Nendiꞌamasien 11
11
Jeftee̱
1Kisꞌijña ngo nda̱ xi kiꞌmí Jeftee̱, ngo nda̱jun xi achichí chꞌokon ko̱jo ꞌniú kamá, na̱ꞌmii̱ kui nda̱a̱ Ngalaa̱nd boá, kó na̱aa̱n ngo na̱masien kamá. 2Chjo̱on ndaa̱ Ngalaa̱nd kisꞌiee̱ kje̱ꞌe ngase ndí, kó ngije kamáxchá kuí ndií, tsangatji̱ngii̱ Jeftee̱ ki̱a̱ ndiꞌaa̱, kó bi̱ katsoó: Jmí ni sa̱kójiín kjo̱a̱a̱ ndiꞌaa̱ na̱ꞌminá, ngatꞌa̱ ndií kje̱ꞌe na̱án boá ji.
3Kósꞌe̱ Jeftee̱ tsangaa̱ ntsꞌi̱e̱, kó ki̱a̱ kijíkꞌíjñá ki̱a̱ nangi Too̱b, kó ki̱a̱ nijan kamátikójo̱ já xí tjimásón nga ndajín katsꞌén.
4Jaskan ngije jaꞌa chiboa ni̱xtjin, xota̱ tji̱e̱e̱ Amoo̱n askjanjo̱ xota̱ Israee̱l, 5kó kjiꞌanga bo̱a̱ kamá, xota̱ xi xchaá nangi Ngalaa̱nd kijíngase Jeftee̱ ki̱a̱ nangi Too̱b, 6kó bi̱ katsoó:
—¡Ndibé jí, ngatꞌa̱ jí xí ka̱ma ji ngito̱ko̱jne̱, kó nijan ku̱i̱xkánjo̱ xota̱ tji̱e̱e̱ Amoo̱n!
7Ta̱nga Jeftee̱, bi̱ katsoó xota̱ xi xchaá nangi Ngalaa̱nd:
—A júnjín xí kiniꞌánchꞌójnúꞌun, kó ikiyotji̱ngíjnúꞌun ndiꞌaa̱ na̱ꞌmina. Kó míkjo̱a̱a̱ nga an ndyi̱foéꞌechonjnúꞌun ngotꞌe̱ ꞌne̱ nga kjo̱a̱xti tjínjnú.
8Kósꞌe̱ xota̱ xi xchaá nangi Ngalaa̱nd, bi̱ katsoó Jeftee̱:
—Ja̱ kuí má ni nga ji jéꞌe̱chonjne̱, tsi̱ꞌe̱ nga kꞌuínje̱jne̱, ngatꞌa̱ kjo̱a̱xti tjínjne̱, kó ku̱i̱xkénje̱ ji xota̱ tji̱e̱e̱ Amoo̱n, ko̱jo nga ji xi ka̱ma ji, kui xota̱ xi sku̱i̱e̱ndikón ngayeje xota̱ xi chji̱a̱ni nangi Ngalaa̱nd.
9Kó Jeftee̱, bi̱ katsoó xota̱ xi xchaá nangi Ngalaa̱nd:
—Tsi jún xi mejénjnuú nga kongínjo̱ nginíjnúꞌun tsi̱ꞌe̱ nga skjanjo̱ an xota̱ tji̱e̱e̱ Amoo̱n, kó tsi Néná sa̱ꞌínkꞌasꞌien ngi̱ya ndsa̱ án kui xotaa̱, án boá xi ka̱ma an xota̱ xi xcha̱ndikón ki̱a̱ ngi̱jinjnú.
10Kó kui xota̱ xi xchaá nangi Ngalaa̱nd, bi̱ katsoó Jeftee̱:
—Néná boá xi chistiko̱ ngatamaná, nga ni xi sé jí, kuí ni xi si̱ꞌanjne̱.
11Kósꞌe̱ Jeftee̱, kijíjo̱ xota̱ xi xchaá ki̱a̱ nangi Ngalaa̱nd, kó xota̱ na̱xi̱ńdaá jaꞌájin Jeftee̱ nga kui xi xcha̱ndikón nga ka̱ma ngito̱ko̱o̱. Kó ki̱a̱ na̱xi̱ńdáꞌniú Mispaa̱, Jeftee̱ tsíchji̱a̱ nginí ngayeje ni xi sa̱ꞌínkjatjosón ngindyi̱ko̱n Néná.
