xi tsjiejín ngindyi̱ko̱n Néná, 5ngatꞌa̱ ndí xí xꞌi̱e̱ ji, ngije stse̱n, ka̱májín ku̱i̱ché ji tsja̱to̱ko̱, ngatꞌa̱ kui ndií nasareoo̱ Néná ka̱ma ndeskande nga tjiyáꞌmá, kó kuí boá xi kꞌo̱xiéꞌá xota̱ Israee̱l ngi̱ya tsja xota̱ Filisteaa̱.

6Kó kui xota̱chjo̱on, kijítsóyaà xi̱ꞌii̱n kui nii̱, nga bi̱ katsoó:

—Ngo xota̱ xi chji̱a̱ni Néná jachókónna, kó ja̱kjiꞌi ndítsjiee̱ Néná má kjiꞌi, achichí kijíndikónna, asíyájáa̱n ñá chji̱a̱ni, ti̱nde kui katsóyàjínna jaꞌeén, 7ta̱ bi̱ tsí katsóna: Ngotꞌe̱ ꞌne̱, ngo ndí xꞌi̱e̱, ko̱jo stse̱én ji, ngata̱ ꞌyíjín ji bino̱ ko̱jo xán xí ꞌniú, ti̱nde ngata̱ chinijín ji ni xi tsjiejín ngindyi̱ko̱n Néná, ngatꞌa̱ kui ndií nasareoo̱ Néná ka̱ma ndeskande nga tjiyáꞌmá, ngaskande nga ko̱ya.

8Kósꞌe̱ Manoaa̱ ꞌniú tsíꞌaá Néná nga bi̱ katsoó: Ji Ne tsa̱ꞌa̱n, ꞌniú míꞌaá nga kji̱ndi̱bá nginí kui nda̱ xi kanangiye ji, tsi̱ꞌe̱ nga ka̱tso̱yàjne̱ mí ni xi si̱ꞌanjo̱jne̱ ngije stse̱n kuí ndií.

9Kó Néná tsintꞌieé nga tsíchji̱a̱ Manoaa̱, kósꞌe̱ kui ndítsjie xi Néná ti̱ jachókón nginií kui xota̱chjo̱on, kjiꞌanga xió tikón ki̱a̱ kꞌijñaá xi̱ꞌii̱n, ta̱nga nde ki̱a̱jín tikón Manoaa̱, 10kó kui xota̱chjo̱on tsanga má nga kijítsóyaà xi̱ꞌii̱n, nga bi̱ katsoó:

—Manoa̱, jéꞌe̱n, je jatjokjà nginína kui xota̱ xi jatjokjàna tsie ꞌne̱.

11Kó Manoaa̱ jastjíe̱n, sꞌe̱ kijítji̱ngii̱ chjo̱ón, kó nga jachó ngindyi̱ko̱n kui nda̱a̱, bi̱ katsoó:

—A jí boá kui nda̱ xi tsíchji̱a̱jo kui xota̱chjo̱on tsie ꞌne̱.

Kó bi̱ katsó kui nda̱a̱:

—Jo̱o̱n, án boá.

12Kósꞌe̱ Manoaa̱, bi̱ katsoó:

—Ngije kjo̱tjosón én xí kandokjo̱e̱ ji, kótsꞌèn si̱ꞌanchji̱ni̱e̱jne̱ kui ndií, kó mí ni xi si̱ꞌanjo̱jne̱.

13Kó kui ndítsjie xi Néná, bi̱ katsoó Manoaa̱:

—Chjóo̱n chjiéngá sa̱ꞌínkjatjosón ngayeje ni xi je kixiáa̱n, xikoó:

14Nga ka̱májín skji̱ni̱e̱ ko̱jo kꞌuí ngayeje ni xi niꞌándani tostsi̱je̱è, ti̱nde ka̱májín kꞌuí bino̱ ko̱jo xán xí ꞌniú, ti̱nde ka̱májín skji̱ni̱e̱ ni xi tsjiejín ngindyi̱ko̱n Néná. Chjiéngá sa̱ꞌínkjatjosón ngayeje ni xi je atixomáa̱ nga sa̱ꞌín.

