Xo̱jo̱o̱n Sandiyaá 3

Bi̱ tsꞌén íni̱jmì Sandiyaá ni xi tsꞌén najee̱n

1Jún ntsꞌie, ngata̱ kjínjín mostro̱ ngasꞌie ngi̱jinjnú, ngatꞌa̱ jè yàjnú nga ji̱n xi mostro̱jne̱, ꞌniú ngase nda ka̱majéjne̱ ta̱bo̱a̱jiín xota̱ xi ngasee̱. 2Ngayeje ñá niꞌán ni xi bo̱a̱jín kjiꞌi, ta̱nga tsi ngo nda̱ xi chiíjín ku̱i̱chji̱a̱ ngo én xí ndajínkjiꞌi, kuí boá xi̱ꞌba̱ xi je kamá xi chjiéngá ka̱ma, kó ka̱maa̱ nga nda ku̱i̱ꞌíꞌniuú nga kjo̱jo ngayeje yojoo̱. 3Kjiꞌanga ꞌbíjñáa ngo ki̱cha̱ tsꞌoa ndi̱je̱e̱, tsi̱ꞌe̱ nga ku̱i̱ntꞌiéꞌénná boá, ko̱jo nga ka̱máná nda si̱ꞌankjí ndatsi je kui cho̱o̱. 4Ti̱ tsitsíjenjnúu̱ tjotso yiꞌii̱ nga, ndatsi ꞌniú yiꞌi, kó ndatsi tjo̱ xi ꞌniuú tsangińña, ta̱nga nda̱ xi tsꞌénxájoo̱, máa tsꞌénkjí nga tsꞌénkjién ngo chií ndí ni chichí xi tsꞌénxájo̱ni. 5Ti̱ bo̱a̱ ti̱ tsꞌén najee̱n, kuí boá xi ngo ndí ni xi chichií yojoná, ta̱nga ka̱márií sa̱ꞌín ni xi yiꞌi. Tsitsíjen chi̱bo̱a̱yajnúu̱ nga ngo ndí ndiꞌí xí chichí, ka̱márií ku̱i̱ꞌítí ngo kꞌijñá xí ta̱nisién tsie.

6Kó najee̱n xikónií ngo ndiꞌí, ta̱nisién ndajín, ngatꞌa̱ kuí boá xi tsꞌénkjátsón ngayeje yojoo̱. Ndo̱bo̱a̱ṉkꞌi̱e̱e̱n ꞌbítí kui najee̱n, kó kui najee̱n ꞌbítí ngayeje kjo̱a̱mindyionná. 7Xotaa̱ ka̱márií sa̱ꞌínńtꞌíé ngayeje to̱ko̱ya cho̱ tamá, ko̱jo ni̱sie, ko̱jo ye̱, ko̱jo cho̱o̱ ndáchíkoón, kó jè kamaá katsꞌénntꞌíé, 8ta̱nga kji̱e̱ ngo xota̱ xi je kamaá katsꞌénntꞌíé na̱je̱n, ngatꞌa̱ najee̱n xikónií ngo ni xi ndajín, xi jmíjín xi ka̱maa̱ sa̱ꞌínńtꞌíé ko̱jo xi tjikítsie maá xaán ye̱ xi tsꞌenkꞌiénná. 9Ti̱kuii najen xi niꞌánkjién, nga ndokjo̱a̱ nga niꞌántsjáa̱ Néná xí Na̱ꞌminá, ti̱kuíní xi niꞌánkjién, nga chꞌo ꞌmíi̱ xota̱ xi Néná katsꞌénda xikó kjiꞌi a̱sie̱én kuí. 10Ta̱ ngo tsi ndso̱ꞌbaa̱ xi fotjoo̱ én xi niꞌántsjànii̱ Néná, kó ti̱kuíní xi fotjoo̱ én xí chꞌo tsoó xotaa̱. Jún ntsꞌie, chjiénjín nga bo̱a̱ si̱ꞌan ñá. 11A ka̱márií ngo ndáńchꞌi̱ nga ti̱kuii xtjoó ndáfoa xi nda ko̱jo ndáfoa xi sa. 12Já ntsꞌie, a ka̱márií yáꞌingo̱ ko̱a̱ja̱a̱ toꞌaseituna̱, kó a ka̱márií ńꞌniuú tostsi̱je̱è ko̱a̱ja̱a̱ toꞌingo̱. Ti̱ bo̱a̱ ti̱ tsꞌén nga nde ngojín ndáńchꞌi̱ xi ti̱kuii kjo̱joo̱ ndáfoa nda ko̱jo ndáfoa xi ndia.

Bi̱ tsꞌén íni̱jmì Sandiyaá kjo̱a̱a̱ kjo̱a̱kjínkón xi tsjá Néná

13ꞌYání xi kjínkón ko̱jo xi ꞌniú makjiín ngi̱jinjnú. Nga ta̱kó kui nii̱ nga nda ni xi sa̱ꞌín, kó ni̱ma̱kjo̱a̱ ngatama nga sa̱ꞌín ni xi tsjaá kui kjo̱a̱kjínkón xi ndaa̱. 14Ta̱nga tsi kjo̱a̱ꞌontakón tikónjii̱n ini̱ma̱jnú, kó tsi ndyi̱bixkánjnú nga mejénjnú ko̱kójnú ꞌyání xi chꞌokon ngase, ngata̱ jejín ꞌna̱xiéjnú yojojnú, ti̱nde ngata̱ miyoniéjínjnú ni xi ja̱koxi̱i̱. 15Ngatꞌa̱ kui xota̱ xi bo̱a̱ ndyi̱tsꞌe̱én jmí tsi Néná xí tsꞌéntsjaá kui kjo̱a̱kjínkoón, kjo̱a̱kjínkoón nga̱sondiee̱ boá, ko̱jo xi tsi̱ꞌe̱ xotaa̱, ko̱jo xi tsi̱ꞌe̱ xindajín. 16Ngatꞌa̱ nínga tjín kjo̱a̱ꞌontakón ko̱jo kjo̱a̱bixkaán, ki̱a̱ boá nínga jmí tsi xió kjiꞌi, ko̱jo nínga tjín ngayeje to̱ko̱ya ni xi ndajiín. 17Ta̱nga kui xota̱ xi Néná tsjaá kjo̱a̱kjínkoón, kuí boá xi tsjietsꞌén síndo ngindyi̱ko̱n Néná, kó tjiín kjo̱a̱xió, kó ndaxota̱ ma, kó ntꞌiéꞌén, kó tsie kjo̱a̱ni̱ma̱takón tjiín, kó nda ni xi tsꞌén, kó ta̱ són tsꞌénjo̱ ngayeje xotaa̱, kó jmíjiín kjo̱a̱jókje̱n. 18Xota̱ xi mongase kjo̱a̱xioó xota̱ xi ngasee̱, Néná tsja̱á nga xió ko̱jo nga kixi̱ kꞌuíndo.

Currently Selected:

Xo̱jo̱o̱n Sandiyaá 3: MAIX

Highlight

Compare

Copy