Xo̱jo̱o̱n Sandiyaá 4

Bi̱ tsꞌén íni̱jmì Sandiyaá kjo̱a̱a̱ ni xi ndajín xi niꞌán

1Ñá ndibánií kjo̱a̱xcha̱án ko̱jo kjo̱a̱bixkán xi sꞌie ngi̱jinjnú. A ki̱a̱jín ndibánií ni xi ndajín xi mejeén ini̱ma̱jnú, kuí nii̱ xi kjánjo̱jnú. 2Jún mejénjnú ngo ni, kó sakójínjnú, niꞌánkꞌiénjnú xingi̱jnú, kó ma ontakonjnú, kó nga sakójínjnú, bixkánjnú, kó niꞌánjnú kjo̱a̱xchán. Ta̱nga sa̱kójínjnú ni xi mejénjnú ngatꞌa̱ jmí tsi Néná xi ndyi̱chjiáꞌájnúu̱. 3Kó nga chjiáꞌájnú, sakójínjnú, ngatꞌa̱ ndajín kichjiáꞌájnú, ngatꞌa̱ chjiáꞌájnú ngo ni, ta̱ tsi̱ꞌe̱ nga si̱ꞌankjatjosón tsí jún ni xi chjíjiín xi tsja májnú. 4¡Jún xota̱ xi jmí tsi kixi̱ timatji̱ngijnú Néná! A yàjínjnú jún nga xota̱ xi ndyi̱tsꞌèntjó nii̱ kui nga̱sondiee̱, kondraa̱ Néná síndoni. Ta̱ꞌya xota̱ní xi mejeén nga amingoo̱ kui nga̱sondiee̱ ka̱ma, kondraa̱ Néná tjítsꞌén yojoo̱. 5Jè yàjnú nga jmí tsi ta̱kjo̱a̱ndaní nga bi̱ tsó xo̱jo̱o̱n: “Néná íjñajinná A̱si̱énni̱xtjii̱n, kó kui A̱si̱énni̱xtjii̱n tsꞌatio tsꞌéntjóná.” 6Néná tsie ngase kjo̱a̱nda xi tsjáná, kuíni nga bi̱ tsó xo̱jo̱n eén Néná: “Néná kondra̱ maá xota̱ xi je ꞌboxié yojoo̱, ta̱nga xota̱ xi ni̱ma̱kjo̱a̱a̱ tsjaá kjo̱a̱nda.” 7Kuíni nga ni̱ma̱kjo̱a̱ ti̱ꞌánjnú yojojnú ngindyi̱ko̱n Néná. Kondra̱ tangínjnúu̱ xindajín, kó kui ko̱ngaboaꞌájnú. 8Ti̱ꞌantiñajnúu̱ yojojnú Néná, kó kui sa̱ꞌíntiñajnú yojoo̱. Jún xota̱ xi ndyi̱niꞌánjéjnú, ti̱ꞌantsjiejnú ndsa̱jnú. Kó jún xi jó ni tjíjii̱n ini̱ma̱jnú, ti̱ꞌantsjiejnú ini̱ma̱jnú. 9Ngatama ndasenjnú, ko̱jo chaꞌájnú, kó on ngatamajnú. Kjo̱a̱mojnójnú kjo̱a̱chaꞌá ngatama, kó kjo̱a̱tsjajnú kjo̱a̱ndasen ngatama. 10Ni̱ma̱kjo̱a̱ ti̱ꞌánjnú yojojnú ngindyi̱ko̱n Ndi̱a̱ná, kó kuí boá xi skjinínkꞌájnú.

Bi̱ tsꞌén íni̱jmì Sandiyaá kjo̱a̱a̱ nga ko̱ndókjo̱a̱taꞌinján ntsꞌié

11Jún ntsꞌie, ngata̱ ja̱kꞌi̱e̱ ja̱ngajánjín ndokjo̱a̱taꞌínjnú xingi̱jnú. Xi chji̱a̱taꞌin ko̱jo xi ꞌbítꞌajé ntsꞌi̱e̱, ti̱ chꞌo tsꞌén tsꞌénchji̱a̱ kjo̱a̱a̱ kjo̱a̱kitii̱, ko̱jo ti̱ tsꞌénchji̱a̱taꞌin tsi nda ko̱jo tsi ndajín tsó kjo̱a̱kitii̱ nga. Kó tsi ji bo̱a̱ tꞌísé ji nga nda ko̱jo tsi ndajín kui kjo̱a̱kitii̱, tindaꞌyéꞌínjíi̱n, ta̱sá ta̱ bo̱a̱ tsí tꞌísé tsi nda ko̱jo tsi ndajín tsó kjo̱a̱kitii̱. 12Ta̱ ngo tsí má xi katsjá kjo̱a̱kitii̱, ko̱jo xi tsóyà tsi nda ko̱jo tsi ndajín ndyi̱tsꞌèn xotaa̱, kó kuí boá xi maa̱ ꞌboxiéꞌá, ko̱jo tsi sa̱ꞌínchaja xotaa̱, kó ji, ꞌyá jií bo̱a̱ nga ji kon xi tiꞌmíyé ji tsi nda ko̱jo tsi ndajín ndyi̱tsꞌèn kje̱ꞌe xota̱.

Bi̱ tsꞌén íni̱jmì Sandiyaá kjo̱a̱a̱ nga ngi̱ya tsja Néná ku̱i̱ndyión

13Ndaꞌyájnú jún kui nii̱, jún xi bi̱ ꞌmíjnú: “Ngotꞌe̱ ko̱jo tsi ndyiojón kongín kui na̱xi̱ńdá jàn, kó ki̱a̱ ngo nó kamáná nga si̱ꞌanxá, ko̱jo nga si̱ꞌán to̱n.” 14¡Kó nde yàjínjnú ni xi ka̱ma ndyiojón! Ngatꞌa̱ mí nii̱ bo̱a̱ kjo̱a̱mindyionjnú. Xikónií ṉdi̱xa̱a̱ nga ngotjón chií fotjokjà, kósꞌe̱ tji̱e̱nmá chaja nginí. 15Ta̱sá bi̱ tꞌínjnú: “Tsi Ndi̱a̱ná xí mejeén, ku̱i̱ndyión, kó kui ni xi̱ꞌbi̱ ko̱jo tsi kui ni jàn xí si̱ꞌán.” 16Ta̱nga ngotꞌe̱ ꞌne̱, je ꞌnaxiéjnú yojojnú, kó ngayeje kjo̱a̱nkꞌatakón xikoó xi̱ꞌba̱, ndajín. 17Xota̱ xi maá tsꞌén ni xi ndaa̱, kó tsi tsꞌénjín, ndyi̱tsꞌèn jé boá.

Currently Selected:

Xo̱jo̱o̱n Sandiyaá 4: MAIX

Highlight

Compare

Copy