15Kósꞌe̱ Manoaa̱, bi̱ katsoó ndítsjie xi Néná:

—ꞌNiú míꞌaá nga xchiyéra chií ji ngotjón, mejénjne̱ nga si̱ꞌankꞌienjne̱ ngo ndí ndií tindso̱ tsi̱ꞌe̱ nga si̱ꞌandajne̱ chií nichinie.

16Ta̱nga ndítsjie xi Néná, bi̱ katsoó Manoaa̱:

—Ndatsi kotíjña̱ an, skjíni̱e̱jín an ni xi si̱ꞌinde ji, ta̱nga tsi kꞌuijñínde ji ngo kjo̱a̱tjó, ta̱sá Néná ti̱ꞌinkꞌasꞌíi̱n.

Kó Manoaa̱ nde bejín nga ndítsjie xi Néná boá kui nda̱a̱.

17Sꞌe̱ Manoaa̱, bi̱ katsó ngasee̱ kui ndítsjie xi Néná:

—Kó ꞌmií tsi̱ꞌe̱ nga si̱ꞌandikónjne̱ ji ngije jatjosón én xí kandokjo̱e̱ ji.

18Kó kui ndítsjie xi Néná, bi̱ katsoó Manoaa̱:

—Míkjo̱a̱a̱ nga bosíyé ji jaꞌénna, xi ye ji nga tikónꞌmá boá.

19Kósꞌe̱ Manoaa̱ iskjíbé ndí ndií tindso̱o̱, ko̱jo kjo̱a̱tjó xi ni xi maxchá jno̱o̱, kó ki̱a̱ katsꞌénkꞌasꞌiee̱n Néná ki̱a̱ nga̱soón ndi̱jo̱jee̱. Tji̱e̱nga Manoaa̱ ko̱jo chjo̱on índikón ni xi kjimaa̱, kó kui ndítsjiee̱ katsꞌén ngo kjo̱a̱ndikón, 20ngatꞌa̱ tji̱e̱nga ndiꞌií kui kjo̱a̱tjó xi tjítií kijínijíngí nkꞌajmii̱, kui ndítsjie xi Néná nijan kijínijíngíjo̱ ndiꞌí xí kjifotjoni nga̱soón kui ṉchaa̱n. Nga kamábe kui nii̱ Manoaa̱ ko̱jo chjo̱ón, asiéntikoó ngaskande nga kisitꞌaa̱ xtjien tꞌanangii̱. 21Kó kui ndítsjie xi Néná ngiti̱ akójiín yojoo̱ Manoaa̱ ko̱jo chjo̱ón. Kósꞌe̱ ngaskande kjiꞌá boá nga Manoaa̱ kamákjiín nga ndítsjie xi Néná boá.

22Kósꞌe̱ Manoaa̱, bi̱ katsoó chjo̱ón:

—¡Nga ja̱koxi̱, ko̱yà ñá, ngatꞌa̱ jè kamáyà Néná!

23Ta̱nga bi̱ katsó chjo̱ón kui nda̱a̱:

—Tsi Néná xí kamámejeén nga sa̱ꞌínkꞌiénná, a mí tsí iskjíbejín ngi̱ya ndsa̱ kui kjo̱a̱tjoó, ko̱jo kui chji̱e̱e̱, ti̱nde kamáyàjínra̱ ngayeje kui nii̱, ko̱jo nde katsóyàjínra̱ná kui nii̱ kui ni̱xtjin xi̱ꞌbi̱.

24Kó kui xota̱chjo̱on kisꞌiee̱ ngo ndí xíꞌín, kó Sansoo̱n ítꞌajaꞌén. Kó kui ndií kamáxchá, kó Néná katsꞌénchikonñé. 25Sꞌe̱ A̱si̱énni̱xtjii̱n Néná kamáyà ki̱a̱ ngi̱ndie nínga síndo ndiꞌańjñoo̱ xotaa̱ ki̱a̱ Ndaa̱n, xtji̱e̱e̱n ngamasiee̱n na̱xi̱ńdáꞌniú Soraa̱ ko̱jo na̱xi̱ńdáꞌniú Estaoo̱l.

Currently Selected:

Nendiꞌamasien 13: MAIX

Highlight

Compare

Copy