Nendiꞌamasien 12
12
Jeftee̱ ko̱jo xota̱ tji̱e̱e̱ Efraii̱n
1Kósꞌe̱ jáxíꞌín xi chji̱a̱ni xota̱ tji̱e̱e̱ Efraii̱n kamátikó, kó kijí xtji̱e̱e̱n ta̱ꞌin, sꞌe̱ bi̱ katsoó Jeftee̱:
—Míkjo̱a̱a̱ nga kꞌin so̱bo̱e̱ ji nga kꞌinkixkénje̱ ji xota̱ tji̱e̱e̱ Amoo̱n, kó jmí ni kasejínjne̱ tsi̱ꞌe̱ nga tsangínjo̱jne̱ ji. ¡Ngotꞌe̱ ꞌne̱, kꞌuitíniéjne̱ ji ndiꞌáa̱!
2Kó Jeftee̱, bi̱ katsoó:
An ko̱jo xota̱ na̱xi̱ńdána kandokjo̱a̱tijo̱jne̱ xota̱ tji̱e̱e̱ Amoo̱n, kó tsíchji̱a̱jnúꞌun, ta̱nga kaꞌnaxiéꞌájínjnúꞌun ngi̱ya tsja kui xotaa̱.
3Kó nga kamábe an nga kaꞌnaxiéꞌájínjnúꞌun, katsjáa̱ko̱n an, kó askjanjo̱ an xota̱ tji̱e̱e̱ Amoo̱n, kósꞌe̱ Néná katsꞌénkꞌasꞌien ngi̱ya ndsa̱ án. Kó ngotꞌe̱ ꞌne̱, míkjo̱a̱a̱ nga kꞌi̱e̱ kjindibánijíngíjnú tsi̱ꞌe̱ nga an ku̱i̱xkánjo̱jnúꞌun.
4Kósꞌe̱ Jeftee̱ ítikó ngayeje jáxíꞌín xi chji̱a̱ni nangi Ngalaa̱nd, kó askjanjo̱ xota̱ tji̱e̱e̱ Efraii̱n. Kó kui jáxíꞌín xi chji̱a̱ni nangi Ngalaa̱nd katsꞌeén xota̱ tji̱e̱e̱ Efraii̱n, ngatꞌa̱ kui jaá, bi̱ katsoó xota̱ Ngalaa̱nd:
—¡Jún xota̱ Ngalaa̱nd, kꞌi̱e̱ jatjojnú ngi̱jii̱n xota̱ tji̱e̱jne̱ nga ikiyojnú, kꞌi̱e̱ kixindyionjinjnú ngi̱jii̱n xota̱ tji̱e̱e̱ Efraii̱n ko̱jo xota̱ tji̱e̱e̱ Manasee̱!
5Kó xota̱ Ngalaa̱nd jaꞌáxiín xota̱ tji̱e̱e̱ Efraii̱n nangi nínga bitjatióni ndejèꞌ Jorndaa̱n, kó kui xotaa̱ askondá kui ngi̱ndiee̱, kó kjiꞌanga tjín xota̱, xi jatjoni ki̱a̱ ngi̱jii̱n xota̱ tji̱e̱e̱ Efraii̱n xi jaꞌa ki̱a̱a̱, kó nga bi̱ katsoó: Mejénna kjo̱a̱ꞌa an katsaki. Jáxíꞌín xi chji̱a̱ni Ngalaa̱nd, bi̱ tsꞌén asíyaá: A xota̱ tji̱e̱e̱ Efraii̱n boá ji. Tsi jmí katsó, 6bi̱ tsꞌén akasíyaá: Xibolee̱t, tꞌín ji, kó tsi Sibolee̱t katsó, ngatꞌa̱ ndajín kamaá kandokjo̱a̱ kui eén, kandobá, kó ki̱a̱ kiniꞌánkꞌién ki̱a̱ nínga bitjatiónii̱ ndejèꞌ Jorndaa̱n. Kó kui ni̱xtjin jàn mara̱ yichán jó mi̱ xota̱ tji̱e̱e̱ Efraii̱n xi kiniꞌánkjiesón.
7Kó Jeftee̱ jun nó kamaá nga atíxomaa̱ xota̱ Israee̱l, kó ngije kꞌien kui nda̱ Ngalaa̱nd, ki̱a̱ akjanijín ngo na̱xi̱ńdáꞌniú xí chji̱a̱ni kui nangii̱.
Ibsaa̱n
8Ngije kꞌien Jeftee̱, Ibsaa̱n, nda̱ xi chji̱a̱ni na̱xi̱ńdáꞌniú Belee̱n, atíxomaa̱ xota̱ Israee̱l, 9kui nda̱a̱ kantié ndí xi xi̱ꞌin ko̱jo kantié ndí xí ínchjín kisꞌiee̱, kó xín katsangiya, sꞌe̱ xín katsangiyakjaꞌá kantié ínchjín xí kisꞌińdojo̱ ndí xíꞌiín. Kó yito nó kamaá nga atíxomaa̱ xota̱ Israee̱l. 10Kó ngije kꞌien Ibsaa̱n, ki̱a̱ na̱xi̱ńdáꞌniú Belee̱n akjanijín.
Eloo̱n
11Jaskan ngije kꞌien Ibsaa̱n, Eloo̱n, nda̱ xi chji̱a̱ni xota̱ tji̱e̱e̱ Sabuloo̱n, tie nó kamaá nga atíxomaa̱ xota̱ Israee̱l, 12kó ngije kꞌien Eloo̱n, ki̱a̱ na̱xi̱ńdáꞌniú Ayaloo̱n akjanijín, nangi xi chji̱a̱ni xota̱ tji̱e̱e̱ Sabuloo̱n.
Abndoo̱n
13Jaskan ngije kꞌien Eloo̱n, Abndoo̱n, ndií Ilee̱l, nda̱ xi chji̱a̱ni Piratoo̱n, kisꞌijña ngajoo̱, 14kui nda̱a̱ yichán ndí kisꞌiee̱, ko̱jo kantié ndínde, xi kisꞌińdosoón ichítié ko̱jo kan bórró, kó jin nó kamaá nga atíxomaa̱ xota̱ Israee̱l. 15Ngije kꞌien Abndoo̱n, ndií Ilee̱l, ki̱a̱ na̱xi̱ńdáꞌniú Piratoo̱n akjanijín, ngi̱ndie xi tikónjin nangi xi chji̱a̱ni xota̱ tji̱e̱e̱ Efraii̱n, ki̱a̱ na̱xi̱ xi chji̱a̱ni xota̱ Amalee̱k.
Currently Selected:
Nendiꞌamasien 12: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