12Jaskan Jeftee̱ katsangiyaa̱ já chji̱ni̱e̱ꞌén nda̱ ree̱ xota̱ tji̱e̱e̱ Amoo̱n, nga bi̱ ka̱tso̱o̱:
Mí ni xi tjínná ji ko̱jo an, tsi̱ꞌe̱ nga kjindibé ji, kó an kjindibékixkénje̱ní kꞌi̱e̱ nangina.
13Kó nda̱ ree̱ xota̱ tji̱e̱e̱ Amoo̱n, bi̱ katsoó já chji̱ni̱e̱ꞌén xí katsangiya Jeftee̱:
Ngatꞌa̱ xota̱ Israee̱l iskjíbé tꞌanangijne̱, kjiꞌanga kjindibáni nangi Ejipto̱, kui tꞌanangi xi yaꞌanii̱ ndeskande xo̱ngàndántꞌié Arnoo̱n, ngaskande xo̱ngàndántꞌié Jaboo̱k, ko̱jo ndejèꞌ Jorndaa̱n, kó mejénna nga xió tsꞌén si̱ꞌinkꞌasꞌínní kuí tꞌanangii̱.
14Kó Jeftee̱ ti̱ katsangiya nginií já chji̱ni̱e̱ꞌén nda̱ ree̱ xota̱ tji̱e̱e̱ Amoo̱n, 15kó bi̱ katsó én xí katsangiyaa̱:
Bi̱ tsó Jeftee̱: Jmíni̱xtjin nga xota̱ Israee̱l iskjíbé kui tꞌanangi xi chji̱a̱ni nangi Moaa̱b, ko̱jo tꞌanangii̱ xota̱ tji̱e̱e̱ Amoo̱n, 16ngatꞌa̱ kjiꞌanga jatjoni nangi Ejipto̱, xota̱ Israee̱l ki̱a̱ kisꞌiṉtso̱ma nangi kixií ngaskande Ndáchíkón Inií, kó jachó ngaskande na̱xi̱ńdáꞌniú Kandee̱. 17Kósꞌe̱ xota̱ Israee̱l katsangiyaa̱ já chji̱ni̱e̱ꞌén nda̱ re xi chji̱a̱ni nangi Endoo̱n, nga bi̱ katsoó: ꞌNiú míꞌaá nga ko̱e̱ꞌéndièjne̱ nga ka̱ma ku̱i̱tjájne̱ nangìi̱, ta̱nga nda̱ ree̱ nangi Endoo̱n kamámejénjiín. Ti̱ katsangiyaa̱ én nda̱ ree̱ nangi Moaa̱b, kó ti̱ kamámejénjiín ndatsa kui nga, kuíni nga xota̱ Israee̱l, ki̱a̱ kisꞌińdo tsá ki̱a̱ na̱xi̱ńdáꞌniú Kandee̱. 18Jaskan ki̱a̱ kisꞌiṉtso̱ma ki̱a̱ nangi kixií, kó jaꞌatjiyajoo̱n nangi Endoo̱n, ko̱jo nangi Moaa̱b, kó jachó ki̱a̱ xtji̱e̱e̱n nínga fotjo tsꞌueé nangi Moaa̱b, kósꞌe̱ ki̱a̱ índo ndiꞌaa̱ ki̱a̱ xi ingoboaá xo̱ngàndántꞌié Arnoo̱n, ta̱nga ki̱a̱jín tsꞌasꞌien xtji̱e̱e̱n tꞌanangi Moaa̱b, ngatꞌa̱ xo̱ngàndántꞌié Arnoo̱n boá xi tsindioó nangi Moaa̱b kamá. 19Kósꞌe̱ xota̱ Israee̱l katsangiyaa̱ já chji̱ni̱e̱ꞌén nda̱ re Sijoo̱n, xi botixómaá xota̱ Amoo̱r ko̱jo nangi Esboo̱n, nga bi̱ katsoó: ꞌNiú chjiáꞌájne̱ ji nga ko̱e̱ꞌéndièjne̱ nga ka̱ma ku̱i̱tjájne̱ tꞌanangìi̱ ngaskande nga kjóchójne̱ ngi̱ndiejne̱, 20ta̱nga Sijoo̱n kamáꞌniátakónjín xota̱ Israee̱l tsi̱ꞌe̱ nga ki̱a̱ ka̱ma kjo̱a̱ꞌa ki̱a̱ tꞌanangii̱, kó ta̱sá ítikó Sijoo̱n ngayeje xota̱ na̱xi̱ńdaá, kó ki̱a̱ índo ndiꞌańjñoo̱ ki̱a̱ Jaasaa̱, kó askjanjo̱ xota̱ Israee̱l. 21Ta̱nga Néná xí tsi̱ꞌe̱ xota̱ Israee̱l katsꞌénkꞌasꞌien Sijoo̱n ko̱jo ngayeje xota̱ na̱xi̱ńdaá ngi̱ya tsja xota̱ Israee̱l, kó xota̱ Israee̱l katsꞌeén, kósꞌe̱ iskjíbé tꞌanangii̱ xota̱ Amoo̱r xi kisꞌińdo kui na̱xi̱ńdaá. 22Kó bo̱a̱ tsꞌén nga kachjábéjne̱ ngayeje tꞌanangii̱ xota̱ Amoo̱r, ndeskande xo̱ngàndántꞌié Arnoo̱n, ngaskande xo̱ngàndántꞌié Jaboo̱k, ko̱jo ndeskande nangi kixií, ngaskande ndejèꞌ Jorndaa̱n. 23Kó ngotꞌe̱ ꞌne̱ nga Néná xí tsi̱ꞌe̱ xota̱ Israee̱l je tsꞌaxié xota̱ Amoo̱r xikótsꞌèn ndyi̱fí xota̱ Israee̱l, a mejeénri nga ji chje̱ꞌéxíi̱n tꞌanangii̱. 24Kó kui tꞌanangi xi je katsjaá ne Kemoo̱, a tse̱jín boá. Ti̱ bo̱a̱ ti̱ tsꞌén ji̱n ngayeje tꞌanangi xi Nejne̱ je jaꞌáxiín xotaa̱ ngindiee̱ nga kjóchójne̱ jè tsa̱ji̱n. 25Kó ngotꞌe̱ ꞌne̱, a chjí ngasee̱ ji ta̱bo̱a̱jiín Balaa̱k ndií Sipoo̱r, nda̱ ree̱ nangi Moaa̱b. A kisꞌiérií ngo kjo̱a̱xti kui ko̱jo xota̱ Israee̱l, axa̱ katsꞌénjo̱ kjo̱a̱xchán. 26Jè ján úchán nónií xota̱ Israee̱l nga síndo ki̱a̱ na̱xi̱ńdáꞌniú Esboo̱n ko̱jo ndí nangií, ko̱jo ki̱a̱ na̱xi̱ńdáꞌniú Aroee̱r ko̱jo ndí nangií, ko̱jo ngayeje na̱xi̱ńdáꞌniú xi síndo nga̱ndee̱ xo̱ngàndántꞌié Arnoo̱n, kó ánní nga jmí ni kasejíi̱n ngayeje kui ni̱xtjin xi̱ꞌba̱ ki. 27Kuíni nga jmí ni xi ndajín tjítsꞌenjo̱jaán jí, ta̱nga ji ndajínkjiꞌi ni xi tiniꞌínje̱ní nga an tibixkénje̱ní. Néná, kui xi be tsi nda ko̱jo tsi ndajín niꞌán, kuí boá xi ngatsꞌénjeé tsi xota̱ Israee̱l ko̱jo tsi xota̱ tji̱e̱e̱ Amoo̱n.
28Ta̱nga nda̱ ree̱ xota̱ tji̱e̱e̱ Amoo̱n nde katsꞌénsénjiín én xí katsangiyaa̱ Jeftee̱.
Ni xi katsóyàtjón nga sa̱ꞌín Jeftee̱
29Kó A̱si̱énni̱xtjii̱n Néná kjindibánié Jeftee̱, kósꞌe̱ jaꞌa nangi Ngalaa̱nd ko̱jo nangi Manasee̱, sꞌe̱ jaꞌa ki̱a̱ na̱xi̱ńdáꞌniú Mispa̱ xi tikón ki̱a̱ nangi Ngalaa̱nd, sꞌe̱ ki̱a̱ jatjoni kui ngi̱ndiee̱ nga kijí nínga síndo xota̱ tji̱e̱e̱ Amoo̱n, 30kó Jeftee̱ ngo ni índajo̱ Néná nga bi̱ katsoó: Tsi ja̱koxi̱ nga ngi̱ya ndsa̱ án si̱ꞌinkꞌasꞌin ji xota̱ Amoo̱n, 31ta̱ꞌyaní xi tjón ko̱e̱je̱kjaꞌáyíndi̱yàna nga kjo̱tjoxieni ndiꞌana, ngije kjindibáni an nga katsꞌée̱n xota̱ tji̱e̱e̱ Amoo̱n, tse̱ ka̱ma, án boá xi sa̱ꞌinkꞌasꞌien an nga sa̱ꞌin an ngo kjo̱a̱tjó xi ꞌbítí.
32Kó bo̱a̱ tsꞌén Jeftee̱ kijíkjánjo̱ xota̱ tji̱e̱e̱ Amoo̱n, kó Néná katsꞌénkꞌasꞌien ngi̱ya tsja ngayeje kui xotaa̱.
33Kó Jeftee̱ katsꞌeén kondraa̱ ndeskande na̱xi̱ńdáꞌniú Aroee̱r, ngaskande na̱xi̱ńdáꞌniú Minii̱t, kan ma na̱xi̱ńdáꞌniuú, ngaskande nangi són nínga tjitjíe̱ tostsi̱je̱è. Kó bo̱a̱ tsꞌén ni̱ma̱kjo̱a̱ ikꞌíndo xota̱ tji̱e̱e̱ Amoo̱n, ngindyi̱ko̱n xota̱ Israee̱l.
34Kó Jeftee̱ jachó nginí ndiꞌaa̱ ki̱a̱ na̱xi̱ńdáꞌniú Mispa̱, kó tsa̱kji̱ín kijíkjaꞌáyíndi̱yà nga tsꞌéntié ko̱jo nga tjítsꞌénkjánié ngo pandero̱. Kó ta̱ ngo tsí kamá ndí tsa̱kji̱ín, ngatꞌa̱ ngiti̱ kisꞌiejín ngasee̱ ndí xí xíꞌín, ko̱jo tsi ndí xí ínchjín. 35Kó nga kamábe, iskjíndiyájón ńjño xi yajá, kó bi̱ katsó:
—¡Xi̱xꞌi̱a̱n xò án ndí chjo̱on! ¡Achichí ndasen mana! ¡Jí boá xi kjo̱a̱ndasenna ji ngotꞌe̱, ngatꞌa̱ án boá xi katsjáa̱ ndso̱ꞌba án Néná, kó ngotꞌe̱ ꞌne̱ ngiti̱ ka̱májín kjoaꞌaxín an ni xi je kixian an!
36Kó ndí chjo̱on bi̱ katsó:
—Ji na̱ꞌmi, tsi katseꞌée̱ ndso̱ꞌbe ji Néná, ja̱bo̱a̱ ngatamana xikó je kase ji, ngatꞌa̱ Néná boá xi je katsjaá nga kiniꞌíi̱n kondra̱a̱, kui xi xota̱ tji̱e̱e̱ Amoo̱n. 37Kó kui tsa̱kji̱ín bi̱ katsó ngasee̱ na̱ꞌmii̱: Kui nii̱ nga niꞌánjo̱na: Te̱ꞌéndièní nga kjuín án, an ko̱jo ínchjín xi nda yaꞌana, jó sá ki̱a̱ ngi̱jin na̱xi̱i̱, kó ki̱a̱ kjótsoꞌbá an nga skjandá an kjo̱a̱a̱ nga xo̱ngò án nga ko̱ya án.
38Kó na̱ꞌmii̱ katsjandieè nga kijí jó sá kuí, ko̱jo ínchjín xi nda yaꞌa, kó askjandá kjo̱a̱a̱ nga xo̱ngò nga ko̱ya ki̱a̱ ngi̱jin na̱xi̱i̱.
39Kó ngije jaꞌa xi jó saá, kijíkón nginií na̱ꞌmii̱, kósꞌe̱ na̱ꞌmii̱ katsꞌénkjatjosón ni xi índajo̱ Néná, kó kui tsa̱kji̱ín jmíni̱xtjin kisꞌiee̱ xi̱ꞌin. Kó ki̱a̱ na̱xi̱ńdá Israee̱l 40kisꞌijña ngo kjo̱a̱xchá nga ínchjín xo̱ngò xí chji̱a̱ni Israee̱l, xki̱ nó xki̱ nó, nijón ni̱xtjin kijíkjandátjé ndí tsa̱kji̱ín Jeftee̱.
Currently Selected:
Nendiꞌamasien 11: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
